2
ᒋᔭ, ᓂᑯᓯᐦᑳᑎᒫᐎᓐ ᑎᒧᑏ, ᓲᐦᒃ ᐐ ᓲᐦᑳᑎᓰᒃᐦ ᙭ ᒌᓴᔅ ᐅᒋᔐᐙᑎᓰᐎᓂᐦᒡ ᐅᐦᒋ᙮ ᒋᒌ ᐯᐦᑑᓐ ᑖᓐ ᑳ ᐃᔑ ᒋᔅᑯᑕᒫᒉᔮᓐ ᐊᓂᑌ ᒣᑴᓰᓅ ᐁ ᒥᐦᒉᑎᓈᓅᐦᒡ᙮ ᐆ ᒫᒃ ᑳ ᐃᔑ ᒋᔅᑯᑕᒫᒉᔮᓐ ᒉ ᐸᒋᔥᑎᓀᑯᒡ ᐊᓂᒌ ᑳ ᑖᐺᐅᒉᔨᐦᑖᑯᓯᑣᐤ ᒉᒌ ᐋᔔ ᒋᔅᑯᑕᒧᐙᑣᐤ ᑯᑕᒃ ᐊᐌᔫᐦ᙮ ᓲᐦᒃ ᐐ ᓰᐲᐌᓰᐦ ᐁ ᐋᔨᒧᐦᐅᔨᓐᐦ ᒬᐦᒡ ᙭ ᒌᓴᔅ ᐅᒥᔫ ᒫᓯᐦᒉᐤ ᐄᓃᒻᐦ ᑳ ᐃᐦᑎᔨᒡ᙮ ᐌᔥ ᒫᓯᐦᒉᐤ ᐄᓅ ᓲᐦᒃ ᑯᒋᐦᑖᐤ ᒉᒌ ᓇᐦᐄᐌᐦᐋᑦ ᐊᓂᔫ ᑳ ᓃᑳᓂᔥᑳᑯᑦ ᑲᔦ ᓇᒧᐃ ᒥᑐᓐ ᐋᐸᑌᔨᐦᑕᒥᐦᐄᑰ ᒉᒌ ᐐᒋᐦᐄᐌᑦ ᑖᓐ ᐁ ᐃᐦᑎᓈᓄᔨᒡ ᐅᑕᐦ ᐊᔅᒌᐦᒡ᙮ ᐱᒫᑎᓰᐦ ᑖᓐ ᐁ ᐃᔑ ᓂᑕᐌᔨᒥᔅᒃ ᒋᔐᒪᓂᑑ ᒉᒌ ᐃᔑ ᐱᒫᑎᓯᔫᑦ᙮ ᐌᔥ ᐊᐌᓐ ᑳ ᐐᒋᐦᐄᐌᑦ ᐁ ᒋᐦᒋᐸᐦᑖᓄᔨᒡ ᓇᒧᐃ ᒋᑲ ᐅᐦᒋ ᑳᓂᔫ ᐹᑎᔥ ᔮᒀᐤ ᓇᓈᑲᑕᐌᔨᐦᑕᐦᑫ ᐊᓂᔫ ᑖᓐ ᐁ ᐃᔑ ᐃᐦᑕᑯᓂᔨᒡ ᒋᐹ ᐃᔑ ᓇᓈᑲᑕᐌᔨᐦᑕᒻ᙮ ᑲᔦ ᒫᒃ ᓂᐦᑖᐅᒋᐦᒉᓲ ᓲᐦᒃ ᑳ ᐋᐸᑎᓯᑦ ᐃᑌᔨᐦᑖᑯᓂᔫ ᐎᔭ ᓃᔥᑕᒻ ᒉᒌ ᐸᐦᑴᓂᒫᓱᑦ ᐊᓂᔫ ᑖᓐ ᑳ ᐃᔑ ᓂᐦᑖᐅᒋᐦᑖᑦ᙮ ᒫᒥᑐᓀᔨᐦᑕᐦ ᐆ ᑖᓐ ᑳ ᐃᔑ ᐙᐐᐦᑕᒫᑖᓐ ᐌᔥ ᐅᑎᐯᔨᐦᒋᑫᐤ ᒋᑲ ᐃᐦᑑᑖᒄ ᒉᒌ ᓂᓯᑐᐦᑕᒪᓐ ᒥᓯᐌ ᒉᒀᓐ᙮
ᒨᔥ ᑲᔦ ᒉ ᒋᔅᒋᓯᔨᓐ ᑖᓐ ᑳ ᐃᔑ ᐙᐐᐦᑕᒫᓐ ᒥᔻᒋᒧᐎᓐ ᐁ ᐋᔨᒨᒪᒃ ᒌᓴᔅ ᙭ ᐁ ᒌ ᐗᓂᔥᑳᓈᑲᓅᑦ ᓂᐳᐎᓂᐦᒡ ᐅᐦᒋ ᑲᔦ ᒫᒃ ᑌᐱᑦ ᐁ ᐃᐦᑖᔨᒡ ᐁ ᒌ ᐅᐦᒋ ᐋᓂᔅᒉ ᐱᒫᑎᓰᑦ᙮ ᐌᔥ ᐁ ᐙᐐᐦᑕᒫᓐ ᐆ ᒥᔻᒋᒧᐎᓐ ᐁᐅᑰ ᐌᐦᒋ ᓇᓀᐦᑳᑌᔨᒧᔮᓐ, ᑲᔦ ᒬᐦᒡ ᐊᐌᓐ ᐁ ᒌ ᐗᓇᐦᐱᓱᑦ ᑳ ᒌ ᒫᒫᐦᒋᒀᐱᔅᑲᐦᐙᑲᓅᑦ ᐁᑯᓐ ᐁ ᐃᐦᑑᑖᑯᔮᓐ, ᒥᒄ ᒫᒃ ᓇᒧᐃ ᒋᑲ ᒌ ᒫᒫᐦᒋᒀᐱᔅᑲᐦᐄᑲᓅᔫ ᒋᔐᒪᓂᑑ ᐅᑕᔨᒧᐎᓐ᙮ 10 ᐁᒄ ᒫᒃ ᐁ ᓲᐦᒋᐸᔨᐦᒡ ᒥᓯᐌ ᒉᒀᓐ ᒉᒌ ᔖᑰᒋᐦᑖᔮᓐ ᑖᓐ ᒉ ᐃᔑ ᓇᓀᐦᑳᒋᐦᐄᑯᐙᓀ, ᐁ ᐳᑯᓭᔨᒧᔮᓐ ᐊᓂᔫᐦ ᒋᔐᒪᓂᑑ ᑳ ᐎᔮᐸᒫᑦ ᒉ ᐅᑏᓃᒥᑦ ᒉ ᐊᔮᔨᒡ ᐱᒫᒋᐦᐄᑯᓰᐎᓂᔫ ᑲᔦ ᑳᒋᒉ ᒋᔅᑌᔨᐦᑖᑯᓱᐎᓂᔫ ᙭ ᒌᓴᔅ ᐁ ᐃᐦᑖᔨᒡ ᑳ ᐅᐦᒋᐸᔨᔨᒡ᙮ 11 ᐌᔥ ᑖᐺᒪᑲᓐ ᐆ ᑳ ᒌ ᐄᓈᓅᐦᒡ, ᒉ ᐐᒡ ᓂᐲᒫᐅᐦᑴ, ᒋᑲ ᐐᒡ ᐱᒫᑎᓰᒫᓅ ᑲᔦ᙮ 12 ᑲᓇᐙᒡ ᒉ ᓰᐲᐌᓰᔅᑕᒧᐙᐅᐦᑴ ᓇᓀᐦᑳᑌᔨᒧᐎᓐ, ᒋᑲ ᐐᒡ ᑎᐯᔨᐦᒋᑫᒫᓅ᙮ ᑲᔦ ᒫᒃ ᐃᑗᔨᐦᑴ ᐁᑳ ᒋᔅᒉᔨᒪᐦᒄ, ᑲᔦ ᐎᔭ ᒋᑲ ᐃᑌᐤ ᐁᑳ ᒋᔅᒉᔨᒥᑕᐦᒄ᙮ 13 ᐁᑳ ᒫᒃ ᑯᐃᔅᒄ ᐃᐦᑏᐦᑴ, ᔮᐸᒡ ᑯᐃᔅᒄ ᒋᑲ ᐃᐦᑑ ᐎᔭ ᙭, ᐌᔥ ᓇᒧᐃ ᐋᐦᒌᐤᐦ ᒋᑲ ᒌ ᐃᑌᔨᐦᑖᑯᓲ ᑖᓐ ᐁ ᐃᑌᔨᐦᑖᑯᓯᑦ᙮
ᐁ ᐃᔑ ᓇᐦᐁᔨᐦᑖᑯᓯᑦ ᐊᑐᔅᒉᓲ
14 ᒨᔥ ᒫᒃ ᒋᔅᒋᓲᒪᒡ ᒋᑏᓃᒪᒡ ᐅᔦᔫ ᑲᔦ ᐅᐦᒋᔥᑰ ᒋᔐᒪᓂᑑ ᐁ ᐃᐦᑖᔨᒡ ᔮᒀᒥᒪᒡ ᐁᑳ ᒉᒌ ᒪᒪᒋᐸᔨᐦᑲᐦᑖᑐᑣᐤ ᐊᔨᒧᐎᓂᔫ ᐅᐦᒋ, ᐌᔥ ᓇᒧᐃ ᒥᑐᓐ ᒥᔪ ᐐᒋᐦᐄᐌᒪᑲᓐ ᐆ ᐁ ᐃᐦᑎᓈᓅᐦᒡ᙮ ᐃᐦᑕᑯᓂᔫ ᑖᓐ ᐁ ᐃᔑ ᒪᒋᑑᑖᑯᑣᐤ ᐊᓂᒌ ᑳ ᓂᑐᐦᑕᐦᒀᐤ᙮ 15 ᓲᐦᒃ ᒨᔥ ᐃᐦᑑᑦ ᐊᓐ ᒫᐅᒡ ᐁ ᑲᔅᒋᐦᐅᔨᓐ ᐁ ᐃᐦᑑᑕᒪᓐ ᒉᒀᓐ ᐊᓂᔫ ᒉ ᓇᐦᐁᔨᐦᑕᒪᐦᐄᑯᑦ ᒋᔐᒪᓂᑑ, ᒬᐦᒡ ᐊᐌᓐ ᓲᐦᒃ ᑳ ᐋᐸᑎᓰᑦ ᐁᑳ ᐃᐦᑕᑯᓂᔨᒡ ᑖᓐ ᒉ ᐃᔑ ᐱᒫᒥᐦᐄᑯᑦ ᐅᑖᐸᑎᓱᐎᓐ᙮ ᐊᐌᓐ ᑯᐃᔅᒄ ᑳ ᐃᔑ ᒋᔅᑯᑕᒫᒉᑦ ᑖᓐ ᐁ ᐃᔑ ᑖᐺᒪᑲᓂᔨᒡ ᒋᔐᒪᓂᑑ ᐅᑕᔨᒧᐎᓐ ᐁᑯᓐ ᒋᐹ ᐃᐦᑎᓐ᙮ 16 ᐁᑳᐐ ᐸᐱᔅᑳᑌᔨᐦᑕᒥᐦᐄᒄ ᓂᑕᒧᒄ ᐊᔨᒧᐎᓐ ᐁᑳ ᐋᔨᒨᒫᑲᓅᑦ ᒋᔐᒪᓂᑑ, ᑲᔦ ᐁᑳ ᑲᒋᐦᑳᐙᔅᑖᑯᐦᒡ ᒉᒀᓐ ᐁ ᐋᔨᒥᑑᑖᑲᓅᒡ ᐌᔥ ᓇᒧᐃ ᐐᒋᐦᐄᑰ ᐊᐌᓐ ᐅᔫ ᐁ ᐃᔑ ᐊᔨᒥᓈᓄᔨᒡ᙮ ᐃᐦᑑᑖᑰ ᒥᒄ ᐁᑎᑑ ᒉᒌ ᐊᔮᐙᐸᒫᑦ ᒋᔐᒪᓂᑑ᙮ 17 ᐆ ᐁ ᐃᔑ ᐊᔨᒥᓈᓅᐦᒡ ᒧᔮᒻ ᑳ ᒬᐦᒡ ᐊᐦᑯᓱᐎᓐ ᐁᑯᓐ ᒬᐦᒡ ᐁ ᐃᑌᔨᐦᑖᑯᐦᒡ᙮ ᐊᓂᒌ ᒫᒃ ᐦᐃᒥᓀᔭᔅ ᐁᒄ ᒫᒃ ᕙᐃᓖᑕᔅ ᐁᑯᓐ ᐁ ᐃᐦᑎᑣᐤ ᐁ ᒋᔅᑯᑕᒫᒉᑣᐤ᙮ 18 ᒌ ᓇᑲᑕᒧᒡ ᑖᐺᐎᓂᔫ, ᐁᒄ ᑳ ᐃᐦᑑᑕᐙᑣᐤ ᐸᔅᒡ ᐊᓂᔫ ᑳ ᑖᐺᐦᑕᒦᑣᐤᐦ ᐁᑳ ᒉᒌ ᐊᑎ ᓵᐯᔨᐦᑕᒥᔨᒡ ᐁ ᑖᐺᐦᑕᒥᔨᒡ, ᐌᔥ ᒌ ᒋᔅᑯᑕᒫᒉᐅᒡ ᐁ ᐃᑗᑣᐤ ᔖᔥ ᐁ ᒌ ᐗᓂᔥᑳᓈᑲᓄᔨᒡ ᑳ ᑖᐺᐦᑕᒦᑣᐤ᙮ 19 ᒥᒄ ᒫᒃ ᐊᓂᔫ ᒋᔐᒪᓂᑑ ᐅᒋᔅᑯᑕᒫᒉᐎᓐ ᑖᓐ ᐁ ᐃᔑ ᑖᐺᒪᑲᓂᔨᒡ ᓇᒧᐃ ᒋᑲ ᒌ ᐋᐦᑎᓂᑲᓅᔫ ᐁ ᐃᔥᐱᔥ ᔮᐃᑕᓂᔨᒡ, ᑲᔦ ᐊᓐ ᑳ ᐃᑕᔥᑌᒡ, ᐅᑎᐯᔨᐦᒋᑫᐤ ᒋᔅᒉᔨᒣᐤ ᐊᓂᔫᐦ ᐊᐌᔫᐦ ᐎᔭ ᑌᐱᔦᐅᓰᑦ ᑲᔦ ᒥᓯᐌ ᐊᐌᓐ ᐅᑎᐯᔨᐦᒋᑫᐤ ᐁ ᐃᐦᑖᔨᒡ ᑳ ᐃᔑ ᑎᐯᔨᐦᑖᑯᓯᑦ ᒋᐹ ᓇᑲᑕᒻ ᒪᒑᑎᓰᐎᓂᔫ᙮
20 ᐊᓂᑌ ᒥᔅᑕ ᐙᔅᑳᐦᐄᑲᓂᐦᒡ ᐃᐦᑕᑯᓐ ᓇᓈᐦᑰ ᐁ ᐃᔑᓈᑯᐦᒀᐤᐦ ᐎᔮᑲᓐᐦ᙮ ᐸᔅᒡ ᐊᓂᔫᐦ ᐎᔮᑲᓐᐦ ᐅᔖᐅᔔᓕᔮᐙᐱᔅᑰᓐᐦ ᐁᒄ ᑯᑕᒃ ᐙᓭᔮᐱᔅᑳᐤᐦ᙮ ᐸᔅᒡ ᒥᔅᑎᑯᐦᒡ ᒌ ᐅᐦᒋ ᐅᔑᐦᑖᑲᓅᐦ ᐁᒄ ᑯᑕᒃ ᓯᔅᒎᐦᒡ᙮ ᐊᓂᔫᐦ ᑳ ᔔᓕᔮᐅᐦᒀᐤ ᓇᒧᐃ ᓈᔥᒡ ᐋᐸᑕᓐᐦ ᐁᒄ ᐊᓂᔫ ᐁᑳ ᑳ ᔔᓕᔮᐅᐦᒀᐤ ᐁᐅᑯᓐᐦ ᐊᓂᔫᐦ ᐁᔑᑯᒻ ᒌᔑᑳᐤᐦ ᔮᐸᑕᐦᒀᐤᐦ᙮ 21 ᒥᒋᐦᐱᓐ ᒫᒃ ᐊᐌᓐ ᐸᔦᐦᒋᐦᐄᓱᑌ ᐁ ᓇᓈᑲᑐᐌᔨᐦᑕᐦᒃ ᐁᑳ ᒉᒌ ᐐᓂᐦᐄᑯᑦ ᒪᒑᑎᓰᐎᓂᔫ, ᑲᑕ ᐃᐦᑕᑯᓂᔫ ᐊᓂᔫ ᓈᔥᒡ ᐁ ᒋᔅᑌᔨᐦᑖᑯᓂᔨᒡ ᒉ ᐃᔑ ᐋᐸᒋᐦᐋᑲᓅᑦ, ᒥᑐᓐ ᑌᑲᔥ ᑲᑕ ᐸᒋᔥᑎᓂᓲ ᒉᒌ ᒥᔻᐸᒋᐦᐄᑯᑦ ᐊᓂᔫ ᑳ ᐐ ᐋᐸᒋᐦᐄᑯᑦ ᐁ ᐃᐦᑑᑕᐦᒃ ᒥᒄ ᑖᓐ ᐁ ᐃᑕᔓᒥᑯᑦ᙮ 22 ᑯᒋᐦᑖᐦ ᐁᑳ ᒉᒌ ᐸᐱᔅᑳᑌᔨᑕᒥᐦᐄᑯᔨᓐ ᑖᓐ ᐊᓂᔫᐦ ᓂᔮᓂᑯᑌᐦᒡ ᐁ ᐃᔑ ᒧᔥᑌᓀᔨᐦᑕᐦᒃ ᒉᒌ ᐃᑖᑎᓰᑦ ᐅᔅᒋᓃᒎ᙮ ᐅᔅᑌ ᐃᑌᔨᐦᑕᒥᐦᐄᑯᐦ ᑯᐃᔅᑯᑖᑎᓰᐎᓐ, ᑖᐺᐦᑕᒧᐎᓐ, ᓵᒋᐦᐄᐌᐎᓐ ᑲᔦ ᒫᒃ ᒋᔮᒣᔨᐦᑕᒧᐎᓐ, ᐁ ᐐᒉᐅᑣᐤ ᐊᓂᒌ ᑳ ᑌᑆᑖᑣᐤ ᐅᑎᐯᔨᐦᒋᑫᐤ ᒉᒌ ᐐᒋᐦᐄᑯᑣᐤ ᐁ ᐸᔦᐦᑲᓂᔨᒀᐤ ᐅᑌᐦᐄᐙᐤᐦ᙮ 23 ᐁᑳᐐ ᓇᓂᑐᐦᑕ ᓂᑕᒧᒄ ᐊᔨᒧᐎᓐ ᑲᔦ ᒌᔥᑴ ᐊᔨᒧᐎᓐ, ᐌᔥ ᐁᑯᑦ ᐌᐦᒋᐸᔨᐦᒡ ᒉᒌ ᐅᐦᒋ ᒪᒋᐸᔨᐦᑲᐦᑖᑐᓈᓅᐦᒡ᙮ 24 ᐌᔥ ᐊᓐ ᑳ ᐋᐸᒋᐦᐄᑯᑦ ᐅᑎᐯᔨᐦᒋᑫᐤ ᓇᒧᐃ ᒋᐹ ᐅᐦᒋ ᐊᔮᔑᑌᒧᐌᐤ᙮ ᒋᐹ ᒋᔅᑎᒫᒉᔨᒣᐤ ᒥᓯᐌ ᐊᐌᔫ ᑲᔦ ᒫᒃ ᐊᓂᔫ ᐁ ᒥᔪ ᒋᔅᑯᑕᒫᒉᓲᑦ ᒋᐹ ᓰᐲᐌᓰᔅᑐᐌᐤ ᐊᐌᔫᐦ᙮ 25 ᑲᔦ ᒋᔮᒻ ᒋᐹ ᐃᐦᑑᑕᐌᐤ ᐁ ᐐ ᑯᐃᔅᑯᓈᑦ ᐊᓂᔫ ᑳ ᓇᓂᔅᑰᔅᑖᑯᑦ ᐊᐌᔫᐦ᙮ ᒉᒃ ᒫ ᒋᐹ ᒌ ᐃᐦᑑᑖᑯᔫᐦ ᒋᔐᒪᓂᑑ ᒉᒌ ᑴᔅᑳᑎᓯᔨᒡ ᑲᔦ ᒉᒌ ᒋᔅᒉᔨᐦᑕᒥᔨᒡ ᑖᐺᐎᓂᔫ᙮ 26 ᑲᔦ ᒉᒌ ᒋᔅᒉᔨᐦᑕᒥᔨᒡ ᑖᓂᑌ ᒉᒌ ᐅᐦᒋ ᐐᐦᑯᒋᐦᐆᑣᐤ ᐁ ᒌ ᓇᒀᑎᑯᑣᐤ ᒪᒋᒪᓂᑑ ᐁ ᒌ ᐃᐦᑑᑖᑯᑣᐤ ᒥᒄ ᒉᒌ ᐃᔑ ᓇᓂᐦᐄᐦᑐᐙᑣᐤ ᑖᓐ ᐁ ᐃᑕᔓᒥᑯᑣᐤ᙮