នាវកោរាញឞ្រាសងើយនាវតឹមរាង្លាប់មហែ ២ ពេត្រោស 3

នាវកោរាញយេឆូព្លឹវាច់

1 អើអ៝សនោតានាវញឆីងអីគ៝ប់រ៝ង់ អ្យាជេងឆ៝ម់បុតរើសឞារអីគ៝ប់ញចីសញជ្វាល់អ៝ន់មាខាន់អៃមៃ។ នាវតាត្រោមឆ៝ម់បុតលែៈឞារអ្យា គ៝ប់លែៈងកាសខាន់អៃមៃអ៝ន់ខាន់អៃមៃគែសនូយ្សនហ៝ម់នាវមឹនអ្វែស។ 2 ខាន់អៃមៃលើយអោសច្វេលទឹងលែៈនាវអីមពោលឞូនុយ្សនតើយ្សនាវងើយកោរាញឞ្រាសលែៈញចីសជេសកាល់អែនើស ទឹងលែៈខាន់ពាង់អីនៃអីឞូនុយ្សក្ល៝សអ្វែស។ លើយច្វេលដ៝ង់នាវឞ្រាសយេឆូក្រីស ដាៈ ពាង់អីកោរាញអីនើមនាក់រាក្លាយ្សឞ៝ន់ នាវដាៈអីនៃហេនអីមពោលកោរាញអ៝សម៝នលែៈជេសនតុមនតីខាន់អៃមៃនើស។

3 អ៝ន់ខាន់អៃមៃគឹតនាវអីខ្លៃរាលាវឞូអ្យា៖ តារានោកងគ្លែៈទុត*មរាគែសឞូនុយ្សអីគុងាវតឹងរាង្លៃឆាក់ខាន់ពាង់នើមកើញទើម ជេសរីគើមមឺចនាវនតីអីងាន់។* 4 ខាន់ពាង់មរាលាស៖ “ខាន់អៃមៃលាសឞ្រាសយេឆូក្រីស លែៈត៝នព្លឹវាច់តៃតានែសនតូអ្យា អាសពាង់អាបៃអ្យាហ្យើ? នតើមឞើសផូងអូចែឞ៝ន់ខឹតត៝ត់មាអាបៃអ្យាហោមកើតអើមនឹងទើម នទើតានែសនតូអ្យាហោមកើតអើម កើតនតើមញជេងនែសនតូនើសដ៝ង់ មោអោសឆៃគែសនាវរាគ៝ល់!” 5 យើនមាខាន់ពាង់អីនៃជានលាសច្វេល កោរាញឞ្រាសញជេងត្រោក នទ្រែលមានែសនតូជេងតាៈឞើសនាវងើយពាង់នើម កើសនែសលោសតាៈឞើសទាក ជេសរីកើសគុតាងក្លាងទាក។* 6 ជេសរីពាង់ទ៝ង់ទាកលេងទាកទើងគៃមាងគ្រ៝សលើយទឹងលែៈនទើតានែសនតូលែៈផ្យៅ។ 7 ជេសរីតាៈឞើសនាវងើយកោរាញឞ្រាសដ៝ង់ ត្រោក នទ្រែលមានែសនតូអាបៃអ្យា កោរាញឞ្រាសលែៈនទ្រាប់អ៝ន់អុញមាឆូលើយលែៈផ្យៅតានារពាង់ផាតទោយ្សទឹងលែៈឞូនុយ្ស នអ៝ប់មាងគ្រ៝សលើយផូងឞូនុយ្សអ្យើសអ៝ន់លែៈផ្យៅ។*

8 អើអ៝សនោតានាវញឆីងអីគ៝ប់រ៝ង់ អ៝ន់ខាន់អៃមៃកាសគឹតនាវអ្យា៖ មាកោរាញឞ្រាស ទូនារតឹមឞានមា ១០០០ នាម់ ជេសរី ១០០០ នាម់តឹមឞានមាទូនារទើមដ៝ង់។* 9 កោរាញយេឆូ មរាវាច់ងាន់តឹងនាវពាង់ត៝នអីនៃ កោរាញឞ្រាសមោអោសច្វេលមោអោសជ៝ៈអីរកើតឞូនុយ្សអាបាៈមឹន។ យើនមាពាង់អ៝ត់នូយ្សមាឞ៝ន់ យ៝រលាសពាង់មោអុចអោសអ៝ន់ទូហ្វេឞូនុយ្សរ៝សហេង ពាង់អុចងាន់អ៝ន់ទឹងលែៈឞូនុយ្សរាគ៝ល់លើយនូយ្សនហ៝ម់អ្យើស។* 10 នារកោរាញយេឆូ វាច់ ឞូមោអោសគឹតល៝រ ជេងតឹមឞានមាឞូនុយ្សនតុងហាន់នតុងឞូ។ នោកនៃត្រោកមរាលេកលែៈផ្យៅនអ៝ប់មាទុតនតែស ជេសរីទឹងលែៈនតីលនទើអុញមរាឆាលែៈផ្យៅ ជេសរីនែសនតូ នអ៝ប់មាទឹងលែៈនទើឞូជានតានែសនតូនើសឞូមរាឆៃនហេលនានេៈងាន់ គៃមាកោរាញឞ្រាសផាតទោយ្ស†។*

11 លាសទឹងលែៈនទើអីនៃមរារ៝សលេកលែៈផ្យៅកើតនៃងាន់ លាសនទ្រីតានាវគុងាវខាន់អៃមៃអ៝ន់ខាន់អៃមៃជានអ៝ន់ទុតអ្វែស នទ្រែលមាគុតឹមទីមានាវកោរាញឞ្រាសអុចហោងាន់ទោ! 12 អ៝ន់ខាន់អៃមៃញឆ្រោយ្សគុក៝ប់ ជេសរីអ៝ន់កើលគៃមានារកោរាញឞ្រាសផាតទោយ្សនៃអ៝ន់គើញត៝ត់ ជេងនារអីត្រោកមរាលេកអុញឆាលែៈផ្យៅ ជេសរីទឹងលែៈនទើមរារ៝សលេកតាអុញលែៈផ្យៅដ៝ង់។ 13 នទ្រីទឹងឞ៝ន់គុក៝ប់ត៝ត់គែសត្រោកមហែ នទ្រែលមានែសនតូមហែអីគែសនាវអ្វែសនាវឆ៝ង់អីលែៈពាង់ត៝នជេស។*

14 អើអ៝សនោតានាវញឆីងអីគ៝ប់រ៝ង់ យ៝រលាសខាន់អៃមៃហោមគុក៝ប់ទឹងលែៈនាវអីនៃ អ៝ន់ខាន់អៃមៃគែសនូយ្សនហ៝ម់គើយ្សហោងាន់ គៃមាកោរាញឞ្រាសមោអោសឆៃនាវមានទុយ្សតាខាន់អៃមៃអីតឹមឞានមានាវអូករាមាវ គៃមាពាង់ឆៃខាន់អៃមៃគុរេសដាប់មពាន់នទ្រែលពាង់ហ៝ៈ‌* 15 ជេសរីអ៝ន់ខាន់អៃមៃវ៝ត់នាវអ្យា នាវកោរាញឞ៝ន់អ៝ត់នូយ្សអេហ៝ៈពាង់ព្លឹវាច់នៃ តាៈឞើសពាង់អុចឞូនុយ្សគែសនាវរាក្លាយ្ស។ កើតនៃដ៝ង់ ពោល អីអ៝សនោតានាវញឆីងអីគ៝ប់រ៝ង់ ពាង់លែៈញចីសតាឆ៝ម់បុតអីពាង់ញជ្វាល់អ៝ន់មាខាន់អៃមៃនើស ពាង់ញចីសតឹងមានាវមឹនគឹតឞ្លាវអីកោរាញឞ្រាសលែៈអ៝ន់ជេសមាពាង់។* 16 អាប់ឆ៝ម់បុតអីពាង់លែៈគែសញចីស ពាង់ញចីសកើតអីនៃទាទេដ៝ង់។ តាឆ៝ម់បុតពាង់គែសនាវអាបាៈអីជេរវ៝ត់ ជានអ៝ន់ឞូនុយ្សអីរាលូក នទ្រែលមាឞូនុយ្សអីញឆីងមោន៝ប់រាគ៝ល់នាវជេរវ៝ត់ជេងតីសមានាវខ្លៃអើម កើតមាខាន់ពាង់លែៈគែសរាគ៝ល់នាវខ្លៃតានាវកោរាញឞ្រាសងើយអាបាៈអេងដ៝ង់ កើតនទ្រីជានអ៝ន់ឆាក់ខាន់ពាង់នើមនហ៝មារ៝សហេង។

នាវដាៈញជ្រាង់ងគ្លែៈទុត

17 អើអ៝សនោតានាវញឆីងអីគ៝ប់រ៝ង់ គ៝ប់លែៈអ៝ន់ខាន់អៃមៃលែៈគឹតទឹងលែៈនាវអីនៃជេស លាសនទ្រីអ៝ន់ខាន់អៃមៃគុញជ្រាង់ឆាក់ គៃមាខាន់អៃមៃមោអោសអ្យាត់តឹងនាវនតីងក្លាៈមពោលឞូនុយ្សអ្យើសអីនៃ ជេសរីច្វេលនាវនតីងាន់អីខាន់អៃមៃលែៈញអោត។* 18 យើនមាអ៝ន់ខាន់អៃមៃលើមាហោគុន៝ប់តានាវអ្វែសឞ្រាសយេឆូក្រីស នអ៝ប់មាតានាវគឹតនាល់ពាង់អីកោរាញឞ៝ន់ អីនើមរាក្លាយ្សឞ៝ន់។ ជេសរីទាន់រានេមានាវច្រេកលើបតាពាង់រានោកអាបៃអ្យា នហ៝មាបាបើនហ៝រ៝។ អើអ៝ន់គែសកើតនៃងាន់រ៝‡៕*៚

*3:3 ៣:៣៖ តានាវតឹមរាង្លាប់មហែមឞើសមាឞ៝ន់ ជេសឞ្រាសយេឆូ ហាវឆឹតតាកាលើត្រោក ត៝ត់មាពាង់ព្លឹវាច់ ជេងរានោកងគ្លែៈទុត។

*3:3 ៣:៣-៤៖ មថ ២៤:២៣-២៤; ១តម ៤:១-២; យដ ១:១៨-១៩

*3:5 ៣:៥-៦៖ នន ៧:៥-២៣

*3:7 ៣:៧៖ ១ពេ ៤:១៧-១៩; នតម ២១:១

*3:8 ៣:៨៖ នម ៩០:៤

*3:9 ៣:៩៖ ១តម ២:៤; តត ១:១

†3:10 ៣:១០៖ «នអ៝ប់មាទឹងលែៈនទើ...ផាតទោយ្ស» តាឆ៝ម់បុតអីញចីសមាតីអាបាៈគែសញចីសតឹមតីសឞាល់៖ «នអ៝ប់មាទឹងលែៈនទើអីគែសតានែសនតូមរារ៝សលេក»។

*3:10 ៣:១០៖ ១តេ ៥:២; មថ ២៤:២៩; នតម ២០:១១; ២១:១

*3:13 ៣:១៣៖ រម ៨:២០-២២; អេផ ១:១០

*3:14 ៣:១៤៖ តត ២:១៣

*3:15 ៣:១៥៖ ២ពេ ៣:៩; រម ២:៤

*3:17 ៣:១៧៖ ១កោ ១០:១២

‡3:18 ៣:១៨៖ «អើអ៝ន់គែសកើតនៃងាន់រ៝» មោលាស «អាមែន »។

*3:18 ៣:១៨៖ លក ២:១១