1 Mürin ewe mätter, ewe Samol mi Lapalap a üreni Moses me Eleasar nöün ewe souasor Aaron we mwän, 2 “Oupwe angei iteiten ekewe aramasen Israel meinisin seni ier rüe feitä lon en me an famili, meinisin mi tongeni fiti maun.” 3 Iwe, Moses me ewe souasor Eleasar ra kapas ngeni ekewe aramas me lon ewe maasiesin Moap arun ewe chanpupu Jortan sasape ngeni Jeriko o üreniir, 4 pwe repwe angei iteiten ekewe mwän seni ier rüe feitä, usun ewe Samol mi Lapalap a fen allük ngeni Moses. Ikkei ir ekewe aramasen Israel mi towu seni ewe fanü Isip:

5 Ekewe mwirimwirin Rupen, nöün Israel we mwänichi lon tettelin ar kewe cho: än Hanok cho, än Palu cho, 6 än Hesron cho me än Karmi cho. 7 Iteiter meinisin me lon ewe ainangen Rupen faik me ülüngatngeröü füpükü ilik mwän. 8 Iwe, nöün Palu mwän: Eliap. 9 Nge nöün Eliap kewe mwän: Nemuel, Tatan me Apiram. Ätekei Tatan me Apiram ra kefilitä seni ewe mwichen aramas pwe nöür nöüwis. Ra ü ngeni Moses me Aaron o eti än Kora mwich le ü ngeni ewe Samol mi Lapalap. 10 Mürin, ewe pwül a sangfesen o oromirela fiti Kora. Iei usun ekewe aramas ra mäla, nge ekkei a kenala ekewe ruopükü lime mwän. Iwe, a fis pwe ir eu lenien eniweniw. 11 Nge nöün Kora kewe mwän resap mäla.

12 Iwe, ekewe mwirimwirin Simeon lon tettelin ar kewe cho: än Nemuel cho, än Jamin cho, än Jakin cho, 13 än Sera cho me än Shaul cho. 14 Iteiter meinisin me lon ewe ainangen Simeon rüe me ruungeröü ruopükü mwän.

15 Iwe, ekewe mwirimwirin Kat lon tettelin ar kewe cho: än Sefon cho, än Haki cho, än Shuni cho, 16 än Osni cho, än Eri cho, 17 än Arot cho me än Areli cho. 18 Iteiter meinisin me lon ewe ainangen Kat faik ngeröü limepükü mwän.

19 Iwe, nöün Juta kewe mwän Er me Onan. Nge Er me Onan ra mäla lon ewe fanü Kanaan. 20 Iwe, ekewe mwirimwirin Juta lon tettelin ar kewe cho: än Shela cho, än Peres cho me än Sera cho. 21 Nge ekewe mwirimwirin Peres: än Hesron cho me än Hamul cho. 22 Iteiter meinisin me lon ewe ainangen Juta fik me wonungeröü limepükü mwän.

23 Iwe, ekewe mwirimwirin Isakar lon tettelin ar kewe cho: än Tola cho, än Puwa cho, 24 än Jasup cho me än Simron cho. 25 Iteiter meinisin me lon ewe ainangen Isakar wone me rüanüngeröü ülüpükü mwän.

26 Iwe, ekewe mwirimwirin Sepulon lon tettelin ar kewe cho: än Seret cho, än Elon cho me än Jalel cho. 27 Iteiter meinisin me lon ewe ainangen Sepulon wone ngeröü limepükü mwän.

28 Iei ekewe mwirimwirin Josef lon tettelin ar kewe cho mi pop seni Manasa me Efraim: 29 Ekewe mwirimwirin Manasa: än Makir cho me än Kiliat cho. (Iwe, Makir semen Kiliat.) 30 Nge ekewe mwirimwirin Kiliat: än Jeser cho, än Helek cho, 31 än Asriel cho, än Sekem cho, 32 än Semita cho me än Hefer cho. 33 Nge Selofehat nöün Hefer we mwän esap wor nöün mwän, pwe a chök wor nöün fefin. Iwe, ikkei iten nöün Selofehat kewe fefin: Mala, Noa, Hokla, Milka me Tirsa. 34 Iteiter meinisin me lon ewe ainangen Manasa lime me ruungeröü füpükü mwän.

35 Iwe, ekewe mwirimwirin Efraim lon tettelin ar kewe cho: än Sutela cho, än Peker cho me än Tahan cho. 36 Nge ekewe mwirimwirin Sutela: än Eran cho. 37 Iteiter meinisin me lon ewe ainangen Efraim ilik me ruungeröü limepükü mwän. Ikkei ir ekewe mwirimwirin Josef lon tettelin ar kewe cho.

38 Iwe, ekewe mwirimwirin Peniamin lon tettelin ar kewe cho: än Pela cho, än Aspel cho, än Ahiram cho, 39 än Sefufam cho me än Hufam cho. 40 Nge ekewe mwirimwirin Pela: än Art cho me än Naaman cho. 41 Iteiter meinisin me lon ewe ainangen Peniamin faik me limungeröü wonopükü mwän.

42 Iwe, ekewe mwirimwirin Tan lon tettelin ar we cho: än Suham cho. 43 Iteiter meinisin me lon ewe ainangen Tan wone me rüanüngeröü föpükü mwän.

44 Iwe, ekewe mwirimwirin Aser lon tettelin ar kewe cho: än Imna cho, än Iswi cho me än Peria cho. 45 Nge ekewe mwirimwirin Peria: än Heper cho me än Malkiel cho. 46 Iwe, iten nöün Aser we fefin Sera. 47 Iteiter meinisin me lon ewe ainangen Aser lime me ülüngatngeröü föpükü mwän.

48 Iwe, ekewe mwirimwirin Naftali lon tettelin ar kewe cho: än Jaseel cho, än Kuni cho, 49 än Jeser cho me än Sillem cho. 50 Iteiter meinisin me lon ewe ainangen Naftali faik me limungeröü föpükü mwän. 51 Iwe, kapachalapen ekewe re Israel meinisin ükükün wonopükü eungeröü füpükü ilik mwän.

52 Iwe, ewe Samol mi Lapalap a üreni Moses, 53 “Ewe fanü epwe ainet ngeni ekei aramas pwe repwe fanüeni, epwe alongolong won iteiter. 54 Are eu ainang a watte, kopwe awattei fanüan, nge are eu ainang a kükün, kopwe pwal akükünü fanüan. Iteiten eu me eu ainang epwe angei fanüan won ükükün chochon. 55 Nge ewe fanü epwe inet ren üttüt. Repwe angei fanüer lon tettelin iten än semer kewe ainang. 56 Iwe, fän pwüngün ar üttüt, fanüer epwe ainet ngeni ekewe ainang watte me kükün.” ✡Num 34.13; Jos 14.1-2

57 Iwe, ikkei tettelin chon ewe ainangen Lefi lon ar kewe cho: än Kerson cho, än Kohat cho me än Merari cho. 58 Ikkei pwal ekoch cho seni ewe ainangen Lefi: än Lipni cho, än Hepron cho, än Mali cho, än Mushi cho me än Kora cho. Nge Kohat semen Amram. 59 Iwe, iten pwülüen Amram Jokopet, nöün Lefi fefin a nöüni me Isip. Nge Jokopet a nöüni me won Amram: Aaron, Moses me Miriam fefiner we. 60 Iwe, Aaron a nöüni Natap, Apihu, Eleasar me Itamar. ✡Num 3.2 61 Nge Natap me Apihu ra mäla, lupwen ra eäni asor ngeni ewe Samol mi Lapalap ekkei esap pin. ✡Lif 10.1-2; Num 3.4 62 Iwe, iteiten mwän seni ewe ainangen Lefi seni eu maram feitä ükükün rüe me ülüngat ngeröü. Ir resap alealong lon iteiten ekewe aramasen Israel, pokiten resap angei fanüer me leir.

63 Iwe, ikkei ekewe iteit Moses me ewe souasor Eleasar ra aleani, lupwen ra angei iteiten ekewe aramasen Israel lon ewe maasiesin Moap arun ewe chanpupu Jortan sasape ngeni Jeriko. 64 Nge lon ei iteit esap wor eman mwän me lein chokewe Moses me ewe souasor Aaron ra fen aleani, lupwen ra angei iteiten ekewe aramasen Israel lon ewe fanüapön Sinai. 65 Pun ewe Samol mi Lapalap a apasa pwe ir meinisin repwe mäla lon ewe fanüapö. Esap wor eman mwän me leir a chüen manau, chilon chök Kalep nöün Jefune mwän me Josua nöün Nun mwän. ✡Num 14.26-35