Nau Kôranh Brah Ngơi Nau Tâm Rnglăp Mhe Hêbrơ 8

Nau tâm rnglăp i ueh rlau

1 Dâng lĕ ndơ i hên lĕ mbơh nkoch i nây nơh jêng kơt nđa: Bân lĕ geh jêh du huê kôranh jan brah dŭt kuŏng, i gŭ mpeh bơh ma rnơl kađăch Kôranh Brah nơm i dŭt prêh ta kalơ trôk i ntŭk Păng nơm ri.* 2 Păng gŭ jan kar kôranh jan brah dŭt kuŏng ta ntŭk kloh ueh ta chun bok jan brah ma Kôranh Brah i ngăn ta kalơ trôk, i Kôranh Brah nơm jan, mâu ôh bunuyh jan.

3 Nau jan kar ma dâng lĕ rngôch mpôl kôranh jan brah dŭt kuŏng, jêng nhhơr ndơ ma dăn Kôranh Brah yô̆ nau tih*, ndrel ma nhhơr ndơ êng êng jât, lah ndri iăt ma khân păng geh ndơ ma nhhơr. 4 Lah Brah Yêsu hôm gŭ ta neh ntu dja, Păng mâu ôh dơi jan bunuyh jan brah, yorlah lĕ geh jêh mpôl bunuyh jan brah ma nhhơr ndơ ma Kôranh Brah tâng kơt lĕ geh nchih ta nau vay Môsê. 5 Khân păng sơm kơl jan kar ta ntŭk jan brah i bu jan tâng ntŭk jan brah i ngăn ta kalơ trôk i ntŭk Kôranh Brah nơm, yorlah nôk Môsê jan chun bok jan brah ma Kôranh Brah i nây nơh, Kôranh Brah lĕ đă n'hêl păng kơt nđa: ‘Ăn may njrăng, jan dâng lĕ tâng rup i Gâp lĕ nhhơ jêh ma may, nôk may gŭ ta kalơ yôk dja’†, ndri dâng ntŭk khân păng jan brah i nây jêng tâm ban ma gui i bu uănh mâu ôh say ndơ ngăn.* 6 Aƀaơ dja Kôranh Brah lĕ kơih Brah Yêsu ma jan kar kôranh jan brah dŭt kuŏng ta kalơ trôk, nau jan kar i nây ueh rlau ma nau jan kar bunuyh jan brah ta neh ntu dja, Păng jêng nơm leo ma nau tâm rnglăp mhe Kôranh Brah đah bunuyh i ueh rlau ma nau tâm rnglăp i ơm, jêh ri nau tâm rnglăp mhe i nây geh nau Kôranh Brah ton i ueh rlau.*

7 Lah nau tâm rnglăp i ơm nây lĕ dŭt ueh jêh, lah ndri mâu khăch ôh geh nau tâm rnglăp a êng jât ma ntrŏ.* 8 Yơn ma Kôranh Brah lĕ say phung ƀon lan jan rlau bơh nau tâm rnglăp ơm, dâng Păng lah kơt nđa:

‘Ta nar jât năp tay

Gâp mra ăn nau tâm rnglăp mhe ma phung Israel ro,

Ma mpôl Yuđa.

9 Nau tâm rnglăp mhe dja mâu ôh tâm ban ma nau tâm rnglăp nôk Gâp tâm rnglăp ndrel u che khân păng,

Nôk Gâp têk khân păng du lôh bơh bri Êsip nơh.

Khân păng mâu ôh gŭ răp jăp ndjôt tâng nau tâm rnglăp ndrel Gâp nây,

Ndri Gâp kŏ mâu hôm gŭ ndrel ma khân păng đŏng’, dja jêng nau ngơi Kôranh Brah nơm.

10 Jêh ri Kôranh Brah lah:

‘Nau tâm rnglăp i Gâp tâm rnglăp ndrel phung Israel ta nar jât năp tay, jêng kơt nđa:

Gâp mra tê̆ dâng lĕ nau Gâp đă kăr ta tôr khân păng,

Ndrel ma nchih nau đă i nây ta trôm nuih n'hâm khân păng,

Jêh ri Gâp mra jêng brah i khân păng yơk mbah,

Khân păng mra jêng phung ƀon lan Gâp nơm.

11 Ta nôk nây tay, mâu hôm khăch ôh geh bunuyh ntŭm nti ma bunuyh chiao meng, ndrel ma ndŭl mpôl khân păng nơm lah:

‘Ăn khân ay may gĭt năl Kôranh Brah’

Yorlah ntơm bơh bunuyh jê̆ ta nâm bu, tât ma bunuyh kuŏng rlau bu,

Dâng lĕ khân păng mra gĭt năl Gâp dadê,

12 Gâp mra yô̆ nđach dâng lĕ nau djơh nau tih khân păng,

Jêh ri Gâp mâu hôm ôh nkah ma nau tih khân păng jât’†.

13 Yor ma Kôranh Brah lĕ lah nau tâm rnglăp dja jêng nau tâm rnglăp mhe, ndri dâng nau tâm rnglăp i ơm mâu hôm ôh khlay ma jan tâng. Jêh ri ndơ ơm i mâu hôm geh khlay ma jan tâng bơi ma lĕ roh jêh.*

*8:1 8:1: Hêb 10:12; 12:2; Rôm 8:34

*8:3 8:3: Tă bơh Môsê sŏ dơn nau vay, geh mpôl bunuyh jan brah dơm dơi jan brah ma Kôranh Brah, bunuyh a êng iăt ma ăn ndơ nhhơ ma du huê bunuyh jan brah pre ma nhhơr ma Kôranh Brah. Phung kon sau Arôn dơm dơi jan bunuyh jan brah, ndri dâng Brah Yêsu i mâu ôh tă bơh kon sau Arôn mâu ôh dơi jan bunuyh jan brah ta neh ntu dja.

†8:5 8:5: NNg 25:40

*8:5 8:5: Kôl 2:17

*8:6 8:6: Hêb 7:22; 12:24; 1Ti 2:5

*8:7 8:7-13: Hêb 9:15; 10:14-18; NNg 24:7-8; Yêr 31:31-34; 1Kô 11:25; 2Kô 3:6

†8:12 8:8-12: Yêr 31:31-34

*8:13 8:13: Rôm 10:4