1 Iwe, nöün Aaron kewe mwän iter Natap me Apihu ra angei en me an sepien asoren ötüöt, ra uwalong ekkei lon o iseis apach mi pwokus won. Nge ei asor esap pin fän mesen ewe Samol mi Lapalap, pun eu sokun asor Kot esap allük ngeniir. 2 Iwe, ewe Samol mi Lapalap a tinato ekkei o kenirela pwe ra mäla fän mesan. 3 Mürin, Moses a üreni Aaron, “Iei usun wewen mine ewe Samol mi Lapalap a apasa: Üpwe pwärätä pwe ngang üa pin me lein chokewe ra kan ngeniei, nge üpwe pwal alinga ai ling fän mesen aramas meinisin.” Iwe, Aaron a chök fanafanala.

4 Mürin, Moses a körato Misael me Elsafan nöün Ussiel mwän, nge Ussiel pwin semen Aaron. Iwe, a üreniir, “Oupwe kaneto o ekiela pwimi seni lon ewe imwenfel seni mangaku, pwe oupwe ekirewu lükün ewe ia aramas ra nonom ie.” 5 Iwe, ra feito o ekirewu lükün ewe ia aramas ra nonom ie, usun Moses a apasa, nge ekewe somä ra chüen üföüf üfer üfen souasor. 6 Mürin, Moses a üreni Aaron me nöün kewe mwän iter Eleasar me Itamar, “Ousap atorongauei möküremi, ousap pwal kamwei üfemi pwe asisilen ämi letipeta, pwe ousap mäla, nge ewe Samol mi Lapalap esap pwal song ngeni unusen ewe mwichen aramas. Nge pwimi ekewe chon Israel meinisin repwe kechüeiti afeiengauen ewe kar, ewe Samol mi Lapalap a afisätä. 7 Ousap towu seni leasamalapen ewe imwenfel seni mangaku, pwe ousap mäla. Pun än ewe Samol mi Lapalap löön epit a nonom womi.” Iwe, ra föri usun mine Moses a kapas ngeniir.

8 Iwe, ewe Samol mi Lapalap a kapas ngeni Aaron, 9 “En me noum kana mwän ousap ünümi wain are sakau mi pwichikar, lupwen oupwe tolong lon ewe imw mangaku ia aramas ra churiei ie, pwe ousap mäla. Iei eu allük esemwüch ngenikemi me mwirimwirimi kana, seni eu täppin aramas tori eu täppin. 10 Oupwe alefila lefilen mettoch mi pin me mettoch resap pin, pwal lefilen mettoch mi limengau me mettoch mi limöch. 11 Oupwe pwal aiöü ngeni ekewe aramasen Israel ekewe allük meinisin ngang ewe Samol mi Lapalap üa ngeni Moses pwe epwe aiti ngeniir.”

12 Iwe, Moses a üreni Aaron me nöün kewe mwän mi chüen manau iter Eleasar me Itamar, “Oupwe angei ewe asoren mongö lusun ewe asor won ekkei ngeni ewe Samol mi Lapalap, pwe oupwe mongö ewe pilawa esap wor iis lon lükün ewe rongen asor. Pun ei asor a unusen pin. 13 Oupwe mongö ei asor lon eu leni mi pin, pun iei inetum me inetin noum kewe mwän seni ewe asor ngeni ewe Samol mi Lapalap. Pun iei usun Kot a allük ngeniei. ✡Lif 6.14-18 14 Nge en me noum kewe mwän me fefin oupwe ochoch leupwen ewe mönün asor mi assaw pwal pechen lon sokun leni mi limöch. Pun iei inetum me inetin noum kewe mwän seni än ekewe aramasen Israel asoren kinamwe. 15 Iwe, pechen ewe mönün asor pwal leupwan mi assaw repwe uweefengenireto me kirisin ekewe asor, pwe repwe assawa fän mesen ewe Samol mi Lapalap, pun eu asoren assaw. Iwe, ei epwe inetum me inetin noum kewe pwe wisemi fansoun meinisin, usun ewe Samol mi Lapalap a fen allük.” ✡Lif 7.30-34

16 Iwe, Moses a ais tichik usun mine ra föri ngeni ewe ätemwänin kuuch, ewe mönün asoren tipis. Nge a pwä pwe a kekila. Iwe, Moses a song ngeni Eleasar me Itamar, nöün Aaron kewe mwän mi chüen manau, a pwal üreniir, 17 “Pwota ousap ochoch fituken ewe mönün asoren tipis lon ewe leni mi pin? Pun ei mettoch a unusen pin, a ainet ngenikemi pwe oupwe uwei föföringauen ewe mwichen aramas ren ämi föri asoren amusamusen tipis fän iter fän mesen ewe Samol mi Lapalap. ✡Lif 6.24-26 18 Nengeni, ousap fen uwalong chan ewe mönün asor lon ewe leni mi pin. Pwüngün itä oupwe ochei fituken ewe mönün asor lon ewe leni mi pin usun üa allük ngenikemi.” 19 Iwe, Aaron a üreni Moses, “Nengeni, ikenai ekewe aramas ra eäni ar asoren tipis me asoren kek fän mesen ewe Samol mi Lapalap, nge ekei sokun feiengau ra toriei. Ifa usun, epwe pwüng fän mesen ewe Samol mi Lapalap ai üpwe ochei fituken ewe mönün asoren tipis?” 20 Nge lupwen Moses a rongorong ekei kapas, a menemen ren.