នាវកោរាញឞ្រាសងើយនាវតឹមរាង្លាប់មហែ ផីលេមោន 1

ឆ៝ម់បុតពោលញជ្វាល់អ៝ន់មា

ផីលេមោន

នាវឞោកអ៝ន់ឞូគឹតល៝រ

នើមញចីសឆ៝ម់បុតអ្យារាញាពោល ពាង់ញចីសឆ៝ម់បុតអ្យាក្លាប់លាសតានាម់ ៦១ ក្លាប់លាស ២៨ នាម់ជេសឞ្រាសយេឆូ ទ៝ក់រេស។ ពាង់ញចីសឆ៝ម់បុតអ្យានោកពាង់ហោមគុតាត្រោមនទ្រូង នាវពាង់គុនទ្រូងនៃ យ៝រមានាវមឞើសងក៝ចនាវមហែមហានអ្វែស(ផលម ១:១, ៩, ២៣)។ ឞូមឹនលាសពាង់គុនទ្រូងតាប៝នរោម ។ នោកពោល ញជ្វាល់ឆ៝ម់បុតអ៝ន់មានោផីលេមោន អ្យា ពាង់ញជ្វាល់នទ្រែលដ៝ង់ពែអឹឆ៝ម់បុតអាអេងជឹត ឆ៝ម់បុតអេផេឆោ ឆ៝ម់បុតផីលីប ឆ៝ម់បុតកោលោស។ ឆ៝ម់បុតពាង់ញជ្វាល់អ៝ន់មានោផីលេមោន អ្យា ពាង់ញជ្វាល់អ៝ន់នអ៝ប់មាផូងញឆីងអីគុរាបុននទ្រែលនោផីលេមោន តាញីសពាង់ដ៝ង់(ផលម ១:២)។

មាឆ៝ម់បុតអាអេងអីពោល ញចីសទាន់អ្វាញ់តាឆ៝ម់បុតរោមតានាវឞោក «ឆ៝ម់បុតពោល »។

ផីលេមោន ជេងឞូនុយ្សនទ្រ៝ង់ ពាង់គែសទឹកអាបាៈ។ ពោល មឞើសងក៝ចនាវមហែមហានអ្វែស ជេសរីពាង់ឆឹតញឆីងមាឞ្រាសក្រីស (ផលម ១:១៩)។ ពាង់គែសដ៝ង់ទូហ្វេទឹករាញាអោនេឆីម យើនមានោអោនេឆីម លែៈទូញច្វាត់ត៝ត់អាប៝នពោល គែសនទ្រូង តាប៝នអីនៃពាង់តឹមម៝ប់មាពោល ពាង់តាង់ពោល មឞើសងក៝ចនាវមហែមហានអ្វែស ពាង់ឆឹតញឆីងមាឞ្រាសក្រីស (ផលម ១:១០) ជេសរីនហ៝មាកើលពោល ទោលពោល ហោមគុតានទ្រូងនៃ(ផលម ១:១៣)។ អោនេឆីម លែៈរាគ៝ល់នូយ្សនហ៝ម់ព្លឹឆឹតជានទឹកមាផីលេមោន តៃ យ៝រលាសអាបៃអ្យាពាង់លែៈឆឹតញឆីងមាឞ្រាសក្រីស ។ ទីមាផីលេមោន តេៈទោយ្សក្វ៝ង់អោនេឆីម នទ្រីទឹងពោល ញចីសឆ៝ម់បុតអ្យាញជ្វាល់អ៝ន់មាផីលេមោន ទាន់ផីលេមោន យោៈមោហោមតេៈទោយ្សមាអោនេឆីម រ៝មអោនេឆីម មាលែៈនូយ្សនហ៝ម់ជេងតឹមឞានមាពោល នើម(ផលម ១:១៧)។ អោនេឆីម ញអោតឆ៝ម់បុតអ្យាគៃមាអ៝ន់ផីលេមោន អីកោរាញពាង់នើម។ រាញាអោនេឆីម គែសនាវខ្លៃលាស«គែសខ្លៃ» តា ផលម ១:១១ ពោល ទ៝ង់នាវខ្លៃរាញាអីនៃកើតនអា៖ «នតើមនើសពាង់(អោនេឆីម )មោអោសគែសនាវខ្លៃមាមៃ យើនមាអាបៃអ្យាពាង់គែសនាវខ្លៃមាមៃ»។

មឞើសនាវខ្លៃតាងកោៈតាឆ៝ម់បុតអ្យា

- នាវអោបអ្វែសលាង់ (១:១-៣)

- ពោល រានេផីលេមោន (១:៤-៧)

- ពោល ទាន់ផីលេមោន យោៈមាអោនេឆីម (១:៨-២២)

- នាវនតិញងគ្លែៈទុត (១:២៣-២៥)

នាវអោបអ្វែសលាង់

1 ឆ៝ម់បុតគ៝ប់ពោល ញចីស គ៝ប់អីឞូនុយ្សគែសនទ្រូងយ៝រមាជានការមាឞ្រាសក្រីសយេឆូ នអ៝ប់មាឆ៝ម់បុតអ៝សនោឞ៝ន់តីមោថេ ដ៝ង់។ គ៝ប់ញចីសឆ៝ម់បុតអ្យាអ៝ន់មាមៃនោផីលេមោន ។ ហេនញជ្វាល់ឆ៝ម់បុតអ្យាទាន់អោបនាវអ្វែសលាង់មៃអីមឹតជាង់អ្វែស អីឞូនុយ្សជានការកើតហេន*។ 2 ញជ្វាល់ឆ៝ម់បុតអ្យាអ៝ន់មាយោសអាប់ផៀ ដ៝ង់ ញជ្វាល់អ៝ន់មានោអាខីពុស អីឞូនុយ្សជានការនទ្រែលហេន ឞ៝លលាសគែសអ៝ក់ឞូនុយ្សតឹមរាទ៝ង់ដាសហេន† ញជ្វាល់អ៝ន់មាផូងញឆីងគុរាបុនតាជៃមៃដ៝ង់ ទាន់អោបនាវអ្វែសលាង់ទឹងលែៈខាន់អៃមៃ។* 3 ទាន់កោរាញឞ្រាសឞឹឞ៝ន់ នទ្រែលមាកោរាញយេឆូក្រីស អ៝ន់នាវអ្វែស អ៝ន់នាវដាប់មពាន់មាខាន់អៃមៃ។

4 អាប់តឹគ៝ប់មឞើសឆើមមាមៃ គ៝ប់លាសអ្វែសមាកោរាញឞ្រាសអីឞ្រាសគ៝ប់យើកមឞាស‌ 5 យ៝រលាសគ៝ប់តាង់នាវឞូមឞើសងក៝ចនាវមៃញឆីងមាកោរាញយេឆូ នាវមៃរ៝ង់មាទឹងលែៈផូងប៝នលានកោរាញឞ្រាស។* 6 គ៝ប់ទាន់កោរាញឞ្រាសអ៝ន់នាវញឆីងមៃអីមៃលែៈគែសនទ្រែលហេនអ៝ន់លើមាជ្រូ នហ៝មាមៃវ៝ត់ទឹងលែៈនទើអ្វែសអីឞ៝ន់លែៈគែសតាឞ្រាសក្រីស ។* 7 អើនោ ឆៃមៃគែសនូយ្សនហ៝ម់រ៝ង់មាផូងញឆីងមាឞ្រាសយេឆូក្រីស លែៈគែសនហាវនូយ្សនហ៝ម់គ៝ប់ នទ្រែលមាអ៝ន់គ៝ប់គែសនូយ្សនហ៝ម់រាម់មអាកហោងាន់ យ៝រមាមៃលែៈជានអ៝ន់ខាន់ពាង់គែសនហាវនូយ្សនហ៝ម់ដ៝ង់។

ពោល កើលងគាងមាអោនេឆីម

8 ឞ៝លលាសគ៝ប់គែសនាវទើយតាៈឞើសឞ្រាសក្រីស ទើយដាៈមៃជាននទើអីទីមាមៃជានកាដោយ‌ 9 យើនមាគ៝ប់ទាន់មៃជានទូនាវយ៝រមាមៃគែសនាវរ៝ង់។ គ៝ប់ពោល អ្យាលែៈរាញហើយ អាបៃអ្យាគែសនទ្រូងយ៝រមាជានការមាឞ្រាសក្រីសយេឆូ ជឹត។ 10 នទ្រីគ៝ប់ទាន់មៃជានទូនាវអ៝ន់មានោអោនេឆីម អីគ៝ប់កើបតឹមឞានមាក៝នគ៝ប់នើម អីគ៝ប់លែវពាង់ញឆីងមាឞ្រាសយេឆូ ទោលគ៝ប់គែសនទ្រូង។* 11 នតើមនើសពាង់មោអោសគែសនាវខ្លៃមាមៃ យើនមាអាបៃអ្យាពាង់គែសនាវខ្លៃមាមៃ ជេសរីនអ៝ប់មាគ៝ប់ដ៝ង់‡។ 12 គ៝ប់មព្លឹពាង់អាមៃនើម ទាន់មៃរ៝មពាង់ទោ យ៝រលាសពាង់អីឞូនុយ្សគ៝ប់រ៝ង់ហោងាន់។ 13 គ៝ប់អុចងាន់អ៝ន់ពាង់ហោមគុនទ្រែលគ៝ប់ គៃមាអ៝ន់ពាង់ជានការនត្រ៝ៈមៃទោលគ៝ប់គែសនទ្រូងយ៝រមាមឞើសងក៝ចនាវមហែមហានអ្វែស។ 14 យើនមាគ៝ប់មោអុចអោសជាន លាសអេហ៝ៈអុចតាៈឞើសមៃ គៃមាលើយអោសញច៝ប់មៃជាននទើអ្វែសអ្យា អ៝ន់មៃជានមាលែៈនូយ្សនហ៝ម់ហ៝ៈ។*

15 ក្លាប់លាសអោនេឆីម តឹមងខាសឞើសមៃទូប្ល៝ត់ គៃមាអ៝ន់មៃគែសតៃពាង់នហ៝រ៝‌ 16 មោហោមអោសជេងទឹកទើម យើនមាជេងឞូនុយ្សគែសនាវខ្លៃរាលាវមាទឹកជឹត ជេងអ៝សឞ៝ន់អីទុតរ៝ង់ងាន់ហ៝ៈ។ ពាង់ជេងអ៝សនោគ៝ប់អីទុតរ៝ង់ងាន់ យើនមាមៃរ៝ង់ពាង់រាលាវមាគ៝ប់ងាន់ យ៝រមាពាង់ទឹកមៃ នអ៝ប់មាជេងអ៝សមៃតាកោរាញយេឆូ ដ៝ង់។ 17 លាសនទ្រី លាសមៃកើបគ៝ប់ជេងអ៝សនោមៃតានាវញឆីងងាន់ ទាន់មៃរ៝មពាង់អ៝ន់តឹមឞានមារ៝មគ៝ប់ដ៝ង់។ 18 លាសពាង់គែសជានតីសមាមៃ មោលាសហោមរាន៝នមាមៃ រាន៝នអីនៃអ៝ន់មៃកើបតាគ៝ប់ហ៝ៈ។ 19 នាវអ្យាគ៝ប់នើមពោល ញចីសមាតីគ៝ប់នើម៖ គ៝ប់មរាត៝ម់រាន៝នអីនៃមាមៃ។ គ៝ប់មោអុចងកាសតោរមៃនាវអីគ៝ប់លែវមៃគែសនាវរេសនហ៝រ៝ នទើអីនៃតឹមឞានមារាន៝នឆាក់មៃហោមមាញគ៝ប់។ 20 អើនោ គ៝ប់ទាន់មៃកើលនាវអីនៃយ៝រមាមៃញឆីងមាកោរាញយេឆូ ទាន់នហាវនូយ្សនហ៝ម់គ៝ប់តាឞ្រាសក្រីស ដ៝ង់។ 21 គ៝ប់ញចីសឆ៝ម់បុតអ្យាញជ្វាល់អ៝ន់មៃ គ៝ប់ញឆីងជេសមៃអ្យាត់កើតនាវគ៝ប់ទាន់អ្យា ជេសរីគ៝ប់គឹតនហេលមៃមរាជានរាលាវឞើសនាវគ៝ប់ទាន់អ្យាជឹត។ 22 គ៝ប់អុចទាន់មាមៃហោមទូនាវដ៝ង់ ទាន់មៃនទ្រាប់ទូនតុកគុអ៝ន់មាគ៝ប់ យ៝រលាសគ៝ប់រានើមម៝ប់ខាន់អៃមៃ យ៝រនាវខាន់អៃមៃមឞើសឆើមទាន់កោរាញឞ្រាសអ៝ន់គ៝ប់លោសឞើសនទ្រូងអ្យា។*

នាវនតិញងគ្លែៈទុត

23 នោអេពាព្រាស អីគែសនទ្រូងនទ្រែលគ៝ប់យ៝រមាជានការមាឞ្រាសក្រីសយេឆូ ពាង់អោបនាវអ្វែសលាង់មៃ។* 24 ជេសរីនោមារកោស នោអើរីសដារកុស នោដេមាស នទ្រែលមានោលូកា ឞូនុយ្សអីជានការនទ្រែលគ៝ប់ ខាន់ពាង់អោបនាវអ្វែសលាង់មៃដ៝ង់។* 25 ទាន់នាវអ្វែសកោរាញយេឆូក្រីស គុនទ្រែលនូយ្សនហ៝ម់ខាន់អៃមៃ៕៚

*1:1 ១:១៖ មោលាស «ជានការនទ្រែលហេន»។

†1:2 ១:២៖ «ឞូនុយ្សជានការ...ដាសហេន» មោលាស «អីឞូនុយ្សតាហែនឞ្រាសក្រីសយេឆូ នទ្រែលមាហេន»។

*1:2 ១:២៖ កោល ៤:១៧

*1:5 ១:៥៖ ផល ២:១-៥; ហេឞ ៦:១០

*1:6 ១:៦៖ អេផ ១:៣

*1:10 ១:១០៖ កោល ៤:៩; ១តម ១:២

‡1:11 ១:១១៖ តានាវងើយគ្រែក រាញា«អោនេឆីម» គែសនាវខ្លៃលាស «គែសនាវខ្លៃ»។

*1:14 ១:១៤៖ ២កោ ៩:៧

*1:22 ១:២២៖ ផល ១:២៥; ២:២៤

*1:23 ១:២៣៖ កោល ១:៧; ៤:១២

*1:24 ១:២៤៖ ការ ១២:២៥; ១៩:២៩; កោល ៤:១៤; ២តម ៤:១០-១១