18
នាវនតឹតមាកោរាញផាតទោយ្ស មាដាសឞូអូរនទ្រោ
1 ជេសរីឞ្រាសយេឆូ នតុមនតីមពោលអ៝សម៝នពាង់ អ៝ន់មឞើសឆើមបាបើ លើយអោសទឹលនូយ្សនហ៝ម់។*១៨:១-៨៖ លក ១១:៥-១០; រម ១២:១២; ១តេ ៥:១៧ 2 ពាង់ងើយនតឹត៖ “តាទូប៝នគែសទូហ្វេកោរាញផាតទោយ្ស ពាង់ឞូនុយ្សមោអោសគឹតក្លាចមាកោរាញឞ្រាស មោកាៈមោរានាមមាឞូនុយ្សដ៝ង់។ 3 តាប៝ននៃគែសដ៝ង់ទូហ្វេឞូអូរនទ្រោខឹតឆាយដាៈពាង់ផាតទោយ្សបាបើងាន់។ ឞូអូរនទ្រោអីនៃលាស៖ «ហើយកោរាញ ដាៈមៃឆើមផាតទោយ្សមាឞូនុយ្សអីជានតីសមាគ៝ប់អើ»។ 4 ពាង់រាលាច់មោអុចផាតទោយ្សអ៝ន់មាឞូអូរនៃលែៈជ៝ៈនារងាន់ យើនមាជឹតនាប់តៃពាង់មឹនអេងតានូយ្សនហ៝ម់រី៖ «ឞ៝លលាសគ៝ប់មោគឹតក្លាចមាកោរាញឞ្រាស មោគឹតឆ្រីមមោគឹតរាមាចមាឞូនុយ្សកាដោយលែៈ 5 គ៝ប់ហោមផាតទោយ្សអ៝ន់មាឞូអូរនទ្រោអ្យាដ៝ង់ យ៝រលាសពាង់ឞ្រោៈរាខ្វាកគ៝ប់បាបើងាន់។ លាសគ៝ប់មោអោសផាតទោយ្សអ៝ន់មាពាង់ ពាង់ហោមដាៈគ៝ប់ជ៝ល់ក៝ដ៝ង់ អ៝ន់គ៝ប់ទឹល»”។
6 ឞ្រាសយេឆូ លាសជឹត៖ “ល៝ង់អ្យាត់ម៝សនាវកោរាញផាតទោយ្សអ្យើសអ្យាពាង់ងើយនើស។ 7 កោរាញឞ្រាសរាលាវមានៃ ពាង់ឆើមកើល*១៨:៧៖ មោលាស «ផាតទោយ្ស»។អ៝ន់មាខាន់អៃមៃអីឞូនុយ្សលែៈពាង់កើយ្ស អីជ៝យក្វាល់ពាង់ទឹងមាង់ទឹងនារ។ អាសពាង់ជានមឞ្រែៈមឞ្រើយមាខាន់អៃមៃឞើស?*១៨:៧៖ លក ១១:៩-១០ 8 មោអោស គ៝ប់មឞើសមាខាន់អៃមៃ កោរាញឞ្រាសឆើមកើល†១៨:៨៖ មោលាស «ផាតទោយ្ស»។អ៝ន់មាពាង់គើញ‡១៨:៨៖ មោលាស «ត៝ត់ទីម៝ងកោរាញឞ្រាសឆើមកើល ពាង់កើលនទាលរ៝»។រ៝។ យើនមាទោលគ៝ប់អីក៝នឞូនុយ្សតាៈឞើសកោរាញឞ្រាសព្លឹវាច់តានែសនតូអ្យា ហោមឆៃឞូនុយ្សគែសនាវញឆីងកើតនអាដ៝ង់លាសមោ?”
នាវនតឹតមាទូហ្វេឞូនុយ្សផារីឆី ដាសមាឞូនុយ្សក៝ប់ឆ៝ៈព្រាក់ឞូ
9 ជេសរីឞ្រាសយេឆូ ងើយទូនាវនតឹតជឹតអ៝ន់មាឞូនុយ្សអីកើបអេងឆាក់ពាង់នើមជេងឞូនុយ្សឆ៝ង់តាឞើសនាប់កោរាញឞ្រាស ជេសរីមឺចមាឞូអេង។*១៨:៩៖ លក ១៥:១-២ 10 ពាង់លាសកើតនអា៖ “គែសឞារហៃឞូក្លោហាន់មឞើសឆើមតាជ៝ង់គូងញីសជានឞ្រាស។ ទូហ្វេផូងផារីឆី ទូហ្វេជឹតមពោលក៝ប់ឆ៝ៈព្រាក់ឞើសឞូមាអ៝ន់កោរាញម៝ត់អ្វាញ់។ 11 ពាង់អីផារីឆី រីទ៝ក់ទូហ្វេអេងពាង់នើមមឞើសឆើមឞើសអ្យាលាស៖ «ហើយកោរាញឞ្រាស គ៝ប់លាសអ្វែសមាមៃ យ៝រលាសគ៝ប់មោអោសកើតឞូនុយ្សអាបាៈអេង លែៈមពោលអីនៃជេងឞូនុយ្សនតុង ឞូនុយ្សក្វែ ឞូនុយ្សល៝ម់អូរល៝ម់ឆាយ ជេសរីគ៝ប់មោតឹមឞានមាឞូនុយ្សក៝ប់ឆ៝ៈព្រាក់ឞូអីនៃដ៝ង់។ 12 ល៝ង់គ៝ប់អ្យាអ៝ត់ឆោងឆារាលាវមាឞូនុយ្សអេងទូពើសអ៝ត់ឞារនារ ជេសរីឆ៝ៈនទើគែសជឹតអឹរាហ្វាត់ង្វាយញហើរមាកោរាញឞ្រាសលែៈនទើគ៝ប់មហែគែសដ៝ង់»។*១៨:១២៖ លក ៥:៣៣; កល ២៧:៣០-៣៣
13 ល៝ង់ពាង់អីក៝ប់ឆ៝ៈព្រាក់ឞូរី ទ៝ក់ឞើសងាយមោឞាញ់ដ៝ង់ងគើរមាត់ជឹតលើមាកោរាញឞ្រាស។ ពាង់នតុរនតាងនតើសពាង់នើមយ៝រមាពាង់រាង៝តមានាវតីសពាង់នើម ពាង់លាស៖ «ហើយកោរាញឞ្រាស ទាន់មៃយោៈនអាចមាគ៝ប់ គ៝ប់ជេងឞូនុយ្សតីស»។*១៨:១៣៖ នម ៥១:៣-៥ 14 គ៝ប់មឞើសមាខាន់មៃ ខាន់ពាង់ព្លឹឆឹតតាជៃ កោរាញឞ្រាសកើបទូហ្វេឞូនុយ្សអ្យាជេងឞូនុយ្សលែៈឆ៝ង់ លែៈយោៈនាវតីសពាង់ តីសមាទូហ្វេផូងផារីឆី អីនៃកោរាញឞ្រាសមោអោសកើបជេងឞូនុយ្សឆ៝ង់ មោអោសយោៈនអាចនាវតីសពាង់។ យ៝រលាសឞូម៝សអីនហាវអេងឆាក់ពាង់នើម កោរាញឞ្រាសញជុរលើយ ឞូម៝សអីញជុរឆាក់ពាង់នើម កោរាញឞ្រាសទែនហាវពាង់”។*១៨:១៤៖ លក ១៤:១១
ឞ្រាសយេឆូ អ៝ន់នាវគែសជេងមាក៝នឆែ
(មថ ១៩:១៣-១៥; មក ១០:១៣-១៦)
15 គែសទូនារឞូលែវក៝នឆែជេៈៗហាន់តាឞ្រាសយេឆូ គៃមាដាៈពាង់ពាសតីតាក៝នឆែអីនៃអ៝ន់នាវគែសជេងមាខាន់ពាង់។ ត៝ត់មាមពោលអ៝សម៝នឆៃកើតនៃ ខាន់ពាង់ឞ្វៃលើយហាន់ទាច់អាឞ្រាសយេឆូ ។ 16 យើនមាឞ្រាសយេឆូ ក្វាល់មពោលក៝នឆែអីនៃហាន់អាពាង់ ជេសរីពាង់លាសមាមពោលអ៝សម៝នពាង់៖ “អ៝ន់ផូងក៝នឆែវាច់តាគ៝ប់ លើយអោសឞ្វៃពាង់ យ៝រលាសខាន់ពាង់មោអោសនហាវអេងឆាក់ខាន់ពាង់នើម យើនមាញឆីងមាមេៈឞឹហោងាន់ ឞូនុយ្សអីកោរាញឞ្រាសអុចម៝ត់អ្វាញ់ខាន់ពាង់គែសកើតនទ្រីដ៝ង់§១៨:១៦៖ មោលាស «ឞូនុយ្សកើតនទ្រីលែៈគែសឞ្រីកាដាច់កោរាញឞ្រាសជេស»។។ 17 គ៝ប់លាសនហេលនានេៈងាន់មាខាន់អៃមៃ ឞូម៝សមោអោសតឹមឞានមាក៝នឆែជេៈអ្យា មោគែសអោសកោរាញឞ្រាសរ៝មពាង់មាម៝ត់អ្វាញ់*១៨:១៧៖ មោលាស «ឞូនុយ្សអីនៃលាប់តាឞ្រីកាដាច់កោរាញឞ្រាសមោអោសទើយ»។”។
ទូហ្វេឞូនុយ្សនទ្រ៝ង់អុចគែសនាវរេសនហ៝រ៝
(មថ ១៩:១៦-៣០; មក ១០:១៧-៣១)
18 គែសទូហ្វេកោរាញផូងអីឆ្រាអែល អោបឞ្រាសយេឆូ កើតនអា៖ “ហើយនើមនតីអ្វែស មើមគ៝ប់ជានមេស គៃមាគែសនាវរេសនហ៝រ៝តៃ?”*១៨:១៨៖ លក ១០:២៥ 19 ឞ្រាសយេឆូ អើសមាពាង់៖ “មើមទឹងមៃក្វាល់គ៝ប់«អ្វែស»កើតនៃមេស? មោគែសអោសទូហ្វេឞូនុយ្សអ្វែស គែសទូហ្វេកោរាញឞ្រាសទើមអ្វែស។ 20 មៃលែៈគឹតជេសតានាវវៃផូងឞ៝ន់លាស៖ «លើយល៝ម់អូរល៝ម់ឆាយ លើយងខឹតឞូ លើយនតុង លើយងើយញចើត ជេសរីយើកមាមេៈឞឹហ៝ៈ»”។*១៨:២០៖ នង ២០:១២-១៦ 21 ឞូក្លោអីនៃអើសមាឞ្រាសយេឆូ ៖ “ទឹងលែៈនាវវៃអីនៃគ៝ប់ញអោតនតើមឞើសជេៈងាន់”។ 22 ត៝ត់ឞ្រាសយេឆូ តាង់កើតនៃ ជេសរីពាង់លាសមាឞូក្លោអីនៃ៖ “ហោមទូនតីលមៃមោហ៝ៈជាន តាច់លែៈទ្រាប់នទើមៃ ពាៈអ៝ន់មាមពោលអ៝អាច រីមើមៃគែសនទើខ្លៃតាប៝នអ្វែសតាកាលើ ជេសរីទឹងហាន់តឹងគ៝ប់”។*១៨:២២៖ លក ១២:៣៣; មថ ១៣:៤៤-៤៦ 23 ជេសតាង់កើតនៃ ពាង់រាវៃញហ្វាចហោងាន់ យ៝រលាសពាង់ជេងឞូនុយ្សនទ្រ៝ង់គែសទ្រាប់នទើអ៝ក់ងាន់។ 24 ទោលឞ្រាសយេឆូ ឆៃឞូនុយ្សនទ្រ៝ង់នៃ[គែសនូយ្សនហ៝ម់រាវៃ] ពាង់លាស៖ “ជេរងាន់មាឞូនុយ្សនទ្រ៝ង់អ៝ន់កោរាញឞ្រាសម៝ត់អ្វាញ់ខាន់ពាង់†១៨:២៤៖ មោលាស «ជេរងាន់មាឞូនុយ្សនទ្រ៝ង់លាប់តាឞ្រីកាដាច់កោរាញឞ្រាស»។*១៨:២៤-២៥៖ លក ៨:១៤ 25 ជេររាលាវមាអ៝ន់ឆែសឆាមោលាប់តាត្រោមងលាយ‡១៨:២៥៖ មោលាស «ទើសរាលាវមាឆែសឆាមោលាប់តាត្រោមងលាយ មាដាសឞូនុយ្សនទ្រ៝ង់លាប់តាឞ្រីកាដាច់កោរាញឞ្រាស»។”។ 26 ឞូនុយ្សអីតាង់នាវឞ្រាសយេឆូ លាសនៃ ខាន់ពាង់អោប៖ “លាសឞូនុយ្សនទ្រ៝ង់លែៈគែសជេរជេសមាអ៝ន់កោរាញឞ្រាសម៝ត់អ្វាញ់ខាន់ពាង់ លាសនទ្រីឞូនុយ្សអាអេងហោមទើយអ៝ន់កោរាញឞ្រាសម៝ត់អ្វាញ់ដ៝ង់លាសមោ?”§១៨:២៦៖ ផូងអីឆ្រាអែល គឹតលាស ឞូនុយ្សអីនទ្រ៝ង់យ៝រមាពាង់ឆ៝ង់ នទ្រីកោរាញឞ្រាសអ៝ន់នាវគែសជេងមាពាង់។ 27 ឞ្រាសយេឆូ អើសមាខាន់ពាង់៖ “នទើឞូនុយ្សជានមោឞ្លាវ កោរាញឞ្រាសជានហោមឞ្លាវ ឞូនុយ្សមោអោសឞ្លាវរាក្លាយ្សអេងឆាក់ពាង់នើម យើនមាកោរាញឞ្រាសហោមឞ្លាវរាក្លាយ្ស”។*១៨:២៧៖ នន ១៨:១៤; យេរ ៣២:១៧
28 ពេត្រោស លាសមាឞ្រាសយេឆូ ៖ “មៃលែៈឆៃហេនជេស លែៈនទើហេនគែសហេនមអារ់លើយ ជេសរីតឹងមៃ លាសនទ្រីមើមហេនមេស?”*១៨:២៨៖ លក ៥:១១ 29 ឞ្រាសយេឆូ លាសមាខាន់ពាង់៖ “គ៝ប់លាសនហេលនានេៈងាន់មាខាន់អៃមៃ ឞូម៝សមអារ់ញីសជៃ អូរក៝ន មេៈឞឹ នទ្រែលមាអ៝សនោ យ៝រមាអ៝ន់កោរាញឞ្រាសម៝ត់អ្វាញ់មាពាង់*១៨:២៩៖ មោលាស «យ៝រមាតឹងជ៝យឞ្រីកាដាច់កោរាញឞ្រាស»។*១៨:២៩៖ លក ១៤:២៦ 30 ឞូនុយ្សអីនៃពាង់ទើននទើគែសអ៝ក់រាលាវអីនៃតានោកអាបៃអ្យា នទ្រែលមាគែសនាវរេសនហ៝រ៝ដ៝ង់តានារជឹតនាប់តៃ”។
ឞ្រាសយេឆូ មឞើសមានាវពាង់ខឹត
(មថ ២០:១៧-១៩; មក ១០:៣២-៣៤)
31 ឞ្រាសយេឆូ លែវលែៈ ១២ កោរាញអ៝សម៝ន†១៨:៣១៖ តានាវងើយគ្រែក លាស «១២ នុយ្សអីនៃ»ទើម។ហាន់តានតុកអេងនទ្រែលពាង់នើម។ ពាង់លាសមាខាន់ពាង់នៃ៖ “អាបៃអ្យាឞ៝ន់ហាន់តាប៝នក្វ៝ង់យេរូឆាលឹម យ៝រលាសលែៈនាវឞូនុយ្សនតើយ្សនាវងើយកោរាញឞ្រាសលែៈញចីសកាល់អែនើសងក៝ចមាគ៝ប់អីក៝នឞូនុយ្សតាៈឞើសកោរាញឞ្រាស នាវអីនៃត៝ត់ងាន់រ៝។ 32 យ៝រលាសឞូញជុនគ៝ប់អីក៝នឞូនុយ្សតាៈឞើសកោរាញឞ្រាសអ៝ន់មាផូងអីមោទីផូងឞ៝ន់។ ផូងអីនៃគើមងគ្រើសគ៝ប់ រាកឆ្វាយ នទ្រែលមាឆ៝សទាកទីវតាគ៝ប់ដ៝ង់។*១៨:៣២-៣៣៖ លក ៩:២២, ៤៤ 33 ឞូរាពាត់គ៝ប់មាម៝ង់រាឆែ ជេសរីងខឹតលើយគ៝ប់ យើនមាពែនារឞើសកើយនៃគ៝ប់ទ៝ក់រេសជឹត”។ 34 លែៈមពោលកោរាញអ៝សម៝នមោវ៝ត់អោសនាវឞ្រាសយេឆូ ងើយអីនៃ ខាន់ពាង់មោវ៝ត់ម៝សនាវពាង់អុចលាស យ៝រលាសនាវអីនៃហោមម៝មាខាន់ពាង់ងាន់។*១៨:៣៤៖ លក ៩:៤៥; ២៤:៤៥
ឞ្រាសយេឆូ ជានឞាសឞូនុយ្សចែសមាត់អ៝ន់ឆៃអាង
(មថ ២០:២៩-៣៤; មក ១០:៤៦-៥២)
35 ទោលឞ្រាសយេឆូ ហាន់ឞើយត៝ត់ប៝នយេរីខោ គែសទូហ្វេឞូនុយ្សចែសមាត់គុទាន់ឞូតាមែងត្រ៝ងរី។ 36 ទោលពាង់តាង់នតែសឞូនុយ្សផូងហាន់រ៝ៈត្រ៝ងនៃ ពាង់អោបឞូ៖ “ម៝សគែសនាវហ្យាស?” 37 ឞូមឞើសមាពាង់៖ “នើមនតីយេឆូ តាៈឞើសប៝ននាឆារែត ពាង់ហាន់រ៝ៈត្រ៝ងអ្យា”។ 38 ជេសរីឞូនុយ្សចែសមាត់នតើមនតែរ៖ “ហើយកោរាញយេឆូ ក៝នឆៅកាដាច់ដាវីត ! យោៈនអាចមាគ៝ប់បាៈអើ!”*១៨:៣៨-៣៩៖ មថ ២០:៣០-៣១ 39 ឞូអីឞ្រោៈឞើសនាប់នៃឞ្វៃពាង់ដាៈគុអ្យាត់ឆាក់ហ៝ៈ យើនមាពាង់លើមានតែរទុតនតែសៗ៖ “ហើយក៝នឆៅកាដាច់ដាវីត ! យោៈនអាចមាគ៝ប់បាៈអើ!” 40 ឞ្រាសយេឆូ ញឆ្រុង ជេសរីដាៈឞូលែវឞូនុយ្សនៃអាពាង់។ ឞូនុយ្សចែសមាត់នៃហាន់ត៝ត់តារី ជេសរីឞ្រាសយេឆូ អោប៖ 41 “ម៝សមៃអុចអ៝ន់គ៝ប់ជានមាមៃមេស?” ឞូនុយ្សចែសមាត់នៃអើស៖ “ហើយកោរាញ អ៝ន់មាត់គ៝ប់ឆៃអាង”។ 42 ឞ្រាសយេឆូ លាសមាពាង់៖ “អាងហ៝ម់ នាវមៃញឆីងមាគ៝ប់លែៈរាក្លាយ្ស‡១៨:៤២៖ មោលាស «លែៈឞាសនាវជី»។មៃជេស”។*១៨:៤២៖ មក ៥:៣៤ 43 ជេសរីមាត់ពាង់ទោមាឆៃអាងរ៝ ពាង់តឹងឞ្រាសយេឆូ ឞើសកើយ ងក្រែមារានេមាកោរាញឞ្រាស។ លែៈឞូនុយ្សអីឆៃនាវនៃខាន់ពាង់រានេមាកោរាញឞ្រាសទាទេដ៝ង់។
*18:1 ១៨:១-៨៖ លក ១១:៥-១០; រម ១២:១២; ១តេ ៥:១៧
*18:7 ១៨:៧៖ មោលាស «ផាតទោយ្ស»។
*18:7 ១៨:៧៖ លក ១១:៩-១០
†18:8 ១៨:៨៖ មោលាស «ផាតទោយ្ស»។
‡18:8 ១៨:៨៖ មោលាស «ត៝ត់ទីម៝ងកោរាញឞ្រាសឆើមកើល ពាង់កើលនទាលរ៝»។
*18:9 ១៨:៩៖ លក ១៥:១-២
*18:12 ១៨:១២៖ លក ៥:៣៣; កល ២៧:៣០-៣៣
*18:13 ១៨:១៣៖ នម ៥១:៣-៥
*18:14 ១៨:១៤៖ លក ១៤:១១
§18:16 ១៨:១៦៖ មោលាស «ឞូនុយ្សកើតនទ្រីលែៈគែសឞ្រីកាដាច់កោរាញឞ្រាសជេស»។
*18:17 ១៨:១៧៖ មោលាស «ឞូនុយ្សអីនៃលាប់តាឞ្រីកាដាច់កោរាញឞ្រាសមោអោសទើយ»។
*18:18 ១៨:១៨៖ លក ១០:២៥
*18:20 ១៨:២០៖ នង ២០:១២-១៦
*18:22 ១៨:២២៖ លក ១២:៣៣; មថ ១៣:៤៤-៤៦
†18:24 ១៨:២៤៖ មោលាស «ជេរងាន់មាឞូនុយ្សនទ្រ៝ង់លាប់តាឞ្រីកាដាច់កោរាញឞ្រាស»។
*18:24 ១៨:២៤-២៥៖ លក ៨:១៤
‡18:25 ១៨:២៥៖ មោលាស «ទើសរាលាវមាឆែសឆាមោលាប់តាត្រោមងលាយ មាដាសឞូនុយ្សនទ្រ៝ង់លាប់តាឞ្រីកាដាច់កោរាញឞ្រាស»។
§18:26 ១៨:២៦៖ ផូងអីឆ្រាអែល គឹតលាស ឞូនុយ្សអីនទ្រ៝ង់យ៝រមាពាង់ឆ៝ង់ នទ្រីកោរាញឞ្រាសអ៝ន់នាវគែសជេងមាពាង់។
*18:27 ១៨:២៧៖ នន ១៨:១៤; យេរ ៣២:១៧
*18:28 ១៨:២៨៖ លក ៥:១១
*18:29 ១៨:២៩៖ មោលាស «យ៝រមាតឹងជ៝យឞ្រីកាដាច់កោរាញឞ្រាស»។
*18:29 ១៨:២៩៖ លក ១៤:២៦
†18:31 ១៨:៣១៖ តានាវងើយគ្រែក លាស «១២ នុយ្សអីនៃ»ទើម។
*18:32 ១៨:៣២-៣៣៖ លក ៩:២២, ៤៤
*18:34 ១៨:៣៤៖ លក ៩:៤៥; ២៤:៤៥
*18:38 ១៨:៣៨-៣៩៖ មថ ២០:៣០-៣១
‡18:42 ១៨:៤២៖ មោលាស «លែៈឞាសនាវជី»។
*18:42 ១៨:៤២៖ មក ៥:៣៤