3
Kapasen öüröür fän iten souläng
3.1-11
Kopwe achema ngeni noumw kewe souläng, pwe repwe fokun aleasochis ngeni ekewe samol me sounemenem, repwe pwal molotä ngeni ar repwe föri sokun föför mi mürina. Kopwe üreniir, pwe resap kapas ingau usun eman aramas, repwe afisätä kinamwe me chiechiöch o pwärala ar tipepwetete ngeni aramas meinisin. Pun me lom püsin kich sia miritimang o aleasolap, sia pwal mwalechela. Sia nom fän nemenien sokopaten mochenia me pwapwan fanüfan. Sia manaueni eu manau mi ngau me lolowo, aramas ra oputakich, nge kich sia oputa ir. Nge lupwen än Kot, ach Chon Amanau kirikiröch me tong a pwäla, i a amanauakich, esap pokiten föriach föförün pwüng, nge pokiten an tong. A amanauakich ren ewe Ngünmifel, ewe mi aupusefälikich o ngenikich eu manau mi fö ren an limetikich. Kot a fokun tinatiu woch ewe Ngünmifel ren Jesus Kraist ach Chon Amanau, pwe ren an ümöümöch sipwe küna pwüng me ren Kot o eäni ewe manau esemüch sia apilükülük ngeni. A allükülük ekei kapas.
Üa mochen pwe kopwe fokun aweweöchü ekei mettoch, pwe chokewe mi lükü Kot repwe fokun alomota ar fansoun le föri föför mi mürina, sokun föför mi öch o lomot ngeni aramas meinisin. Nge kopwe afäluk seni ekewe kapasen anini esor mirit lon, seni tettelin uruwon ekewe lewo, seni ekiekin tipefesen me kapasen anini usun ekewe allük, pun ra lomotongau o aücheangau. 10 Kopwe chök apwüngü fän eu ika fän ruu eman aramas mi afisätä tipefesen, nge mürin kosap chüen iamüri. 11 En ka silei, pwe ena sokun aramas a fokun ngau. An kewe tipis a alletätä pwe i mi mwäl.
Än Paulus kapasen öüröür lesopolan
3.12-15
12 Lupwen üpwe tinala reöm Artemas ika Tikikus, kopwe achocho ngeni om kopwe feito rei Nikapolis, pun üa fen ekiekin nonom ikenan lon fansoun lefen. Föf 20.4; Ef 6.21-22; Kol 4.7-8; 2.Tim 4.12 13 Kopwe pwal achocho le alisi Senas ewe souallük me Apolos lon ar sai, kopwe pii pwe resap osupwang ren och. Föf 18.24; 1.Kor 16.12 14 Kopwe aiti ngeni chiechiach kewe souläng, pwe repwe fokun alomota ar fansoun le föri föför mürina, pwe epwe wor rer mine ra osupwang ren, pwe manauer esap lomotongau.
15 Chokewe meinisin mi nom rei ra kapong ngonuk. Kopwe uwei äm kapong ngeni chiechiach kewe souläng lon ach lükülük.
Än Kot ümöümöch epwe nonom remi meinisin.

3:12: Föf 20.4; Ef 6.21-22; Kol 4.7-8; 2.Tim 4.12

3:13: Föf 18.24; 1.Kor 16.12