1 Ai Kot, kosap fanafanala,

ai Kot, kosap mosonoson ika asösö.

2 Pun nengeni, chon ü ngonuk ra akürang,

nge chokewe mi oputok ra achimwätä mökürer.

3 Ra rawangauei noum aramas fän atuputup.

Ra ekiekietä mine a ngau ngeni noum kewe ka tümwünüür.

4 Ra apasa, “Ou etto, ousipwe aroserela pwe resap chüen eu mwü,

esap pwal wor eman epwe chüen chechemeni Israel.”

5 Ewer, ra tipeeufengen le rawangau.

Ra föri eu pwonen atipeeufengen pwe repwe ü ngonuk.

6 Ekewe chon Etom me ekewe mwirimwirin Ismael,

ekewe chon Moap me ekewe mwirimwirin Hakar,

7 ekewe chon Kepal, chon Amon me chon Amalek,

ekewe chon Filistia me chokewe mi imweimw lon ewe telinimw Tirus,

8 pwal ekewe chon Asiria ra choniir.

Ir meinisin ra alisi ekewe mwirimwirin Lot.

9 Kopwe föri ngeniir usun mine ka föri ngeni chon Mitian,

usun mine ka föri ngeni Sisera me Japin arun ewe chanpupu Kison. ✡Souk 7.1-23; Souk 4.6-22

10 Ir ra ninnila me Entor,

inisir a usun chök kiten mongö won pwül.

11 Kopwe föri ngeni ar kewe aramas tekia pwe repwe usun chök Orep me Seep,

nge ar kewe samol meinisin repwe usun chök Sepa me Salmuna, ✡Souk 7.25; Souk 8.12

12 ir chokewe mi apasa, “Ousipwe angei fän itach

ekewe fanüen Kot pwe sipwe fanüeni.”

13 Ai Kot, kopwe föri pwe repwe usun chök pipisüsü,

pwal usun chök fetilipwas asepwäl a ässala.

14 Usun ekkei a kenala ewe wöllap,

usun ngetengeten ekkei a akkara ekewe chuk,

15 iei usun kopwe tapweriir ren om asepwäl mi pöchökül

o eniwokusuur ren om mölümöl.

16 Kopwe atoto wor säw,

pwe repwe küttok, ai Samol mi Lapalap.

17 Amwo repwe säw o nom lon niuokus watte tori feilfeilachök.

Amwo repwe mäla lon itengau.

18 Iwe, repwe silei pwe en ewe mi iteni Samol mi Lapalap,

en chök Ewe mi Unusen Tekia won unusen fanüfan.