3
Iriira Jesús anairiri Moisés-ni
1 Iyekiite oiteshiretaarewo, nonkantaiyemini pikaatzira ikaimashireyetaimi Inkitesatzi: Pinkenkithashiretakotaiyaari Cristo Jesús, iriitake oshiyakariri otyaantaarewo, irijatzi oshiyakariri apaani Imperatasorentsiperori. 2 Roshiyakari otyaantaarewo ikyaaryoowentakero okaatzi ikantziriri otyaantziriri. Ari ikantakari eejatzi Jesús. Roshiyakotakari Moisés-ni, ikyaaryoowentakeniri isheninkapaini rashiyetari Pawa. Tema iitaitakeri isheninkapaini “Inampipanko Pawa”. 3 Iri kantacha Jesús, iriiperori rinatzi, ranairi Moisés-ni, tema iriitake wetsikakeriri pairani. Oshiyawaitakawo ikantaitapiintzi: “Pimpinkathatero nopanko.” Tema kaari pankotsi impinkathaite, iriira impinkathaite ashitawori ipanko. Tema ikaatzi wetsikirori pankotsi iriitake iriiperotatsiri. *Iri Moisés-ni oshiyawori pankotsi, tema irijatzi isheninkapaini Judá-ite iitaitziri “Inampipanko Pawa”. 4 Tema iri ashitawo pankotsi wetsikakerori, ariwaitake ikantaka pairani Pawa riwetsikantakawori maawoini. 5 Ikantaitake:
Moisés kyaaryoowentakeriri isheninkapaini iitaitziri “Inampipanko Pawa”.
Iri kantacha roshiyamatsitakari irirori apaani imperataarewo, ikenkithatakoyetairo onkaate awisatsine. 6 Iriima Cristo, iriitake tomintakariri ashitawori pankotsi, irijatzi jewatairi ikaatzi roshiyakagaitairi pankotsi. Aritake antsipataiyaari aakapaini iitaitziri “Inampipanko Pawa”, arika ankyaaryoowentairi, kisokero owanairi irojatzi weyaantapaakyaawone kiteesheri.
Rimakoryaamento rashiyetaari Pawa
7 Jiroka ikantakeri Tasorenkantsi:
Pinkemairi iroñaaka Pawa ikenkithawaitzi, ikantzi:
8 Eero pikisoshirewaitzi.
Poshiyarikari pithokashitakenari pairani iñaantayetakena ochempiki.
9 Ari ikowakaawetakena picharineeteni nowasanketerime, iñaantashiretakena naaka,
Okantawetaka iñagaiyawetakawoni noneshironkayetakeri okaatzi 40 osarentsi.
10 Irootake nokisantanakari,
Nokantanake: Ari ikantapiintatya itzipinashirewaitzi,
Te rantapiintziro nokowakairiri.
11 Noyatsimankakiini nokantanake:
Eero nareetakagaari nimakoryaamentoki.
12 Iyekiite, kyaa pipakagairi Pawa, Kañaanetatsiri. Eero pikaariperoshirewaitzi, eero pithainkashirewaitzi. 13 Iro kameethatatsi pominthashiretawakayaani poshireyetaiya. Panteroota iroñaaka eero ramatawitaitantzimi pantayetairo kaariperori, piñiirokari pinkisoshirewaite. 14 Kisokerorika oweri Cristo, irojatzi weyaantapaakyaawone kiteesheri, aritake añagairo intsipayetai. 15 Irootake ikantantaitari:
Pinkemairi iroñaaka ikenkithawaitzi Pawa, ikantzi:
Eero pikisoshirewaitzi.
Poshiyarikari pithokashitakenari pairani.
16 ¿Itzimika pithokashitakariri Pawa, ikemawetakawowa riñaane? ¿Kaarima jirikapaini ramayewetakarira Moisés-ni ipoñagaawowa Egipto-ki? 17 ¿Itzimika ikisapiintakeri Pawa okaatzi 40 osarentsi? ¿Kaarima antapiintakerori kaariperori, aperaatainchari janta ochempiki? 18 ¿Itzimika ikenkithatakoitakeri ikantaitake:
Eero nareetakaayetaari nimakoryaamentoki?
¿Kaarima jirikapaini iitaitakeri piyathariite? 19 Ari añiiro kantakaawori kaari rareetakagaitantari, tema iro kantakaantzirori te ikemisantaiyini.
*3:3 Iri Moisés-ni oshiyawori pankotsi, tema irijatzi isheninkapaini Judá-ite iitaitziri “Inampipanko Pawa”.