1 Mürin, Piltat ewe re Shu a pälüeni Hiop,

2 “Inet kopwe ükütiu le eäni ei sokun kapas?

Kopwe akomwen ekiek, mürin sipwe fos.

3 Pwota aipwe wewe ngeni man?

Pwota äm aia tiparoch me reöm?

4 Hiop, ka püsin atatakisiik lon om song.

Ifa usun, fanüfan epwe pöla pokitom,

ika ewe achau epwe mwökütüwu seni lenian?

5 Ewer, än ewe aramasangau saram a kunula,

nge ngetengeten an ekkei esap ükütiu.

6 Ewe saram lon imwan imw mangaku a rochopwakala,

nge an lamp mi nom asan a kunula. ✡Hiop 21.17

7 Sääpöchökülen pechen a kisikisila,

a turula ren püsin an rawangau.

8 A püsin fetalelong lon eu cheew,

a ipwetä won eu lenien likatup mi wor pwang fan.

9 Eu foren likapich a forei apilipilin pechen,

a fif lon eu lenien likatup.

10 Efoch säl a monola lepwül fän itan,

pwal eu likapich a wor lon alan.

11 Eniweniw a aniuokusu ekis meinisin

o tapweri ia a ipwela ie.

12 Feiengau a echik o moneiti ewe aramasangau,

feiengau a molotä fän itan, lupwen epwe turutiu.

13 Samau a enala ünüchan,

samaun mäla a enala kifetin kewe.

14 A angeawu ewe aramasangau seni imwan imw mangaku ia a nom ie fän kinamwe,

o emwenala ren ewe king itan eniweniw.

15 Mine a eäni me lom esap chüen nom lon imwan,

nge pirimiston a toropasfeil won lenian.

16 Waran kewe mi nom fan ra mäla,

nge palan kewe ra pwasala.

17 Esap chüen wor eman a chechemeni i me won ewe fanü,

esap chüen föü itan me won lenian.

18 Aramas ra cheela seni saram ngeni rochopwak

o asüela seni won fanüfan.

19 Esap wor nöün ika mwirimwirin me lein aramasan,

esap pwal wor eman mi chüen manau lon ewe leni ia a nom ie me lom.

20 Ekewe aramas mi nom lotou me ötiu ra mairü o chechech fän niuokus,

lupwen ra rongorong usun an feiengau.

21 Ellet, iei usun mine a fis ngeni ekewe chon föföringau, iei feiengauen chokewe resap silei Kot.”