14
Johannes Soupapatais a mäla
14.1-12
(Mark 6.14-29; Luk 9.7-9)
Lon ena fansoun Herotes ewe samolun Kalilea a rong usun Jesus. Iwe, a üreni nöün kewe nöüwis, “Iei i wesewesen Johannes Soupapatais, a manauatä seni mäla. Iei popun a tongeni föri ekewe manaman.” Pun me mwan Herotes a allük pwe repwe turufi Johannes o atolonga lon imwen fötek. Herotes a föri ei pokiten Herotias pwülüen pwiin we Filip. Luk 3.19-20 Pun Johannes Soupapatais a fen üreni Herotes, “Ese pwüng ngonuk om kopwe pwülüeni Herotias.” Lif 18.6; 20.21 Herotes a ekiekin niela Johannes, nge a niuokusiti ekewe chon Juta, pun ra ekieki pwe Johannes eman soufos. Nge lupwen a tori ränin uputiuen Herotes, nöün Herotias föpwül a pworuk me mwen ewe mwich mi eti an we kametip. Iwe, Herotes a fokun pwapwaiti, pwe a pwon ngeni ewe föpwül, “Üa pwon fän akapel, pwe ngang üpwe ngonuk meinisin mine ka tüngor.” Fän än ewe in kapasen öüröür ngeni nöün we föpwül, a tüngor ngeni Herotes, “Kopwe ngeniei iei chök möküren Johannes Soupapatais lon eu sepi!” Iwe, ewe king a lolilen, nge pokiten ewe pwon fän akapel a föri mwen mesen nöün kewe chon kökköto meinisin mi eti le mongö, a allük pwe än ewe föpwül tüngor epwe pwönüetä. 10 Iei mine a tinala eman pwe epwe pöküela üen Johannes me lon imwen fötek. 11 Iwe, ra uwato möküren Johannes we lon eu sepi o ngeni ewe föpwül, nge neminewe a uwala ren inan. 12 Mürin nöün Johannes kewe chon kaiö ra feito o angei somän Johannes o peiaseni. Iwe, mürin ra feila o asile ngeni Jesus ewe pworaus.
Jesus a amongöü limengeröü mwän
14.13-21
(Mark 6.30-44; Luk 9.10-17; Joh 6.1-14)
13 Iwe, lupwen Jesus a rong ewe pworaus usun Johannes, a fiti efoch wa seni ikenan o feila ngeni eu leni ia esap wor aramas ie. Nge lupwen ekewe aramas ra rong usun, ra feila seni telinimwer kewe o tapwela mürin, nge ra chök fetal wilifanü. 14 Lupwen Jesus a tötiu me won ewe wa, a küna eu mwichen aramas mi chomong. A fokun tongeer o a apöchökülätä ekewe chon samau me leir. 15 Iwe, lupwen a tori lekuniol, nöün kewe chon kaiö ra feito ren o apasa, “Ei leni a toau seni lenien aramas, nge a fen tori lekuniol. Kopwe tinala ei mwichen aramas pwe repwe feila lon ekewe sopw o kamö püsin aner mongö.” 16 Nge Jesus a üreniir, “Ir resap feila, ämi oupwe ngeniir met repwe mongö!” 17 Nge ir ra pölüeni, “Mi wor rem limeföü pilawa chök me ruoman ik.” 18 Iwe, Jesus a üreniir, “Oupwe uwato rei ekewe mongö.” 19 Mürin a allük ngeni ekewe aramas pwe repwe mottiu won ewe fetil. Iwe, a angei ekewe limeföü pilawa me ruoman ik, a sachetä läng o iotekin kilisou ngeni Kot wor. A kinikisietiu ekewe pilawa o ngeni nöün kewe chon kaiö, nge ir ra inetiir ngeni ekewe aramas. 20 Iwe, ir meinisin ra mongö o mötüla. Mürin ekewe chon kaiö ra amasoua engol me ruu chüük ren lusun ekewe mongö. 21 Iwe, iteiten ekewe mwän mi mongö ei mongö ina epwe ükükün limungeröü, nge esap alealong fefin me semirit.
Jesus a fetal won matau
14.22-33
(Mark 6.45-52; Joh 6.15-21)
22 Lon ewe chök otun Jesus a pesei nöün kewe chon kaiö pwe repwe tötä won ewe wa o akomwola mwan epek ewe noom, nge i epwe tinala ekewe aramas. 23 Mürin an tinala ekewe aramas, Jesus a feitä won eu chuk, pwe epwe iotek. Lupwen a arapakan pwinila, Jesus a emanüla ikenan. 24 Nge lon ena otun ewe wa a fokun toau seni fanü, a nuponup ren watten nono, pun ewe asepwäl a pöchökül le eniti. 25 Ina epwe lefilen kulok ülüngat me kulok wonu lesosor Jesus a feito ren ekewe chon kaiö, nge a fetal won matau. 26 Lupwen ra küna an fetal won ewe matau, ra fokun rükö o puchörütä ren ar niuokus. Ra apasa, “Eman anü!” 27 Lon ewe chök otun Jesus a kapas ngeniir o üreniir, “Oupwe apilükülük! Ngang ei, ousap niuokus!” 28 Mürin Petrus a apasa, “Ai Samol, ika pwe en wesewesen na, kopwe üreniei pwe üpwe asaila reöm won ei matau.” 29 Jesus a pölüeni, “Kopwe feito!” Iei mine Petrus a tötiu seni won ewe wa o popuetä asaila ren Jesus won ewe matau. 30 Nge lupwen a nengeni pöchökülen ewe asepwäl, a niuokus o popuetä le kokotiu. Iwe, a puchörütä, “Ai Samol, kopwe amanauaei!” 31 Lon ewe chök otun Jesus a aitiela pöün, a amwöchü pöün Petrus o üreni, “Ka lükükisikis! Pwota ka tipemwaramwar?” 32 Iwe, lupwen ar tötä won ewe wa, ewe asepwäl a manasösötiu. 33 Mürin ekewe chon kaiö mi nom won ewe wa ra fel ngeni Jesus o apasa, “Enlet, en Nöün Kot!”
Jesus a apöchöküla ekewe mi samau lon Kenesaret
14.34-36
(Mark 6.53-56)
34 Iwe, ra saila pekilan ewe noom o tori ewe fanü Kenesaret. 35 Lupwen ekewe aramas lon ewe leni ra asilla Jesus, ra tinala pworaus ngeni unusen ekewe fanü mi nom ünükün, pwe Jesus a nom. Mürin aramas ra uwato ren Jesus ekewe chon samau meinisin. 36 Ra tüngormau ngeni pwe epwe mwüt ngeni ekewe chon samau ar repwe chök atapa lepwülün üfan. Iwe, ir meinisin mi atapa ra pöchökületä seni ar samau.

14:3: Luk 3.19-20

14:4: Lif 18.6; 20.21