6
Künaen ewe soufos usun ekewe fofoch woken
6.1-8
1 Iwe, üa netäsefäl o küna fofoch woken ra feito me lefilen ruu chuk, nge ekewe chuk ra seni piras. 2 Iwe, orisin ewe aefochun woken ra parapar, orisin ewe aruofochun woken ra chol, ✡ Pwär 6.4-5 3 orisin ewe aülüfochun ra pwech, nge orisin ewe afofochun woken ra tiketik. Ir meinisin ra fokun pöchökül. ✡ Pwär 6.2 4 Mürin üa aisini ewe chon läng mi piin kapas ngeniei, “Met wewen ekei woken, ai samol?” 5 Nge ewe chon läng a pälüeniei, “Ikkeiir ekewe föman ngün seni läng mi towu seni fän mesen ewe Samolun unusen fanüfan. ✡ Pwär 7.1 6 Ewe woken mi chol orisin a feila ngeni ewe fanü efeng, ewe mi pwech orisin a feila ngeni ewe fanü lotou, nge ewe mi tiketik orisin a feila ngeni ewe fanü ör.” 7 Lupwen ekewe oris mi fokun pöchökül ra towu, ra fokun pacheu ar repwe feila raunei fanüfan. Iwe, ewe chon läng a üreniir, “Oupwe feila raunei fanüfan.” Iei mine ra feila raunei fanüfan. 8 Mürin, ewe chon läng a kapas leüömong ngeniei, “Ekewe oris mi feila ngeni ewe fanü efeng ra amanasösöütiu än ewe Samol mi Lapalap song.”
Epa mwärämwär fän iten Josua
6.9-15
9 Iwe, ewe Samol mi lapalap a üreniei, 10 “Kopwe angei silifer me kolt seni ekewe chon oola iter Heltai, Topia me Jetaia, ir ätekewe mi liwinto seni Papilon. Lon ewe chök ränin kopwe feila lon imwen Josia nöün Sefania we mwän. 11 Kopwe föri epa mwärämwär seni ewe silifer me kolt ra ngonuk o amwärämwärätä won möküren Josua ewe souasor mi lap nöün Jehosatak we mwän. 12 Iwe, kopwe üreni, ‘Iei alon ewe Samol mi Unusen Manaman: Nengeni, iei i ewe mwän mi iteni Ewe Palan. Epwe märitä seni lon lenian, epwe pwal aüsefälietä Imwenfelin ewe Samol mi Lapalap. ✡ Jer 23.5; 33.15; Sek 3.8 13 I ätewe epwe aüetä ewe Imwenfelin ewe Samol mi Lapalap o küna meninin me ren aramas usun eman king, epwe mot won an lenien motun king o nemeni nöün aramas. Epwe wor eman souasor ünükün. Iwe, repwe angangfengen lefiler fän kinamwe.’ 14 Nge ewe mwärämwär epwe nom lon Imwenfelin ewe Samol mi Lapalap pwe eu pisekin achem fän iten Heltai, Topia, Jetaia me Josia nöün Sefania we mwän.”
15 Iwe, chokewe mi nom lon fanü toau repwe feito o alilis le aüetä Imwenfelin ewe Samol mi Lapalap, nge ämi oupwe silei pwe ewe Samol mi Unusen Manaman a tinieito remi. Ei epwe fis, are oupwe wesewesen aleasochis ngeni alon ewe Samol mi Lapalap ämi we Kot.