នាវកោរាញឞ្រាសងើយនាវតឹមរាង្លាប់មហែ ១ យោហាន 1

ឆ៝ម់បុត

យោហាន

ញចីស

រើស ១

នាវឞោកអ៝ន់ឞូគឹតនាល់ល៝រ

នើមញចីសឆ៝ម់បុតអ្យារាញាយោហាន ពាង់ញចីសឆ៝ម់បុតអ្យាក្លាប់លាសតានាម់ ៦០-៩០។ យោហាន ជេងកោរាញអ៝សម៝នឞ្រាសក្រីស តា ១២ នុយ្សមពោលកោរាញអ៝សម៝ន។ តានាវងើយគ្រែក មោអោសគែសញចីសរាញាយោហាន តាឆ៝ម់បុតអ្យា យើនមាផូងកោរាញផូងញឆីងមាឞ្រាសក្រីស ឞើសកើយជេសឞូញចីសនាវតឹមរាង្លាប់មហែ កើបយោហាន នាក់ញចីស ឞូមឹនលាសពាង់ញចីសឆ៝ម់បុតអ្យាតាប៝នអេផេឆោ ។ ពាង់ញជ្វាល់ឆ៝ម់បុតអ្យាអ៝ន់មាទឹងលែៈផូងញឆីងមាឞ្រាសយេឆូ ។ ពាង់ញចីសឆ៝ម់បុតយោហាននាវមហែមហានអ្វែសដ៝ង់ ឆ៝ម់បុតយោហានរើស ២‌ រើស ៣ នទ្រែលមាឆ៝ម់បុតនាវតឹមមពើលដ៝ង់។

នាវអុចនត្រ៝ង់តាឆ៝ម់បុតអ្យា

យោហាន អ៝ក់ញចីសមានាវរ៝ង់មាឞូ ពាង់លាសអ៝ន់ឞ៝ន់គឹតនហេលកោរាញឞ្រាសរ៝ង់មាឞ៝ន់ លាសឞ៝ន់រ៝ង់មាកោរាញឞ្រាស អ្យាត់មាឞ៝ន់រ៝ង់មាឞូអេងដ៝ង់។ ពាង់លាសឞ្រាសយេឆូ ជេងក៝នកោរាញឞ្រាសងាន់ ជេសរីជេងឞូនុយ្សងាន់ដ៝ង់ ពាង់ដាៈញជ្រាង់មានាវឞូនតីងក្លាៈ ពាង់លាសដ៝ង់ ឞូម៝សអីគុតាកោរាញឞ្រាស ឞូនុយ្សអីនៃមោហោមអោសជានតីស(១យហ ៣:៦; ៥:១៨) ជេសរីតឹមរ៝ង់នទ្រាង់នើមដ៝ង់(១យហ ៣:១០, ១៤; ៤:៨, ២០)។ ពាង់ញចីសគៃមាឞ៝ន់គឹតនហេលនានេៈងាន់ ឞ៝ន់ឆ៝ៈទើននាវរេសនហ៝រ៝(១យហ ៥:១៣)។ ទូត្រ៝ងអេងអីគែសនាវខ្លៃហោងាន់តាឆ៝ម់បុតអ្យាជេង ១យហ ១:៩ «យើនមាលាសឞ៝ន់មឞើសនាវតីសឞ៝ន់នើមមាកោរាញឞ្រាស កោរាញឞ្រាសយោៈមោហោមកើបនាវតីសឞ៝ន់ នហ៝មាតឹមឞានមារាវឞ៝ន់អ៝ន់ជេងក្ល៝សមោហោមគែសនាវអ្យើសនាវក្វែ យ៝រលាសពាង់រាប់ជាប់ ពាង់ឆ៝ង់ ពាង់ជានតឹងទឹងលែៈនាវពាង់ត៝ននើស»។

មឞើសនាវខ្លៃតាងកោៈតាឆ៝ម់បុតអ្យា

- ឞ្រាសយេឆូ ជេងនាវងើយអីអ៝ន់នាវរេស (១:១-៤)

- នាវគុតានាវអាង នទ្រែលមានាវគុតានាវង៝ (១:៥-២:២៩)

- ផូងក៝នកោរាញឞ្រាស នទ្រែលមាកោរាញអីតឹមរាទ៝ង់ដាសឞ្រាសក្រីស (៣:១-២៤)

- នាវអីងាន់ នទ្រែលមាឞូនុយ្សនតើយ្សងក្លាៈនាវងើយកោរាញឞ្រាស (៤:១-៦)

- នាវរ៝ង់ (៤:៧-២១)

- នាវទើយតានាវញឆីង (៥:១-២១)

ឞ្រាសយេឆូ ជេងនាវងើយអីអ៝ន់នាវរេស

1 នាវលែៈអើមគែសឞើសនតើមឆាអើមនើសងាន់ នាវហេនអីកោរាញអ៝សម៝នលែៈឆៃលែៈតាង់ជេស នាវអីនៃហេនមឞើសងក៝ចមាខាន់អៃមៃ។ ហេនលែៈឆៃនាវអីនៃមាមាត់ហេននើម ហេនលែៈគែសពាសនាវអីនៃមាតីហេននើមដ៝ង់ នាវអីនៃជេងឞ្រាសយេឆូក្រីស នើម ពាង់ជេងនាវងើយអីអ៝ន់នាវរេស។* 2 ពាង់អីអ៝ន់នាវរេសនៃ កោរាញឞ្រាសលែៈញហើឆាក់ពាង់អ៝ន់ហេនឆៃជេស ហេនអ្យាអីតើមឆៃ នទ្រែលមាមឞើសងក៝ចអ៝ន់មាខាន់អៃមៃពាង់អីជេងនាវរេសនហ៝រ៝នៃ។ អាល៝រនើសពាង់គុនទ្រែលឞឹពាង់នើមតាកាលើរី ជេសរីកោរាញឞ្រាសលែៈញហើពាង់អ៝ន់ហេនមាឆៃ។* 3 ហេនមឞើសងក៝ចអ៝ន់មាខាន់អៃមៃម៝សនទើអីហេនលែៈឆៃលែៈតាង់ជេស គៃមាខាន់អៃមៃលាប់គុតឹមរាង្លាប់នទ្រែលហេនដ៝ង់ ជេសរីឞ៝ន់លែៈគុតឹមរាង្លាប់ជេសនទ្រែលកោរាញឞ្រាសឞឹ នទ្រែលឞ្រាសយេឆូក្រីស អីក៝នពាង់នៃ។* 4 ជេសរីគ៝ប់ញចីសទឹងលែៈនាវអីអ្យាញជ្វាល់អ៝ន់ខាន់អៃមៃ គៃមាឞ៝ន់គែសនាវរាម់មអាកទុតហោ។*

នាវគុរេសតានាវអាង

5 អ្យាជេងនាវហេននតិញអីហេនលែៈតាង់ឞើសឞ្រាសយេឆូក្រីស ។ ហេនមឞើសងក៝ចនាវអីនៃអ៝ន់មាខាន់អៃមៃតាង់ដ៝ង់៖ កោរាញឞ្រាសជេងនាវអាង មោគែសអោសនាវង៝គុតាពាង់ ដេៈមោអើម។* 6 លាសឞ៝ន់លាស៖ “ឞ៝ន់នើមគុតឹមរាង្លាប់នទ្រែលកោរាញឞ្រាស” តីសមាមោអោសគុរេសតឹងនាវពាង់អុច ឞ៝ន់តឹមឞានមាហោមគុតានាវង៝ច្រាវ លាសនទ្រីឞ៝ន់លែៈងើយមរោសជេស មោអោសតឹងជាននាវងាន់។* 7 យើនមាលាសឞ៝ន់គុរេសតឹងនាវពាង់អុច ឞ៝ន់តឹមឞានមាគុតានាវអាង កើតពាង់គុតានាវអាងដ៝ង់។ លាសនទ្រីឞ៝ន់លែៈគុតឹមរាង្លាប់ឞាល់នទ្រែលមហាមឞ្រាសយេឆូ នើមអីក៝នកោរាញឞ្រាសតឹមឞានមារាវទឹងលែៈនាវតីសឞ៝ន់អ៝ន់ឞ៝ន់ជេងក្ល៝សតានាប់មាត់កោរាញឞ្រាស។*

នាវតីស នទ្រែលមានាវយោៈ

8 លាសឞ៝ន់លាស៖ “ឞ៝ន់មោអោសគែសនាវតីស ឞ៝ន់មរោសអេងឆាក់ឞ៝ន់នើម” ជេសរីនាវងាន់មោអោសគុតាឞ៝ន់។ 9 យើនមាលាសឞ៝ន់មឞើសនាវតីសឞ៝ន់នើមមាកោរាញឞ្រាស កោរាញឞ្រាសយោៈមោហោមកើបនាវតីសឞ៝ន់ នហ៝មាតឹមឞានមារាវឞ៝ន់អ៝ន់ជេងក្ល៝សមោហោមគែសនាវអ្យើសនាវក្វែ យ៝រលាសពាង់រាប់ជាប់ ពាង់ឆ៝ង់ ពាង់ជានតឹងទឹងលែៈនាវពាង់ត៝ននើស។* 10 លាសឞ៝ន់លាស៖ “ឞ៝ន់មោអោសជានតីស” អីនៃជេងឞ៝ន់លាសកោរាញឞ្រាសជេងនើមមរោស* ជេសរីនាវងើយកោរាញឞ្រាសមោអោសគុតាឞ៝ន់។

*1:1 ១:១៖ យហ ១:១-២

*1:2 ១:២៖ យហ ១:៤, ១៤; ១៥:២៧

*1:3 ១:៣៖ យហ ២០:៣១

*1:4 ១:៤៖ យហ ១៥:១១

*1:5 ១:៥៖ យហ ៨:១២; ១តម ៦:១៦

*1:6 ១:៦៖ ១យហ ២:៤, ៩; យហ ៣:២១

*1:7 ១:៧៖ ហេឞ ៩:១៤; ១ពេ ១:១៨-១៩

*1:9 ១:៩៖ នម ៣២:១-៥

*1:10 ១:១០៖ តានាវកោរាញឞ្រាសងើយលែៈគែសញចីសលាស៖ «មោគែសអោសឞូនុយ្សឆ៝ង់ ទូហ្វេមោគែសដ៝ង់»(នម ១៤:៣; រម ៣:១០)។