1 Iwe, iei allükün ewe asoren pupungau mi unusen pin: 2 Lon ewe leni ia ra niela ie ewe mönün asoren kek, repwe pwal niela ie ewe mönün asoren pupungau, nge chan ewe mönün asor epwe utut ngeni pwelin ünükün ewe rongen asor. 3 Ewe souasor epwe eäni asor kirisin ewe mönün asor meinisin: Kirisin mechan pwal ewe kiris mi pwölüela pisekin lon inisin, 4 ekewe ruoföü föün lon fiti kirisin wor mi kükü ngeni fitukesaran wänüükün, pwal mwärekeon ammünün. 5 Iwe, ewe souasor epwe kenirela won ewe rongen asor, pwe eu asor ngeni ewe Samol mi Lapalap. Iei eu asoren pupungau. 6 Iteiten ekewe mwän mi wiseni ewe wisen souasor ra tongeni mongö seni ewe asor. Nge repwe chök mongö lon eu leni mi pin, pun eu asor mi unusen pin. 7 Mi wor eu chök allükün asoren pupungau me asoren tipis: Ewe souasor mi föri ewe asoren amusamusen tipis epwe eäni fituken ewe mönün asor. 8 Iwe, ewe souasor mi föri än ekewe aramas asoren kek epwe eäni silin ewe mönün asoren kek. 9 Iteiten asoren mongö mi um pwal meinisin mine a kuk lon nape ika furain lon furaipan epwe fän iten ewe souasor mi föri ewe angangen asor. 10 Nge ekewe asoren mongö resap mwot, ese lifilifil ika mi nofit ngeni apüra ika resap nofit, repwe fän iten nöün Aaron kewe mwän meinisin, epwe inetöchfengen lefiler.

11 Iwe, iei allükün ekewe asoren kinamwe aramas ra eäni ngeni ewe Samol mi Lapalap: 12 Are eman a eäni ewe asoren kinamwe pwe asoren kilisou, epwe uwato an mönün asor o achu ngeni pilawa esap wor iis lon mi nofit ngeni apüra, pwal sokun pilawa usun nokop esap wor iis lon mi toto ngeni apüra, pwal pilawa mi mürina o nofitöch ngeni apüra. 13 Nge lupwen a eäni an asoren kinamwe fän iten kilisou, epwe pwal uwato pilawa mi wor iis lon. 14 Iwe, epwe angei eföü pilawa seni iteiten ewe sokun asoren mongö o eäni asor ngeni ewe Samol mi Lapalap. Iei än ewe souasor mi uti chan ewe mönün asoren kinamwe ngeni ewe rongen asor. 15 Nge ewe aramas epwe ocheela fituken an mönün asoren kinamwe fän iten kilisou lon ewe chök ränin a asor. Esap tongeni likiti och tori lesosor. 16 Iwe, are ewe aramas a eäni an asor fän iten pwon ika seni püsin letipan, epwe ochei fituken ewe mönün asor lon ewe rän a asor, nge lusun a pwal tongeni ochei sorotan. 17 Nge lusun fituken ewe mönün asor mi chüen nom tori aülüngatin rän epwe kek. 18 Iwe, are eman a ochei fituken ewe mönün asoren kinamwe lon aülüngatin rän, ewe asor esap tiw me ren Kot, esap pwal wor lomotan ngeni ätewe mi eäni, pun a limengau. Nge ätewe mi ochei ewe fituk epwe mwärei an tipis.

19 Esap wor eman epwe ochoch fituk mi torii och mettoch mi limengau, epwe chök kek. Chokewe meinisin mi limöch *wewen ei limöch och sokun limöch lon pwüngün allükün lamalam ra tongeni ochei fituken ewe mönün asoren kinamwe. 20 Nge are eman aramas mi nom lon och limengau a ochei fituken ewe mönün asoren kinamwe än ewe Samol mi Lapalap, ewe aramas epwe käriwu seni aramasan. 21 Iwe, are eman a atapa och mettoch mi limengau, ese lifilifil ika eman aramas mi limengau ika eman man mi limengau ika och sokun mettoch mi anioput, nge mürin a ochei fituken ewe mönün asoren kinamwe än ewe Samol mi Lapalap, ätewe epwe käriwu seni aramasan.

22 Iwe, ewe Samol mi Lapalap a ngeni Moses ekei allük 23 fän iten ekewe aramasen Israel: Ousap ochoch kirisin kow ika sip ika kuuch. 24 Iwe, kirisin eman man mi püsin mäla ika kirisin eman mi tatakis ren manmwacho oua tongeni aea fän iten och, nge ousap fokun tongeni ochei. 25 Iteiten eman me eman aramas mi ochei kirisin ekewe man ra eäni asor won ekkei ngeni ewe Samol mi Lapalap epwe käriwu seni aramasan. 26 Ekis meinisin ia oua nonom ie ousap fokun ün cha, ese lifilifil ika chan mansüsü ika chan man. 27 Iteiten eman me eman aramas mi ün cha epwe käriwu seni aramasan. ✡Ken 9.4; Lif 17.10-14; 19.26; Tut 12.16,23; 15.23

28 Iwe, ewe Samol mi Lapalap a pwal ngeni Moses ekei allük 29 fän iten ekewe aramasen Israel: Eman mi eäni an asoren kinamwe ngeni ewe Samol mi Lapalap epwe uwato eu kinikin pwe an asor ngeni ewe Samol mi Lapalap. 30 Epwe püsin uwato ekewe asor ngeni ewe Samol mi Lapalap. Iwe, epwe uwato kirisin ewe mönün asor pwal leupwan, pwe ewe leupw epwe assaw fän mesen ewe Samol mi Lapalap. 31 Iwe, ewe souasor epwe kenala ewe kiris won ewe rongen asor, nge leupwen ewe mönün asor epwe fän iten Aaron me nöün kewe mwän. 32 Oupwe ngeni ewe souasor pelifichin pechen ämi mönün asoren kinamwe. 33 Iö me lein nöün Aaron kewe mwän a eäni asor chan ewe mönün asoren kinamwe pwal kirisin, i epwe eäni pelifichin pechen ewe mönün asor pwe ina inetin. 34 Pun üa angei seni än ekewe aramasen Israel mönün asoren kinamwe leupwan mi assaw pwal pechen o ngeni ewe souasor Aaron me nöün kewe mwän. Iei ekewe kinikin ekewe aramasen Israel repwe ngeni ekewe souasor fansoun meinisin. 35 Iei inetin Aaron me nöün kewe mwän seni ekewe asor ngeni ewe Samol mi Lapalap, mi apinipin fän iter lon ewe ränin ar tolong lon wisen souasor. 36 Ewe Samol mi Lapalap a allük pwe ekewe aramasen Israel repwe ngeniir inetir kei lon ewe ränin ra kepit, pwe wiser fansoun meinisin seni eu täppin aramas tori eu täppin.

37 Iwe, iei allükün ewe asoren kek, ewe asoren mongö, ewe asoren tipis, ewe asoren pupungau, ewe asoren apinipin me ewe asoren kinamwe. 38 Ikei ekewe allük ewe Samol mi Lapalap a ngeni Moses me won ewe chuk Sinai lon ewe ränin a allük ngeni ekewe aramasen Israel pwe repwe uwato ar asor ngeni lon ewe fanüapön Sinai.