2
Timoti furo Yesu Kirisito kiapam yai kawom morame
Ena na wanamyo, ne Kirisito Yesu gere moipika ena yaromi ne bei nokapu de erome. Ena ne yoporam boinga ako moro! Te na ka muruwo ari mapunomdi di mari deika ne fingai kam i ne ari kokonan nokapu beinga yokamai di erengero ena yokamai ari suwo koropane ama di erowaimie. Te ne Kirisito Yesu yaromi kiminem moiro ena tai ipun dongua tarom na fuka di narowanguamere i epe fuka di erowangua ako sikeiyo!* 2 Ti 1:8; 4:5 Ena na ka kuiam duwaro beiya ne firo! Te nen ta kiminem kokonan inangua yaromi kokonan ta ta ikenamie. Tamanumie. Yai ta yaromi kiapam bei tongua mun fi towaro bengua yaromi kiminem kokonan towane imie. Te epemere nenta ari ama ama bu dingai yaromi ama bu dire te bu dinga kam di guwo dungua dourom boikenangua ena yaromi mukom ta ikenamie.* 2 Ti 4:8 Te yai ta yoporam boiro tai i woiro kiapam bengua yaromi kopuna suna tei mokongua koma i nowame.* 1 Ko 9:7, 10, 14 Ena na ka i dikai nomanenumdi inokore ei fire moro! Ena no Ari Wanopanom ne akire di erowangoro ne ka i muruwo firanie.
Ena kakom kakom ne Yesu Kirisito towane inokore ei to! Na yaromi gunom kam di mari dere “Yaromi Dawiri awam moime. Te yaromi goiro tokoi arirome,” epe diye.* Ro 1:3-4; 1 Ko 15:4, 20 Ena na gunom kam epe dikai ari yokamai tai ipun dongua nareime. Te yokamai na ama kan si nareimba Yai Gumam kam i epemere kan fairo dikemie.* Ef 3:1; Fir 1:12-14 10 Ena iran na furo ari Yai Gumam gunom boi erongua yokamai gunom kam di mari de ereika ena tai ipun dongua muruwo inaika faname. Te yokamai Kirisito Yesu fi ki si tere kakom kakom moi kuwom suwainga ire te keranom sungua ama inainga na mun firaiye.* Kor 1:24 11 Te ka ta dungua kawom epe dume:* 2 Ko 4:11
Nonon yaromi gere ama gorapunga ena nonon yaromi gere ama yokori morapune. 12 Te tai ipun dongua nonon fuka di norongua yoporam boiro arire morapunga ena yaromi ari kiapanom bei erowangua kakom no ama ari kiapanom bei erowapune. Te no yaromi mounom wako towapungai yaromi ama epewo nonon mouwom wako norowamie.* Mt 10:33 13 Te nonon bei moiro “Yaromi mouwomdi dourom borapune,” duwapungai ena no kanom i dourom boikenapunga yaromi nenen kam dungua dourom borame. Yaromi ka i “Ka ta epe,” di fikemie.* Ro 3:3-4; Nam 23:19; Tai 1:2
Yai ta kokonan gan nokapu moingua Yai Gumam kanere mun fi tongua kam
14 Ena na ka i dikai ne firo kakom kakom ari yokamai di ero! Ena ne Yai Gumam yaromi okom muromdi tei moinga ka yoporam boiro ari yokamai “Ne yokamai awanoma kanom ka yo dingi kura kam di ipo ka dekeiyo!” di ero! Yokamai awanoma kanom ka yo dingi kura kam di ipo ka dowainga mapunom i akire di erekenamie. Tamanume. Yokamai bei niki de erome.* 1 Ti 6:4; Tai 3:9 15 Ena Yai Gumam ne mun fi erowaro bengua ne yoporam boiro kokonan beyo! Iran i ne gunom kam kawom ari kawom di mari dowanga ne kokonan gan nokapu moire gai goikenanie.* 1 Ti 4:6; Tai 2:7-8 16 Te ari yokamai Yai Gumam ka mapunom dikengua kam yo duwainga ne mounom wako erere tongi fo! Yokamai ka epe yo dinga Yai Gumam konom ma dere mounom wako towaime.* 1 Ti 4:7 17 Te numon niki donguai ori wom deingamere epe wom yokamai kanom i koro koro fungoro ari munmane Yai Gumam konom ma dowaimie. Te yokamai epe moingi suna tei Aimenia te Fairitu yai surai moipire.* 1 Ti 1:20 18 Yai surai kam mapunom kawom ma dere “Yai Gumam ari goinga yokamai akire di erongoro mora tokoi arireime. Ena iran okome no yokamai tokoi arire ganom dinom koi tokoi ikenapune,” epe ama dire dinga ari fi ki si teinga yokamai suwo koropane bei niki de ereimie. 19 Dumba ari iki kowiri kongo wom ikai koi singamere epe Yai Gumam ariyoma yokamai moinga koko tekenaime. Ena Yai Gumam kowiri bakomdi tei ka epe boimie:
Ari Wanopanom yaromi ariyoma mora kanume.
Te ka ta boinguai epe:
Ari “No yokamai Ari Wanopanom ariyoma moiro kam akire dupune,” epe di mari deinga yokamai mapunom niki dongua mounom wako towaime.
epe dume.* Nam 16:5; Yo 10:14-15; 1 Ko 8:3
20 Ena yai ta kam mokongua yaromi ikom tei kopare suwo suwo yo dume. Te kopare ta kongo gol bei eime. Te kopare ta kongo siwa bei eime. Kopare irai nokapu wom dunguai yokamai ire kokonan nokapu beime. Dumba kopare ta eri bei eime. Te kopare ta mansinom bei eime. Te kopare irai nokapu dikenguai ena yokamai ire kokonan yo morom beimie.* Ro 9:21 21 Ena epemere yai ta tai niki dongua mapunom i ma dere kopare nokapu wom dunguamere epe morangua ena kokonan nokapu bename. Te yaromi Ari Wanopanom bei moingoro yo tere morangua yaromi Ari Wanopanom kokonanom mapunom mapunom nokapu bei towame.* 2 Ti 3:17
22 Ena, yae, kakom kakom ne mapunom niki dongua muruwo gaima gako yokamai denom minomdi moko ereinga tongi fo! Te ne yo tongua mapunom i te fi ki si tenga mapunom i te denum minum ari mun fi erenga mapunom i te wira dinga mapunom i dourom boro! Te ne ari denom minom feke dongua Ari Wanopanom uwom boinga yokamai mapunom i ama dourom boro!* 1 Ti 6:11 23 Te ari ka fikeinga du dimba kura kam di ipo ka deinga yokamai ne mounum wako tere tongi fo! Ne mora finga yokamai ka dinga ka i kura kamui umari fume.* 1 Ti 4:7 24 Te Ari Wanopanom nuwi kokonan gan kura kam di ipo ka deinga faikename. Tamanume. Yaromi ari muruwo kokonan wira diro bei erere te “Ari ka nuwi ama si erowaika faname,” di firo moiro te ari bei niki de towainga mokom bai erekename.* 1 Ti 3:3; Tai 1:7 25-26 Te nuwi kokonan gan yaromi furo ari kanom ka singa yokamai “Koma Satan yaromi ari na kanam ka singa yokamai gai goi erongoro yokamai yaromi giramdi gore dime. Ena Yai Gumam yokamai akire di erowangoro inokore nokapu ei fire denom minom si awa tere ka mapunom kawom fire Satan kapu kin koinguamere dungui tei ma dere naime,” diro ka nuwi wira dire si erowame.

*2:3: 2 Ti 1:8; 4:5

*2:5: 2 Ti 4:8

*2:6: 1 Ko 9:7, 10, 14

*2:8: Ro 1:3-4; 1 Ko 15:4, 20

*2:9: Ef 3:1; Fir 1:12-14

*2:10: Kor 1:24

*2:11: 2 Ko 4:11

*2:12: Mt 10:33

*2:13: Ro 3:3-4; Nam 23:19; Tai 1:2

*2:14: 1 Ti 6:4; Tai 3:9

*2:15: 1 Ti 4:6; Tai 2:7-8

*2:16: 1 Ti 4:7

*2:17: 1 Ti 1:20

*2:19: Nam 16:5; Yo 10:14-15; 1 Ko 8:3

*2:20: Ro 9:21

*2:21: 2 Ti 3:17

*2:22: 1 Ti 6:11

*2:23: 1 Ti 4:7

*2:24: 1 Ti 3:3; Tai 1:7