1 Iwe, ewe Samol mi Lapalap a üreni Moses, 2 “Kopwe emwenato Aaron me nöün kewe mwän leasamalapen ewe imw mangaku ia aramas ra churiei ie, kopwe pwal uwei ekewe üf, ewe löön epit, ewe nienifön ätemwänin kow fän iten asoren tipis me ekewe ruoman ätemwänin sip, pwal ewe chükün pilawa esap wor iis lon. 3 Mürin kopwe pwal amwichafengeni ekewe aramas meinisin ikenan.” 4 Iwe, Moses a föri usun mine ewe Samol mi Lapalap a allük ngeni o amwichafengeni ekewe aramas meinisin.

5 Iwe, Moses a üreni ekewe aramas, “Iei usun mine ewe Samol mi Lapalap a allük ngeniei pwe üpwe föri.” 6 Mürin, Moses a emwenato Aaron me nöün kewe mwän o atütüür. 7 A aüföüfa ngeni Aaron ewe söch o peliti ngeni ewe pelit, a pwal aüföüfa ngeni ewe owokot me ewe üf itan efot o ri ngeni ririn ewe efot mi türmürina. 8 Iwe, a pachetä won ewe chechen leupw o uwalong ewe Urim me ewe Tumim lon *Urim me Tumim ruu minen asisil ra aea le asisila letipen Kot. 9 A pwal aimweimwa ngeni Aaron ewe akkaw o rietä won eten mesan ewe kolt mi chöpöp, ewe mwärämwär mi pin, usun ewe Samol mi Lapalap a allük ngeni.

10 Mürin, Moses a angei ewe löön epit o epiti ngeni ewe imw mangaku ia aramas ra churi Kot ie, me meinisin mine a nom lon, a pwal apiniir. 11 Iwe, a angei ekis seni ewe löön epit o äsupu fän fisu ngeni ewe rongen asor, a epiti ewe rongen asor me pisekin meinisin pwal ewe lenien töttöl me motongan, pwe repwe pin. 12 A pwal ninätiu ekis seni ewe löön epit won möküren Aaron o epiti pwe epwe pin. 13 Mürin, Moses a emwenato nöün Aaron kewe mwän, a aüföüfa ngeniir ekewe söch o peliti ngeniir ekewe pelit, a pwal aimweimwa ngeniir ekewe akkaw, usun ewe Samol mi Lapalap a allük ngeni.

14 Mürin, Moses a emwenato ewe ätemwänin kow fän iten asoren tipis, nge Aaron me nöün kewe mwän ra isetä pöür won möküran. 15 Iwe, Moses a niela ewe mönün asor, a angei ekis chan o aea pöün le tofi ewe cha ngeni mächän ewe rongen asor me fofoch, pwe epwe alimöchü ewe rongen asor. Nge lusun ewe cha a ninätiu lepopun ewe rongen asor o apini, pwe epwe föri asoren amusamusen limengauen ewe rongen asor. 16 Mürin, Moses a angei kirisin pisekin lon inisin ewe mönün asor me mwärekeon ammünün, pwal ekewe ruoföü föün lon fiti kirisir, o kenirela won ewe rongen asor. 17 Nge silin ewe ätemwänin kow me fitukan pwal taran a kenirela lükün ewe ia ra nonom ie, usun ewe Samol mi Lapalap a allük ngeni.

18 Mürin, Moses a emwenato ewe ätemwänin sip fän iten asoren kek. Nge Aaron me nöün kewe mwän ra isetä pöür won möküran. 19 Iwe, Moses a niela ewe ätemwänin sip o uti chan ngeni pwelin ünükün ewe rongen asor. 20 Mürin a kinikisietiu fituken ewe ätemwänin sip o kenala möküran me ekewe kinikin pwal kirisin. 21 Iwe, a talü ekewe pisekin lon inisin me pechen ngeni koluk o kenala unusen ewe ätemwänin sip won ewe rongen asor pwe eu asoren kek ngeni ewe Samol mi Lapalap a efich pwoon. Iei usun ewe Samol mi Lapalap a allük ngeni Moses.

22 Mürin, Moses a pwal emwenato ewe aruomanün ätemwänin sip fän iten afeiöchün ekewe souasor. Nge Aaron me nöün kewe mwän ra isetä pöür won möküran. 23 Iwe, Moses a niela ewe ätemwänin sip, a angei ekis chan o tofi ngeni emin fän pelifichin selingen Aaron, pwal ngeni aütülapen pelifichin pöün me pechen. 24 Mürin, Moses a pwal emwenato nöün Aaron kewe mwän. Iwe, a tofi ekis ewe cha ngeni emin fän pelifichin selinger pwal ngeni aütülapen pelifichin pöür me pecher. Nge lusun ewe cha a uti ngeni pwelin ünükün ewe rongen asor. 25 Iwe, a angei kirisin ewe mönün asor, kirisin mechan me kirisin won pisekin lon inisin meinisin, mwärekeon ammünün pwal ekewe ruoföü föün lon fiti kirisir me pelifichin pechen. 26 A pwal angei eföü pilawa seni lon chükün ewe pilawa esap wor iis lon mi nom fän mesen ewe Samol mi Lapalap, pwal eföü pilawa mi nofitfengen me apüra, me echö nokop, o iseniir won kirisin ewe mönün asor pwal won pelifichin pechen. 27 Iwe, ekei mettoch meinisin Moses a isenalong lepöün Aaron me nöün kewe mwän, nge ir ra assawerela fän mesen ewe Samol mi Lapalap pwe eu asoren assaw. 28 Mürin, Moses a angei ekei mettoch seni lepöür o kenirela won ewe rongen asor fiti ewe asoren kek pwe eu asoren afeiöch ewe Samol mi Lapalap a efich pwoon. 29 Iwe, Moses a pwal angei leupwen ewe mönün asor o assawa pwe eu asoren assaw fän mesen ewe Samol mi Lapalap. Iei inetin Moses me won ewe ätemwänin sip, ewe asoren afeiöch. Moses a föri meinisin mine ewe Samol mi Lapalap a allük ngeni.

30 Mürin, Moses a angei ekis seni ewe löön epit me ekis ewe cha mi nom won ewe rongen asor o äsupu ngeni Aaron me üfan, pwal ngeni nöün kewe mwän me üfer. Iei usun a apini Aaron me nöün kewe mwän me üfer.

31 Iwe, Moses a üreni Aaron me nöün kewe mwän, “Oupwe kuku ewe fituk leasamalapen ewe imw mangaku ia aramas ra churi Kot ie. Ikenan oupwe pwal ochei ewe fituk o mongö ewe pilawa mi nom lon ewe chükün asoren afeiöch. Pun iei usun Kot a allük ngeniei pwe oupwe föri. 32 Nge lusun ewe fituk me ewe pilawa oupwe kenala. 33 Iwe, ousap towu lükün asamalapen ewe imwenfel seni mangaku ükükün fisu rän, tori repwe wesöchüla ränin afeiöchümi. Pun angangen afeiöchümi epwe fis lon ükükün fisu rän. 34 Ewe Samol mi Lapalap a allük pwe epwe fis asoren amusamusen tipis fän itemi, usun a fen fis ikenai. 35 Iwe, oupwe nonom leasamalapen ewe imwenfel seni mangaku lerän me lepwin lon ükükün fisu rän, pwe oupwe föri mine ewe Samol mi Lapalap a awisa ngenikemi pwe ousap mäla. Pun iei usun Kot a allük ngeniei.” 36 Iwe, Aaron me nöün kewe mwän ra föri ekewe mettoch meinisin usun mine ewe Samol mi Lapalap a allük ngeni Moses.