នាវកោរាញឞ្រាសងើយនាវតឹមរាង្លាប់មហែ នាវតឹមមពើល 14

ក៝នឞែឞ្យាប់ នទ្រែលមាឞូនុយ្សអីកោរាញឞ្រាសទែច្វាយ

1 ជេសរីគ៝ប់ឆៃក៝នឞែឞ្យាប់អីនៃទ៝ក់តាកាលើយោកឆីយោន គែសឞូនុយ្ស ១៤៤០០០ នុយ្សគុនទ្រែលពាង់ ទឹងលែៈឞូនុយ្សអីនៃលែៈគែសញចីសជេសរាញាក៝នឞែឞ្យាប់ នទ្រែលមារាញាអីឞឹពាង់នើមតានទាង់ក្លែង។* 2 គ៝ប់តាង់នតែសនទើតាកាលើត្រោកតឹមឞានមាងគោរទាកក្វ៝ង់ មោលាសតឹមឞានមានតែសនត៝រ់មីសទុតហោ។ នាវនតែសអីគ៝ប់តាង់នៃតឹមឞានមានតែសមពោលគ៝សគ៝ងរេងអ៝ក់ងាន់។ 3 ខាន់ពាង់អី ១៤៤០០០ នុយ្សនៃ មព្រើនាវមព្រើមហែតាឞើសនាប់រានើលកាដាច់អីនៃ តាឞើសនាប់ព្វាន់នុយ្សនទើអីគែសនាវរេសអីនៃ នទ្រែលមាតាឞើសនាប់មពោល ២៤ នុយ្សកោរាញអីនៃ។ មោគែសអោសទូហ្វេឞូនុយ្សអាអេងឞ្លាវនតីនាវមព្រើអីនៃ គែសផូងអី ១៤៤០០០ នុយ្សអីលែៈកោរាញឞ្រាសទែច្វាយឞើសនែសនតូនើសទើមឞ្លាវ។* 4 ទឹងលែៈខាន់ពាង់អីនៃមោគែសអោសឞិចដាសមាឞូអូរ* ខាន់ពាង់ហោមអែនតាងខាតទាទេងាន់។ អាសនតុកក៝នឞែឞ្យាប់ហាន់ ខាន់ពាង់ហាន់តឹងគ្រ៝យពាង់តានតុកនៃដ៝ង់។ ពាង់លែៈច្វាយជេសខាន់ពាង់ល៝រឞូឞើសទឹងលែៈឞូនុយ្ស ជេងនទើញហើរមាកោរាញឞ្រាស មាក៝នឞែឞ្យាប់អីនៃដ៝ង់។* 5 ទឹងលែៈខាន់ពាង់អីនៃមោព្រ៝តដ៝ង់ងើយមរោស តាខាន់ពាង់មោគែសអោសនាវមានទុយ្ស។

មឞើសងក៝ចនាវតេៈទោយ្ស

6 ជេសរីគ៝ប់ឆៃទូហ្វេតោងពារ់ជឹត មពារ់រ៝ៈងគូលត្រោក លែវនាវមហែមហានអ្វែសអីហោមបាបើនហ៝រ៝ មាមឞើសងក៝ចអ៝ន់មាទឹងលែៈឞូនុយ្សតានែសនតូ ទឹងលែៈឞ្រីទាក ទឹងលែៈរាន៝យទែស ទឹងលែៈនាវងើយ នទ្រែលមាទឹងលែៈនទុលមពោលឞូនុយ្ស។ 7 តោងពារ់អីនៃនតែរទុតទាង់លាស៖ “អ៝ន់ខាន់អៃមៃក្លាចយើកមាកោរាញឞ្រាស នទ្រែលមារានេនាវច្រេកលើបពាង់ហ៝ម់ យ៝រលាសលែៈត៝ត់ទីម៝ងពាង់ផាតទោយ្ស។ អ៝ន់ខាន់អៃមៃយើកមឞាសមាពាង់អីនើមតើមញជេងត្រោក នែសនតូ ទាកវាច់ទាកវារ់ នទ្រែលមាទឹងលែៈតូទាក”។ 8 គែសទូហ្វេតោងពារ់ជឹតត៝ត់ឞើសកើយលាស៖ “លែៈរាល៝ម់ងាន់រ៝! លែៈរាល៝ម់ងាន់រ៝ប៝នបាបីលោន អីទុតក្វ៝ង់ យ៝រលាសប៝នអីនៃលែៈលែវទឹងលែៈឞូនុយ្សតាទឹងលែៈឞ្រីទាកអ៝ន់ជាននាវខើសក្លែរ នាវតឹមទ៝ង់ តឹមឞានមាឞូលែវឞូនុយ្សអេងញេតនទ្រាញ់ព្លៃយុងយារប៝ន។ នាវអីនៃញជុនលែវអ៝ន់កោរាញឞ្រាសជីនូយ្សតេៈទោយ្ស!”* 9 គែសទូហ្វេតោងពារ់ជឹតត៝ត់ឞើសកើយជេងតោងពារ់អីត៝ល់ពែលាសទុតទាង់ងាន់៖ “ឞូម៝សអីយើកមឞាសមាមពោមពា(ឆ្យុម)អីទុតជាញនៃ ឞូម៝សយើកមឞាសមារូបពាង់នៃ នអ៝ប់មាគែសឆ៝ៈនាវមឞេនពាង់តានទាង់ក្លែង មោលាសតាតី‌* 10 ឞូនុយ្សអីនៃកោរាញឞ្រាសអ៝ន់ញេតឞើសកាច៝កនទ្រាញ់ព្លៃយុងយារប៝នពាង់នើមអីមោគែសលាយមាទាក គែសនាវខ្លៃលាសកោរាញឞ្រាសតេៈទោយ្សទុតហោងាន់។ ខាន់ពាង់ទើននាវក្រីតជេរមាអុញហីត នទ្រែលមាហីតញឆីវតាឞើសនាប់ផូងតោងពារ់ក្ល៝សអ្វែស ឞើសនាប់ក៝នឞែឞ្យាប់នើម។* 11 អុញអីអ៝ន់ខាន់ពាង់គែសនាវក្រីតជេរនៃ នអ៝ប់មាញហូកអុញអីនៃបាបើនហ៝រ៝ងាន់។ ឞូម៝សអីយើកមឞាសមាមពោមពា(ឆ្យុម)អីទុតជាញនៃ នទ្រែលមាយើកមឞាសមារូបពាង់នៃ ឞូនុយ្សអីលែៈឆ៝ៈទើនជេសនាវមឞេនរាញាពាង់នៃ គឹតលាសគែសនាវជេរជ៝ត់ទឹងមាង់ទឹងនារមោហុញអោស”។*

12 លាសនទ្រីផូងប៝នលានកោរាញឞ្រាស អីញអោតនាវវៃកោរាញឞ្រាសដាៈ នទ្រែលមាអីញឆីងន៝ប់រាក៝ក់មាឞ្រាសយេឆូ អ៝ន់គុអ៝ត់នូយ្សនឹងតានាវជេរ។* 13 ជេសរីគ៝ប់តាង់នតែសឞ៝រ់តាកាលើត្រោកលាសកើតនអា៖ “អ៝ន់មៃញចីសនាវអ្យា៖ នតើមឞើសម៝ងអ្យា អ្វែសមអាកងាន់មាឞូម៝សអីខឹត នអ៝ប់មាញឆីងមាកោរាញយេឆូ ”។ ឞ្រាសហ្វេងអ្វែសលាស៖ “ទីងាន់ អ្វែសមអាកងាន់មាខាន់ពាង់ យ៝រលាសខាន់ពាង់មរាគុរាលូ មោហោមអោសគែសនាវរាអាសរាគាញ់ជឹត យ៝រលាសទឹងលែៈនទើខាន់ពាង់ជាននើសគែសនទើងខោមងាន់មាខាន់ពាង់នើម”។*

នាវរែកនែសនតូ

14 ជេសរីគ៝ប់ឆៃទូរាច្វាល់តុកងលាង គែសទូហ្វេគុតានទ៝រ់តុកនៃ ពាង់តឹមឞានមាក៝នឞូនុយ្ស។ ពាង់នទោមោកកាដាច់អីជានមាមាយ្ស នអ៝ប់មាញអោតទូមល៝ម់ញអែវទុតឆោតតាតីពាង់នើម។* 15 ល៝ង់គែសទូហ្វេតោងពារ់ជឹតលោសតាៈឞើសញីសជានឞ្រាសមាកោរាញឞ្រាស នតែរទុតទាង់ងាន់លាសមាពាង់អីគុតានទ៝រ់តុកអីនៃ៖ “ឆ៝ៈញអែវមៃនើមនៃរែកហ៝ម់! លែៈទីម៝ងរែកជេស យ៝រលាសនទើតានែសនតូលែៈទុមជេស”។* 16 ជេសរីពាង់អីគុតានទ៝រ់តុកនៃ រែកនែសនតូមាញអែវ នែសនតូរែកជេសលែៈផ្យៅ។

17 ជេសរីគែសទូហ្វេតោងពារ់ជឹតលោសតាៈឞើសញីសជានឞ្រាសមាកោរាញឞ្រាសតាកាលើត្រោក ពាង់ញអោតទូមល៝ម់ញអែវទុតឆោតដ៝ង់។ 18 គែសទូហ្វេតោងពារ់ជឹតអីកោរាញមាអុញ លោសឞើសនតុកញឆឺងជានឞ្រាស ពាង់លាសទុតទាង់ងាន់មាតោងពារ់អីញអោតញអែវទុតឆោតនៃ៖ “ឆ៝ៈញអែវមៃអីទុតឆោតនៃ ក៝សហ៝ម់រាយោកព្លៃយុងយារប៝នតាតើមតានែសនតូ យ៝រលាសលែៈទុមជេស!” 19 ជេសរីតោងពារ់អីនៃរែកនែសនតូមាញអែវពាង់នើម រាគូមព្លៃយុងយារប៝នអីនៃជេសលែៈផ្យៅ ជេសរីពាង់ងក្លាច់ព្លៃអីនៃតាត្រោមនតុកញជ៝តព្លៃយុងយារប៝នទុតក្វ៝ង់ គែសនាវខ្លៃលាស កោរាញឞ្រាសជីនូយ្សតេៈទោយ្សមាទឹងលែៈឞូនុយ្សតានែសនតូ។* 20 នតុកអីនៃឞើសទីសប៝ន ឞូជ៝តមពែតព្លៃយុងយារប៝នអីនៃ លោសមហាមហ៝ចលោសឞើសនតុកអីនៃព្រេសត៝ត់មឞូងឆែសងាន់ ងាយហ៝ចមហាមអីនៃក្លាប់លាស ៣០០ កីលោមែត។

*14:1 ១៤:១៖ នតម ៧:១-៨; អេឆា ៤:៥; យោអ ៣:៥; ហេឞ ១២:២២

*14:3 ១៤:៣៖ នតម ៤:៤, ៦; ៥:៩; នម ៤០:៣

*14:4 ១៤:៤៖ «មោគែសអោសឞិចដាសមាឞូអូរ» ឞូនុយ្សអាបាៈមឹនលាស គែសនាវខ្លៃលាស៖ «មោគែសយើកមឞាសមាទូហ្វេឞ្រាសអេងឞើសកោរាញឞ្រាស»។

*14:4 ១៤:៤៖ យហ ១០:៤

*14:8 ១៤:៨៖ នតម ១៨:២; អេឆា ២១:៩; យេរ ៥១:៧-៨

*14:9 ១៤:៩៖ នតម ១៣:១៥-១៨

*14:10 ១៤:១០៖ នតម ១៦:១៩; យេរ ២៥:១៥

*14:11 ១៤:១១៖ នតម ១៩:៣

*14:12 ១៤:១២៖ នតម ១៣:១០

*14:13 ១៤:១៣៖ ផល ១:២៣; ហេឞ ៤:៩-១០

*14:14 ១៤:១៤៖ នតម ១:១៣; ដាន ៧:១៣

*14:15 ១៤:១៥៖ យោអ ៣:១៣

*14:19 ១៤:១៩-២០៖ នតម ១៩:១៥; អេឆា ៦៣:១-៦