នាវកោរាញឞ្រាសងើយតានាវងើយឞូន៝ង យោហាន ១៥

១៥

ឞ្រាសយេឆូ តឹមឞានមាតើមព្លៃយុងយារប៝ន

១ ជេសរីឞ្រាសយេឆូ លាស៖ “គ៝ប់អ្យាជេងតឹមឞានមាតើមព្លៃយុងយារប៝នអីងាន់ ជេសរីឞឹគ៝ប់នាក់តើមម៝ត់។* ២ ម៝សងគីងហ៝នតាគ៝ប់មោគែសព្លៃ ឞឹគ៝ប់ឆ្រែសមអារ់លើយ។ យើនមាងគីងគែសព្លៃ ពាង់ក៝សដេៈម៝ត់អ៝ន់អ្វែស គៃមាព្លៃលើអ៝ក់ជឹត។* ៣ មពោលខាន់មៃលែៈក្ល៝សជេស យ៝រមានាវគ៝ប់លែៈជេសមឞើសងក៝ចមាខាន់មៃ។* ៤ អ៝ន់ខាន់មៃហោមគុតាគ៝ប់នឹង កើតគ៝ប់ហោមគុតាខាន់មៃនឹង។ គ៝ប់ជេងតឹមឞានមាតើម ម៝សងគីងមោហ៝នឞើសគ៝ប់ ពាង់មោអោសគែសព្លៃ។ ខាន់មៃតឹមឞានកើតនៃដ៝ង់ លាសមោអោសគុនឹងតាគ៝ប់ ខាន់មៃមោគែសព្លៃអោស។

៥ គ៝ប់អ្យាតឹមឞានមាតើមព្លៃយុងយារប៝ន ខាន់មៃតឹមឞានមាងគីង។ ឞូម៝សហោមគុតាគ៝ប់នឹង គ៝ប់ហោមគុតាពាង់នឹង ពាង់អីនៃគែសព្លៃអ៝ក់ងាន់។ លាសខាន់មៃគុតឹមងខាសមាគ៝ប់ ខាន់មៃមោឞ្លាវអោសជានអេងទូនតីលនទើអីគែសនាវខ្លៃតាកោរាញឞ្រាស។* ៦ ឞូម៝សមោគុតាគ៝ប់ ពាង់អីនៃតឹមឞានមាងគីងឞូមអារ់លើយ ត៝ត់នទ្រ៝ឞូរាគូមពូរលើយតាអុញ ជេសរីអុញឆាលែៈផ្យៅ។* ៧ លាសខាន់មៃហោមគុតាគ៝ប់នឹង ជេសរីនាវគ៝ប់ងើយហោមគុតាខាន់មៃនឹង លាសនទ្រីម៝សនទើខាន់មៃអុច ទាន់ហ៝ម់ ខាន់មៃគែសងាន់រ៝។* ៨ លាសខាន់មៃគែសព្លៃអ៝ក់ ខាន់មៃអ៝សម៝នគ៝ប់ងាន់ នទ្រីទឹងអ៝ន់ឞឹគ៝ប់គែសនាវច្រេកលើប”។*

៩ “គ៝ប់លែៈរ៝ង់មាខាន់មៃ តឹមឞានមាឞឹគ៝ប់លែៈរ៝ង់មាគ៝ប់ដ៝ង់។ អ៝ន់ខាន់មៃហោមគុនឹងហ៝ម់តានាវរ៝ង់គ៝ប់។ ១០ លាសខាន់មៃជានកើតនាវគ៝ប់ដាៈ ខាន់មៃហោមគុនឹងតានាវរ៝ង់គ៝ប់ តឹមឞានមាគ៝ប់លែៈជានកើតនាវឞឹគ៝ប់ដាៈ ជេសរីគ៝ប់ហោមគុនឹងតានាវរ៝ង់ពាង់ដ៝ង់។* ១១ គ៝ប់មឞើសងក៝ចទឹងលែៈនាវអ្យាមាខាន់មៃ គៃមានាវរាម់មអាកគ៝ប់គុតាខាន់មៃ ជេសរីខាន់មៃគែសនាវរាម់មអាកទុតហោងាន់។* ១២ អ្យានាវគ៝ប់ដាៈអ៝ន់មាខាន់មៃ អ៝ន់ខាន់មៃតឹមរ៝ង់នទ្រាង់ខាន់មៃនើម តឹមឞានមាគ៝ប់លែៈរ៝ង់មាខាន់មៃដ៝ង់។* ១៣ ឞូនុយ្សអីជាវឆាក់ពាង់នើមខឹតមាមឹតជាង់ពាង់ ពាង់រ៝ង់មាមឹតជាង់អីនៃទុតហោរាលាវឞូ។* ១៤ ខាន់មៃជេងមឹតជាង់គ៝ប់ងាន់ លាសខាន់មៃជានកើតនាវគ៝ប់ដាៈ។* ១៥ គ៝ប់មោអោសហោមក្វាល់ខាន់មៃឞូនុយ្សឆើមកើលជានការជឹត យ៝រលាសឞូនុយ្សឆើមកើលជានការមោអោសគឹតម៝សនាវកោរាញពាង់នើមជាន។ គ៝ប់ក្វាល់ខាន់មៃជេងមឹតជាង់គ៝ប់នើម យ៝រលាសទឹងលែៈនាវឞឹគ៝ប់លាសមាគ៝ប់ លែៈគ៝ប់មឞើសងក៝ចអ៝ន់មាខាន់មៃគឹតទាទេ។* ១៦ មោអោសខាន់មៃលែៈកើយ្សគ៝ប់គ៝ប់អីកើយ្សខាន់មៃ ជេសរីដាៈខាន់មៃហាន់គែសព្លៃអ៝ក់ ព្លៃអីហោមនឹងនហ៝រ៝។ លាសនទ្រីម៝សនទើខាន់មៃទាន់ឞើសឞឹគ៝ប់តារាញាឆាក់គ៝ប់ពាង់អ៝ន់មាខាន់មៃរ៝។* ១៧ អ្យានាវគ៝ប់ដាៈមាខាន់មៃ៖ អ៝ន់ខាន់មៃតឹមរ៝ង់នទ្រាង់ខាន់មៃនើម”។

ឞូនុយ្សឞ្យាញ់មាឞ្រាសយេឆូ នទ្រែលមាមពោលអ៝សម៝នពាង់

១៨ “លាសឞូនុយ្សតានែសនតូអ្យាឞ្យាញ់មាខាន់មៃ អ៝ន់ខាន់មៃកាសគឹតខាន់ពាង់លែៈឞ្យាញ់មាគ៝ប់ល៝រ។** ១៩ លាសខាន់មៃជេងតឹមឞានមាទឹងលែៈឞូនុយ្សអីមោញឆីងមាគ៝ប់ ខាន់ពាង់រ៝ង់មាខាន់មៃជេងឞាល់មពោល។ យើនមាខាន់មៃមោអោសហោមជេងតឹមឞានមាខាន់ពាង់ យ៝រលាសលែៈគ៝ប់កើយ្សឆ៝ៈខាន់មៃលោសតាៈឞើសខាន់ពាង់ កើតនទ្រីទឹងខាន់ពាង់ឞ្យាញ់មាខាន់មៃ។ ២០ អ៝ន់ខាន់មៃកាសគឹតនាវគ៝ប់លែៈលាសមាខាន់មៃនើស៖ «ឞូនុយ្សឆើមកើលជានការមោអោសក្វ៝ង់រាលាវកោរាញពាង់»។ លាសឞូជានជេរមាគ៝ប់ ខាន់មៃនៃឞូជានជេរដ៝ង់ លាសឞូអ្យាត់នាវគ៝ប់ ខាន់មៃនៃឞូអ្យាត់ដ៝ង់។* ២១ ឞូជានទឹងលែៈនាវអីនៃមាខាន់មៃយ៝រមាគ៝ប់ ជេសរីយ៝រមាខាន់ពាង់មោអោសគឹតនាល់នើមតើមញជ្វាល់គ៝ប់។ ២២ លាសគ៝ប់មោគែសវាច់តានែសនតូអ្យា មោគែសមឞើសងក៝ចមាខាន់ពាង់ ខាន់ពាង់មោអោសគែសនាវតីស។ យើនមាអាបៃអ្យា ខាន់ពាង់មោអោសហោមគែសនាវមាញឆីសមានាវតីសខាន់ពាង់នើម។* ២៣ ឞូម៝សឞ្យាញ់មាគ៝ប់ ពាង់ឞ្យាញ់ដ៝ង់មាឞឹគ៝ប់។* ២៤ លាសគ៝ប់មោគែសជាននាវខ្លៃតានាប់មាត់ខាន់ពាង់ ជេងនទើអីមោគែសអោសទូហ្វេឞូនុយ្សអេងជាន ខាន់ពាង់មោគែសអោសនាវតីស។ យើនមាអាបៃអ្យាខាន់ពាង់លែៈឆៃជេស ជេសរីខាន់ពាង់ហោមឞ្យាញ់មាគ៝ប់ ឞ្យាញ់មាឞឹគ៝ប់ដ៝ង់។ ២៥ កើតនទ្រីនាវអីអ្យាជេងទីដាសមានាវកោរាញឞ្រាសងើយលែៈគែសញចីសមានទើខាន់ពាង់ជាន៖ «ខាន់ពាង់ឞ្យាញ់មាគ៝ប់មោអោសគែសនាវ»†”។

២៦ “គ៝ប់មរាញជ្វាល់នើមកើលតាៈឞើសឞឹគ៝ប់មាខាន់មៃ ពាង់អីនៃឞ្រាសហ្វេងអ្វែស ពាង់លែវខាន់មៃតានាវនតីងាន់។ ត៝ត់ពាង់វាច់រីតៃ ពាង់ជេងតើមមឞើសងក៝ចនាវខ្លៃគ៝ប់អ៝ន់ឞូគឹត។* ២៧ ជេសរីខាន់មៃជេងនើមមឞើសងក៝ចនាវខ្លៃគ៝ប់អ៝ន់ឞូគឹតកើតនទ្រីដ៝ង់ យ៝រលាសខាន់មៃលែៈគុនទ្រែលគ៝ប់នតើមឞើសគ៝ប់នតើមនតុមនតីឞូនើសងាន់”។*

*១៥:១ ១៥:១៖ នម ៨០:៨-១១; យេរ ២:២១

*១៥:២ ១៥:២៖ មថ ៣:១០

*១៥:៣ ១៥:៣៖ យហ ១៣:១០

*១៥:៥ ១៥:៥៖ មថ ៥:១៦; ២កោ ៣:៥; ៤:៧; កាល ៥:២២-២៣

*១៥:៦ ១៥:៦៖ អេឆេ ១៥:១-៨; មថ ៧:១៩

*១៥:៧ ១៥:៧៖ យហ ១៤:១៣-១៤; ១៦:២៣-២៤; មថ ៧:៧; មក ១១:២៤; ១យហ ៣:២២; ៥:១៤-១៥

*១៥:៨ ១៥:៨៖ មថ ៥:១៦; កាល ៥:២២-២៣

*១៥:១០ ១៥:១០៖ យហ ១៤:១៥

*១៥:១១ ១៥:១១៖ យហ ១៦:២២, ២៤; ១៧:១៣

*១៥:១២ ១៥:១២៖ យហ ១៣:៣៤

*១៥:១៣ ១៥:១៣៖ យហ ១០:១១; មក ១០:៤៥

*១៥:១៤ ១៥:១៤៖ មថ ១២:៥០

*១៥:១៥ ១៥:១៥៖ យហ ៨:៣១-៣៦

*១៥:១៦ ១៥:១៦៖ យហ ១៥:៧

*១៥:១៨ ១៥:១៨-២០៖ ២តម ៣:១២

*១៥:១៨ ១៥:១៨-១៩៖ យហ ១៧:១៤; ១យហ ៣:១៣

*១៥:២០ ១៥:២០៖ យហ ១៣:១៦; មថ ១០:២៤

*១៥:២២ ១៥:២២៖ យហ ៩:៤១

*១៥:២៣ ១៥:២៣៖ លក ១០:១៦; ១យហ ២:២៣

†១៥:២៥ ១៥:២៥៖ នម ៦៩:៤

*១៥:២៦ ១៥:២៦៖ យហ ១៤:១៦, ២៦; ១៦:៧-៨, ១៣-១៥; លក ២៤:៤៩; ការ ១:៤-៥; ២:៤; ១យហ ៣:២៤; ៥:៦

*១៥:២៧ ១៥:២៧៖ ការ ១:៨