1 Ifa usun, nei, ka pwon pwe kopwe mönätiu än chon arum liwinimang, ika ka ngeni eman chon ekis asisilen om pwon? 2 Ifa usun, ka tup ren mine ka eäni pwon, ika oo ren om kapas? 3 Mürin kopwe föri ei, pwe kopwe püsin amanauok, pun ka tolong fän nemenien chon arum: Kopwe müttir feila ren chon arum o tüngormau ngeni pwe epwe angasok. 4 Kosap amöürü mesom, kosap pwal ächikichik. 5 Kopwe amanauok usun eman chia a amanaua, lupwen a sü seni ewe chon likapich, ika usun eman machang a ässila seni lepöün ewe chon sär.

6 Kopwe feila ren ekewe molus, en chon chipwang. Kopwe ekieki usun ar angang pwe kopwe tipachemela. 7 Esap wor ar samol, esap pwal wor ar meilap ika ar sounemenem, 8 nge ra amolätä ener lon fansoun pwichikar o ionifengeni ener mongö lon fansoun räs. 9 Ifa langatamen fansoun om kopwe chök konola won kiom, en chon chipwang? Inet kopwe pwätä seni om möür? 10 Ka apasa, “Üpwe chök ekis möür, üpwe ekis kamwöchüfengeni pei o ekis asösö.” 11 Ren ei wöüngau me osupwang repwe toruk usun eman chon solä a feito fän an pisekin afeiengau. ✡SalF 24.33-34

12 Eman aramasangau mi lomotongau a fetalfeil o eäni kapas rikirik, 13 a ächiki mesan o farikeri chienan ren pechen me pöün, 14 nge lon lelukan mi rikirik a chök ekiekietä föför mi ngau, iteiten fansoun a efisätä tipefesen. 15 Iei mine riaföü epwe müttir tori, lon eu chök otun epwe feiengau, nge esap chüen tongeni pöchökülsefäl.

16 Mir wor fisu föför ewe Samol mi Lapalap a oput, esap fokun tipeeu ngeni:

20 Nei, kopwe aleasochisi mine semom a eäni allük ngonuk, nge kosap manlükala mine inom a aiti ngonuk. 21 Kopwe amwöchünükü ar kewe kapas iteiten fansoun, kopwe iseniir lon lelukom. 22 Repwe emwenuk, lupwen kopwe fetal, repwe tümwünüuk, lupwen kopwe konola, nge lupwen kopwe pwätä, repwe fos ngonuk. 23 Pun mine ra öüra ngonuk a usun chök eu lamp, ar kewe kapasen kait a usun chök eu saram, nge ar kewe kapasen fön fän iten emirit, iei ewe alen manau. 24 Ekei kapas repwe tümwünuk seni ewe fefin mi ngau, pwal seni meseniawen eman fefin mi lüangau. 25 Kosap ekieki liöchün neminewe lon lelukom, kosap pwal tup ren nennen mesan. 26 Eman mwän a tongeni möni eman fefin mi amömö inisin ren ükükün liwinin efoch pilawa, nge mön eman fin lisowu mi fen wor pwülüan epwe püsin manauen ewe mwän. 27 Ifa usun, eman mwän a tongeni uwei ekkei fän mwärin, nge üfan esap kar ren? 28 Ika ifa usun, eman a tongeni fetal won moochen ekkei mi sarara, nge pechen esap poi? 29 Ina usun ätewe mi kon ren pwülüen chon arun. Iteiten eman me eman mi atapa neminewe epwe küna liwiningau. 30 Aramas resap kon oput eman chon solä, ika a solä anan mongö, lupwen a echik. 31 Nge lupwen ra turufi, epwe aliwini fän fisu mine a soläni, inamwo ika epwe atowu pisekin meinisin seni lon imwan. 32 Nge eman mi lisowu a tiparoch. A chök püsin afeiengaua inisin. 33 Repwe akinasa o aitengaua, nge an itengau esap wesila. 34 Pun pwülüen ewe fefin epwe fokun lingeringeriti, nge lupwen epwe angei chappen ei föför, esap chä letipan. 35 Esap etiwa och liwin, nge chomongun an lifang esap tongeni awesi an song.