18
Iƴo Babilon
1 Ga ndëcëk watac, nuɓuha mëleka haw̃ary ga cëliɗ g'ambin. Kwëhnako uw̃ëka sankaf do humpen hudëw̃u ha pëtehnëko nkal ŋa. 2 Ndekako gë kopa sankaf:
«Njok! Babilon Samah ỹa njok!
Ambacak ryaha waƴine,
ryaha wahakili waw̃eh,
ryaha wasëry waw̃eh do waỹew̃ik.
3 Ha, fop wayal w̃a ceni uñen ntëw̃u
nte liyehnëɗëhëhniwo kwëlëkwël le ñew̃ëk W̃ën:
vëhnaw̃ vëvë nkal va nkwafani g'umë,
do vëwaf vëvë nkal va mbetani soŋe hnapul sankaf lëw̃u.»
4 Do fëna nkwëryëɓu kopa haw̃ary le w̃atik ambin hna ga ntehnëɗ:
«Cahnëryin aŋi nkol, ɓulunda mën,
ɗanko antë ayentahniw̃u wameh wadëw̃u,
do antë ahnuỹantiw̃u wakata wante rëfëka ŋi.
5 Wameh wadëw̃u ŋa ndivëlëk hafo g'ambin
do W̃ënu ŋa ndënkwëtajëk vantiyehn vameh vambë iŋi nkol.
6 Diryina had gante ntikëhni vëỹëntaw̃ ka,
ɓësaryina wahwënta wahi ile ntik ỹa.
Hnë ñërya uñen nte nkwëntëlehnëhnahnëkëhni vëỹëntaw̃ va,
nkwëntëlëhnehnëryin uñen nte yaw̃ëk wahwënta wahi.
7 Ŋahnëk ɗus icëmb gë hnapul.
Nësëɗ ntaw̃ary ntëw̃u hna:
“Ami, ahnaw̃, ntañahnëɓu tinki ahnaw̃.
Gela asëval ale cëmaryëk asan a do nuɗa muk ucay.”
Soŋe rac, ɓësaryina uhorot do uỹëw̃ëhnah sankaf!
8 Soŋe watac, fac ryampo fo njohahnëɗëha waŋi wakata:
icëm, ucay, inte. Do mbëvëɗ gë hwëɗëh.
Njaw̃ëk Ahwëhn a W̃ën hunte hitiŋëɗëha.
9 «Fop vëhnaw̃ vëvë nkal vële wafak g'umë do ỹahëlëk hnapul lëw̃u ỹa, akoɗëni do njahnaɗëni soŋe lëw̃u ỹa, ge nuni hwëcic hwëɗëh hunte mbëvand ŋa. 10 Añëw̃ëɗëni ŋaw̃ët soŋe ntakah iỹi horot do ntehnëɗëni:
«“Kata! Kata! Babilon, nkol camah! Nkol ƴaw̃ah!
Wati ryampo fo njijëk kitiŋa hu ŋa!”
11 «Do vëwaf vëvë nkal va koɗëni do njahnaɗëni soŋe lëw̃u ỹa, kaɓi ahnë ɓokëɗina ntaw̃ viỹë vilëw̃ hni va: 12 viỹë sanu, kori, wëraka walakëlah, wanjere, wafand wahihnah gë wavëntah, waɗëhwa wadakëlah do fop vile fërik gë beñ iñi, gë waɗëhwa wapërën, ile vuɗik, gë ryëhwëra do gë wëraka wawamah, 13 upih nte hnëŋënëɗ rokëtok, waɗatikola do gë iɗuɗ, uñen, wagu, pih do watoka, wuhni gë wape, wafahnac gë wasaret, vëramp gë vële fëlayik.
14 «Wadëw̃el waɓëntah wante valëkino ŋa ŋaw̃ëtaki, fop vële wamahnëki vi do fëtëɗ vi cëvaryiki do ɓokëɗena nuyi. 15 Vëwaf vële mbetëndanëk va ŋaw̃ëtiniho, soŋe ntakah uhorot lëw̃u w̃a; koɗëni do njahnaɗëni. 16 Ntehnëɗëni:
«“Kata! Kata! Nkol camah ŋa
cuɗak wafand wahihnah fo
do gë pand ɓulu gë mbëntah nte hambëka ntaw̃
do kayëtak sanu gë wëraka walakëlah gë wanjere!
17 Wati ryampo fo përëkanik iỹi hnapul fop!”
«Do vëyaryary Sisikulu va fop, fop vëryokuŋ hnë w̃ënka va, añëw̃ëni ŋaw̃ët. 18 Ante nuhni hwëcic hwëɗëh hunte mbëvahnëɗ ŋa ndekaniho: “Aŋëhne nkol ga këñëlahnëni aŋi nkol cankaf!” 19 Pihani vëɗ hnë vankaf vantëw̃ hni, koni, do njahnani:
«“Kata! Kata, nkol camah
ante vetëndanëkëhni fop vële hwëhnak wasisikulu hnë wov hna!
Wati ryampo fo përëkanik fop!”»
20 Kopa ỹa më mbok ntehnëk: «Ambin, natëryi ỹi soŋe ile përëkanik nkol ŋi!
Natëryiw̃u, w̃uhnë fëna, vëfacah, vëfaƴik do wakila,
kaɓi W̃ënu ŋa kitiŋëka soŋe w̃eh ile ntiku ỹa.»
21 Awa mëleka hwëhn fanka ryampo nufëk taka dënah, më ntoŋëk wov hna ntehnatënd:
«Koyëna, gë fanka përëkanëɗe Babilon nkol camah
do mbokëɗena nuyi.
22 Do mbokëɗena nkwëry ỹal hu
kopa nkaw̃ vërëmp tëmp,
vësël takëralu do vëlënkw,
fëna wëla aseryah aryampo geɗina ỹal hu hna.
Do fëna kopa tank gë hont ɓokëɗena nkwëryi ỹal hu hna.
23 Humpen lampu ỹa ɓokëɗina pët ỹal hu hna.
Kopa aỹëlah ahasëk gë asëvalu ɓokëɗena nkwëryi ỹal hu hna.
Vëỹin fop koyëna nkeɗ kaɓi vëwaf vëlëw̃ hu va yeho vëhnaỹah vëvë nkal va, do kavëla hu ŋa tokakëhni fop waƴamani ŋa.
24 Mbëvehnëɗeru kaɓi ỹal hu hna tëkatik sat wakila gë
vëfacah fop, vële ryaw̃ik nkal li.»