នាវកោរាញឞ្រាសងើយតានាវងើយឞូន៝ង យូដាស ១

ឆ៝ម់បុត

យូដាស

ញចីស

នាវឞោកអ៝ន់ឞូគឹតល៝រ

នើមញចីសឆ៝ម់បុតអ្យារាញាយូដាស មោលាសយូត ពាង់ញចីសឆ៝ម់បុតអ្យាក្លាប់លាសតានាម់ ៦០‌ ក្លាប់លាស ២៧ នាម់ជេសឞ្រាសយេឆូ ទ៝ក់រេស។ ពាង់អីអ៝សឞ្រាសយេឆូ (មថ ១៣:៥៥; មក ៦:៣) នអ៝ប់មាអីអ៝សយាកើ (យាក ១:១) ពាង់ញចីសញជ្វាល់ឆ៝ម់បុតអ្យាអ៝ន់មាទឹងលែៈផូងញឆីងមាឞ្រាសក្រីស តាអាប់នតុក ឞ៝ន់មោគឹតអោសអាសនតុកពាង់គុនោកញចីសឆ៝ម់បុតអ្យា។ គែសអ៝ក់នាវខ្លៃតាឆ៝ម់បុតអ្យាឞើយមាតឹមឞានមានាវខ្លៃតាឆ៝ម់បុតពេត្រោសរើស ២។

នាវអុចនត្រ៝ង់តាឆ៝ម់បុតអ្យា

តាឆ៝ម់បុតអ្យាយូដាស ដាៈផូងញឆីងទែរឞើសនើមនតីអីនតីនាវមោទី អីមោអោសគុរេសតឹមទីដាសនាវកោរាញឞ្រាសអុច(យដ ១:៤-១៩) ពាង់ដាៈផូងញឆីងតឹងនាវនតីអីទី(យដ ១:៣, ២០-២៤)។

មឞើសនាវខ្លៃតាងកោៈតាឆ៝ម់បុតអ្យា

- នាវអោបអ្វែសលាង់ (១:១-៣)

- នូយ្សនហ៝ម់ នាវនតុមនតី នទ្រែលមាគែសទោយ្សមានើមនតីងក្លាៈ (១:៤-១៦)

- នាវដាៈអ៝ន់គែសនាវញឆីងលើមាហោន៝ប់ (១:១៧-២៣)

- នាវនតិញអេងៗ (១:២៤-២៥)

១

នាវអោបអ្វែសលាង់

១ ឆ៝ម់បុតអ្យាតាៈឞើសគ៝ប់យូដាស អីឞូនុយ្សឆើមកើលជានការមា*ឞ្រាសយេឆូក្រីស នទ្រែលមាគ៝ប់អ្យាអីអ៝សយាកើ ដ៝ង់។ គ៝ប់ញចីសឆ៝ម់បុតអ្យាញជ្វាល់អ៝ន់មាទឹងលែៈឞូនុយ្សអីកោរាញឞ្រាសឞឹនើមលែៈកើយ្សជេស អីពាង់រ៝ង់ដ៝ង់។ ឞ្រាសយេឆូក្រីស ញជ្រាង់ខាន់អៃមៃ។* ២ ទាន់កោរាញឞ្រាសអ៝ន់នាវយោៈ នាវដាប់មពាន់ នាវរ៝ង់មាខាន់អៃមៃអ៝ន់លើមាអ៝ក់ងាន់។

នើមនតីងក្លាៈ

៣ អើអ៝សនោតានាវញឆីងអីគ៝ប់រ៝ង់ គ៝ប់នអើរហោងាន់មាញចីសនាវរាក្លាយ្សអ៝ន់មាខាន់អៃមៃ នាវរាក្លាយ្សអីទឹងលែៈឞ៝ន់លែៈគែសជេស។ យើនមាគ៝ប់មឹនអ្យាត់មាគ៝ប់ញចីសមានទើអាអេងអ៝ន់មាខាន់អៃមៃ ដាៈខាន់អៃមៃញជ្រាង់ងាន់នាវនតីមានាវញឆីងឞ៝ន់។ កោរាញឞ្រាសលែៈអ៝ន់នាវអីនៃមាផូងប៝នលានពាង់នើម ពាង់មោហោមអោសរាគ៝ល់នាវអីនៃជឹត។ ៤ គ៝ប់ដាៈកើតនៃយ៝រលាសគែសឞូនុយ្សអាបាៈអីលាប់នតុងតាផូងខាន់អៃមៃ ឞូនុយ្សអីនៃអ្យើសហោងាន់ជានតីសដាសនាវកោរាញឞ្រាសអុច ខាន់ពាង់នតីលាសមោច្រាវអោសលាសជានតីសអាប់នតីល យ៝រមាកោរាញឞ្រាសហោមយោៈតាៈឞើសនាវអ្វែសពាង់នើម។ ខាន់ពាង់តឹមរាទ៝ង់មាឞ្រាសយេឆូក្រីស អីកោរាញឞ៝ន់ទូហ្វេទើម។ ឞើសកាល់អែនើសលែៈគែសញចីសមានាវតេៈទោយ្សមាឞូនុយ្សកើតខាន់ពាង់នៃ។*

៥ ទឹងលែៈនាវអីអ្យាខាន់អៃមៃលែៈអើមគឹតជេស យើនមាគ៝ប់ទាន់ហោមងកាសខាន់អៃមៃ៖ ឞើសកើយកោរាញឞ្រាសលែៈរាក្លាយ្សផូងប៝នលានអីឆ្រាអែល ទូលោសឞើសឞ្រីអេឆីប នើស ជេសរីពាង់លើសហេងលើយផូងអីមោអ្យាត់អោសមាពាង់តាផូងអីពាង់លែៈរាក្លាយ្សអីនៃ។*

៦ គែសផូងតោងពារ់អីជានរាលាវមានាវកោរាញឞ្រាសដាៈ ជេសរីលោសឞើសនតុកកោរាញឞ្រាសលែៈអ៝ន់ខាន់ពាង់គុ កោរាញឞ្រាសក៝ត់នហ៝រ៝ខាន់ពាង់មាឆែរាវាក់ក្រុងខាន់ពាង់តានទ្រូងង៝ អ៝ន់ក៝ប់ត៝ត់ទីនារកោរាញឞ្រាសផាតទោយ្ស ជេងនារអីទុតក្វ៝ង់ងាន់។* ៧ កើតនទ្រីដ៝ង់ នោកកាល់អែនើស គែសប៝នឆោដុម ប៝នកោមោរា នទ្រែលមាប៝នអេងៗជឹតអីតឹមទាច់។ ទឹងលែៈឞូនុយ្សតាប៝នអីនៃលែវឞាល់ជាននាវខើសក្លែរ នាវអីតីសដាសមានាវវៃ ជានតីសកើតផូងប៝នលានអីឆ្រាអែល អីនៃ នអ៝ប់មាកើតផូងតោងពារ់អីនៃដ៝ង់។ ទឹងលែៈប៝នអីនៃកោរាញឞ្រាសងគ្រ៝សលើយមាអុញឞើសកាលើត្រោក ជេងនាវនតឹតឆៃល៝រមានាវកោរាញឞ្រាសមរាតេៈទោយ្សមាអុញហីតនហ៝រ៝។*

៨ កើតអីនៃដ៝ង់អាបៃអ្យាមពោលឞូនុយ្សអីនតីលាសមោច្រាវអោសលាសជានតីសអាប់នតីលអីនៃ ខាន់ពាង់លាស ខាន់ពាង់គែសមឞើយតាៈឞើសកោរាញឞ្រាស អ៝ន់ខាន់ពាង់ជាននទើបឹបើចឆាក់ខាន់ពាង់នើម។ ខាន់ពាង់មោអុចគែសកោរាញមាខាន់ពាង់ នទ្រែលមាមឺចរាម៝តផូងតោងពារ់។* ៩ ឞ៝លលាសគែសទូហ្វេតោងពារ់រាញាមីកែល ជេងកោរាញតោងពារ់អីទុតក្វ៝ង់ នោកពាង់តឹមរាលាច់ដាសឆាតាង់ អីកោរាញមពោលឞ្រាសអ្យើសមានាវឆាក់មោឆេ អីលែៈខឹតនៃនើស ពាង់មោអោសឞាញ់ងើយមឺចរាម៝ត នទ្រែលមាមោអោសឞាញ់ផាតទោយ្សឆាតាង់ យើនមាពាង់លាសទើម៖ «ទាន់កោរាញឞ្រាសលាសមៃ!» ១០ យើនមាមពោលឞូនុយ្សអីនៃបេងមាលែវឞាល់មឺចរាម៝តមានទើអេងៗ ឞ៝លលាសឆាក់ខាន់ពាង់នើមមោអោសគឹតវ៝ត់មានទើអីនៃ។ ម៝សនទើអីខាន់ពាង់លែៈអើមគឹតតានូយ្សនហ៝ម់តឹមឞានមាមពោមពា(ឆ្យុម)អីមោគឹតនាវទើម ជេសរីនាវខាន់ពាង់ជានអីនៃជានអ៝ន់ឆាក់ខាន់ពាង់នើមរ៝សហេង។* ១១ រេសរាញាល់ងាន់មាខាន់ពាង់។ ខាន់ពាង់លែៈហាន់តឹងត្រ៝ងកាអីន អីឞូនុយ្សងខឹតអីអ៝សពាង់នើម។ ខាន់ពាង់មរោសឞូគៃមាគែសព្រាក់តឹមឞានមាបាលាម ។ ខាន់ពាង់គែសនាវរ៝សហេងតឹមឞានមាមពោលអីតឹងទូហ្វេរាញាកោរេ អីគែសនាវរ៝សហេងយ៝រមាតឹមរាទ៝ង់ដាសកោរាញឞ្រាសតារានោកមោឆេ កាល់អែនើស។* ១២ នោកខាន់អៃមៃគុឆោងឆានទ្រែលគៃមាញហើនាវរ៝ង់កោរាញឞ្រាស ខាន់ពាង់ជេងតឹមឞានមានទើបឹបើចតឹមឞានមាគែសនតាក់តាឞ៝កអាវអីពីសមោហោមទើយក្ល៝ស ឆោងឆាអ្យាត់មាហើមនទុលខាន់ពាង់នើមទើម មោគែសអោសនាវដីតព្រេង។ ខាន់ពាង់មោគែសខ្លៃជេងតឹមឞានមានហ៝ម់មីសអីមោហ៝ចមីសអីឆ្យាលទែទាសមារាទូ តឹមឞានមាតើមឆីអីមោគែសព្លៃតាខៃព្លៃ រាលាវឞើសនៃជឹតតើមឆីអីលែៈរោកក្ល៝សរែសលែៈខឹតងាន់។* ១៣ ខាន់ពាង់ជេងតឹមឞានមាញច៝ច់រាឞុសទាកវាច់ទាកវារ់អីទុតទាង់ លោសមពុញ នទើដីតព្រេងអីខាន់ពាង់ជានឆៃនហេលតឹមឞានមានាវមពុញអីនៃ។ មោអោសទើយញឆីងមាខាន់ពាង់ ខាន់ពាង់ជេងតឹមឞានមាមាញ់អីលែៈហ្យើតនតុក កោរាញឞ្រាសលែៈនទ្រាប់ជេសខាន់ពាង់មាអ៝ន់តានតុកង៝ចេកកោលាក់នហ៝រ៝!

១៤ ជេសរីហេនុក អីឆៅមហាលលេលអែល ជេងអីឆាន់អាដាម់ អីឞូនុយ្សត៝ល់ង្វាយកោរាញឞ្រាសញជេងនៃ ពាង់ជេងឞូនុយ្សនតើយ្សនាវងើយកោរាញឞ្រាស លែៈលាសល៝រមាខាន់ពាង់កើតនអា៖ «អ្វាញ់ហ៝ម់! កោរាញឞ្រាសហាន់នទ្រែលផូងក្ល៝សអ្វែសពាង់នើមអីទុតអ៝ក់ងាន់ មោហោមអោសឞ្លាវកើប‌* ១៥ គៃមាផាតទោយ្សទឹងលែៈឞូនុយ្ស ជេសរីតេៈទោយ្សទឹងលែៈឞូនុយ្សតឹងនទើអ្យើសខាន់ពាង់លែៈជានតានាវអីតឹមរាទ៝ង់មាកោរាញឞ្រាស តេៈទោយ្សមានាវងើយអ្យើសអីផូងឞូនុយ្សតីសងើយតឹមរាទ៝ង់ដាសកោរាញឞ្រាស»។ ១៦ ខាន់ពាង់អីនៃជេងឞូនុយ្សអ៝ក់ឞ៝រ់ញជ៝រ់ឆេកហោងាន់ នូយ្សនហ៝ម់មោគែសអោសរាម់មអាក។ ខាន់ពាង់គុរេសជានតឹងនាវកើញហោអីរមាខាន់ពាង់នើមទើម។ នាវមឞើសងើយខាន់ពាង់នហីអេងឆាក់ទុតហោងាន់ ងើយអ្វែសមាឞូគៃមាគែសនទើឞូអ៝ន់មាឆាក់ខាន់ពាង់នើម។

នាវនតិញអេងៗ

១៧ អើអ៝សនោតានាវញឆីងអីគ៝ប់រ៝ង់ អ៝ន់ខាន់អៃមៃហោមកាសគឹតហ៝ម់នាវមពោលកោរាញអ៝សម៝នឞ្រាសយេឆូក្រីស អីកោរាញឞ៝ន់លែៈអើមមឞើសងក៝ចអាល៝រនើស។ ១៨ ខាន់ពាង់លែៈលាស៖ «តារានោកងគ្លែៈទុត†តៃ មរាគែសផូងងើយមឺចមានាវញឆីងឞ៝ន់ ផូងអីនៃជានតឹងរាង្លៃឆាក់ខាន់ពាង់នើមកើញទើម ជេងនទើអីតឹមរាទ៝ង់ដាសនាវកោរាញឞ្រាសអុច»។* ១៩ ខាន់ពាង់ជានអ៝ន់គែសនាវតឹមងខាសមពោលតាផូងខាន់អៃមៃ ខាន់ពាង់ជានតឹងនូយ្សនហ៝ម់នាវមឹនខាន់ពាង់នើមកើញទើម មោគែសអោសឞ្រាសហ្វេងអ្វែសគុនទ្រែលតាខាន់ពាង់។* ២០ យើនមាខាន់អៃមៃនៃអីផូងអ៝សនោតានាវញឆីងអីគ៝ប់រ៝ង់ អ៝ន់ខាន់អៃមៃតឹមនហាវហ៝ម់នាវញឆីងខាន់អៃមៃនើម គៃមានាវញឆីងខាន់អៃមៃលើមាហោន៝ប់ ជេសរីនាវញឆីងអីនៃជេងនទើកោរាញឞ្រាសងាន់ងេន។ ជេសរីអ៝ន់ឞ្រាសហ្វេងអ្វែសអីក្ល៝សអ្វែសលែវខាន់អៃមៃតានាវមឞើសឆើម។* ២១ អ៝ន់ខាន់អៃមៃគុន៝ប់តានាវរ៝ង់កោរាញឞ្រាស នទ្រែលមាគុក៝ប់នាវយោៈនអាចឞ្រាសយេឆូក្រីស នើមអីកោរាញឞ៝ន់ ត៝ត់ពាង់អ៝ន់នាវរេសនហ៝រ៝មាខាន់អៃមៃ។* ២២ ដាៈខាន់អៃមៃយោៈនអាចមាផូងអាបាៈអីគែសនាវញឆីងអេហ៝ៈន៝ប់។ ២៣ ដាៈខាន់អៃមៃកើលរាក្លាយ្សផូងអាបាៈជឹត តឹមឞានមាអូយ្សមផ៝ក់ខាន់ពាង់អ៝ន់ក្លាយ្សឞើសអុញ។ ជេសរីផូងអាបាៈអេង ដាៈខាន់អៃមៃយោៈនអាចមាខាន់ពាង់ដ៝ង់ យើនមាអ៝ន់ញជ្រាង់ឆាក់នើម ក្លាចលាសទើយខាន់ពាង់លែវខាន់អៃមៃជានតីស កើតនទ្រីអ៝ន់ឞ្យាញ់ទឹងលែៈនាវតីសខាន់ពាង់ជាន តឹមឞានមាខាន់អៃមៃបឹបើចមាខ៝អាវរាមាវបោច្រិ។

២៤ អ៝ន់រានេនាវច្រេកលើបកោរាញឞ្រាស ពាង់ទើយញជ្រាង់ខាន់អៃមៃមោជានតីសមោឞាសញឆីង ពាង់ទើយកើលខាន់អៃមៃគុតាឞើសនាប់មាត់ពាង់នើមអីនតុកគែសនាវច្រេកលើប នោកនៃខាន់អៃមៃគែសនាវរាម់មអាកទុតហោមោគែសអោសទូនាវមានទុយ្ស។ ២៥ អ៝ន់រានេនាវច្រេកលើបពាង់ពាង់ទើមអីឞ្រាសងាន់ងេន ពាង់អីនាក់រាក្លាយ្សឞ៝ន់យ៝រមាឞ្រាសយេឆូក្រីស អីកោរាញឞ៝ន់នើម។ នាវច្រេកលើប នាវទុតអ្វែស នាវទើយ នាវឞ្រាស លែៈអើមគែសគុតាពាង់ឞើសនតើមឆាអើមងាន់ ត៝ត់មាអាបៃអ្យា ងក្រែមានហ៝រ៝! អើអ៝ន់គែសកើតនៃងាន់រ៝‡៕៚

*១:១ ១:១៖ «ឞូនុយ្សឆើមកើលជានការមា» មោលាស «ទឹក»។

*១:១ ១:១៖ មថ ១៣:៥៥; យាក ១:១; ១កោ ១:២; ហេឞ ២:១

*១:៤ ១:៤៖ មថ ៧:១៥-១៦; ២ពេ ២:១-៣

*១:៥ ១:៥៖ នក ១៤:២៧-៣៥

*១:៦ ១:៦៖ ២ពេ ២:៤

*១:៧ ១:៧៖ នន ៦:១-៥; ១៩:២៤-២៥

*១:៨ ១:៨-៩៖ ២ពេ ២:១០-១១

*១:១០ ១:១០៖ ២ពេ ២:១២

*១:១១ ១:១១៖ ១តម ៦:៣-៥; ២ពេ ២:២-៣; នន ៤:៨; នក ១៦:១-៣៥; ២២:៥

*១:១២ ១:១២-១៣៖ ១កោ ១១:២០-២២; ២ពេ ២:១៣, ១៧

*១:១៤ ១:១៤៖ នន ៥:២១-២៤

†១:១៨ ១:១៨៖ តានាវតឹមរាង្លាប់មហែមឞើសមាឞ៝ន់ ជេសឞ្រាសយេឆូ ហាវឆឹតតាកាលើត្រោក ត៝ត់មាពាង់ព្លឹវាច់ ជេងរានោកងគ្លែៈទុត។

*១:១៨ ១:១៨៖ មថ ៧:១៥-១៦; រម ១៦:១៧-១៨; កោល ២:៨; ២តម ៣:១-៥

*១:១៩ ១:១៩៖ ១កោ ១:១០; ២តម ៣:២-៥

*១:២០ ១:២០៖ ១កោ ៣:៩-១១; រម ៨:២៦-២៧

*១:២១ ១:២១៖ យាក ៥:៧

‡១:២៥ ១:២៥៖ «អើអ៝ន់គែសកើតនៃងាន់រ៝» មោលាស «អាមែន »។