24
1 Kosap lolowoiti aramas mi ngau ika älälei om mochen chiechi ngeniir, 2 pun ra chök ekiekietä usun föförün mwänewüs, kapasen awer a afisätä osukosuk.
-20-
3 Eu imw a kaütä ren tipachem o nükünük ren mirit, 4 nge ia a wor silelap ie, ekewe rumwen lon ra ur ren sokopaten pisek mi aüchea me mürina.
-21-
5 Eman aramas mi tipachem a wor an manaman, nge eman aramas mi silelap a fokun wor an pöchökül. 6 Kopwe akomwen föri om akot me mwen om kopwe feila ngeni maun, nge ia a wor chomong chon öüröür ie, a wor win.
-22-
7 Kapasen tipachem ra kon tekia ngeni eman chon tiparoch, esap wor och mine a tongeni apasa lon mwichen pwüngüpwüng.
-23-
8 Eman mi ekiekietä mine a ngau epwe iteni chon afisätä rawangau. 9 Mine eman chon tiparoch a ekiekietä iei tipis, nge aramas ra oput eman mi turunufasei chon arun.
-24-
10 Are ka apilükingau lon fansoun riaföü, om pöchökül a kisikis.
-25-
11 Kopwe amanaua chokewe ra nukunuk ngeni mäla. Kopwe amwöchü chokewe mi äpäp ngeni ar repwe ninnila. 12 Are ka apasa pwe kosap silei usun ei lapalap, ifa usun, ewe mi atittina leluken aramas esap küna? Ifa usun, ewe mi mamasok esap silei? I epwe liwini ngeni eman me eman aramas ükükün liwinin an föför.
-26-
13 Nei, kopwe ün chönün chunen, pun a annö. Nge usun supun ewe fasen chunen a arar ngonuk, 14 iei usun kopwe silei pwe tipachem epwe mürina ngonuk. Are ka küna tipachem, epwe wor om apilüköch ngeni ewe fansoun mwom, nge kosap lichipüng lon om apilükülüköch.
-27-
15 Kosap operi imwen ewe chon pwüng usun eman aramasangau, kosap pwal tolong lon o angei pisekin fän pöchökül. 16 Pun inamwo ika eman chon pwüng a turula fän fisu, a chök pwätäsefäl. Nge feiengau epwe tori ekewe aramasangau.
-28-
17 Kosap meseik ren chon oputom, lupwen a tolong lon feiengau, kosap pwal pwapwa, lupwen a chepetek. 18 Pun ewe Samol mi Lapalap epwe küna o oput ei lapalap, epwe pwal asepa an song seni ätewe.
-29-
19 Kosap öürek pokiten ekewe chon föföringau, kosap pwal lolowo ngeni ekewe aramasangau. 20 Pun ekewe chon föföringau esap wor ar apilüköch ngeni ewe fansoun mwer, nge manauen ekewe aramasangau epwe müchüla.
-30-
21 Nei kopwe niuokusiti ewe Samol mi Lapalap o asamolu ewe king, nge kosap chiechi ngeni chokewe mi ü ngeniir. 22 Pun feiengau epwe müttir toriir. Nge iö a tongeni silei ewe mäfeiengau epwe feito seni Kot me ewe king?
23 Ikkei pwal ekoch mwiitun seni ekewe mi tipachem: A ngau ngeni eman soukapwüng an epwe lifilifil aramas lon kapwüng. 24 Are a apasa ngeni ewe chon tipis pwe esap wor an tipis, ekewe aramas meinisin repwe otteki o oputa. 25 Nge ekewe soukapwüng mi apwüngü ekewe chon tipis repwe fefeitä o iteüöch. 26 Eman mi pälüeni chienan fän wenechar, iei asisilen ar pwipwiöchfengen fän let.
27 Kopwe akomwen amolätä o fotuki om kewe tanipi, pwe epwe wor mine kopwe manau seni, mürin na kopwap aüetä imwom o popuetä eu famili.
28 Kosap pwärätä mettoch mi ngau usun chon arum nge esap wor popun, kosap pwal apasa kapas atuputup usun. 29 Kosap apasa, “Ngang üpwe föri ngeni ewe aramas usun mine a föri ngeniei. Üpwe liwini ngeni won ükükün mine a föri ngeniei.”
30 Üa fetal ünükün än eman chon chipwang tanipi, üa fetal ünükün eu tanipin wain än eman aramas esap wor an mirit. 31 Iwe, üa küna pwe ewe tanipi a kula ren iräfölüföl, ewe pwül a pwölüla ren pötöwölingau, nge tittin we tittin fau a sönüla. 32 Lupwen üa nenengeni ei, üa ekieki usun o kaiö eu lesen seni: 33 Ekis möür, ekis ächikichik, ekis kumwuchufengeni pau o asösö. 34 Nge lupwen ka möür, wöüngau me osupwang repwe toruk usun eman chon solä a feito fän an pisekin afeiengau. ✡SalF 6.10-11