នាវកោរាញឞ្រាសងើយតានាវងើយឞូន៝ង មាថាយ ២៧

២៧

ឞូញជុនឞ្រាសយេឆូ អាពីលាត

(មក ១៥:១; លក ២៣:១-២; យហ ១៨:២៨-៣២)

១ ត៝ត់អាអោយមពោលកោរាញជានឞ្រាស នទ្រែលមាមពោលកោរាញផូងអីឆ្រាអែល ខាន់ពាង់តឹមទីទូនតោរនាវអុចងខឹតលើយឞ្រាសយេឆូ ។ ២ ខាន់ពាង់ក៝ត់អោឞាល់លែវញជុនអាពីលាត ឞូនុយ្សប៝នរោម អីកោរាញក្វ៝ង់ម៝ត់អ្វាញ់ឞ្រីយូដា ។

នាវយូដាស-អីឆាការីយោត ងខឹតឆាក់ពាង់នើម

(ការ ១:១៨-១៩)

៣ នោកនៃយូដាស-អីឆាការីយោត អីនើមលែវឞូហាន់ញុបឞ្រាសយេឆូ នើសឆៃឞូតេៈទោយ្សឞ្រាសយេឆូ ពាង់នទុយ្សតោរលាន់តានូយ្សនហ៝ម់។ ពាង់ឆ៝ៈព្រាក់អី ៣០ កាក់រីនើសមព្លឹអ៝ន់មាមពោលកោរាញជានឞ្រាស នទ្រែលមាផូងកោរាញផូងអីឆ្រាអែល ‌ ៤ ជេសរីលាសមាខាន់ពាង់៖ “គ៝ប់លែៈតីសញជុនឞូនុយ្សមោគែសនាវតីសអ៝ន់ខាន់មៃងខឹតពាង់”។ ខាន់ពាង់អើស៖ “គឹតអែសមៃ! អីនៃជេងនាវមៃនើម!”* ៥ យូដាស-អីឆាការីយោត មអារ់មឞ្រាចព្រាក់អីនៃតាញីសជានឞ្រាស ជេសរីទូលោសឞើសនៃហាន់ងខឹតយោងក៝ឆាក់ពាង់នើម។ ៦ មពោលកោរាញជានឞ្រាសទោញព្រាក់អីនៃ ជេសរីលាស៖ “ព្រាក់អ្យាឞ៝ន់មោអោសទីតេៈតាកែសព្រាក់កោរាញឞ្រាស យ៝រលាសព្រាក់ខ្លៃមហាម”។ ៧ ជេសខាន់ពាង់តឹមញច្រាៈរី ខាន់ពាង់ឆ៝ៈព្រាក់អីនៃរាវាត់មីរឞូនុយ្សម៝នគ្លាសមាអ៝ន់ត៝ប់ខឹតផូងឞូនាច់អេង។ ៨ កើតនទ្រីទឹងឞូក្វាល់នតុកអីនៃនហ៝មាត៝ត់នារអ្យាលាស «មីរមហាម»។ ៩ នាវអីនៃជេងទីដាសនាវឞូនុយ្សនតើយ្សនាវងើយកោរាញឞ្រាសកាល់អែនើសរាញាយេរេមី លែៈញចីស៖ «ឞូលែៈឆ៝ៈព្រាក់ ៣០ កាក់អីផូងអីឆ្រាអែល លែៈលាសខ្លៃពាង់‌ ១០ ជេសរីឞូឆ៝ៈព្រាក់អីនៃរាវាត់នែសឞូនុយ្សម៝នគ្លាស កើតកោរាញឞ្រាសលែៈដាៈជេសមាគ៝ប់»។*

ពីលាត អ៝ន់ឞូងខឹតឞ្រាសយេឆូ

(មក ១៥:២-១៥; លក ២៣:៣-៥, ១៣-២៥; យហ ១៨:៣៣; ១៩:១៦)

១១ ឞ្រាសយេឆូ ទ៝ក់ឞើសនាប់កោរាញក្វ៝ង់ពីលាត ពីលាត អោបពាង់កើតនអា៖ “ងាន់លាសមៃកាដាច់ផូងអីឆ្រាអែល បាស?” ឞ្រាសយេឆូ អើស៖ “អើកើតនាវមៃលាសនាវអីនៃ”។* ១២ យើនមានោកមពោលកោរាញជានឞ្រាស នទ្រែលមាមពោលកោរាញផូងអីឆ្រាអែល នតោនឞ្រាសយេឆូ ពាង់មោអើសអោស។* ១៣ ពីលាត លាសពាង់៖ “មៃមោតាង់បាស ទឹងលែៈនាវខាន់ពាង់នតោនមៃនៃ?” ១៤ ពាង់មោអើសអោស ទូត៝ងពាង់មោអើសដ៝ង់ នហ៝មាត៝ត់កោរាញក្វ៝ង់នៃនទ្រ៝ត់ហីសរាហ៝ល់ងាន់។

១៥ តឹមអាប់នាម់ញេតបុននហ៝ត កោរាញក្វ៝ង់អីនៃវៃមអើកទូហ្វេឞូនុយ្សទោយ្សតឹងផូងប៝នលានទាន់។ ១៦ នោកនៃគែសទូហ្វេឞូនុយ្សទោយ្សឞូលឺគុនទ្រូង រាញាពាង់បារាបាស *។ ១៧ ជេសផូងប៝នលានតឹមរាគូមឞាល់ ពីលាត អោបខាន់ពាង់៖ “ឞូម៝សខាន់អៃមៃអុចអ៝ន់គ៝ប់មអើក? មអើកបារាបាស មោលាសយេឆូ អីឞូក្វាល់ឞ្រាសក្រីស ?” ១៨ ពាង់លាសកើតនៃ យ៝រមាពាង់លែៈគឹតជេសនូយ្សនហ៝ម់មពោលកោរាញជានឞ្រាសមោនាច នទ្រីទឹងខាន់ពាង់ញជុនឞ្រាសយេឆូ អ៝ន់មាពាង់នៃ។* ១៩ នោកពីលាត ហោមគុតានតុកផាតទោយ្សនៃ អូរពាង់ដាៈឞូហាន់មឞើសមាពាង់៖ “លើយអោសជានមាឞូនុយ្សអីនៃ ពាង់មោអោសគែសនាវតីស។ យ៝រមាឞូនុយ្សអីនៃមាង់ត៝នើសគ៝ប់មឞើយអ្យើសហោងាន់”។ ២០ យើនមាមពោលកោរាញជានឞ្រាស នទ្រែលមាមពោលកោរាញផូងអីឆ្រាអែល ញច៝ប់ប៝នលានទាន់មអើកបារាបាស ជេសរីទាន់ងខឹតលើយឞ្រាសយេឆូ ។ ២១ កោរាញក្វ៝ង់ពីលាត អោបខាន់ពាង់ទូតឹជឹត៖ “ឞារហៃខាន់ពាង់អ្យា ឞូម៝សខាន់អៃមៃអុចអ៝ន់គ៝ប់មអើក?” ខាន់ពាង់អើស៖ “បារាបាស !”* ២២ ពីលាត អោបតៃខាន់ពាង់៖ “លាសនទ្រីយេឆូ អីឞូក្វាល់ឞ្រាសក្រីស អ្យា មើមខាន់អៃមៃអុចអ៝ន់គ៝ប់ជាន?” ទឹងលែៈខាន់ពាង់នតែរទ្រើវ៖ “ងខឹតពាង់តាឆីតឹមរាកាង់!” ២៣ ពីលាត អោបតៃលាស៖ “ឞូនុយ្សអ្យាម៝សនាវអ្យើសពាង់លែៈជាន?” ផូងប៝នលាននតែរទ្រើវលើមាហោលាស៖ “ដាៈឞូងខឹតពាង់តាឆីតឹមរាកាង់!” ២៤ ពីលាត គឹតពាង់នើមមោហោមទើយ ឆៃប៝នលានអុសអាសលើមាហោដ៝ង់។ ជេសរីពាង់ឆ៝ៈទាករាវតីតានាប់ផូងឞូនុយ្សអ៝ក់ នហ៝មាលាស៖ “នាវអ្យាទុតតាខាន់អៃមៃនើមយឹ គ៝ប់មោអោសគែសទោយ្សដាសងខឹតឞូនុយ្សអ្យា”។* ២៥ ទឹងលែៈផូងប៝នលានអើសទ្រើវ៖ “លាសពាង់មោគែសនាវតីស អ៝ន់ទោយ្សអីនៃតុបតាហេននើម នទ្រែលមាក៝នឆៅហេននើមមហាមពាង់អីនៃ!”* ២៦ អាចមាពីលាត អុចជានតឹងនាវផូងប៝នលានទាន់នើស ពាង់មអើកលើយបារាបាស ។ ជេសរីពាង់ដាៈតាហែនរាពាត់ឞ្រាសយេឆូ មាម៝ង់រាឆែ នហ៝មាជាវអ៝ន់តាហែនងខឹតអោឞាល់តាឆីតឹមរាកាង់។ ២៧ ផូងតាហែនកោរាញក្វ៝ង់ពីលាត លែវឞ្រាសយេឆូ ហាន់លាប់តាជ៝ង់គូងញីសកោរាញក្វ៝ង់នៃ ជេសរីទឹងលែៈតាហែនតានៃគុជុមពាង់។ ២៨ ខាន់ពាង់ទ្រ៝សលើយឞ៝កអាវអោឞាល់ ជេសរីឆ៝ៈអាវចាង់ក្វ៝ង់អីតឹមឞានមាអាវកាដាច់ញឆ៝សតាអោឞាល់។ ២៩ ខាន់ពាង់ឆ៝ៈរាតាវល៝កបារ់ជានមោកកាដាច់នទោតាឞោកឞ្រាសយេឆូ រី នទ្រែលមាឆ៝ៈម៝ង់ជានម៝ង់កាដាច់អ៝ន់តីឞើសមាពាង់ក្វាន់ ជេសរីច៝នកោម៝ក់មឞាសមឺចរាម៝តអោឞាល់នហ៝មាលាស៖ “ហើយកាដាច់ផូងអីឆ្រាអែល ! ហេនយើកមៃ!” ៣០ ខាន់ពាង់រាឆ៝សទាកទីវតាអោឞាល់ នទ្រែលមាឆ៝ៈម៝ង់អីនៃមឞាងឞោកអោឞាល់ជឹត។* ៣១ ជេសមឺចរាម៝តមាអោឞាល់កើតនទ្រី ជេសរីតាហែនទ្រ៝សលើយអាវអីនៃឞើសឆាក់ពាង់ ព្លឹញឆ៝សតៃអាវពាង់នើមនើស ជេសរីតេកលែវអោឞាល់អានតុកឆីតឹមរាកាង់។

ឞូងខឹតឞ្រាសយេឆូ តាឆីតឹមរាកាង់

(មក ១៥:២១-៣២; លក ២៣:២៦-៤៣; យហ ១៩:១៧-២៧)

៣២ នោកលោសឞើសប៝ន ផូងតាហែនម៝ប់ទូហ្វេឞូក្លោរាញាពាង់ឆីមោន តាៈឞើសប៝នក្វ៝ង់កីរេន ឞូដាៈអោឞាល់តូយឆីតឹមរាកាង់ឞ្រាសយេឆូ ៣៣ ត៝ត់តាទូនតុករាញា«កោលកោថា » រាឞ្លាងលាស «នតុកនតីងឞោក»។ ៣៤ ជេសរីឞូឆ៝ៈនទ្រាញ់ព្លៃយុងយារប៝នលាយដាសទាកព្លៃមាត់តាង់†ងាន់អ៝ន់ឞ្រាសយេឆូ ញេត ជេសពាង់ច្យាម់ដេៈ ពាង់មោអុចញេតអោស។* ៣៥ ជេសឞូព៝ង់អោឞាល់តាឆីតឹមរាកាង់ ឞូតឹមពាៈឞ៝កអាវពាង់មានទើញច្រ៝ស‡។ ៣៦ ខាន់ពាង់គុរើបគើបតានៃញជ្រាង់ឞ្រាសយេឆូ ។ ៣៧ តាកាលើឞោកឞ្រាសយេឆូ រី ខាន់ពាង់ព្លាទូរាលាតកាដារញចីសមឞើសងក៝ចនាវឞូនតោនពាង់ លាសកើតនអា៖ «អ្យារាញាយេឆូ កាដាច់ផូងអីឆ្រាអែល »។ ៣៨ នោកនៃឞូងខឹតនទ្រែលឞ្រាសយេឆូ ឞារហៃឞូនុយ្សនតុងដ៝ង់ អីទូហ្វេអ៝ន់ឞើសមាពាង់ ទូហ្វេជឹតអ៝ន់ឞើសច្យៅ។*

៣៩ លែៈឞូនុយ្សអីឞ្រោៈរ៝ៈនៃ ងគ្រើសងគ្រាប់រាតែសឞោករុលទុលមឺចមាអោឞាល់* ៤០ នហ៝មាលាស៖ “ហើយឞូនុយ្សអីលាសរើយ្សលើយញីសជានឞ្រាសមាកោរាញឞ្រាស ជានតៃអីមហែពែនារជេស។ លាសនទ្រីរាក្លាយ្សអេងឆាក់មៃនើម លាសមៃក៝នកោរាញឞ្រាសងាន់ ជុរឞើសឆីតឹមរាកាង់នៃហ៝ម់!”* ៤១ មពោលកោរាញជានឞ្រាស ផូងនើមនតីនាវវៃផូងអីឆ្រាអែល នទ្រែលមាមពោលកោរាញផូងអីឆ្រាអែល លែវឞាល់ងើយងគ្រើសមាពាង់កើតនៃដ៝ង់ ខាន់ពាង់លាស៖ ៤២ “ពាង់ទើយកើលអ៝ក់ឞូអាបាៈអេង តីសមាមោអោសទើយរាក្លាយ្សឆាក់ពាង់នើម! លាសពាង់អីកាដាច់ផូងអីឆ្រាអែល ងាន់ អ៝ន់ពាង់ជុរឞើសឆីតឹមរាកាង់អាបៃអ្យា ជេសរីហេនអ្យាត់មាពាង់ដ៝ង់! ៤៣ ពាង់លែៈញឆីងមាកោរាញឞ្រាស លាសកោរាញឞ្រាសអុច អ៝ន់កោរាញឞ្រាសរាក្លាយ្សពាង់អាបៃអ្យារ៝ យ៝រលាសពាង់លាស៖ «គ៝ប់អីក៝នកោរាញឞ្រាស»”។* ៤៤ ឞ៝លលាសឞារហៃឞូនុយ្សនតុងអីឞូងខឹតនទ្រែលឞ្រាសយេឆូ តារី មឺចរាម៝តអោឞាល់កើតនៃដ៝ង់។*

ឞ្រាសយេឆូ តាច់នហ៝ម់

(មក ១៥:៣៣-៤១; លក ២៣:៤៤-៤៩; យហ ១៩:២៨-៣០)

៤៥ នតើមឞើសនារងក្លាងឞោកលាមឞ្រីទាកអីនៃត្រោកគែសង៝ទាទេ នហ៝មាត៝ត់ម៝ងពែកេងមាង់។* ៤៦ ក្លាប់លាសតាម៝ងពែកេងមាង់ ឞ្រាសយេឆូ នតែរទុតទាង់តានាវងើយហេឞ្រើ ៖ “អេលី! អេលី! លាមាឆាបាច់ថានី ?” រាឞ្លាងនាវនៃ៖ «អើកោរាញឞ្រាសគ៝ប់អើយ! អើកោរាញឞ្រាសគ៝ប់អើយ! ម៝សនាវមៃនត្លើយគ៝ប់?»* ៤៧ ឞូបាបាៈអីគុតានៃតាង់នាវពាង់នតែរនើសវ៝ត់វិ ឞូលាស៖ “ពាង់ក្វាល់អេលីយា អីឞូនុយ្សនតើយ្សនាវងើយកោរាញឞ្រាសឞើសកាល់អែនើស”។ ៤៨ ទោមាគែសទូហ្វេឞូនុយ្សតាផូងខាន់ពាង់ញច្វាត់ឆ៝ៈឞ៝កយុកតាទាកឆ្រាតពូតតាចោងម៝ង់នទឹអ៝ន់ពាង់ញេត។* ៤៩ យើនមាឞូនុយ្សអាបាៈលាស៖ “ក៝ប់អ្វាញ់ប៝ត់ គឹតអេលីយា ហាន់រាក្លាយ្សពាង់មោលាសមោ”។ ៥០ ជេសរីឞ្រាសយេឆូ នតែរតៃទុតទាង់ នហ៝មារ៝សនហ៝ម់ក្ល៝ក់។ ៥១ តាម៝ងនៃឞ៝កអីញចីងតាមពោងជ្រោទុតក្ល៝សអ្វែសតាត្រោមញីសជានឞ្រាសមាកោរាញឞ្រាស ទោមាហេកច្វីកជេងឞារ នតើមឞើសលើនហ៝មាត៝ត់អាទ៝ង់ នែសនតូងគារ់ លុក្លេរដាង។* ៥២ នតូមោចពើកឞ៝ង់រឺកបឺក ខឹតផូងឞូនុយ្សក្ល៝សអ្វែសអ៝ក់អីវៃគុឆ៝ង់តាឞើសនាប់កោរាញឞ្រាសទ៝ក់រេស។ ៥៣ ជេសឞ្រាសយេឆូ ទ៝ក់រេស ផូងខាន់ពាង់លោសឞើសនតូមោច លាប់តាប៝នយេរូឆាលឹម អីប៝នក្ល៝សអ្វែស ញហើអ៝ន់អ៝ក់ឞូនុយ្សឆៃ។ ៥៤ នោកកោរាញតាហែនរោម នទ្រែលមាផូងតាហែនក៝ប់ញជ្រាង់ឞ្រាសយេឆូ តានៃ ឆៃងគារ់នែសនតូ នទ្រែលមាឆៃទឹងលែៈនាវគែសកើតនៃ ខាន់ពាង់ក្លាចញឆ៝រ់ហោងាន់ ជេសរីលាស៖ “ឞូក្លោអ្យាអីក៝នកោរាញឞ្រាសងាន់យា!”* ៥៥ តានតុកនៃគែសអ៝ក់ឞូអូរអីតឹងឞ្រាសយេឆូ តាៈឞើសឞ្រីកាលីលេ អីកើលពាង់ដ៝ង់ ខាន់ពាង់គុអ្វាញ់ពាង់ទឹងលែៈនាវអីនៃឞើសងាយ។* ៥៦ តានៃគែសមារី តាៈឞើសប៝នមាដាលា មារី អីមេៈយាកើ យោឆែប ជេសរីគែសនអ៝ប់មាអីមេៈយាកោប យោហាន §ដ៝ង់។

ឞូត៝ប់ឞ្រាសយេឆូ

(មក ១៥:៤២-៤៧; លក ២៣:៥០-៥៦; យហ ១៩:៣៨-៤២)

៥៧ ត៝ត់កេងមាង់គែសទូហ្វេឞូនុយ្សនទ្រ៝ង់រាញាពាង់យោឆែប តាៈឞើសប៝នអារីមាថេ ពាង់ជេងមពោលអ៝សម៝នឞ្រាសយេឆូ ដ៝ង់។* ៥៨ ពាង់ហាន់ម៝ប់ពីលាត ទាន់ឆ៝ៈឆាក់ជាន់ឞ្រាសយេឆូ ពីលាត ដាៈឞូអ៝ន់មាពាង់។ ៥៩ ជេសរីពាង់ឆ៝ៈឆាក់ជាន់ឞ្រាសយេឆូ ពូតដាសឞ៝កលាយ្សក្ល៝សងលាង។ ៦០ ពាង់ញជ៝រឆាក់ឞ្រាសយេឆូ នៃតាត្រោមនតូមោចមហែ នតូអីពាង់លែៈដាៈឞូលោកតាលុក្លេរ*មានទ្រាប់មាឆាក់ពាង់នើម។ ជេសរីពាង់រាលាៈទូមល៝ម់លុក្វ៝ង់រាទ៝ល់ត្រោមមោចរី ពាង់នើមឆឹតយ៝តក្លាក់។ ៦១ មារី តាៈឞើសប៝នមាដាលា នទ្រែលមាមារី ទូហ្វេអេងជឹតគុតានៃដ៝ង់ ខាន់ពាង់គុតឹមឆ៝ង់មពោងមោចរី។

៦២ ត៝ត់អោយតៃរី តានារឆាបាត់ អីនាររាលូផូងអីឆ្រាអែល មពោលកោរាញជានឞ្រាស នទ្រែលមាផូងផារីឆី ខាន់ពាង់លែវឞាល់ហាន់ម៝ប់ពីលាត ៦៣ មឞើសមាពាង់៖ “អើកោរាញ ហេនហោមកាសគឹតនាវឞូនុយ្សមរោសអីនៃលាសនោកពាង់ហោមរេសនើស៖ «ជេសគ៝ប់ខឹត ត៝ត់ពែនារគ៝ប់ទ៝ក់រេសតៃ»។* ៦៤ លាសនទ្រីទាន់កោរាញដាៈតាហែនអ៝ន់ញជ្រាង់ងាន់មោចអីនៃអ៝ន់លោចពែនារ។ ក្លាចលាសមពោលអ៝សម៝នពាង់ហាន់ឆ៝ៈនតុងឆាក់ពាង់នៃ ជេសរីមឞើសងក៝ចមាផូងប៝នលានលាសពាង់លែៈទ៝ក់រេស។ លាសនទ្រីនាវមរោសអាបៃអ្យាអ្យើសរាលាវមាឞើសកើយនើសជឹត”។* ៦៥ ពីលាត លាសមាខាន់ពាង់៖ “ខាន់មៃឆ៝ៈតាហែន ដាៈឞូញជ្រាង់ងាន់អ៝ន់ទុតអ្វែសទោ ទាសអុចខាន់មៃនើម!” ៦៦ ជេសរីខាន់ពាង់ហាន់អាមោច ញជឹរនតូមោចព្លានទើវែរកាលើជឹតគៃមាលើយអ៝ន់ឞូលាប់ នទ្រែលមាអ៝ន់តាហែនគុញជ្រាង់។

*២៧:៤ ២៧:៤៖ នវ ២៧:២៥

*២៧:១០ ២៧:១០៖ ឆាក ១១:១២-១៣; យេរ ១៩:១-១៣; ៣២:៦-៩

*២៧:១១ ២៧:១១៖ មថ ២:២

*២៧:១២ ២៧:១២-១៤៖ នម ៣៨:១៣-១៥; អេឆា ៥៣:៧

*២៧:១៦ ២៧:១៦៖ ឆ៝ម់បុតអើមអីញចីសមាតីអាបាៈ ញចីសលាស៖ «យេឆូ-បារាបាស »។ នទើញចីសនៃគែសតាត្រ៝ង ១៦‌ ១៧‌ ២០‌ ២១ នទ្រែលមាតា ២៦ តាងកោៈអ្យា។

*២៧:១៨ ២៧:១៨៖ យហ ១១:៤៧-៤៨

*២៧:២១ ២៧:២១-២៣៖ ការ ៣:១៣-១៤; ១៣:២៧-២៨

*២៧:២៤ ២៧:២៤៖ នន ២១:៦-៨

*២៧:២៥ ២៧:២៥៖ យេរ ២៦:១៥; ការ ៥:២៨

*២៧:៣០ ២៧:៣០៖ អេឆា ៥០:៦

†២៧:៣៤ ២៧:៣៤៖ ឞូមឹនលាស ឞូអ៝ន់នទើអីនៃមាឞ្រាសយេឆូញេត គៃមាកើលមោអីរជី។

*២៧:៣៤ ២៧:៣៤៖ នម ៦៩:២១

‡២៧:៣៥ ២៧:៣៥៖ ឆ៝ម់បុតអើមអីញចីសមាតីអាបាៈគែសនត៝ប៖ «គៃមាទីដាសនាវឞូនុយ្សនតើយ្សនាវងើយកោរាញឞ្រាសកាល់អែនើសលែៈគែសញចីស៖ «ឞូឆ៝ៈឞ៝កអាវគ៝ប់តឹមពាៈ ជេសរីឆ៝ៈអាវគ៝ប់មានទើញច្រ៝ស»»។

*២៧:៣៨ ២៧:៣៨៖ អេឆា ៥៣:១២

*២៧:៣៩ ២៧:៣៩៖ នម ២២:៦-៧; ១០៩:២៥

*២៧:៤០ ២៧:៤០៖ មថ ២៦:៦១; យហ ២:១៩

*២៧:៤៣ ២៧:៤៣៖ មថ ២៦:៦៣-៦៤; នម ២២:៨

*២៧:៤៤ ២៧:៤៤៖ លក ២៣:៣៩-៤៣

*២៧:៤៥ ២៧:៤៥៖ អាម ៨:៩

*២៧:៤៦ ២៧:៤៦៖ នម ២២:១

*២៧:៤៨ ២៧:៤៨៖ នម ៦៩:២១

*២៧:៥១ ២៧:៥១៖ នង ២៦:៣១-៣៣; ហេឞ ១០:១៩-២០

*២៧:៥៤ ២៧:៥៤៖ មក ១៥:៣៩

*២៧:៥៥ ២៧:៥៥-៥៦៖ លក ៨:២-៣

§២៧:៥៦ ២៧:៥៦៖ «អីមេៈយាកោប យោហាន » មោលាស «អីមេៈក៝នឞូក្លោឆេបេដេ »។

*២៧:៥៧ ២៧:៥៧-៥៨៖ នវ ២១:២២-២៣

*២៧:៦០ ២៧:៦០៖ នោកនៃតាផូងអីឆ្រាអែល មោចផូងខាន់ពាង់ ខាន់ពាង់លោកត្រោមតាលុក្លេរ ត្រោមអីនៃទើយឞ្រោៈលាប់ ទើយត៝ប់អ៝ក់ឞូនុយ្ស។

*២៧:៦៣ ២៧:៦៣៖ មថ ១២:៤០

*២៧:៦៤ ២៧:៦៤៖ មថ ២៨:១២-១៣