98
Mwareiti än Kot pwüng
98.1-9
Echö köl.
Oupwe eäni echö köl mi fö ngeni ewe Samol mi Lapalap,
pun a föri mettoch mi amwarar.
An manaman me an pöchökül mi pin ra afisätä an win.
Ewe Samol mi Lapalap a asile ngeni aramas an win,
a pwärätä an pwüng me fän mesen chon ekewe mwü.
A chechemeni an tong ellet me an allükülük ngeni chon Israel.
Aramasen fanüfan meinisin ra küna usun än Kot amanaua aramas.
 
Oupwe eäni eu mweireiren pwapwa ngeni ewe Samol mi Lapalap, ämi chon fanüfan meinisin.
Oupwe chietä echö kölün pwapwa me kölün mwareiti Kot.
Oupwe kölün mwareiti ewe Samol mi Lapalap
fän ükülele, pwal fän sokopaten pisekin ettik.
Oupwe eäni eu mweireiren pwapwa fän rappwa me puun sewi
me fän mesen ewe King, ewe Samol mi Lapalap.
 
Ewe matau epwe ngüngü, pwal mönümanau meinisin mi nom lon.
Fanüfan epwe köl, pwal aramas meinisin mi nom won.
Ekewe koluk repwe alopolop,
ekewe chuk repwe kölfengen fän pwapwa.
Repwe köl me fän mesen ewe Samol mi Lapalap,
pun epwe feito o apwüngü chon fanüfan.
Epwe apwüngü chon ekewe mwü fän pwüng me wenechar.