19
Hnëw̃ w̃ëka ambin
1 Ga ndëcëk watac, nkwëryëɓu had kopa ɓulunda samah mbin hna le ryekaɗëho:
«Aleluya!
Ipeh ŋa, icëmb iŋa do gë fanka fa vëhni W̃ën fu hna nke.
2 Vakitiŋa vantëw̃u va catëk do toña ye.
Kitiŋëka asëval ale yëtanik gwafa ntëw̃u,
ale ronkënëɗëho nkal gë gwafa ntëw̃u,
koroteyehnëhnëka soŋe sat vëryokuŋ vëlëw̃u va.»
3 Mbok nësëni kat:
«Aleluya! Hwëcic hwëɗëh hunte mbëvahnëɗ Babilon Samah ŋa kaƴëndaɗ dol do gë kantëm!»
4 Tac vacërakëlo wafëhw wahi gë vëhnah (24) do wulaw̃ wahnah (4) w̃a ndëkwëhnëniho, cëmbëniha W̃ënu ŋa ga ntañak tinki ahnaw̃ hna nësatëndëni: «Nke koyëna! Aleluya!»
5 Tac cahnik kopa mbë tinki ahnaw̃ hna ntehn:
«Cëmbëryina W̃ën fu ŋa, w̃uhnë fop vëryokuŋ lëw̃u,
w̃uhnë, vëhihnah gë vëryindah, vële ntakëɗ g'umë!»
6 Do nkwëryëɓu had kopa ɓulunda yaɓah, had kopa wavonkëlo w̃ënka wacankaf, do had wakopa waparat, nësatëndëni:
«Aleluya! Ahwëhn W̃ën fu ŋa Ahwëhn Fanka Fop ỹa
tufahnëk inaw̃ ntëw̃u ŋa.
7 Natëfu, nëŋëfu,
cëmbënëfuna kaɓi ambënt ñël Fape fa tëkik,
do ale tëhnak a këɓënak.
8 Maw̃ëryahnik cuɗa viỹi vihihnah vëfëtëpët
do vëfacah, viỹi vihihnah vi ye vantiyehn vacatah mba vëfacah.»
9 Mëleka ỹa më ntehnëko: «Kerëry: Mbetani vële w̃acik hnë mbënt Fape fa!» Më mbok ntehnëko: «Waŋi ye wanës paryi W̃ënu ŋa.»
10 Tac ndëkwëhnëɓu hnë wapary mëleka hna sëmbahnëw̃a, ɓare umë ntehnëko: «Kehary antë ali waŋi! Ami ye arëfëlënta hun ỹa ɗoku hna, wëjë gë vëỹënta hu, vële ye waseɗe Yesu. Ha, fop wante pëƴahnëɗëni wakila ŋa, wëɓa Yesu ye had gante tufëkëhni Iƴir W̃ën ka. Awa cëmbëryehna W̃ënu ŋa fo!»
Soŋe viỹë mbëɗ gë wahi vile ryëcëtaɗ
1. Soŋe ale haƴëka pahnac ƴah
11 Tac nuɓu ambin ŋa piɗëtak do wëlinëha pahnac ƴah. Ale haƴëka ỹa w̃acëɗe Ahahnëndak do Toña. Kitiŋëɗ do mëtaryëɗ g'usatah. 12 Vinkër vidëw̃u va nkeho had humpen hwëɗëh; pënkwako vapënkw ahnaw̃; akwëhnako w̃ac ile herik hnë mbahn dëw̃u hna do wok ƴëtina afo umë. 13 Acuɗako cuɗ nte hoƴik hnë sat. W̃acik: «Wanës W̃ën». 14 Wasoɗaɗe wavë ambin tëfalëɗënihaw̃o hnë wafahnac wayah, vëhni fop viỹë vëyah do vëfacah cuɗaniho. 15 Hnë w̃ës lëw̃u hna canëɗëho sëlame ỹakah soŋe ndafahnëhni wayal w̃a. Keryëɗëhëhni gë ryoko ryëhwëra, ŋwëỹehnëɗ waresen hnë tank camah ntavah mba W̃ën Hwëhn Fanka Fop. 16 Hnë cuɗ ntëw̃u hna do hnë mbuf ntëw̃u hna kerik w̃ac: «Ahnaw̃ vëhnaw̃ do Ahwëhn vëhwëhn».
2. Ambënt W̃ën soŋe wasëry
17 Tac nuɓuha mëleka ryampo ga kahnëk lav hna. Ndekahnëkëhni gë kopa sankaf fop wasëry wale watëɗ cëmët ambin hna: «Ƴijën, ɓarëpëlin soŋe ambënt cankaf mba W̃ën, 18 soŋe aroku mbahn vëhnaw̃, mbahn vësankaf wasoɗaɗe, mbahn vëhwëhn fanka, mbahn wafahnac do gë vële haƴëkëhni va, mbahn fop vële ye vëramp gë vële wok vëyena vëramp, vëhihnah gë vëryëndah.»
3. Soŋe ntaw̃ ŋa gë kila wamër
19 Do nuɓuha ntaw̃ ŋa, vëhnaw̃ vëvë nkal va gë wasoɗaɗe walëw̃ hni. Mbarëpëlëni mëtaryëniha ale haƴëka pahnac ƴah ŋa gë wasoɗaɗe walëw̃u w̃a. 20 Pëlaniha ntaw̃ ŋa gë kila lëw̃u ỹa vële liko haryënkw lëw̃u vifëmpëhnahnah wante tokahnëkëhniwo vële hwëhnak yavëta ntaw̃ ŋa do sëmbëɗëho w̃ëntëlënta lëw̃u. Fop vëhni vëhi tak ntoŋini vëfërën fo hnë lant hwëɗëh hn'ile ŋagëɗ uvëɗ. 21 Vëyëntaw̃ va fop mbëvëni gë sëlame le saniɗëho hnë w̃ës ale haƴëka pahnac ŋa, do fop wasëry w̃a pihnëniho vimbahn vidëw̃ hni va.