1 Mürin eman me lein ekewe füman chon läng mi amwöchü ekewe fisu sepi a feito rei o üreniei, “Kopwe etto, üpwe aiti ngonuk usun än ewe fin lisowu mi iteföüla epwe küna apwüng, wewen, iei ewe telinimw watte mi kaütä arun chomong chanpupu. ✡Jer 51.13 2 Ekewe kingen fanüfan ra föri föförün lisowu ngeni o ekewe aramasen fanüfan ra puchula ren ar ün ünümen neminewe we wainen lisowu.” ✡Ais 23.17; Jer 51.7

3 Mürin ewe chon läng a uweieila lon eu fanüapö lupwen ai nom lon Ngün. Ikenan üa küna eman fefin mi mot won eman manmwacho mi par. Ei manmwacho a kula won inisin ren it mi turunufasei Kot. A wor fisu möküran me engol mächän. ✡Pwär 13.1 4 Ei fefin a üföüf üf mi parachol me parapar, a pwal foute ngeni sokopaten fout seni kolt, fau mi aüchea me föün pwei. A amwöchü lepöün eu kap seni kolt mi ur ren sokopaten mettoch mi anioput me limengauen an föförün lisowu. ✡Jer 51.7 5 A mak eu it won chamwan a monomon wewen: Papilon mi lapalap, inelapen ekewe fin lisowu meinisin me ekewe föför mi anioput won fanüfan. 6 Üa küna ewe fefin pwe a puchula ren chaan ekewe chon pin me chaan chokewe mi ninnila pokiten ar allükülük ngeni Jesus.

Lupwen üa küna neminewe, üa fokun mairü. 7 Nge ewe chon läng a aisiniei, “Pwota ka mairü? Üpwe pwäri ngonuk wewen ewe monomon usun ewe fefin me ewe manmwacho mi uwei neminewe, ewe manmwacho mi wor fisu möküran me engol mächän. 8 Ewe manmwacho ka küna a manau me lom, nge iei esap chüen manau, epwele feitä seni lon ewe pwang mi alolol pwe epwe tolong lon feiengauen pöütmwälila. Ekewe aramas mi nom won fanüfan iter esap mak lon ewe puken iten chon manau me mwen än Kot esamwo föri fanüfan, ir meinisin repwe mairü lupwen repwe nenengeni ewe manmwacho, pun a manau me lom o iei esap chüen manau, nge epwe pwal pwäsefäl. ✡Tan 7.7; Pwär 11.7; Kölf 69.28

9 “Iei lomoten tipachem me silelap. Ekewe fisu mökür wewen fisu chuk ewe fefin a mot won. 10 Ra pwal wewe ngeni füman king. Limman leir ra fen mäla, eman a chüen nemenem, nge ewe eman esamwo war. Iwe, lupwen epwe war, epwe chök nemenem lon fansoun mochomoch. 11 Ewe manmwacho mi manau me lom, nge iei esap chüen manau, i ewe awalumanün king, eman me lein ekewe füman. Nge epwe tolong lon feiengauen pöütmwälila.

12 “Ekewe engol mächä ka küna, ir engol king resamwo popuetä le nemenem, nge epwe toriir ewe pwüüng pwe repwe nemenem lon wisen king fiti ewe manmwacho lon ükükün eu awa chök. ✡Tan 7.24 13 Ekei engol king ra tipeeufengen, iwe, ra ngeni ewe manmwacho ar pöchökül me nemenem. 14 Repwe maun ngeni ewe Lam, nge ewe Lam epwe akufuur, pun i ewe Samol mi lap seni ekewe samol meinisin, pwal i ewe King mi tekia seni ekewe king meinisin. Nge chokewe mi tapwela mürin ir chon kö, chon fil me chon allükülük ngeni.”

15 Mürin ewe chon läng a pwal üreniei, “Ekewe koluk ka küna, ewe fin lisowu a mot arur, wewen mwü, mwichen aramas, ainang me kapas. 16 Nge ekewe engol mächä ka küna, pwal ewe manmwacho repwe oput ewe fin lisowu. Repwe angei seni mettochun meinisin o likiti neminewe lon an selela. Repwe ochei fitukan o kenala ren ekkei. 17 Pun Kot a atolonga lon letiper pwe repwe apwönüetä an ekiek ren ar repwe tipeeufengen le ngeni ewe manmwacho pöchökülen ar nemenem tori än Kot kapas repwe pwönüetä.

18 Ewe fefin ka küna, iei ewe telinimw mi lapalap a nemenem won ekewe kingen fanüfan.”