នាវកោរាញឞ្រាសងើយតានាវងើយឞូន៝ង យោហាន ១៦

១៦

១ ឞ្រាសយេឆូ លាសជឹត៖ “គ៝ប់ងើយនាវអីនៃមាខាន់មៃ គៃមាលើយអោសខាន់មៃឞាសញឆីងមាគ៝ប់។ ២ យ៝រលាសឞូមរានត្រុតខាន់មៃទូលោសឞើសញីសរាបុនផូងអីឆ្រាអែល ឞ៝ន់។ ជេសរីនារជឹតនាប់តៃឞូម៝សងខឹតខាន់មៃ ខាន់ពាង់មឹនលាសនទើខាន់ពាង់ជានអីនៃ ខាន់ពាង់ជាននទើអីកោរាញឞ្រាសរានេ។* ៣ ខាន់ពាង់ជានកើតនៃ យ៝រលាសខាន់ពាង់មោគឹតនាល់ឞឹគ៝ប់ នទ្រែលមាមោគឹតនាល់គ៝ប់ដ៝ង់។ ៤ គ៝ប់លែៈងើយនាវអីនៃមាខាន់មៃ គៃមាត៝ត់ទីនារអីនៃតៃ ខាន់មៃកាសគឹតនាវគ៝ប់លែៈនតិញមាខាន់មៃ។ អាល៝រនើសគ៝ប់អេហ៝ៈអោសមឞើសងក៝ចទឹងលែៈនាវអីនៃ យ៝រលាសគ៝ប់ហោមគុនទ្រែលខាន់មៃ”។

នតីលនទើជានការឞ្រាសហ្វេងអ្វែស

៥ “អាបៃអ្យាគ៝ប់ហាន់ឆឹតអានើមតើមញជ្វាល់គ៝ប់ យើនមាតាមពោលខាន់មៃមោគែសអោសទូហ្វេអោបគ៝ប់៖ «អាសនតុកហាន់មៃរី?» ៦ យើនមាខាន់មៃគែសនាវងក្ល៝ន់រាវៃហោងាន់តានូយ្សនហ៝ម់ ត៝ត់តាង់នាវគ៝ប់ងើយអ្យា។ ៧ គ៝ប់អុចមឞើសអ៝ន់ខាន់មៃគឹត នាវគ៝ប់ទូលោសឞើសខាន់មៃគែសនាវខ្លៃងាន់មាខាន់មៃ។ លាសគ៝ប់មោទូលោស នើមកើលមោអោសវាច់តាខាន់មៃ។ យើនមាលាសគ៝ប់ទូលោស តៃគ៝ប់ញជ្វាល់ពាង់អ៝ន់មាខាន់មៃ។* ៨ នោកត៝ត់ពាង់តាអ្យាតៃ ពាង់ពើកឞោកតោរផូងឞូនុយ្សតានែសនតូគឹតវ៝ត់មានាវតីស មានាវឆ៝ង់ នទ្រែលមានាវកោរាញឞ្រាសផាតទោយ្ស។ ៩ គឹតវ៝ត់មានាវតីស យ៝រលាសផូងឞូនុយ្សតានែសនតូលែៈគែសនាវតីសយ៝រមាមោអុចអោសញឆីងមាគ៝ប់។* ១០ គឹតវ៝ត់មានាវឆ៝ង់ យ៝រលាសគ៝ប់ហាន់ឆឹតតាឞឹគ៝ប់នទ្រីឆៃគ៝ប់ឆ៝ង់ងាន់ ជេសរីខាន់មៃមោហោមអោសឆៃគ៝ប់។ ១១ គឹតវ៝ត់មានាវកោរាញឞ្រាសផាតទោយ្ស យ៝រលាសនាវកោរាញឞ្រាសតេៈទោយ្សមាឆាតាង់ អីកោរាញមពោលឞ្រាសអ្យើសអីកោរាញនែសនតូអ្យា មរាអ៝ន់ឞូគឹតនហេលកោរាញឞ្រាសតេៈទោយ្សមាឞូនុយ្សអីជានតីសដ៝ង់*”។*

១២ “ហោមអ៝ក់ជឹតនាវគ៝ប់អុចមឞើសងក៝ចអ៝ន់មាខាន់មៃ យើនមាខាន់មៃមោអោសទើយញអោតអាបៃអ្យា។ ១៣ នោកឞ្រាសហ្វេងអ្វែសអីលែវនាវនតីងាន់ត៝ត់ តៃពាង់លែវខាន់មៃអ៝ន់គឹតនាល់ទឹងលែៈនាវងាន់។ ទឹងលែៈនាវពាង់មឞើសងក៝ចអីនៃ មោអោសគែសលោសតាៈឞើសឆាក់ពាង់នើមអុច។ ពាង់មឞើសងក៝ចទឹងលែៈនាវពាង់លែៈតាង់ឞើសឞឹគ៝ប់ នទ្រែលមាមឞើសងក៝ចអ៝ន់ខាន់មៃគឹតល៝រម៝សនាវគែសតានារជឹតនាប់អ្យាតៃ។** ១៤ ពាង់មរាអ៝ន់គ៝ប់គែសនាវច្រេកលើប យ៝រលាសទឹងលែៈនាវពាង់មឞើសងក៝ចអ៝ន់មាខាន់មៃ ពាង់ឆ៝ៈតាៈឞើសគ៝ប់ទាទេ។ ១៥ ទឹងលែៈនទើឞឹគ៝ប់គែស ជេងនទើគ៝ប់ទាទេ។ កើតនទ្រីទឹងគ៝ប់លែៈលាស ទឹងលែៈនាវឞ្រាសហ្វេងអ្វែសមឞើសងក៝ចអ៝ន់មាខាន់មៃ ពាង់ឆ៝ៈតាៈឞើសគ៝ប់ទាទេ”។*

នាវងក្ល៝ន់រាវៃព្លាច់ជេងនាវរាម់មអាក

១៦ “ហោមទូប្ល៝ត់ជឹតខាន់មៃមោអោសហោមឆៃគ៝ប់ យើនមាហោមទូប្ល៝ត់ជឹតនាប់ជឹតខាន់មៃឆៃតៃគ៝ប់”។* ១៧ ជេសរីមពោលអ៝សម៝នអាបាៈតឹមលាសនទ្រាង់ខាន់ពាង់នើម៖ “ម៝សនាវពាង់អុចលាស៖ «ហោមទូប្ល៝ត់ជឹតខាន់មៃមោអោសហោមឆៃគ៝ប់ យើនមាហោមទូប្ល៝ត់ជឹតនាប់តៃខាន់មៃឆៃតៃគ៝ប់» នទ្រែលមាលាស៖ «គ៝ប់ហាន់តាឞឹគ៝ប់» អីនៃហ្យាស?” ១៨ ខាន់ពាង់តឹមលាសតៃនទ្រាង់ខាន់ពាង់៖ “នាវពាង់លាស៖ «ហោមទូប្ល៝ត់ជឹត» ម៝សគែសនាវខ្លៃ? ឞ៝ន់មោវ៝ត់អោស ម៝សនាវពាង់អុចលាស!” ១៩ ឞ្រាសយេឆូ លែៈគឹតខាន់ពាង់អុចអោបពាង់ នទ្រីពាង់លាស៖ “ខាន់មៃតឹមអោបនទ្រាង់ខាន់មៃនើម ម៝សនាវគ៝ប់អុចលាសឞើស? គ៝ប់លាស៖ «ហោមទូប្ល៝ត់ជឹតខាន់មៃមោអោសហោមឆៃគ៝ប់ យើនមាហោមទូប្ល៝ត់ជឹតនាប់ជឹតខាន់មៃឆៃតៃគ៝ប់»”។

២០ “គ៝ប់លាសនហេលនានេៈងាន់មាខាន់មៃ៖ ខាន់មៃតៃញហ្យាង់ញុម យើនមាផូងឞូនុយ្សអីមោញឆីងមាគ៝ប់រាម់មអាក។ ខាន់មៃតៃគែសនាវងក្ល៝ន់រាវៃអោសអេតអោសអេលងាន់ យើនមានាវងក្ល៝ន់រាវៃខាន់មៃអីនៃតៃព្លាច់ជេងនាវរាម់មអាកច្រាវ។ ២១ ល៝ង់ឞូអូរ ទោលពាង់ឞើយគុអ៝ស ពាង់គែសនាវជីនទុលហោងាន់ យើនមាត៝ត់ពាង់លែៈជេសគុអ៝ស ពាង់ច្វេលនាវជីអីនៃ ពាង់រាម់មអាក យ៝រលាសឆៃគែសអ៝សឞេមហែ។ ២២ អាបៃអ្យាខាន់មៃតឹមឞានកើតនៃដ៝ង់ ខាន់មៃគែសនាវងក្ល៝ន់រាវៃ យើនមាគ៝ប់តឹមម៝ប់តៃដាសខាន់មៃទូតឹជឹត។ នោកនៃខាន់មៃគែសនាវរាម់មអាកងាន់ មោគែសអោសឞូនុយ្សទើយពីតនាវរាម់មអាកខាន់មៃ។* ២៣ នោកនៃខាន់មៃមោអោសហោមអោបគ៝ប់ទូនតីលនាវ។ គ៝ប់លាសនហេលនានេៈងាន់មាខាន់មៃ ម៝សនទើខាន់មៃទាន់ឞើសឞឹតារាញាឆាក់គ៝ប់†ពាង់អ៝ន់រ៝មាខាន់មៃ។* ២៤ ត៝ត់មាអាបៃអ្យា ខាន់មៃអេហ៝ៈអោសគែសទាន់នទើឞើសឞឹតារាញាឆាក់គ៝ប់។ ខាន់មៃទាន់ហ៝ម់ គែសងាន់រ៝ ជេសរីខាន់មៃគែសនាវរាម់មអាកទុតហោងាន់”។

ឞ្រាសយេឆូ ទើយ

២៥ “គ៝ប់មឞើសងក៝ចទឹងលែៈនាវអីនៃអ៝ន់មាខាន់មៃមានាវងើយនតឹត។ យើនមាហោមទូប្ល៝ត់ជឹតគ៝ប់មោអោសហោមងើយនាវនតឹត ជេសរីនាវឞឹគ៝ប់គ៝ប់ងើយអ៝ន់មាខាន់មៃនហេលនានេៈងាន់។* ២៦ តានារអីនៃ ខាន់មៃទាន់អេងឞើសឞឹតារាញាឆាក់គ៝ប់។ គ៝ប់មោអោសឆើមទាន់ឞើសឞឹអ៝ន់មាខាន់មៃ‌* ២៧ យ៝រលាសឞឹនើមរ៝ង់មាខាន់មៃ។ ពាង់រ៝ង់មាខាន់មៃ យ៝រលាសខាន់មៃលែៈរ៝ង់មាគ៝ប់ នទ្រែលមាខាន់មៃលែៈអ្យាត់គ៝ប់លោសតាៈឞើសកោរាញឞ្រាស។ ២៨ គ៝ប់លោសតាៈឞើសឞឹជុរតានែសនតូអ្យានើស អាបៃអ្យាគ៝ប់លោសឞើសនែសនតូអ្យាព្លឹឆឹតតៃតាពាង់”។

២៩ មពោលអ៝សម៝នឞ្រាសយេឆូ លាស៖ “អាបៃអ្យាមៃងើយមាហេនលែៈនហេលនានេៈ មៃមោអោសហោមងើយនាវនតឹត។ ៣០ អាបៃអ្យាហេនលែៈគឹតជេសមៃគឹតទាទេទឹងលែៈនតីលនទើ។ មៃមោខាច់អោសគែសឞូអោបមៃល៝រ យ៝រលាសមៃលែៈគឹតអេងជេសម៝សនទើនាវមឹនតានូយ្សនហ៝ម់ឞូ។ កើតនទ្រីទឹងហេនអ្យាត់ មៃតាៈឞើសកោរាញឞ្រាសងាន់”។* ៣១ ឞ្រាសយេឆូ អោបខាន់ពាង់៖ “អាបៃអ្យាខាន់មៃលែៈអ្យាត់ងាន់ឞើស? ៣២ យើនមាត៝ត់ទីម៝ងនៃ អាបៃអ្យាម៝ងអីនៃលែៈឞើយត៝ត់ ខាន់មៃញច្វាត់ទូគុនតុកអេងៗ តឹងញីសជៃខាន់មៃនើម នត្លើយគ៝ប់គុអេង។ យើនមាគ៝ប់មោគែសអោសគុអេង គែសឞឹនើមគុនទ្រែលគ៝ប់។* ៣៣ គ៝ប់មឞើសងក៝ចនាវអីនៃមាខាន់មៃ គៃមាខាន់មៃគែសនាវដាប់មពាន់យ៝រមាខាន់មៃញឆីងមាគ៝ប់។ ហោមគុតានែសនតូអ្យា ខាន់មៃហោមគែសម៝ប់នាវជេរ យើនមាលើយអោសក្លាចរាវៃ យ៝រលាសទឹងលែៈនទើតានែសនតូអ្យាគ៝ប់លែៈទើយទាទេជេស”។*

*១៦:២ ១៦:២៖ យហ ៩:២២; ការ ៨:១; ១៧:៥-៦; ២៣:១២

*១៦:៧ ១៦:៧-៨៖ យហ ១៥:២៦

*១៦:៩ ១៦:៩៖ យហ ៣:១៨

*១៦:១១ ១៦:១១៖ «គឹតវ៝ត់...» មោលាស «យ៝រលាសឞូមរាឆៃឆាតាង់ អីកោរាញមពោលឞ្រាសអ្យើសអីកោរាញនែសនតូអ្យាលែៈកោរាញឞ្រាសតេៈទោយ្ស។»

*១៦:១១ ១៦:១១៖ យហ ១២:៣១

*១៦:១៣ ១៦:១៣-១៥៖ យហ ១៥:២៦

*១៦:១៣ ១៦:១៣៖ យហ ១៤:២៦; ១យហ ២:២៧

*១៦:១៥ ១៦:១៥៖ យហ ១៧:១០

*១៦:១៦ ១៦:១៦៖ យហ ១៤:១៩

*១៦:២២ ១៦:២២៖ យហ ២០:១៩-២០, ២៦

†១៦:២៣ ១៦:២៣-២៤, ២៦៖ មោលាស «ឞើសឞឹយ៝រមាញឆីងមាគ៝ប់»។

*១៦:២៣ ១៦:២៣-២៤៖ យហ ១៥:៧

*១៦:២៥ ១៦:២៥៖ មថ ១៣:៣៤

*១៦:២៦ ១៦:២៦៖ យហ ១៤:១៣-១៤

*១៦:៣០ ១៦:៣០៖ យហ ២:២៥

*១៦:៣២ ១៦:៣២៖ មថ ២៦:៣១, ៥៦; ឆាក ១៣:៧

*១៦:៣៣ ១៦:៣៣៖ យហ ១៤:២៧