នាវកោរាញឞ្រាសងើយតានាវងើយឞូន៝ង យោហាន ១៩

១៩

ឞូតេៈទោយ្សងខឹតឞ្រាសយេឆូ

១ ជេសរីពីលាត លែវឞ្រាសយេឆូ លាប់តាត្រោមជៃ ដាៈតាហែនរាពាត់ពាង់មាម៝ង់រាឆែ។ ២ ផូងតាហែនឆ៝ៈរាតាវល៝កបារ់ជានមោកកាដាច់នទោតាឞោកឞ្រាសយេឆូ រី ជេសរីឆ៝ៈអាវចាង់ក្វ៝ង់អីតឹមឞានមាអាវកាដាច់ញឆ៝សអ៝ន់អោឞាល់ញឆ៝សដ៝ង់។ ៣ ខាន់ពាង់ហាន់ទាច់តាឞ្រាសយេឆូ មឺចលាសមាពាង់៖ “អើកាដាច់ផូងអីឆ្រាអែល ហេនមឞាសមាមៃ” ជេសរីតាបអោឞាល់តាមុសមាត់។* ៤ ជេសរីពីលាត ហាន់លោសអាទីសម៝ប់តៃមពោលកោរាញផូងអីឆ្រាអែល ទូតឹជឹត លាសមាខាន់ពាង់៖ “អ្យា គ៝ប់លែវពាង់មាខាន់មៃ គៃមាអ៝ន់ខាន់មៃគឹត គ៝ប់មោអោសឆៃពាង់គែសនាវតីសមាតេៈទោយ្សពាង់ជឹត”។* ៥ នោកនៃឞ្រាសយេឆូ លោសអាទីសដ៝ង់ នអ៝ប់មានទោមោកកាដាច់ជានមាល៝ក នទ្រែលមាញឆ៝សអាវចាង់។ ពីលាត លាស៖ “អ្យា អ្វាញ់ហ៝ម់ឞូនុយ្សអ្យា!” ៦ ត៝ត់មាមពោលកោរាញជានឞ្រាស នទ្រែលមាមពោលតាហែនញីសជានឞ្រាសឆៃឞ្រាសយេឆូ ខាន់ពាង់នតែរទ្រើវ៖ “ងខឹតពាង់តាឆីតឹមរាកាង់! ងខឹតពាង់តាឆីតឹមរាកាង់!” ពីលាត លាស៖ “ខាន់មៃឆ៝ៈពាង់ ងខឹតអេងពាង់តាឆីតឹមរាកាង់ យ៝រលាសគ៝ប់មោអោសឆៃពាង់គែសនាវតីស”។* ៧ មពោលកោរាញផូងអីឆ្រាអែល លាសមាពីលាត ៖ “ផូងហេនគែសនាវវៃ តឹងមានាវវៃហេនឞូនុយ្សអីនៃអ្យាត់មាងខឹតលើយ យ៝រលាសពាង់កើបអេងឆាក់ពាង់នើមលាសក៝នកោរាញឞ្រាស”។* ៨ ត៝ត់ពីលាត តាង់កើតនៃ ពាង់លើហោក្លាច។ ៩ ជេសរីពីលាត ព្លឹលាប់តៃតាត្រោមជៃ អោបឞ្រាសយេឆូ ៖ “មៃឞើសតាៈ?” យើនមាឞ្រាសយេឆូ មោអើសអោស។ ១០ ពីលាត លាសឞ្រាសយេឆូ ៖ “ម៝សមៃមោអុចអើសមាគ៝ប់មេស? មៃមោគឹតគ៝ប់គែសនាវទើយ? អុចបើកមៃកាដោយ មោលាសអុចងខឹតមៃតាឆីតឹមរាកាង់កាដោយ”។ ១១ ឞ្រាសយេឆូ លាសមាពីលាត ៖ “លាសមោគែសនាវទើយតាៈឞើសកោរាញឞ្រាសអ៝ន់មាមៃ មៃមោអោសគែសនាវទើយមាគ៝ប់ កើតនទ្រីឞូនុយ្សអីញជុនគ៝ប់មាមៃ ខាន់ពាង់គែសនាវតីសជ្រូរាលាវមៃងាន់”។*

១២ នតើមឞើសនោកនៃ ពីលាត ជ៝យនាវគៃមាអុចបើកឞ្រាសយេឆូ ដ៝ង់ យើនមាមពោលកោរាញផូងអីឆ្រាអែល នតែរទ្រើវ៖ “លាសមៃបើកឞូនុយ្សអីនៃ មៃមោអោសទូនតោរនាវមាកោរាញកាដាច់ឆេឆារ * មោអោសទីមឹតជាង់នទ្រែលកោរាញកាដាច់ឆេឆារ យ៝រលាសឞូម៝សកើបអេងឆាក់ពាង់នើមលាសកាដាច់ ពាង់អីនៃឞូនុយ្សរាលាង់មាកោរាញកាដាច់ឆេឆារ !”* ១៣ ត៝ត់ពីលាត តាង់នាវនៃ ពាង់លែវឞ្រាសយេឆូ លោសអាទីស គុតារានើលផាតទោយ្ស តានតុកនៃឞូរាញាលាស៖ «នតុកលាក់លុ» នាវងើយហេឞ្រើ លាស៖ «គាបាថា »។ ១៤ នារនៃឞូនទ្រាប់នាវញេតបុននហ៝ត ក្លាប់លាសងក្លាងឞោកនារ។ ពីលាត លាសមាមពោលកោរាញផូងអីឆ្រាអែល ៖ “អ្យា! កាដាច់ខាន់មៃ”។ ១៥ យើនមាខាន់ពាង់នតែរលាស៖ “ងខឹតលើយពាង់! ងខឹតលើយពាង់! ងខឹតពាង់តាឆីតឹមរាកាង់!” ពីលាត អោបខាន់ពាង់៖ “ខាន់មៃអុចអ៝ន់គ៝ប់ងខឹតកាដាច់ខាន់មៃតាឆីតឹមរាកាង់ឞើស?” មពោលកោរាញជានឞ្រាសលាស៖ “រាលាវឞើសកោរាញកាដាច់ឆេឆារ ហេនមោហោមអោសគែសកាដាច់អេង”។ ១៦ ជេសរីពីលាត អ៝ន់ឞ្រាសយេឆូ មាឞូ អ៝ន់ផូងតាហែនងខឹតពាង់តាឆីតឹមរាកាង់ ជេសរីផូងតាហែនលែវឞ្រាសយេឆូ លោសឞើសនៃ។

ឞូព៝ង់ឞ្រាសយេឆូ តាឆីតឹមរាកាង់

(មថ ២៧:៣២-៤៤; មក ១៥:២១-៣២; លក ២៣:២៦-៤៣)

១៧ ជេសរីឞ្រាសយេឆូ លោសឞើសប៝នតូយឆីតឹមរាកាង់ ហាន់តានតុកឞូរាញាលាស៖ «នតុកនតីងឞោក» នាវងើយហេឞ្រើ លាស៖ «កោលកោថា »។ ១៨ ឞូងខឹតឞ្រាសយេឆូ តាឆីតឹមរាកាង់តានតុកនៃ គែសឞារហៃឞូនុយ្សទោយ្សឞូងខឹតនទ្រែលពាង់តានៃដ៝ង់ ទូហ្វេឞើសច្យៅទូហ្វេឞើសមា ពាង់ងក្លាងងគូល។ ១៩ ជេសរីពីលាត អ៝ន់ឞូញចីសនាវមឞើសតាទូរាលាតកាដារព្លាតាឆីតឹមរាកាង់នៃ តានៃគែសនាវលាស៖ «អ្យាយេឆូ តាៈឞើសប៝ននាឆារែត ពាង់កាដាច់ផូងអីឆ្រាអែល »។ ២០ តានាវញចីសអីនៃ គែសនាវងើយហេឞ្រើ នាវងើយលាតាង់ នទ្រែលមានាវងើយគ្រែក ។ គែសផូងអីឆ្រាអែល អ៝ក់អ្វាញ់នាវញចីសអីនៃ យ៝រលាសនតុកឞូងខឹតឞ្រាសយេឆូ ទាច់កេងប៝នក្វ៝ង់យេរូឆាលឹម ។* ២១ មពោលកោរាញជានឞ្រាសហាន់ម៝ប់ពីលាត មឞើសមាពាង់៖ “មៃលើយអោសញចីស៖ «ពាង់កាដាច់ផូងអីឆ្រាអែល »។ ទាន់មៃញចីស៖ «ពាង់លាស៖ «គ៝ប់កាដាច់ផូងអីឆ្រាអែល »»”។ ២២ ពីលាត លាស៖ “ម៝សនទើគ៝ប់ញចីស គ៝ប់ញចីសលែៈជេសទាទេ!” ២៣ ជេសផូងតាហែនព៝ង់ឞ្រាសយេឆូ នៃ ខាន់ពាង់ឆ៝ៈឞ៝កអាវឞ្រាសយេឆូ តឹមពាៈព្វាន់នុយ្ស ទូហ្វេង្វាយទូហ្វេង្វាយ យើនមាអាវជ៝ងឞ្រាសយេឆូ នៃ ឞូតាញមាទូឞ្លាសឞ៝កទើមមោគែសជឹងអោសនតើមឞើសលើត៝ត់អាទ៝ង់។ ២៤ កើតនទ្រីទឹងខាន់ពាង់តឹមលាសនទ្រាង់ខាន់ពាង់នើម៖ “អាវជ៝ងអីអ្យាឞ៝ន់លើយងខេកអោស អ៝ន់ឞ៝ន់ញុបនទើញច្រ៝សហ៝ៈ គៃមាគឹតឞូម៝សគែសអាវអ្យា”។ ផូងតាហែនជានកើតនៃជេងតឹមទីដាសមានាវកោរាញឞ្រាសងើយលែៈញចីស៖

«ឞូឆ៝ៈឞ៝កអាវគ៝ប់តឹមពាៈឞាល់‌

ជេសរីអាវក្វ៝ង់គ៝ប់ឞូញុបនទើញច្រ៝ស»†។

នទ្រីផូងតាហែនជាន។

២៥ តានតុកនៃគែសមេៈឞ្រាសយេឆូ អ៝សមេៈឞ្រាសយេឆូ មារី អីអូរក្លោពាស នទ្រែលមាមារី អីតាៈឞើសប៝នមាដាលា ទ៝ក់កេងឆីតឹមរាកាង់ឞ្រាសយេឆូ នៃ។* ២៦ ឞ្រាសយេឆូ ឆៃមេៈពាង់ នទ្រែលមាទូហ្វេអ៝សម៝នពាង់រ៝ង់គុទាច់កេងនៃ ពាង់លាសមាមេៈពាង់៖ “អើមេៈ! នៃក៝នអៃ”។* ២៧ ជេសរីពាង់លាសមាអ៝សម៝នពាង់នៃ៖ “នៃមេៈមៃ”។ នតើមឞើសនៃ អ៝សម៝នអីនៃឆ៝ៈមេៈឞ្រាសយេឆូ គុនទ្រែលពាង់នើម។

ឞ្រាសយេឆូ តាច់នហ៝ម់

(មថ ២៧:៤៥-៥៦; មក ១៥:៣៣-៤១; លក ២៣:៤៤-៤៨)

២៨ ជេសឞើសនៃឞ្រាសយេឆូ លែៈគឹតទឹងលែៈនទើពាង់ជានរឹងលែៈផ្យៅ ជេសរីឞ្រាសយេឆូ លាស៖ “គ៝ប់ជីហីរទាក” គៃមាតឹមទីដាសនាវលែៈគែសញចីសតានាវកោរាញឞ្រាសងើយ។* ២៩ តានតុកនៃគែសទូមល៝ម់យាង់ជេៈ ងគ៝រ់ទាកឆ្រាត†ឞេង។ ឞូឆ៝ៈនទើតឹមឞានមាឞ៝កយុកតាទាកឆ្រាតនៃ ជេសរីពូតតាចោងងគីងឆីហីឆោប មឞ្ល៝ប់តាមឞូងឞ្រាសយេឆូ ។ ៣០ ជេសឞ្រាសយេឆូ ញេតទាកឆ្រាតនៃ ពាង់លាស៖ “លែៈនទើគ៝ប់លែៈជានជេសលែៈផ្យៅ”។ ជេសរីពាង់កុញឞោកតាច់នហ៝ម់‡។ ៣១ នារនៃជេងនារឞូនទ្រាប់មានារឆាបាត់ អីនាររាលូផូងអីឆ្រាអែល ។ មពោលកោរាញផូងអីឆ្រាអែល ហាន់ម៝ប់ពីលាត ទាន់ពាង់ដាៈឞូនទែសលើយជ៝ង់មពោលអីលែៈឞូព៝ង់តាឆីតឹមរាកាង់នៃ គៃមាខឹតរ៝ ជេសខាន់ពាង់ខឹត ញជុរលើយឆាក់ខាន់ពាង់ឞើសលើឆីតឹមរាកាង់រ៝។ ខាន់ពាង់មោអុចអោសអ៝ន់ឞូនុយ្សហោមតាឆីតឹមរាកាង់តានារឆាបាត់ យ៝រលាសនារឆាបាត់ អីនៃក្វ៝ង់ ជេងញេតបុននហ៝តដ៝ង់។* ៣២ ជេសរីផូងតាហែនហាន់មឞាងនទែសលើយជ៝ង់ឞូនុយ្សទោយ្សត៝ល់ង្វាយ នទ្រែលមាឞូនុយ្សទោយ្សត៝ល់ឞារឞូងខឹតនទ្រែលឞ្រាសយេឆូ ។ ៣៣ ត៝ត់តាឞ្រាសយេឆូ នៃ ខាន់ពាង់ឆៃពាង់លែៈខឹត កើតនទ្រីខាន់ពាង់មោហោមអោសមឞាងនទែសជ៝ង់ពាង់។ ៣៤ យើនមាគែសទូហ្វេតាហែនឆ៝ៈតាកនត៝ប់តាពុងទាកឞ្រាសយេឆូ នៃ ជេសរីលោសហ៝ចមហាម នទ្រែលមាទាករ៝។* ៣៥ គែសទូហ្វេអ៝សម៝នលែៈឆៃនាវនៃ ពាង់មឞើសងក៝ចនាវអីនៃ គៃមាអ៝ន់ខាន់អៃមៃរ៝ៈឆ៝ម់បុតអ្យាញឆីងមាឞ្រាសយេឆូ ដ៝ង់។ នាវពាង់មឞើសងក៝ចជេងនាវងាន់ ពាង់លែៈគឹតឆាក់ពាង់នើមមឞើសងក៝ចនាវងាន់។* ៣៦ នាវអីនៃជេងតឹមទីដាសមានាវកោរាញឞ្រាសងើយលែៈញចីស៖ «នតីងពាង់ឞូមោមរានទែសទូមល៝ម់»†។ ៣៧ ជេសរីតានាវកោរាញឞ្រាសងើយតានតុកអេងគែសញចីសកើតនអា៖ «ខាន់ពាង់មរាអ្វាញ់ឞូនុយ្សខាន់ពាង់នត៝ប់រាហ៝នៃ»†។*

៣៨ ជេសឞើសនៃគែសទូហ្វេឞូក្លោរាញាយោឆែប តាៈឞើសប៝នអារីមាថេ ពាង់អ៝សម៝នឞ្រាសយេឆូ ដ៝ង់ យើនមាពាង់មោអោសអ៝ន់ឞូគឹត យ៝រលាសក្លាចមាមពោលកោរាញផូងអីឆ្រាអែល ។ ពាង់ហាន់ម៝ប់ពីលាត គៃមាទាន់ឆ៝ៈឆាក់ឞ្រាសយេឆូ ។ ពីលាត អ៝ន់ ជេសរីពាង់ហាន់ឆ៝ៈឆាក់ឞ្រាសយេឆូ រ៝។* ៣៩ ល៝ង់នីកោដេម ឞូនុយ្សហាន់ម៝ប់ឞ្រាសយេឆូ តានោកមាង់នើស ពាង់ហាន់នទ្រែលដ៝ង់។ ពាង់ញអោតនតាក់ឆីបោកាស រាញាមឹរ លាយដាសរានីសឆីបោកាស រាញាអាលោអេ ក្លាប់លាសគែស ៣០ កីលោគ្រាម។ * ៤០ ជេសរីឞារហៃខាន់ពាង់នៃ ញជុរឆាក់ឞ្រាសយេឆូ ពូតពាង់មាឞ៝កងលាង នទ្រែលមានទើបោកាសតាឆាក់ពាង់នៃ អីនៃតឹងនាវវៃត៝ប់ខឹតផូងអីឆ្រាអែល នៃនើស។ ៤១ តានតុកឞូងខឹតឞ្រាសយេឆូ តាឆីតឹមរាកាង់នៃ គែសទូលោកមីរ តាមីរនៃគែសទូមល៝ម់នតូមោចហោមមហែ អេហ៝ៈគែសឞូត៝ប់ឞូនុយ្សអោស។ ៤២ ម៝ងនៃលែៈកេងមាង់ឞើយមាលាប់នារឆាបាត់ អីនាររាលូផូងអីឆ្រាអែល §។ ជេសរីឞារហៃខាន់ពាង់គើញមាត៝ប់ឞ្រាសយេឆូ តានតូមោចអីនៃ យ៝រលាសនតូមោចអីនៃទាច់កេងនៃ។

*១៩:៣ ១៩:៣៖ យហ ១២:១៣

*១៩:៤ ១៩:៤៖ យហ ១៨:៣៨

*១៩:៦ ១៩:៦៖ យហ ១៨:៣១

*១៩:៧ ១៩:៧៖ យហ ៥:១៨; កល ២៤:១៦

*១៩:១១ ១៩:១១៖ យហ ៣:២៧; ការ ២:២៣

*១៩:១២ ១៩:១២៖ «ឆេឆារ » គែសនាវខ្លៃលាស៖ «កោរាញកាដាច់» តានាវងើយលាតាង់ អីនាវងើយផូងរោម ។

*១៩:១២ ១៩:១២៖ លក ២៣:២; ការ ១៧:៧

*១៩:២០ ១៩:២០៖ ហេឞ ១៣:១២-១៣

†១៩:២៤ ១៩:២៤៖ នម ២២:១៨

*១៩:២៥ ១៩:២៥៖ មក ១៥:៤០-៤១; លក ៨:២-៣

*១៩:២៦ ១៩:២៦៖ យហ ១៣:២៣

*១៩:២៨ ១៩:២៨៖ នម ២២:១៥; ៦៩:២១

†១៩:២៩ ១៩:២៩៖ «ទាកឆ្រាត» មោលាស «នទ្រាញ់អ្យាស»។ នទ្រាញ់ព្លៃយុងយារប៝នលាសមោកុបអ៝ន់អ្វែស នទ្រាញ់ព្លៃយុងយារប៝នអីនៃជេងឆ្រាតមោហោមកាស នោកឞ្រាសយេឆូ ឞូតាច់ថ៝ក។

‡១៩:៣០ ១៩:៣០៖ មោលាស «កុញឞោកជាវហ្វេងពាង់នើម»។

*១៩:៣១ ១៩:៣១៖ នវ ២១:២២-២៣

*១៩:៣៤ ១៩:៣៤៖ យហ ២០:២៥

*១៩:៣៥ ១៩:៣៥៖ យហ ២១:២៤

†១៩:៣៦ ១៩:៣៦៖ នង ១២:៤៦; នក ៩:១២; នម ៣៤:២០

†១៩:៣៧ ១៩:៣៧៖ ឆាក ១២:១០

*១៩:៣៧ ១៩:៣៧៖ នតម ១:៧

*១៩:៣៨ ១៩:៣៨៖ យហ ៩:២២; ១២:៤២

*១៩:៣៩ ១៩:៣៩៖ យហ ៣:១-២១

§១៩:៤២ ១៩:៤២៖ ផូងអីឆ្រាអែល កើបនាវត៝ប់ឞូនុយ្សជេងទូនតីលការមោទីជានតានារឆាបាត់ ដ៝ង់។