1 Iwe, ewe Samol mi Lapalap a kapas ngeni Moses, 2 pwe epwe ngeni Aaron me nöün kewe mwän pwal ekewe aramasen Israel meinisin ekei allük: 3 Are eman chon Israel a niela eman kow ika eman sip ika eman kuuch pwe an asor lon ewe leni ia ra nonom ie ika lükün, 4 nge esap uwato ewe man leasamalapen ewe imw mangaku ia aramas ra churi Kot ie, pwe epwe fang ngeni ewe Samol mi Lapalap mwen an imwenfel, ewe mwän epwe nom lon tipisin nimanau. Iwe, pokiten a föri ei, iei mine epwe käriwu seni aramasan. 5 Popun ei allük pwe ekewe aramasen Israel repwe uwato ar kewe mönün asor ren ewe Samol mi Lapalap, nge resap chüen nirela lon ekewe maasies. Repwe uweereto ren ewe souasor leasamalapen ewe imwenfel seni mangaku o nirela, pwe ar asoren kinamwe. 6 Iwe, ewe souasor epwe äsupu chan ewe mönün asor ngeni ewe rongen asor än ewe Samol mi Lapalap leasamalapen ewe imwenfel seni mangaku, epwe pwal keni kirisin pwe ewe Samol mi Lapalap epwe efich pwoon. 7 Iwe, repwe ükütiu le kirikiringau ngeni ewe Samol mi Lapalap ren ar niela ar kewe mönün asor ngeni ekewe anün rochopwak. Ei epwe eu allük fän iter pwe repwe apwönüetä fansoun meinisin seni eu täppin aramas tori eu täppin.

8 Kopwe pwal üreniir: Iteiten eman me eman me lein chon Israel ika me lein ekewe chon ekis mi nom rer a eäni eu asoren kek ika och sokun asor, 9 nge esap uwato leasamalapen ewe imwenfel seni mangaku pwe epwe eäni asor ngeni ewe Samol mi Lapalap, ätewe epwe käriwu seni lein aramasan.

10 “Iwe, are eman aramas me lein chon Israel ika eman chon ekis mi nom rer a ün cha, ngang üpwe ü ngeni ewe aramas o ärawu me lein aramasan. ✡Ken 9.4; Lif 7.26-27; 19.26; Tut 12.16,23; 15.23 11 Pun manauen mönümanau meinisin a nom lon cha. Üa ngenikemi ei cha pwe oupwe föri asoren amusamusen tipis fän iten manauemi won ewe rongen asor. Iwe ren cha chök a fis amusamusen tipis, pun manau a nom lon. ✡Ipr 9.22 12 Iei mine üa üreni ekewe aramasen Israel: Esap wor eman leimi ika eman chon ekis mi nom remi epwe ün cha. 13 Iwe, are eman leimi ika eman chon ekis mi nom remi epwe liapeni man ika machang mi öchün ochoch, epwe asürala chan o pwölü ewe cha ngeni pwül.

14 Pun chan iteiten mönümanau ina manauan. Iei mine üa ürenikemi ämi aramasen Israel: Ousap ünümi chan eman mönümanau, pun chan iteiten mönümanau ina manauan. Iö a ün cha epwe käriwu me lein aramasan. 15 Nge iteiten aramas, ese lifilifil ika eman chon Israel ika eman chon ekis, mi ochoch fituken eman man mi püsin mäla ika mi mäla ren manmwacho, epwe sopuni üfan o tütü, nge epwe limengau tori lekuniol. Mürin epwe limöch. 16 Nge ika esap sopuni üfan o tütü, an pwüngingau epwe chök nonom won.”