2
Souürür seni fanüen ötiu ra äämwa Jesus
2.1-12
1 Iwe, Jesus a uputiu lon Petleem lon ewe fanü Jutea lon mwün ewe king Herotes. Mürin ekis fansoun, ekoch mwän mi silelapei pekin kaiö ngeni fü seni fanüen ötiu ra feito Jerusalem. 2 Ra ais, “Ia a uputiu ie än chon Juta we king? Äm aia küna füün lupwen a tötä seni ötiu. Iwe, aia feito pwe aipwe asamolu.” 3 Lupwen ewe king Herotes a rong ei pworaus, a fokun osukosuk, pwal chon Jerusalem meinisin. 4 Mürin a körifengeni ekewe souasor mi lap meinisin, pwal ekewe Sensen Allük o aisiniir, ia ewe Kraist epwe uputiu ie. 5 Iwe, ra pölüeni, “Lon ewe telinimw Petleem lon ewe fanü Jutea. Pun iei usun mine ewe soufos a makkei:
6 ‘En Petleem lon ewe fanü Jutea,
kosap fokun kisikis me lein ekewe telinimwen Jutea,
pun eman samol epwe towu senuk, epwe emweni nei aramasen Israel.’ ” ✡Mik 5.2
7 Iei mine Herotes a körato ekewe souürür ar repwe mwichfengen le monomon o küttafichi seniir fansoun pwään ewe fü. 8 Mürin a tiniirela Petleem o ngeniir ei kapasen öüröür, “Oupwe feila o küttafichi ewe mönükol. Nge lupwen oua küna, oupwe asile ngeniei, pwe pwal ngang üpwe feila o asamolu.” 9 Wesin än ewe king kapas ngeniir ra feila. Iwe, lupwen ra fefetal, ewe fü ra fen küna me lon fanüen ötiu a akom mwer tori a üla me won ewe leni ia ewe mönükol a nom ie. 10 Lupwen ar küna ewe fü a fokun lapalap ar pwapwa. 11 Iwe, ra tolong lon ewe imw o ra küna ewe mönükol me Maria inan we, iwe, ra chapetiu mwan o asamolu. Mürin ra wätiu ar kewe lifang: kolt, apach mi pwokus me säfei mi aüchea o fang ngeni. 12 Iwe, Kot a öüröüra ngeniir lon ar tan, pwe resap chüen liwiniti Herotes, iei mine ra liwinsefäliti fanüer won pwal efoch al.
Ewe famili a süla Isip
2.13-15
13 Mürin än ekewe souürür feila, eman nöün ewe Samol chon läng a pwä ngeni Josef lon an tan o üreni, “Herotes epwe kütta ewe mönükol pwe epwe niela. Iei mine kopwe pwätä, kopwe angei ewe mönükol me inan we o süla Isip. Oupwe nonom ikenan tori inet üpwe ürenuk pwe oupwe liwin.” 14 Iwe, Josef a pwätä, a angei ewe mönükol me inan we o ra süla Isip lon ewe chök pwinin. 15 Ra nonom ikenan tori Herotes a mäla. Ei a fis pwe epwe pwönüetä mine ewe Samol a fen apasa me ren ewe soufos, “Üa körawu nei ät seni Isip.” ✡Os 11.1
Herotes a niela ekewe ätin Petleem
2.16-18
16 Lupwen Herotes a mefi, pwe ekewe souürür ra atupu, a fokun lingeringer. Iwe, a tinala nöün sounfiu pwe repwe niela ekewe ät meinisin lon Petleem me lükün Petleem mi ierini ruu are kis seni. A föri iei usun, pun a aükü ngeni ewe fansoun pwään ewe fü a silei seni ekewe souürür ngeni ei otun. 17 Ren ei a pwönüetä mine ewe soufos Jeremaia a fen apasa:
18 “Aramas ra rongorong akürangen ngüngüres me kechüengau lon Rama.
Rahel a kechüeiti nöün kana. Esap mochen chipila, pun nöün ra mäla.” ✡Jer 31.15
Ewe famili a liwinsefäl seni Isip
2.19-23
19 Mürin än Herotes mäla, eman nöün ewe Samol chon läng a pwä ngeni Josef lon an tan me Isip 20 o üreni, “Kopwe pwätä o angei ewe ät me inan we, iwe, kopwe liwinsefäliti ewe fanü Israel, pun ätekewe mi ekiekin niela ewe ät ra mäla.” 21 Iei mine Josef a pwätä, a angei ewe ät me inan we o ra liwinsefäliti Israel. 22 Nge lupwen Josef a rong pwe Arkelaus a siwili saman Herotes lon wisan wisen king lon Jutea, a niuokus an epwe feila ikenan. Iwe, Kot a pwal öüröürasefäli, iei mine a feila lon ewe fanü Kalilea 23 o chonlefanüla lon eu telinimw itan Nasaret. Iei usun a pwönüetä mine ekewe soufos ra fen apasa, “Epwe iteni re Nasaret.” ✡Mark 1.24; Luk 2.39; Joh 1.45