13
Pworausen awewe usun ewe chon amworafeili pwükil
13.1-9
(Mark 4.1-9; Luk 8.4-8)
Iwe, lon ewe chök ränin Jesus a towu seni ewe imw o feila ngeni arun ewe noom. Ikenan a mottiu pwe epwe aiti ngeni aramas kapasen Kot. Nge eu mwichen aramas mi chomong a mwicheto ren, iei mine a tötä won efoch wa o mot won. Nge ekewe aramas meinisin ra ütä lepi. Luk 5.1-3 Iwe, Jesus a kapas ngeniir usun chomong mettoch lon pworausen awewe o apasa, “Eman aramas a feila pwe epwe amworafeili pwükil. Nge lupwen a amworafeili ekewe pwükil, ekoch föün ra mworotiu lepekin al. Iwe, ekewe mansüsü ra feito o eniir. Ekoch föün ra mworotiu won lenien föüföü ia esap watte pwül ie. Ekewe föün ra pwükükai, pun resap pwük lon pwül mi malül. Iwe, lupwen akkar a tötä, pwichikaran a pwichiti ekewe kükün irä. Nge pokiten esap wor warer, ra müttir pwasala. Pwal ekoch föün ra mworotiu lein iräfölüföl. Iwe, ekewe iräfölüföl ra mämäritä o amopu ekewe irä. Nge pwal ekoch föün ra mworotiu lon pwül mi mürina. Iwe, ekewe irä ra märitä o ua, ekoch leir ra uani ipükü, ekoch wone, nge ekoch ilik.” Mürin Jesus a sopwela le üreniir, “Iö a wor selingan epwe rongorong!”
Popun än Jesus afalafal lon pworausen awewe
13.10-17
(Mark 4.10-12; Luk 8.9-10)
10 Mürin ekewe chon kaiö ra feito ren Jesus o aisini, “Pwota ka eäni pworausen awewe lupwen ka kapas ngeni ekei aramas?” 11 Jesus a pölüeniir, “Kot a fen ngenikemi ewe tufich pwe oupwe silei usun monomonen Mwün Läng, nge ei tufich esap pwal ngeni ekoch aramas. 12 Pun iön a wor an, Kot epwe apacha och ngeni an we pwe epwe somwola. Nge iön esap wor an, Kot epwe angei seni mwo nge ewe ekis a wor ren. Mat 25.29; Mark 4.25; Luk 8.18; 19.26 13 Iei popun üa kapas ngeniir lon pworausen awewe, pwe repwe nenengeni, nge resap küna och, repwe aüseling, nge resap rongorong, resap pwal wewe ren. 14 Iei usun osunien ewe soufos Aisea a fis lon manauer:
‘Ekei aramas repwe rongorong me rongorong, nge resap wewe ren,
repwe nenengeni me nenengeni, nge resap küna och.
15 Pun leluken ekei aramas a pöchökül,
ra ükütiu le rongorong, ra amöürü meser.
Pun are resap föri iei usun,
repwe tongeni küna ren meser o rongorong ren selinger,
letiper epwe wewe, repwe pwal kul ngeniei,
pwe üpwe apöchöküleer. Iei alon Kot.’ Ais 6.9-10 16 Nge ämi oua fokun feiöch! Pun mesemi ra küna o selingemi ra rong. 17 Enlet, üpwe ürenikemi, pwe chomong soufos me aramas mi pwüng ra fokun mochen küna met ämi oua küna, nge resap tongeni küna. Ra pwal mochen rongorong met ämi oua rongorong, nge resap tongeni rongorong.
Jesus a awewei ewe pworausen awewe usun ewe chon amworafeili pwükil
13.18-23
(Mark 4.13-20; Luk 8.11-15)
18 “Iwe, oupwe aüseling o kaiö usun wewen ewe pworausen awewe usun ewe chon amworafeili pwükil. 19 Chokewe mi rongorong ewe kapas usun Mwün Kot, nge resap weweiti, ra usun chök ekewe pwükil mi mworotiu lepekin al. Ewe Eman mi Ngau a feito o angei seniir mine a mworotiu lon leluker. 20 Ekewe pwükil mi mworotiu lon lenien föüföü ra wewe ngeni chokewe mi etiwa ewe kapasen Kot fän pwapwa lon ewe chök otun ra rongorong. 21 Pokiten ewe kapas esap warar lon manauer, esap tongeni nomotam. Pun lupwen a fis osukosuk me riaföü pokiten ewe kapasen Kot, ra müttir fangatä. 22 Ekewe pwükil mi mworotiu lein ekewe iräfölüföl ra wewe ngeni chokewe mi rongorong kapasen Kot, nge öürek usun manauen ikenai me pwapwan wöün fanüfan ra amopu ewe kapasen Kot, pwe esap tongeni ua. 23 Nge ekewe pwükil ra mworotiu won pwül mi mürina ra wewe ngeni chokewe mi rongorong ewe kapasen Kot o weweiti. Iwe, ra ua, ekoch ra uani ipükü, ekoch wone, nge pwal ekoch ilik.”
Pworausen awewe usun ewe pötöwölingau
13.24-30
24 Iwe, Jesus a apworausa ngeniir pwal eu pworausen awewe: “Mwün Läng a wewe ngeni eman mwän a amworafeili pwükil mi mürina lon an tanipi. 25 Lon eu pwin, lupwen aramas meinisin ra möür, ewe chon oputan a war o amworafeili ekewe pwükil mi ngau lein ekewe pwükilin wiich, iwe, a feila. 26 Lupwen ekewe irä ra märitä o ekewe umwun wiich ra popuetä le sikiwu, ekewe pötöwölingau ra pwal pwä. 27 Mürin nöün ewe mwän kewe chon angang ra feito ren o üreni, ‘Äm samol, ka amworafeili pwükil mi mürina lon om tanipi. Nge ia chök ekewe pötöwölingau ra feito me ie?’ 28 A pölüeniir, ‘Eman chon oputaei a föri ei.’ Iwe, ekewe chon angang ra aisini, ‘Ifa usun, ka mochen aipwe feila o üttätä ekewe pötöwölingau?’ 29 Iwe, a üreniir, ‘Apwi, pun lupwen oupwe üttätä ekewe pötöwölingau a tongeni fis pwe ekewe wiich repwe pwal etiir le üttütä. 30 Oupwe likitiir pwe repwe mämäritäfengen tori fansoun kinikin. Mürin ngang üpwe üreni ekewe chon angangen räs pwe repwe akomwen üttätä ekewe pötöwölingau, repwe pilüküfengeniir o keniirela. Mürin repwe achufengeni ekewe wiich o iseniir lon ai lenien iseis.’ ”
Pworausen awewe usun ewe föün pwükilin irä mi fokun kükün
13.31-32
(Mark 4.30-32; Luk 13.18-19)
31 Iwe, Jesus a apworausa ngeniir pwal eu pworausen awewe: “Mwün Läng a wewe ngeni eföü pwükilin irä mi fokun kükün, eman aramas a angei o fotukätiu lon an tanipi. 32 Ei pwükilin irä a kükün seni pwükil meinisin, nge lupwen a märitä a watte seni ekewe irä kükün meinisin. A wiliti efoch irä watte, pwe ekewe mansüsü ra ässito o föri faser won palan kana.”
Pworausen awewe usun iis
13.33
(Luk 13.20-21)
33 Iwe, Jesus a apworausa ngeniir pwal eu pworausen awewe: “Mwün Läng a wewe ngeni iis eman fefin a angei o nofitifengeni me lime paun pilawa mi amas tori unusen ewe pilawa a pwotä.”
Popun än Jesus aea pworausen awewe
13.34-35
(Mark 4.33-34)
34 Iwe, Jesus a aea pworausen awewe an epwe aiti ngeni ewe mwichen aramas ekei mettoch meinisin. Esap apasa och mettoch ngeniir lükün an epwe aea eu pworausen awewe. 35 A föri ei an epwe pwönüetä mine ewe soufos a apasa,
“Ngang üpwe aea pworausen awewe lupwen üpwe kapas ngeniir.
Ngang üpwe aiti ngeniir ekewe mettoch mi monomon seni lepoputän fanüfan.” Kölf 78.2
Jesus a awewei ewe pworausen awewe usun ekewe pötöwölingau
13.36-43
36 Iwe, lupwen Jesus a feila seni ewe mwichen aramas o tolong lon eu imw, nöün kewe chon kaiö ra feito ren o üreni, “Kopwe awewe ngenikem met wewen ewe pworausen awewe usun ekewe pötöwölingau lon ewe tanipi.” 37 Jesus a pölüeniir, “Ewe mwän mi amworafeili ekewe pwükil mi mürina, iei i ewe Nöün Aramas. 38 Ewe tanipi, iei fanüfan, ekewe pwükil mi mürina, ekewe aramas ir chon ewe Mwün Kot, ekewe pötöwölingau, ir ekewe aramas nöün ewe mi Ngau, 39 nge ewe chon oput mi amworafeili ewe pötöwölingau, iei i Tefil. Ewe fansoun kinikinin räs, iei ewe fansoun lesopolan, nge ekewe chon angangen räs, ir ekewe chon läng. 40 Usun ekewe pötöwölingau ra ioifengen o kekkila lon ekkei, iei usun mine epwe fis lesopolan fansoun fanüfan. 41 Ewe Nöün Aramas epwe tinala nöün kewe chon läng pwe repwe amwichafengeni seni lon Mwün chokewe meinisin mi emweni aramas ngeni tipis, pwal chokewe meinisin mi föri ekewe föför mi ngau. 42 Repwe atururelong lon ewe lenien ekkei ia repwe pupuchör o akarüngi ie. 43 Mürin ekewe chon pwüng repwe tittin usun akkar lon Mwün Semer. Iö a wor selingan epwe rongorong!
Pworausen awewe usun ewe pisek aüchea mi ireirela
13.44
44 “Ewe Mwün Läng a pwal wewe ngeni eu pisek aüchea mi ireirela. A fis pwe eman aramas a küna o iresefäliela. Iwe, seni watten an pwapwa a feila o amömöla meinisin mine a eäni, mürin a liwinsefälila o möni ewe leni.
Pworausen awewe usun ewe föün pwei
13.45-46
45 “Mwün Läng a pwal wewe ngeni eman aramas mi kükütta föün pwei mi fokun aüchea pwe epwe möni. 46 Lupwen a küna eföü mi fokun unusen mürina, a feila o amömöla meinisin mine a eäni o möni ewe föün pwei.
Pworausen awewe usun eu chew
13.47-50
47 “Mwün Läng a pwal wewe ngeni eu chew ekewe chon attau ra aturätiu leset pwe repwe liapeni sokopaten ik. 48 Lupwen ewe chew a ur ren ik, ra etekinatä lepi, mürin ra mottiu pwe repwe aimwüfeseni ekewe ik: Ekewe ik mi mürina ra uwalong lon säwä, nge ekewe ik mi ngau ra pöütala. 49 Iei usun mine epwe fis lesopolan fansoun fanüfan. Ekewe chon läng repwe feila o aimwüfeseni ekewe aramasangau seni ekewe aramas mi pwüng. 50 Repwe aturalong ekewe aramasangau lon ewe lenien ekkei ia repwe pupuchör o akarüngi ie.”
Mettoch mi fö me mettoch mi mes
13.51-52
51 Iwe, Jesus a aisiniir, “Oua weweiti ekei mettoch?” Ra pölüeni, “Ewer.” 52 Mürin a üreniir, “Iei mine iteiten ekewe Sensen Allük meinisin mi fen kaiö usun Mwün Läng ra usun chök eman souimw a atowu seni an lenien iseis mettoch mi fö me mettoch mi mes.”
Chon Nasaret resap etiwa Jesus
13.53-58
(Mark 6.1-6; Luk 4.16-30)
53 Iwe, lupwen Jesus a wes le apworausa ekei pworausen awewe, a feila seni ewe leni 54 o liwinsefäliti poputän telinimwan. A afalafal lon ewe imwen felikis, nge chokewe mi rongorong ngeni ra mairü ren. Ra ais, “Ia ätei a angei me ie an tipachem? Ia a angei me ie an kei tufich pwe epwe tongeni föri ekei manaman? 55 Ifa usun, sap ätei nöün ewe chon kaü imw? Ifa usun, inan esap iteni Maria? Nge sap pwiin kewe James, Josef, Simon me Jutas? 56 Ifa usun, fefinan kewe meinisin resap nom rech? Ia ätei a angei me ie ekei sokun tufich meinisin?” 57 Iei mine resap etiwa. Iwe, Jesus a üreniir, “Eman soufos a wor meninin ekis meinisin, nge esap wor meninin lon poputän telinimwan pwal lon püsin an famili.” Joh 4.44 58 Pokiten esap wor ar lükülük, Jesus esap föri chomong manaman ikenan.

13:2: Luk 5.1-3

13:12: Mat 25.29; Mark 4.25; Luk 8.18; 19.26

13:15: Ais 6.9-10

13:35: Kölf 78.2

13:57: Joh 4.44