1 Iwe, a fis pwe ekewe mwän mi üküngau me pwülüer ra fokun siö pokiten pwiir kewe chon Juta. 2 Pun mi wor ekoch ra apasa, “Äm me nöüm kewe aia chomong. Aia tüngor pwe aipwe angei wiich pwe aipwe mongö o manau.” 3 Mi pwal wor ekoch ra apasa, “Äm aia amömö fanüem, äm tanipin wain me imwem kewe, pwe aipwe tongeni kamö wiich lon ei fansoun lengita.” 4 Nge mi pwal wor ekoch ra apasa, “Äm aia paro moni pwe aipwe tongeni püngütiu takises ngeni ewe king, nge aia eäni pwon fanüem me äm kewe tanipin wain. 5 Iwe, äm me pwim kewe chon Juta aia eu chök fituk, nöüm ra usun chök nöür. Iei mwo nge aipwe mwütätä nöüm mwän me fefin pwe aramas repwe nöüniir amanau. Ekoch me lein nöüm kewe fefin aramas ra fen nöüniir amanau. Nge esap wor äm pwäk pwe aipwe awesi ei lapalap, pun ekoch aramas ra fen fanüeni fanüem o eäni äm kewe tanipin wain.”

6 Iwe, lupwen üa rongorong ar kewe kapasen siö, üa fokun song. 7 Üa ekieki usun ei lapalap. Mürin üa apwüngü ekewe aramas tekia me ekewe nöüwis o üreniir, “Ämi oua angei manauen nöümi moni seni pwimi kewe chon Juta.” Iwe, üa amwichafengeni eu mwichemongun aramas pwe üpwe fos ngeniir won ei osukosuk. ✡Eks 22.25; Lif 25.35-37; Tut 23.19-20 8 Üa üreniir, “Ükükün äm tongeni äm aia mönisefäli pwim kewe chon Juta mi püsin amömörela ngeni chon ekewe mwü. Nge ämi oua fen ariani pwimi kewe, pwe repwe püsin amömörela ngenikemi.” Iwe, ekewe aramas tekia ra fanafanala, pun resap tongeni pälüeni och. 9 Iei mine üa üra, “Ei föför oua föri esap öch. Ifa usun, ousap niuokusiti ach we Kot o föri mine a pwüng, pwe chon ekewe mwü mi oputakich resap turunufaseekich? 10 Nge pwal ngang me pwii kewe me nei kewe chon angang äm aia mwütätä ngeni aramas moni me wiich. Ousipwe ükütiu le angei manauen nöüch moni seni ar liwinimang. 11 Ikenai oupwe aliwini ngeniir fanüer, ar tanipin wain me tanipin olif pwal imwer kewe, oupwe pwal amusala ar liwinimangen moni, wiich, wain me apüra.” 12 Mürin ra üra, “Äm aipwe aliwini ngeniir ekei mettoch, nge aisap chüen angei och seniir. Äm aipwe föri meinisin mine ka üra.” Iwe, üa körato ekewe souasor o pesei ngeni ekewe nöüwis pwe repwe pwon fän akapel me fän meser, pwe repwe föri usun mine ra eäni pwon. 13 Üa pwal äsupu pipin lenumun üfei o üra, “Iei usun Kot epwe äsupala iteiten eman me eman aramas seni lon imwan me lenian, ika esap apwönüetä ei pwon. Amwo epwe morotiu o pöla iei usun.” Iwe, unusen ewe mwichen aramas ra apasa “Amen”, ra pwal mwareiti ewe Samol mi Lapalap. Nge ekewe nöüwis ra föri usun mine ra eäni pwon.

14 Iwe, lon ewe fansoun üa fil pwe üpwe kepinan ewe fanü Juta, seni ewe arüeen ierin mwün ewe king Artaksasta tori ilik me ruuen ierin, lon ei ükükün engol me ruu ier äm me aramasei kewe aisap mongö ewe mongö wisen kepina. 15 Ekewe kepina mi akom mwei ra aweiresi ekewe aramas o angei seniir ener mongö o ünümer wain iteiten rän won ükükün faik föün moni silifer. Pwal nöür chon angang ra ariaföüü ekewe aramas. Nge ngang üsap föri iei usun, pun üa niuokusiti Kot. 16 Üa fangala ai pöchökül fän iten angangen ei tit, nge üsap fanüeni eu fanü. Pwal nei chon angang meinisin ra chufengen le föri ei angang. 17 Iwe, a pwal wor ipükü lime mwän, ir chon Juta me ekewe nöüwis, ra mot ngeni ai chepel, lükün chokewe mi feito rem seni chon ekewe mwü mi nom ünüküm. 18 Iwe, ükükün ewe mongö üa amolätä iteiten rän eman ätemwänin kow, wonoman sip mi mürina me chomong chuko. Üa pwal amolätä chomong wain lon iteiten engol rän. Üa atowu ekei mongö meinisin, nge üsap angei wisei mongö fän iten kepina, pun ekewe aramas ra fen weires ren ewe angang. 19 Ai Kot, kopwe chechemeni meinisin mine üa föri fän iten ekei aramas o afeiöchüei.