នាវកោរាញឞ្រាសងើយនាវតឹមរាង្លាប់មហែ នាវតឹមមពើល 1

នាវតឹមមពើល

នទើអីឞ្រាសយេឆូក្រីសញហើអ៝ន់យោហានឆៃ

នាវឞោកអ៝ន់ឞូគឹតល៝រ

នើមញចីសឆ៝ម់បុតអ្យារាញាយោហាន ពាង់ញចីសឆ៝ម់បុតអ្យាក្លាប់លាសតានាម់ ៩៥‌ យើនមាគែសឞូនុយ្សអាបាៈមឹនលាសពាង់ញចីសឆ៝ម់បុតអ្យាអេល៝រមានាម់ ៦៨។ ពាង់ញចីសឆ៝ម់បុតអ្យាតាគោលទាកពាតមោស អីទាច់មាឞ្រីអាឆី ឞូដាៈពាង់ទូគុតាគោលទាកមោអ៝ក់ឞូនុយ្សគុនៃតឹមឞានមាគុនទ្រូង យ៝រលាសពាង់មឞើសងក៝ចនាវមហែមហានអ្វែស(នតម ១:៩)។ ពាង់ញចីសឆ៝ម់បុតអ្យាតានោកឞូជានជេរជ៝ត់មាផូងញឆីង ពាង់ញជ្វាល់ឆ៝ម់បុតអ្យាអ៝ន់មាផូងញឆីងតាពើសអឹប៝នតាឞ្រីអាឆី (នតម ១:១១) នអ៝ប់មាទឹងលែៈផូងញឆីងមាឞ្រាសយេឆូ ។ យោហាន ជេងកោរាញអ៝សម៝នតាមពោលកោរាញអ៝សម៝ន ១២ នុយ្ស។ ពាង់ញចីសឆ៝ម់បុតយោហាននាវមហែមហានអ្វែសដ៝ង់ ឆ៝ម់បុតយោហានរើស ១‌ រើស ២‌ នទ្រែលមារើស ៣ ដ៝ង់។

នាវអុចនត្រ៝ង់តាឆ៝ម់បុតអ្យា

តាឆ៝ម់បុតអ្យាយោហាន ញចីសមានាវតឹមឆៃ។ យោហាន ក្វាល់ឞ្រាសយេឆូ «ក៝នឞែឞ្យាប់» យ៝រលាសឞ្រាសយេឆូ លែៈខឹតគៃមាងគ្រ៝សលើយនាវតីសឞ៝ន់ តឹមឞានមាផូងអីឆ្រាអែល វៃងខឹតក៝នឞែឞ្យាប់គៃមាទាន់កោរាញឞ្រាសយោៈនាវតីសខាន់ពាង់។

អាបៃអ្យាឞ៝ន់មោហោមវ៝ត់នហេលទឹងលែៈនាវខ្លៃតាឆ៝ម់បុតអ្យា យើនមាឞ៝ន់ឆៃមរាគែសនាវជេរជ៝ត់អេងៗទុតក្វ៝ង់តានែសនតូអ្យា ជេសរីកោរាញឞ្រាសទើយដាសទឹងលែៈនាវអ្យើស តេៈទោយ្សទឹងលែៈឞូនុយ្សអ្យើស នទ្រែលមានទ្រាប់នតុកទុតអ្វែសអ៝ន់មាទឹងលែៈឞូម៝សអីញឆីងមាឞ្រាសក្រីស ។ តាឆ៝ម់បុតអ្យាយោហាន ញចីសនទើអីកោរាញឞ្រាសញហើមាពាង់អីមរាគែសតានារជឹតនាប់ គៃមានហាវនូយ្សនហ៝ម់ទឹងលែៈផូងញឆីងអ៝ន់គុន៝ប់តានាវញឆីង ឞ៝លលាសគែសនាវជេរជ៝ត់ទុតក្វ៝ង់តានែសនតូអ្យា គែសនាវឞូជានជេរអេងៗមាផូងញឆីង នហ៝មាត៝ត់ឞូងខឹតលើយកាដោយដ៝ង់។ ឞ៝លលាសគែសទឹងលែៈនាវអីនៃកាដោយ កោរាញឞ្រាសហោមគែសនាវទើយ ជេសរីឞ្រាសយេឆូ មរាព្លឹវាច់តានែសនតូអ្យា។ តាឆ៝ម់បុតអ្យាឞ្រាសយេឆូ ដាៈយោហាន ញចីសពើសអឹឆ៝ម់បុតអ៝ន់មាផូងញឆីងពើសអឹប៝នដ៝ង់ ពើសអឹឆ៝ម់បុតអីនៃគែសតាឆ៝ម់បុតតឹមមពើលអ្យាតា នតម ២:១-៣:២២។ អ៝ក់តឹឞ៝ន់ឆៃមរោ«ពើស»តាឆ៝ម់បុតអ្យា មរោពើសអីនៃងើយហោរមានទើអីលែៈរឹង នតឹតលាសផូងញឆីងពើសអឹប៝ន គែសនាវខ្លៃលាសទឹងលែៈផូងញឆីងលាមនែសនតូ។ នាវអាបាៈតាឆ៝ម់បុតអ្យាគែសតឹមឞានមាតាឆ៝ម់បុតអេឆេកៀល ឆ៝ម់បុតដានីអែល ឆ៝ម់បុតឆាការី នអ៝ប់មានាវមឞើយយោឆែប តាឆ៝ម់បុតនាវនតើម(នន ៣៧:៦-៩)ដ៝ង់។

មឞើសនាវខ្លៃតាងកោៈតាឆ៝ម់បុតអ្យា

- នាវអោបអ្វែសលាង់ (១:១-៨)

- នាវតឹមឆៃនាវដាៈញចីសឆ៝ម់បុតអីញជ្វាល់អ៝ន់មាផូងញឆីងពើសអឹប៝ន (១:៩-៣:២២)

- នាវតឹមឆៃឆ៝ម់បុតគែសពើសអឹត្រា (៤:១-៨:១)

- នាវតឹមឆៃពើសអឹនុង (៨:២-១១:១៩)

- នាវតឹមឆៃឞេសញុកញាក់ នទ្រែលមាឞារមល៝ម់មពោមពា(ឆ្យុម) (១២:១-១៣:១៨)

- នាវតឹមឆៃនទើអេងៗជឹត (១៤:១-១៥:៤)

- នាវតឹមឆៃមាពើសអឹងានអីកោរាញឞ្រាសជីនូយ្ស (១៥:៥-១៦:២១)

- នាវរាល៝ម់ប៝នបាបីលោន នទ្រែលមាទឹងលែៈនើមអ្យើសមោហោមគែសនាវទើយជឹត (១៧:១-២០:១០)

- នាវផាតទោយ្សតានារងគ្លែៈទុត (២០:១១-១៥)

- ត្រោកមហែ នែសនតូមហែ នទ្រែលមាប៝នក្វ៝ង់យេរូឆាលឹម មហែ (២១:១-២២:៥)

- នាវងគ្លែៈទុត (២២:៦-២១)

នាវឞោក

1 ឆ៝ម់បុតអ្យាជេងនាវមឞើសងក៝ចឞ្រាសយេឆូក្រីស លែៈញហើអ៝ន់គ៝ប់យោហាន ឆៃ។ កោរាញឞ្រាសអ៝ន់ពាង់ញហើមាផូងឆើមកើលជានការមា*កោរាញឞ្រាសនើមម៝សនាវមរាគើញត៝ត់តានារជឹតនាប់តៃ។ ឞ្រាសយេឆូក្រីស អ៝ន់ទូហ្វេតោងពារ់ពាង់នើមហាន់តាគ៝ប់អីឞូនុយ្សឆើមកើលជានការមាពាង់នើម គៃមាអ៝ន់គ៝ប់គឹតនាវអីនៃ។* 2 ទឹងលែៈនាវអីគ៝ប់លែៈញចីសជេសអ្យា គ៝ប់លែៈឆៃមាមាត់គ៝ប់នើម នាវអីនៃជេងទីងាន់ ជេងនាវងើយកោរាញឞ្រាស នទ្រែលមាមឞើសងក៝ចឞ្រាសយេឆូក្រីស ជេងកោរាញឞ៝ន់។ 3 អ្វែសមអាកងាន់មាឞូម៝សអីរ៝ៈអីតាង់នាវនតើយ្សនាវងើយកោរាញឞ្រាសតាឆ៝ម់បុតអ្យា នអ៝ប់មាអ្វែសមអាកងាន់មាឞូម៝សអីលែៈតាង់ ជេសរីជានតឹងកើតទឹងលែៈនាវអីលែៈគែសញចីសជេសតាអ្យា យ៝រលាសត៝ត់ទីនារមាលោចនាវនតើយ្សអីនៃលែៈឞើយត៝ត់ជេស។

នាវអោបអ្វែសលាង់

4 ឆ៝ម់បុតគ៝ប់យោហាន ញជ្វាល់អ៝ន់មាផូងញឆីងអីរាបុនតាពើសអឹប៝នតាឞ្រីអាឆី ។ ទាន់កោរាញឞ្រាសអ៝ន់នាវអ្វែស នអ៝ប់មានាវដាប់មពាន់មាខាន់អៃមៃ។ ពាង់គុរេសអាបៃអ្យា ពាង់លែៈអើមគុរេសនើស ជេសរីពាង់មរាវាច់។ ទាន់ឞ្រាសហ្វេងអ្វែស†អីគុឞើសនាប់រានើលកាដាច់កោរាញឞ្រាសនើមអ៝ន់នាវអ្វែស នអ៝ប់មានាវដាប់មពាន់មាខាន់អៃមៃ។* 5 ទាន់ឞ្រាសយេឆូក្រីស អ៝ន់នាវអ្វែស នអ៝ប់មានាវដាប់មពាន់មាខាន់អៃមៃដ៝ង់ ពាង់ជេងនើមរាប់ជាប់មឞើសងក៝ចនាវងាន់ទើម ពាង់ជេងនើមល៝រឞូទ៝ក់រេសឞើសផូងខឹត‡ ជេសរីពាង់ជេងកោរាញទឹងលែៈកាដាច់តានែសនតូអ្យា។ ពាង់រ៝ង់មាឞ៝ន់ នទ្រែលមារាក្លាយ្សឞ៝ន់មាមហាមពាង់នើមឞើសនាវតេៈទោយ្សយ៝រមានាវតីសឞ៝ន់។* 6 នហ៝មាពាង់ជានអ៝ន់ឞ៝ន់ជេងមពោលកាដាច់ម៝ត់អ្វាញ់នទ្រែលពាង់នើម ពាង់អ៝ន់ឞ៝ន់ជេងមពោលជានឞ្រាសមាឆើមកើលជានការមាកោរាញឞ្រាសអីឞឹពាង់នើម។ អ៝ន់រានេនាវច្រេកលើបពាង់ នទ្រែលមានាវទើយពាង់បាបើនហ៝រ៝! អើអ៝ន់គែសកើតនៃងាន់រ៝§។*

7 អ្វាញ់ហ៝ម់ ពាង់វាច់រ៝ៈនទ៝រ់តុក*‌

ទឹងលែៈឞូនុយ្សមរាឆៃពាង់ទាទេ‌

ឞ៝លលាសផូងអីតាៈនត៝ប់ពាង់នើសឆៃពាង់ដ៝ង់។

ទឹងលែៈនទុលមពោលឞូនុយ្សតានែសនតូអ្យាមរាញុមរាង៝តយ៝រមាពាង់នៃទាទេ អើងាន់!

អើអ៝ន់គែសកើតនៃងាន់រ៝។*

8 កោរាញឞ្រាសអីកោរាញងាន់ ពាង់លាស៖ “គ៝ប់អ្យាជេងអាលផា នទ្រែលមាអោមេកា †”។ ពាង់គុរេសអាបៃអ្យា ពាង់លែៈអើមគុរេស ជេសរីពាង់មរាវាច់ ពាង់ទុតគែសនាវទើយមាទឹងលែៈនតីលនទើ។*

យោហាន តឹមមពើលឆៃឞ្រាសយេឆូ

9 គ៝ប់យោហាន ជេងអ៝សនោខាន់អៃមៃតានាវញឆីងមាឞ្រាសយេឆូ គែសឞូជានជេរជ៝ត់កើតខាន់អៃមៃ គែសដ៝ង់កោរាញឞ្រាសម៝ត់អ្វាញ់កើតខាន់អៃមៃ នទ្រែលមាគែសញឆ្រោយ្សនឹងតានាវឞូជានជេរកើតខាន់អៃមៃដ៝ង់ យ៝រមាឞ៝ន់គុនទ្រែលឞ្រាសយេឆូ ។ គ៝ប់អ្យាឞូដាៈទូគុតាទូគោលទាករាញាពាតមោស យ៝រមាគ៝ប់មឞើសងក៝ចនាវកោរាញឞ្រាស នទ្រែលមាមឞើសងក៝ចឞ្រាសយេឆូ ជេងកោរាញគ៝ប់នើម។ 10 តានារពើស‡ ឞ្រាសហ្វេងអ្វែសអ៝ន់គ៝ប់មោហោមអោសកាសគឹតឆាក់ ជេសរីគ៝ប់តាង់នតែសឞ៝រ់មឞូងឞើសកើយគ៝ប់រី ទុតនតែសងាន់ តឹមឞានមានតែសអោសនុង* 11 លាសមាគ៝ប់កើតនអា៖ “ម៝សនទើអីមៃឆៃអាបៃអ្យា អ៝ន់មៃញចីសទូមល៝ម់ឆ៝ម់បុត ជេសរីញជ្វាល់អ៝ន់មាផូងញឆីងពើសប៝នតាឞ្រីអាឆី អ្យា៖ ប៝នអេផេឆោ ប៝នឆាមីរនា ប៝នពើកាមុស ប៝នថៀថីរា ប៝នឆារដីស ប៝នផីលាដិលផៀ នទ្រែលមាប៝នលាវដីឆេ ”។

12 ជេសរីគ៝ប់ងគឹលជឹតកើយគៃមាឆៃនើមអីងើយមាគ៝ប់នៃ តានៃគ៝ប់ឆៃពើសអឹងគ៝ង់អុញឆាគេងមាយ្ស។ 13 តាងក្លាងងគូលងគ៝ង់ឆាគេងអីនៃគែសទូហ្វេតឹមឞានមាក៝នឞូនុយ្ស ញឆ៝សអាវជ៝ងរាជាយត៝ត់អាមពាងជ៝ង់ ជេសរីគែសរាឆែមាយ្សក៝ត់តានតើសរីជឹត។* 14 ឆ៝ក់តាឞោកពាង់ងលាងតឹមឞានមាមលី អីមាត់ពាង់តឹមឞានមាមព្យាត់អុញ‌* 15 ជ៝ង់ពាង់ច្រេកទុមតឹមឞានមាកោងអីឞូគុចតាអុញជេសរីថ៝ នតែសងើយពាង់តឹមឞានមាងគោរហ៝ចទាកក្វ៝ង់‌* 16 តីឞើសមាពាង់រីញអោតពើសអឹមាញ់ ជេសរីមឞូងពាង់គែសដាវមាត់ឞារមព្លោញងាន់ អីមុសមាត់ពាង់អាងច្រាតតឹមឞានមានារងក្លាងឞោក។* 17 ត៝ត់គ៝ប់ឆៃពាង់ គ៝ប់ខឹតយើសរ៝ចោតតានែសកេងជ៝ង់ពាង់រី។ យើនមាពាង់តេៈតីឞើសមាឞើសលើគ៝ប់ នហ៝មាលាស៖ “លើយក្លាចអោស គ៝ប់អ្យាអីឞោកទាកល៝រឞូ នទ្រែលមាងគ្លែៈទុតមាទឹងលែៈនទើ។* 18 គ៝ប់អ្យាអីនើមរេសនឹង គ៝ប់នើសតាៈខឹត ល៝ង់អាបៃអ្យាគ៝ប់គែសនាវរេសបាបើនហ៝រ៝។ ឞូនុយ្សអីលែៈខឹតទុតតាគ៝ប់នើម គ៝ប់ឞែគែសនាវទើយអ៝ន់ឞូទ៝ក់រេសទូលោសឞើសនតុកមោច។* 19 លាសនទ្រីអ៝ន់មៃញចីសហ៝ម់ទឹងលែៈនទើអីមៃលែៈឆៃនៃ នទើអីគែសអាបៃអ្យា នទ្រែលមានទើអីគែសជឹតនាប់តៃ។ 20 មាញ់ពើសអឹអីមៃឆៃគ៝ប់ញអោតតាតីឞើសមាគ៝ប់អ្យា នទ្រែលមាងគ៝ង់ឆាគេងមាយ្សពើសអឹអីអ្យា នាវខ្លៃនទើអីនៃអាល៝រនើសហោមនទ៝ប់មពោន អាបៃអ្យាគ៝ប់មឞើសមាមៃ៖ មាញ់ពើសអឹអីនៃ ជេងពើសអឹតោងពារ់មាញជ្រាង់ផូងញឆីងតាពើសនតុកប៝នអីនៃដ៝ង់ ជេសរីងគ៝ង់ឆាគេងពើសអឹអីនៃ ជេងផូងញឆីងតាពើសនតុកប៝នអីនៃដ៝ង់”។

*1:1 ១:១៖ «ឞូនុយ្សឆើមកើលជានការមា» មោលាស «ទឹក»។ តាត្រ៝ងឞើសទ៝ង់អ្យាគែសកើតនៃដ៝ង់។

*1:1 ១:១-៣៖ នតម ២២:៦-៧

†1:4 ១:៤៖ តានាវងើយគ្រែក ងើយមា«ពើសហ្វេង» យើនមាមោអោសទីហ្វេងឞូនុយ្ស។ គែសអ៝ក់ឞូនុយ្សអីគឹតឞ្លាវតានាវកោរាញឞ្រាសងើយមឹនលាស ងើយមាឞ្រាសហ្វេងអ្វែសអីគែសង្វាយទើម។ មរោពើសតានាវកោរាញឞ្រាសងើយគែសអ៝ក់គែសនាវខ្លៃលាស«លែៈរឹង»។ «ពើសហ្វេង»គែសដ៝ង់តា នតម ៣:១; ៤:៥; ៥:៦។ គែសដ៝ង់តាឆ៝ម់បុតឆាការីងើយមាងគ៝ង់អុញឆាគេងអីគែសពើសអឹអុញឆាគេង ជេងរូបមាពើសហ្វេងដ៝ង់(ឆាក ៤:២, ១០)។ គែសដ៝ង់តា អេឆា ១១:២។

*1:4 ១:៤៖ នតម ៤:៨; ១១:១៧; ១៦:៥; នង ៣:១៤

‡1:5 ១:៥៖ «ពាង់ជេងនើមល៝រឞូទ៝ក់រេសឞើសផូងខឹត» មោលាស «ពាង់ជេងក៝នឞោកទាកផូងខឹត»។

*1:5 ១:៥៖ កោល ១:១៨; ហេឞ ៩:១៤

§1:6 ១:៦, ៧៖ «អើអ៝ន់គែសកើតនៃងាន់រ៝» មោលាស «អាមែន »។

*1:6 ១:៦៖ នតម ៥:១០; ១ពេ ២:៩

*1:7 ១:៧៖ «រ៝ៈនទ៝រ់តុក» មោលាស «នអ៝ប់មាតុក»។

*1:7 ១:៧៖ ដាន ៧:១៣; ឆាក ១២:១០; មថ ២៤:៣០

†1:8 ១:៨៖ តានាវងើយគ្រែក «អាលផា »ជេងរាព្លៃរាឆ៝ឞោកទាក ជេសរី«អោមេកា »ជេងរាព្លៃរាឆ៝ងគ្លែៈទុត តឹមឞានមារាឆ៝«ក» នអ៝ប់មារាឆ៝«អ្យ»តានាវងើយឞូន៝ង ។ តា នតម ២១:៦ យោហាន នត៝បនាវខ្លៃនាវនៃកើតនអា៖ «ជេងឞោកទាក នទ្រែលមាងគ្លែៈទុតទឹងលែៈនតីលនទើ» ឆ៝ម់បុតអើមញចីសមាតីអាបាៈនត៝បកើតនៃតានតុកអ្យា។

*1:8 ១:៨៖ អេឆា ៤៤:៦

‡1:10 ១:១០៖ «តានារពើស» មោលាស «តានារកោរាញយេឆូ »។

*1:10 ១:១០៖ មក ១៦:២, ៦

*1:13 ១:១៣៖ នតម ១៤:១៤; ដាន ៧:១៣

*1:14 ១:១៤៖ នតម ២:១៨; ១៩:១២; ដាន ៧:៩

*1:15 ១:១៥៖ អេឆេ ១:២៤

*1:16 ១:១៦៖ នតម ២:១២, ១៦; ១៩:១៥, ២១; ហេឞ ៤:១២

*1:17 ១:១៧៖ នតម ១:៨; អេឆា ៤៤:៦; ដាន ៨:១៨

*1:18 ១:១៨៖ ១កោ ១៥:២៥-២៦, ៥៥