1 Ena aro surai kakom goungoro aro ta kakom yai ta Keina iki birom ori i Gariri ikinom akainom ikai tei dungua moingua yaromi bei moiro opai inaro bengoro te Yesu mam yaromi opai ingui tei ama moingoro 2 te ari yokamai moiro Yesu te no gama yokamai unom boingoro ena no yokamai ure opai ingui tei ama kanupune. 3 Ena moipunga okome nuwi wain neinga goungoro ena Yesu mam bei moiro Yesu “Ari yokamai nuwi wain neinga goume,” di tongoro 4 ena “Manao, na bei furo nanan mapunonam i mari dowaika kakom kungua iran nuwi wain goungua nanan moiki dikeme,” di tongoro*Yo 7:30; 8:20 5 te mam fure nuwi kokonan gan yokamai “Yaromi ne yokama ka ta di erowangoro gore diyo!” di erome.

6 Ena te kongo kowi okonom koro muruwo koro towane teina tei dumie. Koma ari yokamai kowi sin okonom koro koro muruwo ire nuwi koiro iro ure kongo kowi towane towane fera dimie. Ena Yura ari yokamai beinga mapunom dourom boiro okonom te tai ta ta muruwo “Bi suwapune,” diro nuwi kongo kowi moingui ire bi singoro nuwi i goume.*Mk 7:3-4 7 Ena okome Yesu fure nuwi kokonan gan yokamai “Kongo kowi nuwi koiyo!” epe di erongoro nuwi tokoi koi mureime. 8 Koi mureingoro Yesu “Ena epena ne yokamai nuwi suwo fera dire ire fu kopuna kiapam bengua yai ta moingui tei fure teiyo!” di erongoro ena nuwi fera dire iro fure kopuna kiapam bengua yaromi teingoro 9 yaromi nuwi ne fingua nuwiyom i bengua tokoi u nuwi wain mora fungoro yaromi “Nuwi wain amai koime?” diro fikemba nuwi kokonan gan yokamai mora kanimie. Ena kopuna kiapam bengua yaromi moiro opai epena ingua yaromi uwom boiro 10 “Ne mapunom nokapu bene. Ari muruwo nuwi wain nokapu koma fera dire ari ereingoro ena nuwi wain munmane nere du dire moingoro nuwi wain a boikengua ereimba ne nuwi wain nokapu dunguairai ako moire ena epena i mari denie,” di tome.

11 Yesu nuwi ire awa tongoro nuwi wain fungua tarom ori yoporam boingua i Yesu Keina iki birom ori i Gariri ikinom akainom ikai tei dungua moiro koma bengua iran yaromi keranom bau boingua mapunom i mari dongoro te no gama yokamai fi ki si topune.*Lk 9:32; Yo 1:14; 4:54; 11:4

12 Ena yai opai ingua kopuna muruwo mora nopunga Yesu te mam te emerom yokama te no gama yokamai ma dere fu iki birom ori Kapanem fure aro kakom suwo koropane tei moipunie.*Mt 4:13

13 Ena Yura ari “Komari Yai Gumam no awanoma yokamai ei goikengua kakom firapune,” diro kopuna ori nowainga kakom girako towaro bengoro ena Yesu te no yokamai u Yerusarem iwa fure*Eks 12:1-27; Yo 6:4; 11:55 14 Yai Gumam fi mun ei teinga ikom ikai fure kanupunga ari non burumakau te non sipsip te kapuka kunuma eire kongo gure ne moingoro te ama kanupunga ari kongo mukom wapun ereinga koro ire mukom koro nen ereinga yokamai ama ame de moimie.*Mt 21:12-13; Mk 11:15-17; Lk 19:45-46 15 Ena yaromi kan iro ako kumai siro ari ikai moinga durange eiro te non burumakau te sipsip muruwo ama ikai moinga durange eiro ewi mena dero ena furo ari kongo mukom wapun ereinga yokamai boinom gura boire ako sungoro ena ari ama ewi mena dero 16 te furo ari kapuka meina beinga yokama “Iki i maket ikom dikeme. Ne yokama tai i iro mena fiyo! Ne yokama na aunam ikom tei moiro tai meina beinga i faikeme,” di erome.*Lk 2:49 17 Epe bengua iran no yaromi gama yokamai di firo ka mapunom munom epe boingua inokore ei fipunie: “Ne ikinum fi teikai na denam minamdi ikai fai si di narowamie,” epe boime.*Sam 69:9

18 Ena Yesu epe bengoro Yura ari ori yokamai kanero “Ne tora tai ta ta ori benanga no yokamai mora firapunga ‘Yai Gumam yoporam boingua erongoro ena ne ari ewi mena dowanga i faname,’ firapune?” diro mina wako teingoro 19 “Ne yokamai fi mun ei teinga ikomdai ako gui duwaingere na aro suraiye kakom kei gounaiye,” diro ka mokom bai erongoro*Mt 26:61; 27:40; Ap 6:14 20 ena “No Yura ari yokamai bei moiro fi mun ei teinga ikom i kei moipungai ena non iki 46 i dopunga dumia ena ne aro suraiye kakom tokoi kenano? Oro?” epe di teime. 21 Ari epe dimba yaromi nenen gam dinom Yai Gumam fi mun ei teinga ikom dunguamere epe dungua i di firo ka epe dume. 22 Ena okome Yesu mora goiro ariro fu dongoro kakom tei no Yesu gama yokamai Yesu kam epena dungua inokore ei firo ena kam mapunom te Yesu ka dungua i fi ki si daipunie.*Lk 24:6-8; Yo 12:16

23 Ena Yura ari firainga kopuna ori si gai neinga kakom i Yesu Yerusarem tei moingoro te ari yai opai munmane yaromi ari ganom nouro dinga tarom bengua kanero fi ki si teimba*Yo 7:31 24 yaromi ari beinga mapunom muruwo mora fingua ena “Yokamai kaningai tai ta ta ori beika ena fi ki si nareimie,” di kanero ena yokamai mangi mapunom beinga dourom boikeme. 25 Yaromi ari inokore ei moinga tarom muruwo mora fingua iran nenta yaromi ari kanom waiyom opom di towangua faikeme.