នាវកោរាញឞ្រាសងើយនាវតឹមរាង្លាប់មហែ នាវតឹមមពើល 13

មពោមពា(ឆ្យុម)ទុតជាញអីលោសឞើសទាកវាច់ទាកវារ់

1 ជេសរីគ៝ប់ឆៃទូមល៝ម់មពោមពា(ឆ្យុម)ទុតជាញលោសឞើសទាកវាច់ទាកវារ់រី គែសពើសអឹឞោក នទ្រែលមាគែសជឹតអឹងកែ តាកាលើងកែពាង់រីគែសជឹតអឹមោកកាដាច់ដ៝ង់ ជេសរីតាកាលើពើសអឹឞោកពាង់រីគែសញចីសរាញាអេងៗមឺចរាម៝តកោរាញឞ្រាស។* 2 មពោមពា(ឆ្យុម)អីគ៝ប់ឆៃនៃឆាក់ពាង់តឹមឞានមាយៅឞ្រាច់ អីជ៝ង់ពាង់តឹមឞានមាជ៝ង់កៅ ជេសរីអីមឞូងពាង់តឹមឞានមាមឞូងយៅមុរ។ ឞេសញុកញាក់អ៝ន់នាវទាង់ពាង់នើមមាមពោមពា(ឆ្យុម)អីនៃ នទ្រែលមាអ៝ន់គុតារានើលកាដាច់ពាង់នើម នអ៝ប់មាអ៝ន់នាវទើយក្វ៝ង់មាមពោមពា(ឆ្យុម)អីនៃ។* 3 គ៝ប់ឆៃទូមល៝ម់ឞោកមពោមពា(ឆ្យុម)អីនៃរាមាញឞើយមាខឹត យើនមានតុកអីរាមាញទុតហោឞើយមាខឹតនៃលែៈឞាសច្រាវ។ ជេសរីទឹងលែៈឞូនុយ្សតានែសនតូនទ្រ៝ត់ហីសរាហ៝ល់ទាទេងាន់ លែវឞាល់តឹងមពោមពា(ឆ្យុម)អីនៃ។* 4 ខាន់ពាង់យើកមឞាសមាឞេសញុកញាក់អីអ៝ន់នាវទើយមាមពោមពា(ឆ្យុម)អីនៃ ជេសរីខាន់ពាង់យើកមឞាសមាមពោមពា(ឆ្យុម)អីនៃនហ៝មាលាស៖ “មោហោមគែសអោសឞូនុយ្សតឹមឞានមាពាង់អីអ្យា មោហោមគែសអោសឞូនុយ្សទើយតឹមលើសដាសពាង់អីអ្យា”។*

5 កោរាញឞ្រាសមោអោសឞ្វៃពាង់អីនៃងើយហឺន នអ៝ប់មាងើយមឺចរាម៝តកោរាញឞ្រាស។ កោរាញឞ្រាសមោអោសឞ្វៃពាង់ឆ៝ៈនាវទើយម៝ត់អ្វាញ់ជ៝ៈ ៤២ ខៃ។ * 6 ពាង់ហាមឞូងមឺចរាម៝តកោរាញឞ្រាស រាកឆ្វាយរាញាកោរាញឞ្រាស រាកឆ្វាយនអ៝ប់មានតុកកោរាញឞ្រាស នទ្រែលមារាកឆ្វាយទឹងលែៈផូងអីគុតាកាលើត្រោកអីនតុកកោរាញឞ្រាសដ៝ង់។ 7 កោរាញឞ្រាសមោអោសឞ្វៃពាង់តឹមលើសដាសផូងប៝នលានកោរាញឞ្រាសនើម នអ៝ប់មាទើយពាង់ដ៝ង់។ ពាង់ឆ៝ៈទើននាវទើយមាម៝ត់អ្វាញ់ទឹងលែៈរាន៝យទែស ទឹងលែៈនទុលមពោលឞូនុយ្ស ទឹងលែៈផូងឞូនុយ្សនាវងើយអេងៗ នទ្រែលមាទឹងលែៈឞ្រីទាកដ៝ង់។* 8 ជេសរីឞូនុយ្សតានែសនតូអីមោគែសញចីសឆាក់តាឆ៝ម់បុតនាវរេសក៝នឞែឞ្យាប់នើមអីឞូទែងខឹត ទឹងលែៈខាន់ពាង់អីនៃយើកមឞាសមាមពោមពា(ឆ្យុម)អីនៃទាទេ។ រាញាឆាក់តាឆ៝ម់បុតអីនៃឞូលែៈញចីសអេល៝រមានាវរាហាក់ញជេងនែសនតូនើស។* 9 ឞូម៝សអីគែសតោរអ៝ន់ពាង់អ្យាត់ងាន់ហ៝ម់!

10 លែៈអើមកោរាញឞ្រាសអ៝ន់ឞូនុយ្សអាបាៈឞូទែញុបតេៈនទ្រូង‌

ឞូនុយ្សអីនៃមរាគុតានទ្រូងងាន់‌

ពាង់អ៝ន់ឞូនុយ្សអាបាៈឞូទែងខឹតមាដាវ‌

ឞូនុយ្សអីនៃមរាខឹតមាដាវងាន់។

លាសនទ្រីផូងប៝នលានកោរាញឞ្រាសអ៝ន់ញឆ្រោយ្សនឹងតានាវជេរ អ៝ន់គែសនាវញឆីងន៝ប់។*

ទូមល៝ម់មពោមពា(ឆ្យុម)លោសឞើសនែស

11 ជេសឞើសនៃគ៝ប់ឆៃទូមល៝ម់មពោមពា(ឆ្យុម)ទុតជាញអាអេងលោសឞើសនែស គែសឞារអឹងកែតឹមឞានមាងកែក៝នឞែឞ្យាប់ អីនតែសងើយពាង់តឹមឞានមានតែសងើយឞេសញុកញាក់។ 12 មពោមពា(ឆ្យុម)អីនៃឆ៝ៈទឹងលែៈនាវទើយឞើសមពោមពា(ឆ្យុម)ត៝ល់ង្វាយអីលោសឞើសទាកវាច់ទាកវារ់នើស ពាង់ញច៝ប់ទឹងលែៈឞូនុយ្សតានែសនតូអ្យា អ៝ន់យើកមឞាសមាមពោមពា(ឆ្យុម)ត៝ល់ង្វាយអីគែសរាមាញឞើយមាខឹត ជេសរីឞាសនៃនើសដ៝ង់។* 13 ពាង់ជាននាវគឹតមឞេនអេងៗទុតក្វ៝ង់ងាន់ នហ៝មាជានអ៝ន់តុបអុញឞើសកាលើត្រោកតានែសនតូ អ៝ន់ទឹងលែៈឞូនុយ្សឆៃ។* 14 កោរាញឞ្រាសមោអោសឞ្វៃពាង់ជាននាវគឹតមឞេនអេងៗអីតាៈឞើសនាវទើយមពោមពា(ឆ្យុម)ត៝ល់ង្វាយនៃ។ មានាវមឞេនអីនៃពាង់លែវទឹងលែៈឞូនុយ្សអីគុតានែសនតូអ៝ន់ហ្យើត ជេសរីពាង់ដាៈទឹងលែៈឞូនុយ្សអីគុតានែសនតូអ៝ន់ជានរូបមពោមពា(ឆ្យុម)អីរាមាញយ៝រមាដាវ អីលែៈឞាសអីនៃ។* 15 កោរាញឞ្រាសមោអោសឞ្វៃពាង់ជានអ៝ន់រូបមពោមពា(ឆ្យុម)អីនៃគែសនហ៝ម់ញហោរ គៃមាឞ្លាវងើយ ជេសរីមពោមពា(ឆ្យុម)អីនៃអ៝ន់ឞូងខឹតលើយឞូម៝សអីមោអុចអោសយើកមឞាសមារូបមពោមពា(ឆ្យុម)អីនៃ។* 16 ពាង់ញច៝ប់ទឹងលែៈឞូនុយ្ស នអ៝ប់មាឞូនុយ្សជេៈ ឞូនុយ្សក្វ៝ង់ ឞូនុយ្សនទ្រ៝ង់ ឞូនុយ្សក្រ៝ ឞូនុយ្សមោទឹកឞូ ឞូនុយ្សទឹកឞូ អ៝ន់ឆ៝ៈទើនទូនទើមឞេនតាតីឞើសមា មោលាសតានទាង់ក្លែង។* 17 ជេសរីឞូម៝សអីមោអោសគែសនទើមឞេនអីនៃ ពាង់អីនៃមោអោសទើយរាវាត់ ទើយតាច់ទូនតីលនទើ។ មឞេនអីនៃរាញាមពោមពា(ឆ្យុម)អីនៃ មោលាសមរោរាញាមពោមពា(ឆ្យុម)អីនៃ។ 18 អ្យាត់មាគែសនាវមឹនគឹតឞ្លាវមាវ៝ត់នាវខ្លៃនទើមឞេនអីនៃ ឞូម៝សអីគែសនាវឞ្លាវ អ៝ន់ពាង់ឆ៝ៈមរោមពោមពា(ឆ្យុម)អីនៃកើប យ៝រលាសមរោអីនៃជេងមរោរាញាឞូនុយ្ស ជេងមរោ ៦៦៦។

*13:1 ១៣:១៖ នតម ១១:៧; ដាន ៧:៣, ៧

*13:2 ១៣:២៖ នតម ១២:៣; លក ៤:៥-៦; ២តេ ២:៩

*13:3 ១៣:៣៖ នតម ១៧:៨

*13:4 ១៣:៤៖ យេរ ១០:៦-៧

*13:5 ១៣:៥-៦៖ ដាន ៧:៨, ២៥

*13:7 ១៣:៧៖ នតម ១១:៧; ដាន ៧:២១

*13:8 ១៣:៨៖ នតម ៣:៥; ១៧:៨; ២០:១២, ១៥; ២១:២៧; នង ៣២:៣២; លក ១០:២០; ផល ៤:៣

*13:10 ១៣:១០៖ នតម ១២:១៧; ១៤:១២

*13:12 ១៣:១២៖ នតម ១៣:៣

*13:13 ១៣:១៣៖ មថ ២៤:២៤; ២តេ ២:៩

*13:14 ១៣:១៤៖ នតម ១៩:២០; ២០:៤

*13:15 ១៣:១៥៖ ដាន ៣:៥-៦

*13:16 ១៣:១៦-១៧៖ នតម ១៤:៩-១១; ១៦:២; ១៩:២០; ២០:៤