1 Mürin, ekewe aramasen Israel ra sai tori ewe maasiesin Moap ötiuen ewe chanpupu Jortan sasape ngeni Jeriko. Ikenan ra aüetä imwer imw mangaku. 2 Nge Palak nöün Sipor mwän a rong meinisin mine chon Israel ra föri ngeni ekewe chon Amor. 3 Iwe, chon Moap ra fokun niuokus ren chomongun ekewe aramasen Israel, pwe ra chechech pokiten ar niuokusitiir. 4 Iwe, ekewe chon Moap ra kapas ngeni ekewe souakomwen Mitian, “Ei mwichemongun aramas epwe asomwa meinisin mine a nom ünüküch, usun eman ätemwänin kow a asomwa fetilin lemäl.” Nge Palak nöün Sipor mwän a kingen Moap lon ewe fansoun. 5 Iwe, a tinala chon künö ren Palam nöün Peor mwän lon Petor, a arap ngeni ewe chanpupu Oifrat lon ewe fanü Amaw. Iwe, ra uwei ngeni alon Palak o üreni, “Eu mwichen aramas a feito seni Isip, a pwölüela unusen ewe fanü o nonom kükü ngeniei. ✡Num 31.8; 2.Pet 2.15-16; Jut 11 6 Kose mochen kopwe feito iei o anümamaua ngeniei ekei aramas, pun ir ra kon pöchökül seniei. Eli üpwe tongeni akufuur o asürela seni ewe fanü. Pun üa silei pwe iö en ka afeiöchü a feiöch, nge iö ka anümamaua a anümamau.”

7 Iwe, ekewe souakomwen Moap me ekewe souakomwen Mitian ra feila ren Palam o uweela owun eman soupwe. Nge lupwen ra tori, ra apworausa ngeni alon Palak. 8 Iwe, Palam a üreniir, “Oupwe pwinii epwin ikei pwe üpwe aiti ngenikemi usun mine ewe Samol mi Lapalap a aiti ngeniei.” Iei usun ekewe souakom seni Moap ra nom ren Palam. 9 Iwe, Kot a feito ren Palam o aisini, “Iö ekewe mwän ra nom reöm?” 10 Nge Palam a üreni Kot, “Palak ewe kingen Moap a tinireto rei pwe repwe üreniei, 11 pwe eu mwichen aramas a feito seni Isip o pwölüela unusen ewe fanü. A titi ngang pwe üpwe anümamaueer ngeni, pwe epwe tongeni maun ngeniir o asürela.” 12 Nge Kot a üreni Palam, “Kosap etiirela. Kosap anümamaua ekewe aramas, pun ir ra feiöch.” 13 Iwe, Palam a pwätä lesosor o üreni nöün Palak kewe chon künö, “Oupwe liwinla lon fanüemi, pun ewe Samol mi Lapalap esap mwüt ngeniei pwe üpwe etikemi.” 14 Iei mine ekewe chon künö ra ütä o liwinla ren Palak. Iwe, ra üreni, “Palam esap mochen etikem.”

15 Mürin, Palak a pwal tinisefäliela eu mwichen souakom mi chocho o iteföüla seni ätekewe. 16 Iwe, ra feito ren Palam o üreni alon Palak, “Kosap mwüt ngeni och epwe epetuk seni om kopwe feito rei. 17 Pun üpwe ngonuk chomong liwinum, nge meinisin mine ka üreniei üpwe föri. Kose mochen kopwe chök feito o anümamaua ngeniei ekei aramas.” 18 Nge Palam a pälüeni nöün Palak kewe chon künö, “Are Palak epwe fen ngeniei an silifer me kolt meinisin mi nom lon imwan, üsap tongeni föri och mi watte ika kis pwe üpwe tongeni lukumach ngeni ewe allük än ewe Samol mi Lapalap ai we Kot. 19 Nge iei üa tüngor ngenikemi pwe oupwe pwal pwinii epwin ikei, pwe üpwe silei ika ewe Samol mi Lapalap epwe pwal üreniei och.” 20 Iwe, Kot a feito ren Palam lon ewe pwinin o üreni, “Are ekei mwän ra feito pwe repwe köruk, kopwe etiir. Nge kopwe chök föri mine ngang üpwe ürenuk.”

21 Iwe, Palam a pwätä lesosor, a rietä ewe lenien mot won nöün aas, a tötä won o eti ekewe souakomwen Moap. 22 Nge Kot a fokun song pokiten an feila. Iwe, Palam a sai won nöün we aas, nge ruoman nöün chon angang ra eti. Iwe, nöün ewe Samol mi Lapalap chon läng a ütä lon ewe al pwe epwe pinei an sai. 23 Iwe, ewe aas a küna nöün ewe Samol mi Lapalap we chon läng a ütä lon ewe al o amwöchü efoch ketilas lepöün. Iwe, ewe aas a müttir rikiwu seni ewe al o feilong lemäl. Nge Palam a wichi ewe aas pwe epwe liwiniti ewe al. 24 Mürin, nöün ewe Samol mi Lapalap we chon läng a ütä won efoch al mi chökis, a nom lefilen ruu tanipin wain, nge a pwal wor tit lepekin me rüepek. 25 Iwe, lupwen ewe aas a küna nöün ewe Samol mi Lapalap we chon läng, a üngüri lepekin ewe tit o achacha pechen Palam ngeni. Iei mine Palam a pwal wichisefäli ewe aas. 26 Mürin, nöün ewe Samol mi Lapalap we chon läng a akomwola mwan o ütä won eu leni mi fokun chökis, ia esap wor ie eman epwe tongeni rikiwu ngeni pelifichin ewe al ika pelimöngün. 27 Iwe, lupwen ewe aas a küna nöün ewe Samol mi Lapalap we chon läng, a aüpwäsukutiu fän Palam. Nge Palam a fokun song o wichi ewe aas ngeni wokun. 28 Mürin, ewe Samol mi Lapalap a afosa ewe aas pwe a aisini Palam, “Met üa föri ngonuk pwe ka wichiei fän ülüngat.” 29 Iwe, Palam a pälüeni, “Pokiten ka urumwoteei. Amwo itä a fen wor efoch ketilas lepei pwe üpwe niikela.” 30 Iwe, ewe aas a pwal aisini Palam, “Ifa usun, sap ngang noum aas ka wakkawa lon unusen manauom tori ikenai? Ifa usun, üa fen föri ngonuk ei sokun me mwan?” Nge Palam a pälüeni, “Ap.”

31 Mürin, ewe Samol mi Lapalap a aneneloi mesen Palam pwe a küna nöün ewe Samol mi Lapalap we chon läng mi ütä lukalapen ewe al o amwöchü efoch ketilas. Iwe, Palam a rotiu o chapetiu lepwül. 32 Nge nöün ewe Samol mi Lapalap we chon läng a üreni, “Pwota ka wichi noum we aas fän ülüngat? Üa feito pwe üpwe pinei om al pun om ei sai esap pwüng me rei. 33 Iwe, noum we aas a künaei o rik me mwei fän ülüngat. Nge are esap rik me mwei, ellet üpwe niikela iei chök, nge ewe aas epwe manau.” 34 Mürin, Palam a üreni nöün ewe Samol mi Lapalap we chon läng, “Ngang üa tipis. Üsap silei pwe en ka ü lon ewe al o epetiei. Iei mine are ai ei sai a ngau me reöm, üpwe liwinsefäl.” 35 Nge nöün ewe Samol mi Lapalap we chon läng a üreni Palam, “Kopwe eti ekewe mwän. Nge kopwe üra ekewe chök kapas üpwe ürenuk.” Iei mine Palam a eti nöün Palak kewe souakom.

36 Iwe, lupwen Palak a rongorong pwe Palam a war, a feila pwe epwe churi lon Ar eu telinimw ünükün ewe chanpupu Arnon mi nom lon kiännin ewe fanü Moap. 37 Iwe, Palak a aisini Palam, “Ifa usun, üsap titi en pwe kopwe feito rei? Pwota kose mochen feito? Ifa usun, ka ekieki pwe üsap tongeni liwiniik?” 38 Nge Palam a pälüeni Palak, “Nengeni, üa feito reöm. Nge ifa usun, a wor ai pöchökül iei pwe üpwe tongeni apasa och? Üpwe chök apasa ekewe kapas Kot a üreniei.” 39 Mürin, Palam a eti Palak. Iwe, ra tori Kiriat-husot. 40 Ikenan Palak a eäni asor ätemwänin kow me sip o ngeni Palam me ekewe souakom mi nom ren ekoch kinikin seni ekewe mönün asor.

41 Nge sorotän ewe rän Palak a emwenato Palam won ewe chuk Pamot-paal, ia a tongeni küna me ie eu kinikinin ewe mwichen chon Israel.