11
Ekewe ruoman chon pwärätä
11.1-14
1 Mürin eman a ngeniei efoch wok mi wewe ngeni efoch wok minen aükük. Iwe, a üreniei, “Kopwe feila o aükü än Kot we imwenfel me ewe rongen asor, kopwe pwal aleani chokewe mi fel lon. ✡Is 40.3; Sek 2.1-2 2 Nge kosap aükü ekewe leni lükün ewe imwenfel, pun Kot a ngeni ekewe chon lükün Israel ar repwe puri ewe Telinimw mi Pin lon ükükün faik me ruu maram. ✡Luk 21.24 3 Iwe, üpwe tinala nei kewe ruoman chon pwärätä mi üföüf üf seni tuk, repwe arongafeili än Kot kapas lon ekewe engöröü ruopükü wone rän.”
4 Ekei ruoman chon pwärätä, ir ekewe ruofoch irä olif me ekewe ruofoch lenien atittin mi ü mwen ewe Samolun fanüfan. ✡Sek 4.3,11-14 5 Ika chon oputer ra mochen afeiengauer, ekkei epwe ngetewu seni lon awer o keniirela. Iei usun, ika eman a mochen afeiengauer epwe ninnila. 6 A wor ar manaman ar repwe pinei läng pwe esap püngütiu üt lon ükükün ewe fansoun ra arongafeili än Kot kapas. A wor ar manaman won ekewe puächen koluk ar repwe awili ngeni cha. A pwal wor ar manaman ar repwe afeiengaua fanüfan ren sokopaten feiengau fansoun inet chök ra mochen. ✡1.King 17.1; Eks 7.17-19; 1.Sam 4.8
7 Iwe, lupwen repwe wes le arongafeili ar afalafal, ewe manmwacho mi towu seni lon ewe pwang mi alolol epwe maun ngeniir. Iwe, epwe akufuur o niirela, ✡Tan 7.7,21; Pwär 13.5-7; 17.8 8 nge somäär repwe nom won alen ewe telinimw watte, ia ar we Samol a iräpenges ie. Iten ei telinimw lon kapasen awewe Sotom me Isip. ✡Ais 1.9-10 9 Iwe, lon ükükün ülüngat esop rän aramasen ekewe mwü me ainang me kapas me mwich repwe nenengeni ekewe somä, nge resap mwütätä pwe repwe peias. 10 Iwe, ekewe aramasen fanüfan repwe fokun pwapwa pokiten ekei ruoman soufos ra mäla. Repwe föri apwapwan mine a fis o lifangfengen lefiler, pun ekei ruoman ra atoto watten riaföü won chon fanüfan. 11 Nge mürin ülüngat esop rän eu ngasangasen manau seni Kot a tolong lor, iwe, ra ütä o chokewe meinisin mi küneer ra fokun rükö. ✡Is 37.10 12 Mürin ekewe ruoman soufos ra rongorong eu möngüngü mi leüömong a kapas ngeniir seni läng, “Oupwe feitä ikei!” Lupwen ekewe chon oputer ra nenengeniir, ra feita läng lon eu kuchu. ✡2.King 2.11 13 Lon ewe chök otun a wor eu chechechin fanü mi pöchökül o eu leengolun ewe telinimw a tala. Iwe, fisungeröü aramas ra mäla ren, nge ekewe lusun aramas mi chüen manau ra fokun rükö o mwareiti manamanen ewe Kot mi nom läng. ✡Pwär 6.12; 16.18
14 Ewe aruen feiengau a wes, nge ewe aülüngatin epwe müttir feito.
Ewe afisuen rappwa
11.15-19
15 Mürin ewe afümanün chon läng a ettiki nöün rappwa, iwe, a wor chomong möngüngü mi leüömong lon läng, ra apasa, “Ewe manamanen nemeni fanüfan, iei a nom ren ach Samol me nöün we Messaia. Iwe, epwe nemenem tori feilfeilachök.” ✡Eks 15.18; Tan 2.44; 7.14,27 16 Mürin ekewe rüwe me föman souakom mi mot won ar lenien motun king mwen mesen Kot ra chapetiu o fel ngeni Kot. 17 Iwe, ra apasa,
“Äm aia kilisou ngonuk äm Kot, Samol mi Unusen Manaman,
ka nom iei o ka fen nonom,
pun ka angei om manaman mi lapalap
o popuetä le nemenem!
18 Ekewe chon lükün Israel ra fokun song,
pun om lingeringer a war,
ewe fansoun ekewe mi mäla repwe küna kapwüng.
A war ewe fansoun om kopwe liwiniöchü ngeni
noumw kewe chon angang ekewe soufos, me noumw kewe chon pin,
pwal chokewe meinisin mi meninituk,
ekewe aramas tekia me ekewe aramas kis.
A war ewe fansoun om kopwe afeiengaua chokewe mi afeiengaua fanüfan.” ✡Kölf 2.5; 110.5; 115.13
19 Mürin än Kot we imwenfel lon läng a sukula, o a pwä ewe pworofel mi nom ikenan. Iwe, a fis fifin inefi, ngüngü me chopun chopulap, pwal chechechin fanü me üten fau mi püngüchou.