នាវកោរាញឞ្រាសងើយនាវតឹមរាង្លាប់មហែ ១ ពេត្រោស 1

ឆ៝ម់បុត

ពេត្រោស

ញចីស

រើស ១

នាវឞោកអ៝ន់ឞូគឹតល៝រ

នើមញចីសឆ៝ម់បុតអ្យារាញាពេត្រោស ពាង់ញចីសឆ៝ម់បុតអ្យាក្លាប់លាសតានាម់ ៦២ ក្លាប់លាស ២៩ នាម់ជេសឞ្រាសយេឆូ ទ៝ក់រេស។ ឞូមឹនលាសពាង់ញចីសឆ៝ម់បុតអ្យាតាប៝នរោម អីពាង់ក្វាល់«បាបីលោន » យ៝រលាសតានាវតឹមរាង្លាប់មហែឞូទ៝ង់រាញាបាបីលោន ងើយហោរមាទឹងលែៈផូងអីតឹមរាទ៝ង់ដាសកោរាញឞ្រាស(១ពេ ៥:១៣; នតម ១៧:១-១៨:២៤)។ ឞើសនតើមនើសពេត្រោស ជេងឞូនុយ្សវាង់កាទើម ជេសរីឞ្រាសយេឆូ ក្វាល់ពាង់ជេងកោរាញអ៝សម៝នតា ១២ នុយ្សមពោលកោរាញអ៝សម៝ននៃដ៝ង់ ឞូងខឹតពាង់តាប៝នរោម ក្លាប់លាសតានាម់ ៦៤-៦៨ យ៝រមាពាង់មឞើសងក៝ចនាវមហែមហានអ្វែស។ ពាង់ញចីសឆ៝ម់បុតអ្យាអ៝ន់មាទឹងលែៈផូងញឆីងគុលាមនតុកតាព្រាម់អឹឞ្រីជេៈតាឞ្រីក្វ៝ង់អាឆី ។ ពោល លែៈមឞើសងក៝ចនាវមហែមហានអ្វែសតាឞ្រីអីនៃ។

នាវអុចនត្រ៝ង់តាឆ៝ម់បុតអ្យា

ពេត្រោស អុចនហាវនូយ្សនហ៝ម់ផូងញឆីងមាឞ្រាសក្រីស យ៝រមាគែសអ៝ក់ឞូជានជេរជ៝ត់ជេសយ៝រមាខាន់ពាង់ញឆីងមាឞ្រាសក្រីស ពាង់នហាវនូយ្សនហ៝ម់ខាន់ពាង់អ៝ន់គុឆ៝ង់ អ៝ន់គុតឹមទីមានាវកោរាញឞ្រាសអុច ជេសរីជានតឹងនាវដាៈមពោលកោរាញឞ្រីទាក។ ពេត្រោស ក្វាល់ផូងញឆីង «ផូងអីគុចាសច្រាយជេងតឹមឞានមាផូងឞូនាច់តាៈឞើសឞ្រីអេង» ពាង់មោអោសអុចលាសជេងឞូនាច់តាឞ្រីអីនៃងាន់ អុចងើយហោរឞ្រីអីងាន់មាផូងញឆីងជេងតាប៝នអ្វែសតាកាលើត្រោក។ តានែសនតូអ្យា ទឹងលែៈឞូនុយ្សអីញឆីងមាឞ្រាសក្រីស ជេងតឹមឞានមាឞូនាច់ឞ្រីអេងទើម៖ «អើអ៝សនោតានាវញឆីងអីគ៝ប់រ៝ង់ ខាន់អៃមៃអីតឹមឞានមាឞូនុយ្សផូងឞូនាច់ឞ្រីអេងតានែសនតូអ្យា អីតឹមឞានមាឞូនុយ្សអីគុញជើសតានែសនតូអ្យាទូប្ល៝ត់ទើម...»(១ពេ ២:១១)។

មឞើសនាវខ្លៃតាងកោៈតាឆ៝ម់បុតអ្យា

- នាវអោបអ្វែសលាង់ (១:១-២)

- នាវរានើមផូងញឆីង នទ្រែលមានាវនតីអ៝ន់ផូងញឆីងគុរេសតឹមទីដាសនាវកោរាញឞ្រាសអុច (១:៣-២:១០)

- អាមើមនាវគុរេស គៃមាកោរាញឞ្រាសរាម់មអាក (២:១១-៤:១១)

- នាវគុរេសលាសគែសឞូជាននាវជេរជ៝ត់ (៤:១២-៥:១១)

- នាវនតិញងគ្លែៈទុត (៥:១២-១៤)

នាវអោបអ្វែសលាង់

1 ឆ៝ម់បុតគ៝ប់ពេត្រោស អីកោរាញអ៝សម៝នឞ្រាសយេឆូក្រីស ។ ទាន់អោបនាវអ្វែសលាង់ខាន់អៃមៃអីលែៈកោរាញឞ្រាសទែកើយ្សជេស អីគុចាសច្រាយជេងតឹមឞានមាផូងឞូនាច់តាៈឞើសឞ្រីអេងអីគុតាឞ្រីពុនតុស ឞ្រីកាលាតី ឞ្រីកាពាដោកៀ ឞ្រីអាឆី នទ្រែលមាតាឞ្រីបីថូនៀ ។ 2 កោរាញឞ្រាសឞឹលែៈអើមជេសកើយ្សខាន់អៃមៃ ជេសរីឞ្រាសហ្វេងអ្វែសជានអ៝ន់ខាន់អៃមៃជេងប៝នលានកោរាញឞ្រាស គៃមាខាន់អៃមៃអ្យាត់នាវឞ្រាសយេឆូក្រីស នទ្រែលមាគែសយោៈនាវតីសតាៈឞើសនាវអ្យ្រាសមហាមឞ្រាសយេឆូក្រីស នើមតាផូងខាន់អៃមៃ។ ទាន់នាវអ្វែស នទ្រែលមានាវដាប់មពាន់កោរាញឞ្រាសនើមគុតាខាន់អៃមៃលើមាហោលើមាអ៝ក់។*

នាវរានើមផូងញឆីង

3 អ៝ន់រានេកោរាញឞ្រាសអីឞឹឞ្រាសយេឆូក្រីស អីកោរាញឞ៝ន់។ តាៈឞើសនាវយោៈទុតក្វ៝ង់ពាង់នើម កោរាញឞ្រាសលែៈជានជេសនូយ្សនហ៝ម់ឞ៝ន់អ៝ន់មហែតឹមឞានមាអ៝ន់ឞ៝ន់ទែសទូតឹជឹត យ៝រមាពាង់លែៈជានឞ្រាសយេឆូក្រីស អ៝ន់ទ៝ក់រេសឞើសផូងខឹត នទ្រីឞ៝ន់គែសនាវរានើមន៝ប់រាក៝ក់ងាន់ពាង់មរាអ៝ន់ឞ៝ន់ទ៝ក់រេសដ៝ង់។* 4 ជេសរីឞ៝ន់មរាឆ៝ៈទើននទើអីឞ៝ន់មរាគែសមាឞ៝ន់នើមអីមោឞ្លាវអោម អីមោឞ្លាវបឹបើច អីមោឞ្លាវហ្វាញ់។ កោរាញឞ្រាសលែៈនទ្រាប់លែៈព្រាប់ជេសនទើអីឞ៝ន់មរាគែសមាឞ៝ន់នើមអីនៃតាកាលើត្រោកអីនតុកពាង់នើម។ 5 ពាង់ម៝ត់ញជ្រាង់ខាន់អៃមៃមានាវទើយពាង់នើម យ៝រមានាវខាន់អៃមៃញឆីងមាឞ្រាសក្រីស នហ៝មាត៝ត់ខាន់អៃមៃឆ៝ៈទើននាវរាក្លាយ្សឞើសនាវកោរាញឞ្រាសតេៈទោយ្សតាជឹតនាប់តៃ។ នាវរាក្លាយ្សអីនៃពាង់លែៈជេសនទ្រាប់ គៃមាញហើតានារងគ្លែៈទុត។ 6 កើតនទ្រីទឹងខាន់អៃមៃរាម់មអាកហោងាន់ ឞ៝លលាសរានោកអ្យាខាន់អៃមៃម៝ប់នាវជេរជ៝ត់អេងៗអីគែសតានាវរេសអ្យាទូប្ល៝ត់ទើម*កាដោយ។* 7 នាវជេរជ៝ត់អីនៃអុចរាល៝ងនាវញឆីងខាន់អៃមៃគៃមាឆៃនាវញឆីងអីនៃជេងអ្វែសងាន់ងេន ជេសរីនាវញឆីងខាន់អៃមៃគែសនាវខ្លៃរាលាវមាមាយ្សអីមរារ៝ស ឞ៝លលាសឞូគុចមាអុញ។ តានារឞ្រាសយេឆូក្រីស ញហើឆាក់អ៝ន់ទឹងលែៈឞូនុយ្សឆៃ ខាន់អៃមៃមរាគែសនាវរានេ គែសនាវច្រេកលើប នទ្រែលមាគែសនាវយើកយ៝រមានាវញឆីងអីនៃ។ 8 ខាន់អៃមៃមោអោសវៃឆៃពាង់ យើនមាខាន់អៃមៃហោមរ៝ង់ពាង់។ ឞ៝លលាសអាបៃអ្យាខាន់អៃមៃមោអោសឆៃពាង់កាដោយ ខាន់អៃមៃហោមអែញឆីងមាពាង់ដ៝ង់ ជេសរីគែសនាវរាម់មអាកទុតហោងាន់ មោហោមអោសឞ្លាវនតឹត‌* 9 យ៝រមាខាន់អៃមៃឆ៝ៈទើននាវរាក្លាយ្សអីជេងនាវងខោមតាៈឞើសនាវខាន់អៃមៃញឆីង។*

10 ល៝ង់មពោលឞូនុយ្សនតើយ្សនាវងើយកោរាញឞ្រាសកាល់អែនើស លែៈងក៝ចល៝រមានាវអ្វែសអីខាន់អៃមៃឆ៝ៈទើនអាបៃអ្យា។ ខាន់ពាង់មេតអ្វាញ់ញឆ្រោយ្សជ៝យមានាវរាក្លាយ្សអីនៃ‌* 11 គៃមាគឹតម៝សនារ មើមទឹងមរាគែសនាវរាក្លាយ្សអីនៃ យ៝រលាសឞ្រាសហ្វេងអ្វែសឞ្រាសក្រីស អីគុតាខាន់ពាង់អ៝ន់ខាន់ពាង់គឹតល៝រមានាវជេរជ៝ត់ឞ្រាសក្រីស នទ្រែលមានាវច្រេកលើបតាពាង់ឞើសកើយនាវជេរជ៝ត់អីនៃ។ 12 យើនមាកោរាញឞ្រាសលែៈមឞើសមាខាន់ពាង់ នាវអីខាន់ពាង់មឞើសងក៝ចនៃនើស មោអោសគែសនាវខ្លៃអ៝ន់មាខាន់ពាង់នើម ជេងគែសនាវខ្លៃអ៝ន់មាឞ៝ន់។ អាបៃអ្យាមពោលអីមឞើសងក៝ចនាវមហែមហានអ្វែស លែៈមឞើសងក៝ចជេសទឹងលែៈនាវអីនៃអ៝ន់មាខាន់អៃមៃតានាវទើយឞ្រាសហ្វេងអ្វែសអីក្ល៝សអ្វែសអីកោរាញឞ្រាសនើមដាៈហាន់តាៈឞើសកាលើត្រោក។ ឞ៝លលាសផូងតោងពារ់ក៝ៈអុចគឹតវ៝ត់នាវអីនៃហោងាន់ដ៝ង់។

នតីអ៝ន់ផូងញឆីងគុរេសតឹមទីដាសនាវកោរាញឞ្រាសអុច

13 លាសនទ្រីអ៝ន់ខាន់អៃមៃនទ្រាប់នូយ្សនហ៝ម់នាវមឹនមាជានការ នទ្រែលមាអ៝ន់ឞ្លាវម៝ត់ញជ្រាង់ឆាក់អ៝ន់គុទីកែស អ៝ន់គែសនាវរានើមន៝ប់មានាវរាក្លាយ្សអីឞ្រាសយេឆូក្រីស មរាអ៝ន់ខាន់អៃមៃតានារពាង់ញហើឆាក់អ៝ន់មាទឹងលែៈឞូនុយ្សឆៃ។ នាវរាក្លាយ្សអីនៃតាៈឞើសនាវអ្វែសកោរាញឞ្រាស។* 14 អ៝ន់ខាន់អៃមៃអ្យាត់នាវកោរាញឞ្រាសតឹមឞានមាក៝នអ្យាត់នាវមេៈឞឹ លើយអោសជានតឹងនាវកើញអ្យើសអីគែសតានូយ្សនហ៝ម់កើតខាន់អៃមៃវៃជាននោកអេហ៝ៈគឹតនាល់នាវកោរាញឞ្រាសនើស។* 15 ទឹងលែៈនាវជានអ៝ន់ខាន់អៃមៃគុក្ល៝សអ្វែសទាទេ តឹមឞានមាកោរាញឞ្រាសអីលែៈក្វាល់ខាន់អៃមៃនើសពាង់ក្ល៝សអ្វែសដ៝ង់‌ 16 យ៝រលាសតានាវកោរាញឞ្រាសងើយលែៈគែសញចីសជេសកោរាញឞ្រាសលាសកើតនអា៖ «អ៝ន់ខាន់អៃមៃជេងក្ល៝សអ្វែស យ៝រលាសគ៝ប់លែៈក្ល៝សអ្វែស»។†

17 យ៝រលាសខាន់អៃមៃក្វាល់ជ៝យកោរាញឞ្រាសកើបពាង់ជេងឞឹ អ៝ន់ក្លាចយើកមាពាង់ទោ នោកខាន់អៃមៃហោមគុតានែសនតូអ្យាតឹមឞានមាឞូនាច់ឞ្រីអេងអីវែសឞិចទើម អ៝ន់ក្លាចយើកមាពាង់ទោ យ៝រលាសពាង់ផាតទោយ្សឞូនុយ្សតឹងនាវខាន់ពាង់នើមជានទូហ្វេទូហ្វេឆាក់ ពាង់មោអោសកើយ្សឞូនុយ្ស។* 18 ខាន់អៃមៃគឹតជេស ពាង់លែៈច្វាយជេសខាន់អៃមៃឞើសនាវគុរេសអើមអីមោគែសខ្លៃ អីដើនតាៈឞើសអូចែខាន់អៃមៃ។ មោអោសទីពាង់លែៈច្វាយជេសខាន់អៃមៃមានទើអីឞ្លាវរ៝សតឹមឞានមាព្រាក់មាយ្ស‌* 19 យើនមាពាង់លែៈច្វាយខាន់អៃមៃមាមហាមខ្លៃឞ្រាសក្រីស នើមអីមោអោសគែសនាវតីស ពាង់តឹមឞានមាក៝នឞែឞ្យាប់អីទុតអ្វែសអីមោអោសគែសនាវឆោតគ្រាយ្ស†។ 20 កោរាញឞ្រាសលែៈកើយ្សពាង់ឞើសអេហ៝ៈគែសនែសនតូនើសងាន់ ជេសរីញហើអ៝ន់ឞូនុយ្សរានោកងគ្លែៈទុត‡អ្យាឆៃ គៃមាគែសខ្លៃមាខាន់អៃមៃ។* 21 យ៝រមាពាង់ ខាន់អៃមៃលែៈញឆីងជេសមាកោរាញឞ្រាសអីអ៝ន់ពាង់ទ៝ក់រេសឞើសផូងខឹត ជេសរីអ៝ន់ពាង់គែសនាវច្រេកលើប គៃមាខាន់អៃមៃគែសនាវញឆីង នទ្រែលមាគែសនាវរានើមមាកោរាញឞ្រាស។*

22 ខាន់អៃមៃតឹមឞានមាលែៈថ៝អ៝ន់ក្ល៝សជេសខាន់អៃមៃនើម យ៝រមាអ្យាត់នាវងាន់ នទ្រីខាន់អៃមៃលែៈឞ្លាវតឹមរ៝ង់នទ្រាង់នើមហោងាន់។ លាសនទ្រីអ៝ន់ខាន់អៃមៃតឹមរ៝ង់នទ្រាង់នើមទុតហោមាលែៈនូយ្សនហ៝ម់ងាន់។* 23 ខាន់អៃមៃលែៈគែសនូយ្សនហ៝ម់មហែតឹមឞានមាទែសទូតឹជឹត មោអោសទីឞើសរាន៝យអីឞ្លាវអោម ជេងឞើសរាន៝យអីមោឞ្លាវអោម តាៈឞើសនាវងើយកោរាញឞ្រាសអីរេសអីហោមបាបើនហ៝រ៝។* 24 កើតលែៈគែសញចីសជេសតានាវកោរាញឞ្រាសងើយ៖

«ទឹងលែៈឞូនុយ្សជេងតឹមឞានមារេប‌

នាវអ្វែសខាន់ពាង់តឹមឞានមានាវអ្វែសកាវឆីឞ្រី។

រេបអីនៃហ្វាញ់‌

កាវអីនៃរុងដ៝ង់‌*

25 យើនមានាវងើយកោរាញឞ្រាសហោមបាបើនហ៝រ៝»†។

នាវងើយកោរាញឞ្រាសអីនៃជេងនាវមហែមហានអ្វែសអីលែៈឞូមឞើសងក៝ចអ៝ន់មាខាន់អៃមៃនៃនើស។

*1:2 ១:២៖ រម ៨:១៤-១៥; អេផ ១:៤-៥; ២កោ ៥:១៨-២០

*1:3 ១:៣-៥៖ កោល ១:៥; ៣:៣-៤; តត ២:១៣

*1:6 ១:៦៖ «ទូប្ល៝ត់ទើម» លាសតឹមរាដឹលនាវរេសតានែសនតូអ្យាដាសមានាវរេសតាប៝នអ្វែសតាកាលើ នាវរេសតានែសនតូអ្យាជេងតឹមឞានមាទូប្ល៝ត់ទើម។

*1:6 ១:៦-៧៖ ១ពេ ៤:១២-១៣; ១កោ ១:៨-៩; ២កោ ១:៣-៥; ២តម ៣:១២; យាក ១:២-៤

*1:8 ១:៨៖ យហ ២០:២៧-២៩; ២កោ ៥:៧-៨

*1:9 ១:៩៖ ហេឞ ២:១

*1:10 ១:១០-១២៖ លក ១:៧០; ១០:២៤; ២៤:៤៤-៤៦; រម ១:២

*1:13 ១:១៣៖ លក ១២:៣៥-៣៧; ១តេ ៥:៤-៦

*1:14 ១:១៤-១៦៖ រម ៦:៦-៧, ១២-១៣; អេផ ៤:១៧-២០; ១តេ ៤:៥

†1:16 ១:១៦៖ កល ១១:៤៤-៤៥; ១៩:២

*1:17 ១:១៧៖ ២កោ ៥:១០; ៧:១

*1:18 ១:១៨-១៩៖ រម ៣:២៥-២៦; ១កោ ៦:២០; ២កោ ៥:១៨-២១; យហ ១:២៩

†1:19 ១:១៩៖ តានាវតឹមរាង្លាប់អើម កោរាញឞ្រាសដាៈផូងអីឆ្រាអែល ឆ៝ៈមពោមពា(ឆ្យុម)អីទុតអ្វែសអីមោអោសគែសនាវឆោតគ្រាយ្សទើមមាជានឞ្រាសមាកោរាញឞ្រាស នក ២៨:៣។

‡1:20 ១:២០៖ តានាវតឹមរាង្លាប់មហែមឞើសមាឞ៝ន់ ជេសឞ្រាសយេឆូ ហាវឆឹតតាកាលើត្រោក ត៝ត់មាពាង់ព្លឹវាច់ ជេងរានោកងគ្លែៈទុត។

*1:20 ១:២០៖ កាល ៤:៤; អេផ ១:៩-១១

*1:21 ១:២១៖ រម ៤:២៤-២៥

*1:22 ១:២២៖ យហ ១៣:៣៤; ១៥:១២; រម ១២:១០

*1:23 ១:២៣៖ យហ ១:១២-១៣; ៣:៣-៨

*1:24 ១:២៤-២៥៖ យាក ១:១០-១១

†1:25 ១:២៤-២៥៖ អេឆា ៤០:៦-៨