1 Nge en Titus, kopwe fokun afalafal won met mi tipeeu ngeni pwüngüöchün ach lükülük. 2 Kopwe aiti ngeni ekewe chinlap mwän ar repwe tipefesir me tipepwetete, repwe tufichin nemeni püsin inisiir, repwe pöchökül lon ar lükülük, lon ar chen, pwal lon ar likitü. 3 Ina chök usun om kopwe aiti ngeni ekewe chinlap fefin ar repwe usun ekewe fefin mi manaueni eu manau mi pin. Resap luapas, resap riri ngeni ükün wain. Repwe fokun asukula mine a mürina 4 lon ar aiti ngeni ekewe föpwül usun ar repwe echeni pwülüer me nöür kana, 5 usun ar repwe nemeni püsin inisiir o eäni eu letip mi limöch, usun ar repwe sipeöch le angang lon imw, repwe eäni kirikiröch o aleasochis ngeni pwülüer, pwe esap wor eman epwe kapas ingau usun än Kot kapas.

6 Ina chök usun om kopwe fönöü ekewe alüal ar repwe nemeni püsin inisiir. 7 Nge en kopwe fokun eu lenien apirü lon om föför mi mürina. Kopwe wenechar o tiliken lon om afalafal. 8 Kopwe aea kapas mi pwüng, pwe esap wor eman epwe tongeni esitok. Mürin, ekewe chon oputom repwe säw, pun esap wor och kapas mi ngau repwe tongeni apasatä usuch.

9 Kopwe aiti ngeni ekewe amanau pwe repwe anomur fän nemenien ar kewe masta o apwapwaar lon mettoch meinisin. Resap wippin ngeniir, 10 ika soläni och seniir, nge repwe fokun pwärala pwe ra wenechar o allükülük. Iei usun repwe aitöchü ewe angangen asukul usun Kot ach Chon Amanau lon mettoch meinisin. 11 Pun Kot a pwärala an ümöümöch, pwe aramas meinisin repwe küna manau ren. 12 Än Kot ümöümöch a aiti ngenikich ach sipwe likitala ach turunufas me mochenian fanüfan, nge sipwe eäni mirit, pwüng me soulängöch lon ach manau lon ei fanüfan. 13 Iwe, sipwe witiwiti ewe Ränin feiöch sia apilükülük ngeni, lupwen lingen ach we Kot mi tekia, ach Chon Amanau Jesus Kraist epwe wareto. 14 I a fangala manauan fänäsengesich, pwe epwe angasakich seni ach föföringau meinisin, epwe pwal limetikich seni ach tipis, pwe sipwe nöün aramas mi fokun achocho le föri mine a mürina. ✡Kölf 130.8; Eks 19.5; Tut 4.20; 7.6; 14.2; 1.Pet 2.9

15 Ikkei ekewe mettoch kopwe aiti ngeni ekewe souläng. Kopwe aea om pwüüng lon wisom, lupwen kopwe apöchöküla än ekewe souläng lükülük, pwal lupwen om kopwe apwüngüür. Kosap mwüt ngeni eman epwe turunufaseek.