1 Iwe, wesin ekewe ränin afeiöch, Moses a köri Aaron me nöün kewe mwän pwal ekewe souakomwen Israel. 2 Iwe, a üreni Aaron, “Kopwe angei eman nienifön ätemwänin kow fän iten asoren tipis, pwal eman ätemwänin sip fän iten asoren kek, nge esap wor terir. Iwe, kopwe eäniir asor fän mesen ewe Samol mi Lapalap. 3 Mürin kopwe üreni ekewe aramasen Israel: Oupwe angei eman ätemwänin kuuch fän iten asoren tipis, pwal eman nienifön kow me eman lam fan iten asoren kek, nge ir me ruoman eu ierir, esap pwal wor terir. 4 Oupwe pwal angei eman ätemwänin kow me eman ätemwänin sip fän iten asoren kinamwe o eäniir asor fän mesen ewe Samol mi Lapalap fiti eu asoren mongö mi nofit ngeni apüra, pun ikenai ewe Samol mi Lapalap epwe pwä ngenikemi.” 5 Iwe, ra uwato mwen ewe imwenfel seni mangaku meinisin mine Moses a allük ngeniir. Nge ekewe aramas meinisin ra kaneto o ütä fän mesen ewe Samol mi Lapalap. 6 Iwe, Moses a apasa, “Iei usun mine ewe Samol mi Lapalap a allük pwe oupwe föri, pwe lingen ewe Samol mi Lapalap epwe pwä ngenikemi.” 7 Mürin, Moses a üreni Aaron, “Kopwe kan ngeni ewe rongen asor o eäni om asoren tipis me om asoren kek, pwe kopwe föri asoren amusamusen tipis fän itom me ekewe aramas. Kopwe pwal eäni ewe asor fän iten ekewe aramas o föri asoren amusamusen ar tipis, usun ewe Samol mi Lapalap a fen allük.” ✡Ipr 7.27

8 Iwe, Aaron a kan ngeni ewe rongen asor o niela ewe nienifön ätemwänin kow, pwe epwe eäni asoren tipis fän püsin itan. 9 Nge nöün Aaron kewe mwän ra uwato chan ewe mönün asor ren. Iwe, Aaron a otukalong aütün lon ewe cha o tofi ngeni mächän ewe rongen asor, nge lusun a ninätiu lepopun ewe rongen asor. 10 Iwe, kirisin ewe mönün asoren tipis me ekewe föün lon pwal mwärekeon ammünün a kenirela won ewe rongen asor, usun ewe Samol mi Lapalap a fen allük ngeni Moses. 11 Nge fituken ewe mönün asor me silin a kenirela lükün ewe ia aramas ra nonom ie.

12 Mürin, Aaron a niela an we mönün asoren kek. Iwe, nöün Aaron kewe mwän ra uwato chan ewe mönün asor ren, nge Aaron a uti ngeni pwelin ünükün ewe rongen asor. 13 Ra pwal ngeni eu me eu kinikinin ewe mönün asoren kek pwal möküran, nge Aaron a kenirela won ewe rongen asor. 14 Iwe, a talü pisekin lon inisin me pechen o kenirela fiti ewe asoren kek won ewe rongen asor.

15 Mürin, Aaron a uwato än ekewe aramas asor. Iwe, a angei ewe ätemwänin kuuch pwe asoren tipis fän iten ekewe aramas, o niela. Iwe, a föri angangen asoren tipis, usun chök ewe aeuin asoren tipis a föri fän püsin itan. 16 A pwal uwato ewe mönün asoren kek o eäni asor lon pwüngün angangen allükün. 17 Iwe, a pwal uwato ewe asoren mongö, a angei ekumwuch seni o keni me won ewe rongen asor pach ngeni ewe asoren kek mi fis iteiten rän.

18 Mürin, Aaron a pwal niela ewe ätemwänin kow me ewe ätemwänin sip pwe asoren kinamwe fän iten ekewe aramas. Iwe, nöün Aaron kewe mwän ra uwato chan ekewe mönün asor ren, nge Aaron a uti ngeni pwelin ünükün ewe rongen asor. ✡Lif 3.1-11 19 Iwe, ra angei kirisin ewe ätemwänin kow me kirisin ewe ätemwänin sip, iei ewe mechan mi kiris echök, ewe kiris mi pwölüela pisekin lon inisir, ekewe föün lor me mwärekeon ammünür, 20 o iseis meinisin won leupwen ekewe mönün asor. Mürin Aaron a angei ewe kiris o kenala won ewe rongen asor. 21 Nge ekewe leupwan me pelifichin pechen, Aaron a assawa pwe eu asoren assaw fän mesen ewe Samol mi Lapalap, pun iei usun Moses a fen allük.

22 Iwe, wesin än Aaron eäni ekewe asoren tipis me asoren kek pwal asoren kinamwe, a aitiela pöün won ekewe aramas o afeiöchüür. Mürin a feitiu seni ewe rongen asor. ✡Num 6.22-26 23 Mürin, Moses me Aaron ra tolong lon ewe imw mangaku ia aramas ra churi Kot ie. Nge lupwen ra towu, ra afeiöchü ekewe aramas. Iwe, lingen ewe Samol mi Lapalap a pwä ngeni ekewe aramas meinisin. 24 Iwe, ewe Samol mi Lapalap a tinato ekkei o kenala ewe asoren kek me ewe kiris mi nom won ewe rongen asor. Nge lupwen ekewe aramas meinisin ra küna, ra mweireir ren ar pwapwa o chapetiu lepwül.