1 Iwe, ewe chon läng mi piin kapas ngeniei a feitosefäl o apwöküei, usun eman a apwökü eman seni an möür. 2 Iwe, a aisiniei, “Met ka küna?” Nge üa pälüeni, “Üa küna eu lenien atittin seni kolt, nge mi wor eu sepi fän iten noppuk a nom won. Mi pwal wor fisu lamp won ewe lenien atittin, nge fisu paip ra feila ngeni ekewe lamp. 3 Iwe, a wor ruofoch irä olif ünükün ewe lenien atittin, efoch a nom pelifichin, nge efoch a nom pelimöngün.” ✡Pwär 11.4 4 Mürin üa aisini ewe chon läng mi piin kapas ngeniei, “Met wewen ekei mettoch, ai samol?” 5 Nge ewe chon läng a aisiniei, “Kosap silei wewen ekei mettoch?” Iwe, ngang üa pälüeni, “Apwi, ai samol.” 6 Mürin, ewe chon läng a üreniei, “Iei alon ewe Samol mi Lapalap ngeni Serupapel: Esap fis om angang ren pöchökül, esap pwal fis ren manaman, nge epwe fis ren Ngüni. Ngang ewe Samol mi Unusen Manaman üa kapas. ✡Esr 5.2 7 Are ekewe osukosuk repwe tekia usun chuk, repwe wiliti maasies me mwom. En Serupapel kopwe försefäli ewe Imwenfel, nge lupwen kopwe amasalong ewe föün amüchülan lon lenian, ekewe aramas repwe kökkö fän leüömong, ‘Feiöch, feiöch epwe nonom won.’ ” 8 Iwe, ewe Samol mi Lapalap a pwal kapas ngeniei, 9 “Serupapel a föri longolongun ei Imwenfel, i epwe pwal awesala. Are epwe fis ei, nei aramas repwe silei pwe ngang ewe Samol mi Unusen Manaman üa tinuketo rer. 10 Iö kana mi esita ewe rän, lupwen ewe angang a popuetä, pun a kükün, repwe meseik, lupwen repwe küna pwe Serupapel a sopwela le aüetä ewe Imwenfel.” ✡Pwär 5.6

Iwe, ewe chon läng a üreniei, “Ekei fisu lamp mesen ewe Samol mi Lapalap mi nenefetal won unusen fanüfan.” 11 Mürin üa aisini ewe chon läng, “Met wewen ekewe ruofoch irä olif mi nom pelifichin me pelimöngün ewe lenien etittin?” ✡Pwär 11.4 12 Üa pwal aissefäl, “Met wewen ekewe ruofoch palen irä olif mi nom ünükün ekewe ruofoch paip seni kolt, ewe ia ewe noppuk a niniwu me ie?” 13 Iwe, a aisiniei, “Kosap silei wewen ekei mettoch?” Nge üa pälüeni, “Apwi, ai samol.” 14 Mürin a üreniei, “Ikkeiir ekewe ruoman mwän mi kepit ra angang ngeni ewe Samolun unusen fanüfan.”