1 Mürin, Kot a aküna ngeniei Josua ewe souasor mi lap mi ütä fän mesen nöün ewe Samol mi Lapalap chon läng, nge Satan a ütä lepelifichin Josua pwe epwe atipisi. ✡Esr 5.2; Pwär 12.10 2 Iwe, nöün ewe Samol mi Lapalap we chon läng a üreni Satan, “Ewe Samol mi Lapalap epwe apwünguk, Satan. Ewe Samol mi Lapalap mi filätä Jerusalem epwe apwünguk. Ifa usun, ätei esap wewe ngeni efoch wes eman a atowu seni ekkei?” ✡Jut 9 3 Iwe, Josua a ütä fän mesen ewe chon läng, nge a üföüf üf mi limengau. 4 Iwe, ewe chon läng a üreni ekewe chon künö mi ütä me mwan, “Oupwe pwiliti seni ei mwän ekewe üf mi limengau.” Nge a apasa ngeni Josua, “Nengeni, üa angei senuk om tipis, nge üpwe aüföüfa ngonuk üf mi mürina.” 5 A pwal üreniir, “Oupwe aimweimwa ngeni eu akkau mi limöch.” Iei mine ra aimweimwa ngeni eu akkau mi limöch o aüföüfa ngeni ekewe üf mi limöch. Nge nöün ewe Samol mi Lapalap chon läng a ütä ünükün.

6 Iwe, nöün ewe Samol mi Lapalap we chon läng a üreni Josua, 7 “Iei alon ewe Samol mi Unusen Manaman: Are kopwe aleasochisi ai kewe allük o föri ai kewe angang üa awisa ngonuk, mürin kopwe nemenem me lon imwei o tümwünü ai kewe leni ünükün. Üpwe pwal mwüt ngonuk pwe kopwe nom lon eu leni me lein ekewe chon läng mi ütä ikei. 8 Kopwe aüseling, en Josua ewe souasor mi lap, en me chiechiom kewe mi nom reöm, ämi eu asisilen feiöch epwe war: Üpwe emwenato nei we chon angang itan Ewe Palan. ✡Jer 23.5; 33.15; Sek 6.12 9 Üa isetiu fän mesen Josua eföü chök fau mi wor fisu lepekin. Üpwe ruputi och kapas won, nge lon eu chök rän üpwe amoela än chon ewe fanü tipis. 10 Lon ewe fansoun iteiten eman me eman me leimi epwe kökkörato chon arun pwe epwe mot ren fän an irän wain me an irä fik fän kinamwe, iei alon ewe Samol mi Unusen Manaman.” ✡Mik 4.4