នាវកោរាញឞ្រាសងើយនាវតឹមរាង្លាប់មហែ យោហាន 18

ឞូញុបឞ្រាសយេឆូ

(មថ ២៦:៤៧-៥៦; មក ១៤:៤៣-៥០; លក ២២:៤៧-៥៣)

1 ជេសឞ្រាសយេឆូ មឞើសឆើមកើតនៃ ពាង់ហាន់នទ្រែលមពោលអ៝សម៝នពាង់កាល់តីនហ៝ងកេទ្រោន ។ តានតុកនៃគែសទូលោកមីរតើមអោលីវ ខាន់ពាង់លាប់តាមីរនៃ។* 2 យូដាស-អីឆាការីយោត ឞូនុយ្សរាលាង់មាឞ្រាសយេឆូ លែៈគឹតនតុកនៃ យ៝រលាសឞ្រាសយេឆូ នទ្រែលមាមពោលអ៝សម៝នពាង់វៃហាន់តានតុកនៃអ៝ក់តឹ។* 3 ជេសរីយូដាស-អីឆាការីយោត លែវទូមពោលតាហែនរោម នទ្រែលមាទូមពោលតាហែនញីសជានឞ្រាសហាន់តានតុកនៃ។ ខាន់ពាង់ញអោតនអ៝ប់មាអុញរាទ៝ អុញឆាគេង នអ៝ប់មាតាកដាវងាន់។ គែសមពោលកោរាញជានឞ្រាស នទ្រែលមាផូងផារីឆី លែៈអ៝ន់ផូងតាហែនអីនៃហាន់នទ្រែលយូដាស-អីឆាការីយោត ។ 4 ឞ្រាសយេឆូ លែៈគឹតល៝រម៝សនទើគែសមាពាង់ កើតនទ្រីទឹងពាង់ហាន់ម៝ប់អោបផូងអីនៃ ពាង់លាស៖ “ឞូម៝សខាន់មៃអុចជ៝យ?” 5 ខាន់ពាង់អើស៖ “ជ៝យយេឆូ តាៈឞើសប៝ននាឆារែត ”។ ឞ្រាសយេឆូ អើស៖ “គ៝ប់អ្យា”។ យូដាស-អីឆាការីយោត ឞូនុយ្សរាលាង់មាឞ្រាសយេឆូ គុនទ្រែលផូងតាហែនតានៃដ៝ង់។ 6 នោកឞ្រាសយេឆូ លាស៖ “គ៝ប់អ្យា”។ ខាន់ពាង់រុចងកើយចោតត្រាច។ 7 ឞ្រាសយេឆូ អោបតៃខាន់ពាង់៖ “ឞូម៝សខាន់មៃអុចជ៝យ?” ខាន់ពាង់អើស៖ “ជ៝យយេឆូ តាៈឞើសប៝ននាឆារែត ”។ 8 ឞ្រាសយេឆូ លាសមាខាន់ពាង់៖ “គ៝ប់លែៈលាសមាខាន់មៃ គ៝ប់អ្យាហែស។ លាសខាន់មៃអុចជ៝យគ៝ប់ អ៝ន់មពោលខាន់ពាង់អ្យាឆឹត”។ 9 នាវពាង់ងើយកើតនៃតឹមទីដាសនាវពាង់លែៈលាសនើស៖ “ឞូម៝សឞូនុយ្សមៃលែៈអ៝ន់មាគ៝ប់ មោគែសអោសទូហ្វេរ៝សហេង”។* 10 ឆីមោន អីឞូក្វាល់ពេត្រោស ដ៝ង់គែសទូងគ៝រ់ដាវ ពាង់តាក់ដាវឆ្រែសទូហ្វេទឹកកោរាញជានឞ្រាសទុតក្វ៝ង់តាច់តោរឞើសមា រាញាទឹកអីនៃមាល់កុស ។* 11 ឞ្រាសយេឆូ លាសមាពេត្រោស ៖ “នត្រុបហ៝ម់ដាវមៃនៃតានទ្រោម។ មើមទឹងគ៝ប់មោឆ៝ៈទើននាវជ៝ក់ជេរ*ឞឹគ៝ប់អ៝ន់មាគ៝ប់?”*

ឞ្រាសយេឆូ ទ៝ក់តានាប់កោរាញជានឞ្រាសទុតក្វ៝ង់

(មថ ២៦:៦៩-៧០; មក ១៤:៦៦-៦៨; លក ២២:៥៥-៥៧)

12 ជេសរីផូងតាហែន នទ្រែលមាកោរាញតាហែនខាន់ពាង់ នអ៝ប់មាផូងតាហែនញីសជានឞ្រាសញុបចាប់ឞ្រាសយេឆូ ។ 13 ខាន់ពាង់លែវឞ្រាសយេឆូ ហាន់ម៝ប់អានាស អីឞឹព៝កៃផាស ល៝រ កៃផាស ជេងកោរាញជានឞ្រាសទុតក្វ៝ង់នោកនាម់នៃ។ 14 កៃផាស អីនៃលាសមាមពោលកោរាញផូងអីឆ្រាអែល នោកតឹមញច្រាៈនើស៖ “អ្វែសដេៈគែសខឹតទូហ្វេឞូនុយ្សអ៝ន់មាទឹងលែៈផូងប៝នលាន”។*

15 ឆីមោន អីឞូក្វាល់ពេត្រោស ដ៝ង់ នទ្រែលមាទូហ្វេអ៝សម៝នអេងជឹតហាន់តឹងឞ្រាសយេឆូ ។ កោរាញជានឞ្រាសទុតក្វ៝ង់នាល់ទូហ្វេអ៝សម៝នអីនៃ កើតនទ្រីទឹងឞូអ៝ន់ពាង់លាប់នទ្រែលឞ្រាសយេឆូ តាត្រោមជ៝ង់គូងជៃអានាស †នៃ។ 16 យើនមាពេត្រោស ហោមគុឞើសទីសមពោងមពេររី។ កើតនទ្រីអ៝សម៝នឞ្រាសយេឆូ អីកោរាញជានឞ្រាសនៃនាល់ ហាន់ងើយមាឞូអូរគុញជ្រាង់តាឞោកមពោង ជេសរីលែវពេត្រោស លាប់តាត្រោមជ៝ង់គូងនៃដ៝ង់។ 17 ឞូអូរអីនៃអោបពេត្រោស ៖ “មៃអ៝សម៝នពាង់អីរីដ៝ង់បាស?” ពេត្រោស អើស៖ “មោអោស”។ 18 ផូងទឹកតាជៃអីនៃ នទ្រែលមាផូងតាហែនញីសជានឞ្រាសលែៈឆុញអុញមាឆាអោញ ជេសរីគុញជ៝រ់អុញ យ៝រលាសឞ្រីនអីកងាន់។ ពេត្រោស គុញជ៝រ់អុញនទ្រែលឞូតានៃដ៝ង់។

កោរាញជានឞ្រាសទុតក្វ៝ង់អោបឞ្រាសយេឆូ

(មថ ២៦:៥៩-៦៦; មក ១៤:៥៥-៦៤; លក ២២:៦៦-៧១)

19 ជេសរីកោរាញជានឞ្រាសទុតក្វ៝ង់អោបឞ្រាសយេឆូ មាមពោលអ៝សម៝នពាង់ នទ្រែលមានាវពាង់នតីលាស។ 20 ឞ្រាសយេឆូ អើស៖ “គ៝ប់លែៈងើយអ៝ន់មាទឹងលែៈឞូនុយ្សឆៃ គ៝ប់វៃនតីលាសតាត្រោមញីសរាបុនផូងឞ៝ន់ នទ្រែលមាតាជ៝ង់គូងញីសជានឞ្រាស ជេងទឹងលែៈនតុកផូងអីឆ្រាអែល គុគូម។ គ៝ប់មោគែសអោសងើយអេងតាញជោញញជាញ់។* 21 ម៝សមៃអោបគ៝ប់? មៃអោបផូងអីតាង់នាវគ៝ប់ងើយរីអែស យ៝រលាសផូងអីនៃលែៈគឹតទាទេម៝សបាៈនាវគ៝ប់ងើយ”។ 22 ជេសឞ្រាសយេឆូ ងើយកើតនៃ គែសទូហ្វេតាហែនញីសជានឞ្រាសគុទាច់កេងពាង់ តាបឞ្រាសយេឆូ ជេសរីលាស៖ “មើមមៃឞាញ់ងើយកើតនៃមាកោរាញជានឞ្រាស?”* 23 ឞ្រាសយេឆូ អើស៖ “លាសគ៝ប់ងើយតីស ទាន់មឞើសម៝សនាវតីស។ យើនមាលាសគ៝ប់ងើយទី ម៝សឆីកោៈទឹងមៃលើសគ៝ប់?” 24 ជេសរីអានាស អ៝ន់ឞូញជុនឞ្រាសយេឆូ មាកៃផាស អីកោរាញជានឞ្រាសទុតក្វ៝ង់ នអ៝ប់មាក៝ត់តីមារាឆែ។

ពេត្រោស រាលាច់តៃលាសមោនាល់ឞ្រាសយេឆូ

(មថ ២៦:៧១-៧៥; មក ១៤:៦៩-៧២; លក ២២:៥៨-៦២)

25 ឆីមោន អីឞូក្វាល់ពេត្រោស ដ៝ង់ហោមគុញជ៝រ់អុញតារី។ គែសទូហ្វេអោបពាង់៖ “មៃអ៝សម៝នពាង់អីរីដ៝ង់បាស?” ពេត្រោស រាលាច់៖ “មោអោស!”* 26 គែសទូហ្វេទឹកកោរាញជានឞ្រាស ពាង់អីនៃនទុលមពោលដាសឞូនុយ្សអីពេត្រោស ទែឆ្រែសតាច់តោររីនើស អោបពាង់៖ “អើមមោទីលាសមៃអីនៃងាន់គ៝ប់ឆៃគុនទ្រែលពាង់តាមីរតើមអោលីវ រីនើស?”* 27 ពេត្រោស រាលាច់តៃជឹត តានៃទោមាគែសអ្យារ់នទ្រាវរ៝។*

ឞ្រាសយេឆូ ទ៝ក់ឞើសនាប់ពីលាត

(មថ ២៧:១-២, ១១-១៤; មក ១៥:១-៥; លក ២៣:១-៥)

28 ត៝ត់ឞ្រីឞើយមាអាង ឞូលែវឞ្រាសយេឆូ លោសឞើសជៃកៃផាស ហាន់តាជៃពីលាត អីកោរាញក្វ៝ង់តាឞ្រីយូដា ពាង់ផូងរោម ។ ផូងអីឆ្រាអែល មោឞាញ់អោសលាប់តាត្រោមជៃពាង់នៃ យ៝រលាសលាសលាប់តាជៃឞូនុយ្សអីមោទីផូងអីឆ្រាអែល មោហោមក្ល៝សតឹងនាវវៃខាន់ពាង់ លាសនទ្រីមោហោមអោសទើយលាប់ញេតបុននហ៝ត។ 29 នទ្រីទឹងពីលាត លោសអាទីសហាន់ម៝ប់ខាន់ពាង់ អោបខាន់ពាង់៖ “ម៝សនាវខាន់មៃអុចនតោនមាឞូនុយ្សអ្យា?” 30 ខាន់ពាង់អើស៖ “លាសពាង់មោគែសនាវតីសក្វ៝ង់ ហេនមោអោសលែវពាង់តាមៃ កោរាញ!” 31 ពីលាត លាសមាខាន់ពាង់៖ “ខាន់មៃឆ៝ៈពាង់ផាតទោយ្សតឹងនាវវៃខាន់មៃនើមទោ”។ មពោលកោរាញផូងអីឆ្រាអែល មឞើសមាពាង់៖ “ផូងរោម ខាន់មៃទើមទើយតេៈទោយ្សងខឹតឞូនុយ្ស”។ 32 នទើអីនៃជេងតឹមទីដាសមានាវឞ្រាសយេឆូ លែៈងើយ អាមើមនាវពាង់ខឹត‡។* 33 ជេសរីពីលាត លាប់តៃតាត្រោមជៃ ដាៈឞូលែវឞ្រាសយេឆូ តាពាង់ ជេសរីអោប៖ “ងាន់លាសមៃនើសកាដាច់ផូងអីឆ្រាអែល ?” 34 ឞ្រាសយេឆូ លាស៖ “នាវមៃអោបកើតនៃ តាៈឞើសឆាក់មៃនើម មោលាសគែសឞូអេងឆើមមឞើស?” 35 ពីលាត អើស៖ “មៃលែៈគឹតជេស គ៝ប់អ្យាមោទីអោសផូងអីឆ្រាអែល ។ ផូងមៃនើម នទ្រែលមាមពោលកោរាញជានឞ្រាសមៃនើមញជុនមៃមាគ៝ប់ លាសនទ្រីម៝សបាៈនាវមៃលែៈជាន?” 36 ឞ្រាសយេឆូ លាស៖ “ឞ្រីទាកគ៝ប់ម៝ត់អ្វាញ់មោគែសអោសតានែសនតូអ្យា។ លាសឞ្រីទាកគ៝ប់តានែសនតូអ្យា ផូងអ៝សម៝នគ៝ប់ហាន់តឹមលើសរ៝ មោអ៝ន់អោសឞូញជុនគ៝ប់តាតីមពោលកោរាញផូងអីឆ្រាអែល ។ យើនមាឞ្រីទាកគ៝ប់មោគែសអោសតានែសនតូអ្យា”។* 37 ពីលាត អោបឞ្រាសយេឆូ ៖ “លាសនទ្រីមៃកាដាច់ងាន់បាស?” ឞ្រាសយេឆូ អើស៖ “មៃលាសគ៝ប់កាដាច់នៃទីងាន់។ គ៝ប់ទែស គ៝ប់វាច់តានែសនតូអ្យាគៃមាមឞើសងក៝ចនាវងាន់។ ឞូម៝សអីរ៝ង់មានាវងាន់ ពាង់អីនៃអ្យាត់នាវគ៝ប់ងើយ”។* 38 ពីលាត អោបឞ្រាសយេឆូ ៖ “អាមើមនាវងាន់?” ជេសពីលាត ងើយកើតនៃ ជេសរីពាង់ហាន់លោសអាទីសម៝ប់តៃមពោលកោរាញផូងអីឆ្រាអែល ទូតឹជឹត ពាង់លាសមាខាន់ពាង់៖ “ឞូនុយ្សអ្យា គ៝ប់មោអោសឆៃពាង់គែសនាវតីស ដេៈមោអើម”។*

39 “យើនមាខាន់មៃគែសនាវវៃអ៝ន់គ៝ប់បើកទូហ្វេឞូនុយ្សទោយ្សនោកនារញេតបុននហ៝តអ្យា។ លាសនទ្រីខាន់មៃអុចដ៝ង់អ៝ន់គ៝ប់បើកកាដាច់ផូងអីឆ្រាអែល អ្យា?”* 40 ជេសរីឞូនតែរទ្រើវលាស៖ “មៃលើយអោសបើកពាង់ មៃបើកបារាបាស ហ៝ៈ”។ បារាបាស នៃឞូនុយ្សនតុង។

*18:1 ១៨:១៖ មថ ២៦:៣៦

*18:2 ១៨:២-៣៖ យហ ៦:៧០-៧១; លក ២១:៣៧

*18:9 ១៨:៩៖ យហ ៦:៣៩; ១៧:១២

*18:10 ១៨:១០៖ លក ២២:៣៨

*18:11 ១៨:១១៖ «មោឆ៝ៈទើននាវជ៝ក់ជេរ» មោលាស «មោញេតកាច៝ក»។

*18:11 ១៨:១១៖ មថ ២៦:៣៩

*18:14 ១៨:១៤៖ យហ ១១:៤៩-៥២

†18:15 ១៨:១៥៖ តានាវងើយគ្រែក លាស៖ «ជៃកោរាញជានឞ្រាសទុតក្វ៝ង់»។ ឞ៝លលាសតានោកនៃអានាស មោហោមអោសជានកោរាញជានឞ្រាសទុតក្វ៝ង់ យើនមាអាល៝រនើសពាង់វៃជាន។

*18:20 ១៨:២០៖ យហ ៦:៥៩; ៧:១៤, ២៨; លក ១៩:៤៧

*18:22 ១៨:២២៖ នង ២២:២៨

*18:25 ១៨:២៥៖ យហ ១៨:១៨

*18:26 ១៨:២៦៖ យហ ១៨:១០

*18:27 ១៨:២៧៖ យហ ១៣:៣៨

‡18:32 ១៨:៣២៖ ផូងរោម ទើមតេៈទោយ្សងខឹតឞូតាឆីតឹមរាកាង់។ ផូងអីឆ្រាអែល តេៈទោយ្សងខឹតឞូមានតីលអេងៗ។

*18:32 ១៨:៣២៖ យហ ៣:១៤; ១២:៣២-៣៣; នវ ២១:២៣

*18:36 ១៨:៣៦៖ យហ ៦:១៥; ៨:២៣

*18:37 ១៨:៣៧៖ ១តម ៦:១៣

*18:38 ១៨:៣៨៖ យហ ១៤:៦

*18:39 ១៨:៣៩-៤០៖ ការ ៣:១៣-១៤