3
1 យ៝រមាហេនរាវៃហោអីរ ទឹងហេនហោមអុចគុឞារហៃអេងតាប៝នអាថែន ។ 2 ជេសរីដាៈតីមោថេ ហាន់ គៃមាកើលនហាវនូយ្សនហ៝ម់ នទ្រែលមាកើលអ៝ន់នាវញឆីងខាន់អៃមៃន៝ប់រាក៝ក់ងាន់។ ពាង់អីអ៝សហេនអីឞូនុយ្សជានការកោរាញឞ្រាសមឞើសងក៝ចនាវមហែមហានអ្វែសឞ្រាសក្រីស នទ្រែលហេន។*៣:២៖ ការ ១៦:១-៣ 3 ហេនដាៈពាង់ហាន់គៃមាលើយអោសអ៝ន់ទូហ្វេឞាសញឆីងយ៝រមានាវជេរជ៝ត់អីឞូជានជេរគែសអាបៃអ្យា។ ខាន់អៃមៃលែៈគឹតជេសនាវអីនៃ កោរាញឞ្រាសលែៈអ៝ន់មាឞ៝ន់គែសនាវជេរជ៝ត់កើតនៃ។*៣:៣-៤៖ ការ ១៤:២២; ២តម ៣:១២ 4 នោកហេនហោមគុនទ្រែលខាន់អៃមៃនើស ហេនលែៈមឞើសជេសមាខាន់អៃមៃល៝រ៖ ឞ៝ន់មរាគែសនាវជេរជ៝ត់។ ជេសរីនាវជេរជ៝ត់គែសងាន់រ៝ កើតខាន់អៃមៃលែៈគឹតជេស។ 5 កើតនទ្រីគ៝ប់អ៝ត់មោហោមទើយ ទឹងគ៝ប់អ៝ន់តីមោថេ ហាន់អាខាន់អៃមៃគៃមាគឹតនាវញឆីងខាន់អៃមៃ។ គ៝ប់ក្លាចឆាតាង់ *៣:៥៖ តានាវងើយគ្រែក លាស៖ «កោរាញនទើម»។នទើមខាន់អៃមៃទើយ ជេសរីនាវរាអាសរាគាញ់ហេននើសជេងទើមទាម។ 6 អាបៃអ្យាតីមោថេ លែៈឆឹតត៝ត់អាហេនអ្យា ពាង់លែៈមឞើសងក៝ចមាហេននាវញឆីងខាន់អៃមៃ នទ្រែលមានាវរ៝ង់ខាន់អៃមៃមាឞូ។ ពាង់មឞើសមាហេន ខាន់អៃមៃហោងាន់ក្ល៝ង់ហេន អុចម៝ប់ហេនហោងាន់ កើតហេនអុចម៝ប់ខាន់អៃមៃដ៝ង់។
7 អើអ៝សនោតានាវញឆីង យ៝រមានាវញឆីងខាន់អៃមៃ ជានអ៝ន់នូយ្សនហ៝ម់ហេនលែៈអ្វែសដាប់មពាន់ជេស ឞ៝លលាសគែសនាវជេរជ៝ត់ឞូជានជេរទុតហោកាដោយ។*៣:៧៖ ២កោ ៧:១៣ 8 អាបៃអ្យានូយ្សនហ៝ម់ហេនលែៈរាម់ងាន់យ៝រមាលែៈគឹតខាន់អៃមៃហោមគុន៝ប់តានាវញឆីងមាកោរាញយេឆូ កើតនៃ។ 9 ហេនជ៝យនាវមាលាសអ្វែសកោរាញឞ្រាសមោហោមឞ្លាវលែៈ យ៝រមានទើអីខាន់អៃមៃហោមញឆីងន៝ប់រាក៝ក់ជានអ៝ន់ហេនរាម់មអាកតានាប់មាត់កោរាញឞ្រាស។ 10 ទឹងមាង់ទឹងនារងាន់ហេនញឆ្រោយ្សមឞើសឆើមទាន់មាកោរាញឞ្រាស អ៝ន់ឆៃមុសមាត់ខាន់អៃមៃ ជេសរីអ៝ន់នាវញឆីងខាន់អៃមៃលែៈរឹងងាន់ មោហោមអោសគែសនតុកមោត៝ង់។ 11 ទាន់កោរាញឞ្រាសអីឞឹឞ៝ន់ នទ្រែលមាឞ្រាសយេឆូ អីកោរាញឞ៝ន់ ឆើមនទ្រាប់ត្រ៝ងអ៝ន់ហេនហាន់អាខាន់អៃមៃ។ 12 ទាន់កោរាញឞ្រាសអ៝ន់ខាន់អៃមៃគែសនាវរ៝ង់លើមាអ៝ក់ឞេងលែរងាន់ មាតឹមរ៝ង់នទ្រាង់នើម នអ៝ប់មារ៝ង់មាទឹងលែៈឞូនុយ្ស កើតហេនលែៈរ៝ង់មាខាន់អៃមៃដ៝ង់។*៣:១២-១៣៖ ១តេ ៤:៩-១០; កោល ១:១០-១២; ២តេ ១:១០ 13 ទាន់កោរាញឞ្រាសអ៝ន់ខាន់អៃមៃគែសនាវញឆីងន៝ប់រាក៝ក់ គៃមាខាន់អៃមៃគុរេសក្ល៝សអ្វែសមោអោសគែសនាវមានទុយ្សតានាប់មាត់កោរាញឞ្រាសអីឞឹឞ៝ន់ ត៝ត់ឞ្រាសយេឆូ អីកោរាញឞ៝ន់វាច់នទ្រែលផូងលែៈរាក្លាយ្ស!