នាវកោរាញឞ្រាសងើយនាវតឹមរាង្លាប់មហែ យោហាន 17

ឞ្រាសយេឆូ មឞើសឆើមទាន់មាមពោលអ៝សម៝នពាង់

1 ជេសឞ្រាសយេឆូ ងើយនាវនៃ ពាង់ងគើរជឹតត្រោកតី ជេសរីលាស៖ “អើឞឹ! អាបៃអ្យាលែៈត៝ត់ទីម៝ង។ ទាន់មៃជានអ៝ន់គ៝ប់អីក៝នមៃគែសនាវច្រេកលើប គៃមាគ៝ប់អីក៝នជានអ៝ន់មៃគែសនាវច្រេកលើបដ៝ង់។* 2 កើតមៃលែៈអ៝ន់នាវទើយមាគ៝ប់ទើយម៝ត់អ្វាញ់ទឹងលែៈរាងោចឞូនុយ្ស គៃមាគ៝ប់អ៝ន់នាវរេសនហ៝រ៝មាទឹងលែៈឞូនុយ្សអីមៃលែៈអ៝ន់ជេសមាគ៝ប់។* 3 គែសទូហ្វេមៃទើមអីឞ្រាសងាន់ងេន។ ឞូនុយ្សអីគែសនាវរេសនហ៝រ៝តាៈឞើសគឹតនាល់មៃ នទ្រែលមាគឹតនាល់គ៝ប់អីយេឆូក្រីស អីមៃញជ្វាល់ដាៈហាន់។* 4 គ៝ប់លែៈជានអ៝ន់មៃគែសនាវច្រេកលើបតានែសនតូអ្យា យ៝រមាលែៈលោចជានជេសការមៃដាៈគ៝ប់ជាននើស។* 5 អើឞឹ! អាបៃអ្យាទាន់មៃអ៝ន់គ៝ប់នាវច្រេកលើបអីឞ៝ន់លែៈអើមគែសនទ្រែលនោកអេហ៝ៈគែសត្រោកនែសនតូនើស”។*

6 “ឞូម៝សឞូនុយ្សតានែសនតូអ្យាមៃលែៈអ៝ន់ជេសមាគ៝ប់គ៝ប់លែៈអ៝ន់ផូងអីនៃគឹតនាល់មៃ។ ឞើសនតើមនើសផូងអីនៃជេងប៝នលានមៃ ជេសរីមៃអ៝ន់ខាន់ពាង់មាគ៝ប់។ ខាន់ពាង់លែៈញអោតទឹងលែៈនាវមៃ។ 7 អាបៃអ្យាខាន់ពាង់លែៈគឹតទឹងលែៈនាវគ៝ប់ជាននាវគ៝ប់នតី លោសតាៈឞើសមៃនើមអ៝ន់ទាទេ។ 8 ទឹងលែៈនាវមៃអ៝ន់មាគ៝ប់នើស លែៈគ៝ប់អ៝ន់មាខាន់ពាង់ទាទេ។ លែៈខាន់ពាង់ឆ៝ៈទើនទាទេ នទ្រែលមាខាន់ពាង់លែៈគឹតនហេលនានេៈងាន់គ៝ប់លោសតាៈឞើសមៃ ខាន់ពាង់អ្យាត់ងាន់មៃអីនើមញជ្វាល់ដាៈគ៝ប់ហាន់”។

9 “គ៝ប់មឞើសឆើមទាន់អ៝ន់មាខាន់ពាង់ គ៝ប់មោអោសមឞើសឆើមទាន់អ៝ន់មាទឹងលែៈឞូនុយ្សតានែសនតូ គ៝ប់មឞើសឆើមទាន់អ៝ន់មាឞូម៝សមៃលែៈអ៝ន់ជេសមាគ៝ប់ យ៝រលាសខាន់ពាង់អីនៃជេងប៝នលានមៃ។* 10 ជេសរីទឹងលែៈប៝នលានមៃជេងប៝នលានគ៝ប់ ទឹងលែៈប៝នលានគ៝ប់ជេងប៝នលានមៃដ៝ង់។ ខាន់ពាង់ជានអ៝ន់គ៝ប់គែសនាវច្រេកលើប។ 11 គ៝ប់មោអោសហោមគុតានែសនតូអ្យា គ៝ប់ព្លឹឆឹតតៃតាមៃ យើនមាខាន់ពាង់ហោមគុតានែសនតូអ្យា។ អើឞឹមៃក្ល៝សអ្វែសងាន់ ម៝ត់ញជ្រាង់ខាន់ពាង់មានាវទើយមៃនើមអីមៃលែៈអ៝ន់មាគ៝ប់ដ៝ង់ គៃមាខាន់ពាង់គុតឹមរាង្លាប់ឞាល់ហ៝ៈ តឹមឞានមាឞ៝ន់គុតឹមរាង្លាប់ឞាល់ដ៝ង់។* 12 នោកគ៝ប់ហោមគុនទ្រែលខាន់ពាង់តានែសនតូ គ៝ប់ម៝ត់ញជ្រាង់ខាន់ពាង់មានាវទើយមៃនើមអីមៃលែៈអ៝ន់មាគ៝ប់នើស។ ឞូម៝សឞូនុយ្សមៃលែៈអ៝ន់មាគ៝ប់ មោគែសអោសទូហ្វេរ៝សហេង យើនមាហោមគែសរ៝សហេងទូហ្វេ អីនៃជេងតឹមទីមានាវលែៈគែសញចីសជេស”។*

13 “អាបៃអ្យាគ៝ប់ហាន់អាមៃ យើនមាគ៝ប់ងើយនាវអ្យាទោលគ៝ប់ហោមគុតានែសនតូ គៃមាតានូយ្សនហ៝ម់ខាន់ពាង់គែសនាវរាម់មអាកទុតហោងាន់កើតគ៝ប់ដ៝ង់។* 14 គ៝ប់លែៈអ៝ន់នាវមៃមាខាន់ពាង់។ ឞូនុយ្សអីមោញឆីងមាគ៝ប់ ឞូនុយ្សអីនៃឞ្យាញ់មាខាន់ពាង់ យ៝រលាសខាន់ពាង់នើសមោគែសអោសទូនតោរនាវនទ្រែលឞូនុយ្សមោញឆីងមាគ៝ប់ តឹមឞានមាគ៝ប់មោដ៝ង់ទូនតោរនាវនទ្រែលឞូនុយ្សមោញឆីងមាគ៝ប់។* 15 គ៝ប់មោអោសទាន់មៃឆ៝ៈខាន់ពាង់លោសឞើសនែសនតូអ្យា គ៝ប់ទាន់មៃញជ្រាង់ខាន់ពាង់ឞើសឆាតាង់ អីកោរាញមពោលឞ្រាសអ្យើស។* 16 ខាន់ពាង់មោអោសទូនតោរនាវនទ្រែលឞូនុយ្សមោញឆីងមាគ៝ប់ តឹមឞានមាគ៝ប់មោដ៝ង់ទូនតោរនាវនទ្រែលឞូនុយ្សអីមោញឆីងមាគ៝ប់។ 17 ទាន់ជានខាន់ពាង់ជេងផូងប៝នលានមៃនើម គុងាវតឹមទីដាសនាវងាន់។ នាវងើយមៃជេងនាវងាន់។* 18 គ៝ប់ដាៈខាន់ពាង់ហាន់តាងក្លាងផូងឞូនុយ្សអីមោញឆីងមាគ៝ប់ តឹមឞានមាមៃលែៈដាៈគ៝ប់អ៝ន់ហាន់តាងក្លាងផូងឞូនុយ្សអីមោញឆីងមាមៃដ៝ង់។* 19 គ៝ប់ជាវឆាក់គ៝ប់នើមមាខាន់ពាង់ គៃមាអ៝ន់ខាន់ពាង់ជេងផូងប៝នលានមៃនើមងាន់”។*

20 “គ៝ប់មោអោសទើនមឞើសឆើមទាន់អ៝ន់មាមពោលអ៝សម៝នគ៝ប់អ្យាទើម គ៝ប់អុចមឞើសឆើមទាន់ដ៝ង់អ៝ន់ទឹងលែៈឞូនុយ្សអេងអីមរាញឆីងមាគ៝ប់តាៈឞើសនាវខាន់ពាង់មឞើសងក៝ច‌* 21 គៃមាទឹងលែៈខាន់ពាង់គុតឹមរាង្លាប់ឞាល់ហ៝ៈ។ អើឞឹ! តឹមឞានមាមៃគុតាគ៝ប់គ៝ប់គុតាមៃ ទាន់អ៝ន់ខាន់ពាង់អីនៃគុតាឞ៝ន់ដ៝ង់ គៃមាអ៝ន់ទឹងលែៈឞូនុយ្សតានែសនតូអ្យាឞូអ្យាត់មៃអីនើមតើមញជ្វាល់គ៝ប់។* 22 នាវច្រេកលើបអីមៃលែៈអ៝ន់មាគ៝ប់ លែៈគ៝ប់អ៝ន់មាខាន់ពាង់ គៃមាខាន់ពាង់គុតឹមរាង្លាប់ឞាល់ តឹមឞានមាឞ៝ន់តឹមរាង្លាប់ឞាល់ដ៝ង់។ 23 មៃគុតាគ៝ប់គ៝ប់គុតាខាន់ពាង់ គៃមាអ៝ន់ខាន់ពាង់គុតឹមរាង្លាប់ឞាល់នហេលនានេៈងាន់ គៃមាទឹងលែៈឞូនុយ្សតានែសនតូអ្យាឞូគឹតលាសមៃងាន់អីនើមតើមញជ្វាល់អ៝ន់គ៝ប់ហាន់តាអ្យា នទ្រែលមាទឹងលែៈឞូនុយ្សតានែសនតូអ្យាឞូគឹតលាសនាវមៃរ៝ង់មាខាន់ពាង់តឹមឞានមាមៃរ៝ង់គ៝ប់ដ៝ង់”។

24 “អើឞឹ! គ៝ប់អុចអ៝ន់ឞូម៝សមៃអ៝ន់មាគ៝ប់ អ៝ន់ខាន់ពាង់អីនៃគុនទ្រែលគ៝ប់តានតុកគ៝ប់គុនៃដ៝ង់ គៃមាអ៝ន់ខាន់ពាង់ឆៃនាវច្រេកលើបមៃលែៈអ៝ន់មាគ៝ប់ យ៝រលាសមៃលែៈរ៝ង់មាគ៝ប់ឞើសអេហ៝ៈគែសត្រោកនែសនតូនើសងាន់។* 25 អើឞឹ! មៃឆ៝ង់ងាន់។ ឞូនុយ្សតានែសនតូអ្យាឞូមោអោសគឹតនាល់មៃ យើនមាគ៝ប់គឹតនាល់មៃ ជេសរីខាន់ពាង់អីអ្យាលែៈគឹតលាស មៃងាន់ញជ្វាល់ដាៈគ៝ប់ហាន់តាអ្យា។* 26 លែៈគ៝ប់អ៝ន់ខាន់ពាង់គឹតនាល់មៃគ៝ប់ហោមជានកើតនៃនឹង គៃមានាវរ៝ង់មៃមាគ៝ប់គុតាខាន់ពាង់ ជេសរីគ៝ប់នើមគុតាខាន់ពាង់ដ៝ង់”។

*17:1 ១៧:១៖ យហ ១២:២៣; ១៣:៣១-៣២

*17:2 ១៧:២៖ យហ ៦:៣៧-៣៩

*17:3 ១៧:៣៖ ១យហ ៥:២០

*17:4 ១៧:៤៖ យហ ៤:៣៤

*17:5 ១៧:៥៖ យហ ១:១-២; ផល ២:៦

*17:9 ១៧:៩៖ ហេឞ ៧:២៥

*17:11 ១៧:១១៖ យហ ១០:៣០

*17:12 ១៧:១២៖ យហ ៦:៣៩; ១០:២៨-២៩

*17:13 ១៧:១៣៖ យហ ១៥:១១

*17:14 ១៧:១៤៖ យហ ១៥:១៨-១៩

*17:15 ១៧:១៥៖ មថ ៦:១៣; ១យហ ៥:១៨

*17:17 ១៧:១៧៖ នម ១១៩:១៦០; យហ ១៤:៦

*17:18 ១៧:១៨៖ យហ ២០:២១

*17:19 ១៧:១៩៖ ហេឞ ១០:១០

*17:20 ១៧:២០៖ យហ ១៧:៦-១១; រម ១០:១៧

*17:21 ១៧:២១៖ យហ ១០:៣០; កាល ៣:២៨

*17:24 ១៧:២៤៖ យហ ១២:២៦; ១យហ ៣:២

*17:25 ១៧:២៥៖ យហ ៨:៥៥; មថ ១១:២៧