1 Lon eu fansoun Jesus a fetalelong lon eu tanipin wiich lon ränin sapat. Iwe, nöün kewe chon kaiö ra echik, iei mine ra popuetä le fichi ekoch umwun wiich o mongö föün. ✡Tut 23.25 2 Nge lupwen ekewe Farisi ra küna ei, ra üreni Jesus, “Nengeni, noumw kewe chon kaiö ra föri mine esap pwüng lon allükün ach lamalam lon ränin sapat!” 3 Jesus a pölüeniir, “Ousap aleani mwo mine Tafit a föri lon ewe fansoun, lupwen i me chienan kewe ra echik? ✡1.Sam 21.1-6 4 A tolong lon imwen Kot, nge i me chienan kewe ra mongö ekewe pilawa ra eäni asor ngeni Kot, inamwo ika a ü ngeni allükün lamalam ar repwe mongö, pwe ekewe chök souasor a mwümwü ngeniir ar repwe mongö ekei pilawa. ✡Lif 24.9 5 Ika ousap aleani mwo mine a mak lon än Moses kewe allük, pwe iteiten ränin sapat ekewe souasor lon ewe imwenfel ra atai ewe allükün sapat, nge resap tipis? ✡Num 28.9-10 6 Ngang üpwe ürenikemi, pwe och mi lap seni ewe imwenfel a nom ikei. 7 Lon ekewe Toropwe mi Pin a mak, ‘Üa mochen pwe aramas repwe eäni tong enlet, nge sap ar repwe eäni asor man ngeniei.’ Are ämi oua wesewesen silei wewen ei kapas, ousap atipisi ekewe aramas esap wor ar tipis. ✡Mat 9.13; Os 6.6 8 Pun ewe Nöün Aramas i Sounemenemen ewe ränin sapat.”

9 Iwe, Jesus a feila seni ewe leni o tolong lon eu imwen felikis. 10 Ikenan a wor eman mwän mi mä pöün. Ekoch aramas ra pwal nom ikenan, ra kütta och popun mine repwe aturu Jesus won. Iei mine ra aisini, “Ifa usun, a ngau ngeni allükün ach lamalam an eman epwe apöchöküla eman aramas lon ränin sapat?” 11 Jesus a pölüeniir, “Epwe ifa ika eman leimi a wor eman nöün sip a turulong lon eu pwang mi alolol lon ränin sapat? Ifa usun, esap ekiekin angeawu o efietä me lon ewe pwang? ✡Luk 14.5 12 Iwe, eman aramas a kon aüchea seni eman sip! Iei mine allükün ach lamalam a mwütätä ngenikich ach sipwe alisi eman aramas lon ränin sapat.” 13 Mürin Jesus a üreni ewe mwän mi mä pöün, “Kopwe aitiewu poumw.” Iwe, a aitiewu pöün we o a pöchökülsefäl usun chök pwal ewe efoch. 14 Iwe, ekewe Farisi ra towu seni ewe imwen felikis o pwüngüpwüngfengen usun ar repwe niela Jesus.

15 Lupwen Jesus a rong usun ar ekiekin rawangauei, a feila seni ewe leni, nge eu mwichen aramas mi chomong a tapwela mürin. Iwe, a apöchöküla ekewe chon samau meinisin 16 o üreniir, pwe resap apworausa ngeni aramas usun i. 17 A föri ei, pwe epwe pwönüetä mine Kot a apasa ren ewe soufos Aisea:

22 Mürin ekoch aramas ra uwato ren Jesus eman mwän mi chun o awemwöch, pun eman anün rochopwak a wäni. Iwe, Jesus a apöchöküla ewe mwän, pwe a tongeni kapas o küna mwan. 23 Iwe, ekewe aramas meinisin ra mairü ren mine Jesus a föri o ais, “Ifa usun, epwe ätei ewe nöün Tafit?” 24 Nge lupwen ekewe Farisi ra rong ekei kapas, ra apasa, “Ätei a chök asüela ekewe anün rochopwak pokiten ewe samolun anün rochopwak a ngeni an manaman.” 25 Jesus a silei ar ekiek o üreniir, “Are eu mwü a kinikinfesen o fiufengen, ei mwü esap tongeni nonomola. Are chon eu telinimw ika eu famili repwe kinikinfesen o fiufengen lefiler, repwe parasfesen. 26 Iei mine are mwün Satan a kinikinfesen o fiufengen, mwün epwe müttir tala! 27 Ämi oua apasa, pwe üa asüela ekewe anün rochopwak ren manamanen Pelsepul. Iwe, ika epwe iei usun, iö chök a ngeni chiechiemi kewe ar manaman ar repwe asürela? Met chiechiemi kewe ra föri a alletätä pwe oua mwäl. 28 Apwi, esap Pelsepul, nge Ngünün Kot a ngeniei ewe manaman ai üpwe asüela ekewe anün rochopwak. Ei a pwärätä pwe Mwün Kot a fen torikemi.

29 Esap wor eman a tongeni atalong imwen eman mwän mi pöchökül o angeala pisekin, are esap akomwen föti ewe mwän mi pöchökül. Mürin a tongeni angeala pisekin lon imwan.

30 Iwe, are eman esap etiei, i eman chon ü ngeniei, nge are eman esap alisiei le ikioi, i eman chon kütifeseni. 31 Iei mine üpwe ürenikemi: Än aramas tipis meinisin repwe musala, pwal ar kewe kapasen turunufas ra apasa, nge are eman a eäni kapasen turunufas ngeni Ngünmifel esap fokun musala. 32 Iö a apasa och kapasen ü ngeni Nöün Aramas a tongeni musala. Nge iö a apasa och kapasen ü ngeni Ngünmifel esap fokun musala lon ei fansoun ikenai tori feilfeilachök.

33 “Are a wor om irä mi mürina, uan ra pwal mürina, nge are a wor om irä mi ngau, uan ra pwal ngau. Efoch irä a sil ren uan. ✡Mat 7.20; Luk 6.44 34 Ämi serepenit! Ifa usun, oua tongeni apasa mine a mürina ika ämi aramas mi ngau? Pun ekewe kapas ra towu seni awemi iei somwen lelukemi. ✡Mat 3.7; 23.33; 15.18; Luk 3.7; 6.45 35 Eman aramas mi mürina a atowu mettoch mi mürina seni lon an lenien iseis mi mürina, nge eman aramas mi ngau a atowu mettoch mi ngau seni an lenien iseis mi ngau. 36 Nge üpwe ürenikemi, pwe lon ewe ränin apwüng aramas meinisin repwe küna apwüng ren iteiten kapas lomotongau ra apasatä. 37 Pun ren om kewe kapas kopwe küna apwüng ren, repwe pwärätä ika en mi pwüng ika en mi tipis.”

38 Mürin ekoch ekewe Sensen Allük me ekewe Farisi ra üreni Jesus, “Sense, äm aia mochen küna usun om kopwe föri eu manaman.” ✡Mat 16.1; Mark 8.11; Luk 11.16 39 Nge Jesus a üreniir, “A ifan me ingauen me kirikiringauen ei täppin aramasen ikenai! Oua tüngor ngeniei pwe üpwe föri eu manaman, nge esap wor eu manaman epwe pwä ngenikemi, pwe ewe chök manaman mi fis ngeni ewe soufos Sona. ✡Mat 16.4; Mark 8.12 40 Pun usun Sona a nom lon luken ewe ik mi watte lon ükükün ülüngat rän me ülüngat pwin, iei usun Nöün Aramas epwe nom leutun fanüfan lon ükükün ülüngat rän me ülüngat pwin. ✡Sona 1.17 41 Lon ewe ränin kapwüng ekewe chon Ninifa repwe ütä o atipisi ei täppin aramas, pun ra aier ren än Sona afalafal. Nge üpwe ürenikemi, pwe eman mi lap seni Sona a nom ikei! ✡Sona 3.5 42 Lon ewe ränin kapwüng ewe kiwinen Sepa epwe ütä o atipisi ei täppin aramas. Pun neminei a saito seni fanüan mi toau, pwe epwe rongorong än ewe king Salomon kapasen tipachem. Iwe, üpwe ürenikemi, pwe eman mi lap seni Salomon a nom ikei! ✡1.King 10.1-10; 2.Kron 9.1-12

43 “Are eman ngününgau a towu seni eman aramas, a saifeil won fanü mi pwasapwas o kütta eu leni pwe epwe asösö lon. Are esap küna eu leni, 44 epwe apasa, ‘Üpwe liwinsefäliti imwei we üa towu seni.’ Iwe, lupwen a tori ewe imw, a küna pwe a pön, a limöch o kotöch. 45 Mürin epwe feila o panato pwal füman ngün mi ngau seni i. Iwe, repwe feito o nonom lon. Iwe, manauen ewe aramas epwe fokun ngau seni me mwan. Iei usun mine epwe fis ngeni ei täppin aramas mi ngau.”

46 Iwe, lupwen Jesus a chüen kapas ngeni ekewe aramas, inan me pwiin kana ra war. Ra ütä lükün ewe imw o tüngor pwe repwe kapas ngeni. 47 Iei mine eman ekewe aramas a üreni Jesus, “Nengeni, inom me pwiüm kana ra ütä lükün o mochen kapas ngonuk.” 48 Jesus a pölüeni, “Iö inei me iö kana pwii?” 49 Mürin a itini nöün kewe chon kaiö o apasa, “Nengeni! Ikkei ir inei me pwii kana! 50 Pun iö kana ra föri letipen Semei lon läng, ir pwii me fefinei me inei.”