1 ᙭ ᐅᑖᐱᒋᐦᐋᑭᓐᐦ ᒋᐱᐦ ᐄᔑ ᑭᓂᐙᐱᒥᓈᓐ, ᐊᓂᒌ ᑳ ᒥᔮᑭᓂᐎᒡ ᒑ ᐋᔔ ᒋᔅᑯᑎᒫᒑᒡ ᐊᓂᔮᔨᐤ ᒑᒀᔨᐤ ᐋᔥᒄ ᐋᐦᐋᑳ ᐅᐦᒋ ᐐᐦᑖᑭᓂᐐᔨᒡ, ᐊᓂᔮᔨᐤ ᒋᔖᒥᓂᑑ ᐋᐦ ᑖᑦ ᑳ ᐅᐦᒋᐱᔨᔨᒡ᙮ 2 ᐹᔨᒄ ᒑᒀᔨᐤ ᑖᑆᐦ ᐋ ᐄᔑ ᓂᑎᐙᔨᐦᑖᑯᓯᒡ ᒑ ᒌ ᐄᑖᔨᐦᑖᑯᓯᒡ ᐅᒌ ᐅᔮᔨᐤ ᑳ ᐄᔑ ᒥᔮᑭᓂᐎᒡ ᒑ ᒌ ᐄᑖᐱᑎᓰᔨᒡ ᐋᔪᐎᒄ ᒑ ᒌ ᒑᔥᑎᓈᑖᔨᐦᑖᑯᓯᒡ ᑖᑆᐦ ᒑ ᒌᐦ ᑐᑎᐦᒡ ᑖᓐ ᐋᐦ ᐄᑎᔓᒥᑯᒡ ᐅᒋᒫᒧᐙᐤ᙮ 3 ᐋᒄ ᒫᒃ ᐊᓐ ᐋᔑᓈᑯᓱᐙᓈ ᑭᔮᐦ ᒫᒃ ᐋᑳ ᐊᓐ ᐋᔑᓈᑯᓱᐙᓈ, ᓂᒧᐃ ᒋᒋᔅᒑᔨᐦᑖᓈᐙᐤ ᑭᔮᐦ ᓂᒧᐃ ᑯᑎᒃ ᐊᐙᓐ ᒋᔅᒑᔨᐦᑎᒻ᙮ ᓂᒧᐃ ᐙᐙᒡ ᓃᔨ ᓂᒋᔅᒑᔨᐦᑖᓐ᙮ ᑖᐹ ᒥᑐᓐ ᓂᑎᔮᐱᑖᔨᐦᑎᒥᐦᐄᑯᓐ ᑖᓐ ᐋᑖᔨᒥᒀ ᐊᐙᓐ᙮ 4 ᐋᒄ ᒫᒃ ᓃᔨ ᐋ ᐄᔑ ᒋᔅᒑᔨᒦᓱᔮᓐ, ᒥᓯᐙ ᓂᒌᐦ ᑐᑖᓐ ᐊᓐ ᐋᐱᑎᓰᐎᓐ ᑳ ᒥᔨᑭᐎᔮᓐ ᒑ ᑐᑎᒫᓐ᙮ ᒥᒄ ᒫᒃ ᓂᒧᐃ ᐊᔮᐱᒡ ᓂᒑᔥᑎᓈᐦᐅᓐ ᑖᑆᐦ ᒥᓯᐙ ᑳᐦ ᑐᑎᒧᐙᓈ ᐊᓐ ᒑ ᑐᑎᒧᐙᐹᓈ᙮ ᑎᐹᔨᐦᒋᒑᓯᐤ ᒫᒃ ᐋᐅᒄ ᒑ ᑎᐹᔅᑯᓂᑦ᙮ 5 ᐋᐅᒄ ᒫᒃ ᐆ ᐅᐦᒋ ᐊᑳᐐ ᒋᑭ ᐅᐦᒋ ᑎᐹᔅᑯᓈᐤ ᐊᐙᓐ ᐋᔥᒄ ᐋᐦᐋᑳ ᐅᑎᐦᒋᐱᔨᐦᒡ ᒑ ᒌ ᑎᐹᔅᑯᓂᑭᓅᑦ, ᐊᓯᓂᐙᓯᐦ ᒑ ᑎᑯᔑᐦᒃ ᑎᐹᔨᐦᒋᒑᓯᐤ, ᐐᔨ ᒑ ᑎᐹᔅᑯᓈᑦ᙮ ᐐᔨ ᑎᐹᔨᐦᒋᒑᓯᐤ ᒧᔖ ᒋᑭ ᓅᑯᐦᑖᐤ ᒥᓯᐙ ᒑᒀᔨᐤ ᑳ ᑳᑖᑭᓂᐎᔨᒡ ᐊᓂᑖᐦ ᐋᐆᑳᔅᑖᔮᔨᒡ᙮ ᐙᐙᒡ ᐊᓂᔮᔨᐤ ᑖᓐ ᓂᐦᐋᐤ ᑳ ᐄᑖᔨᐦᑎᒥᔨᒡ ᐊᐙᔨᐤᐦ ᐅᑖᐦᐄᔨᒡ ᑭᔮᐦ ᒑᒀᔨᐤ ᐙᒋ ᒌ ᐄᑖᔨᐦᑎᒥᔨᒡ᙮ ᐋᑯᑦ ᒫᒃ ᐊᓂᑎᐦ ᒥᓯᐙ ᐊᐙᓐ ᒑ ᐐᐦᑎᒫᑯᑦ ᒋᔖᒥᓂᑑ ᐋ ᓂᐦᐋᔨᐦᑎᒥᔨᒡ ᐊᓂᔮᔨᐤ ᑖᓐ ᑳ ᐄᔑ ᒥᔪᑐᑎᐦᒃ᙮

6 ᒥᓯᐙ ᐆ ᑳ ᐹᒋ ᐃᔮᓐ ᓃᔨ ᓂᒌᐦ ᐊᔨᒨᒥᓱᓐ ᑭᔮᐦ ᐊᑆᓗᔅ ᓂᒌᐦ ᐋᔨᒨᒫᐤ ᐊᓂᑎᐦ ᒑ ᒌ ᐅᐦᒋ ᒋᔅᒑᔨᐦᑎᒫᒄ ᒌᔨᐙᐤ ᓃᒋᔖᓂᑎᒄ ᒥᒄ ᑖᓐ ᐋᑎᔥᑖᒡ ᒋᐦᒋᒥᓯᓂᐦᐄᑭᓂᐦᒡ ᒑ ᒌ ᐄᔑ ᐱᒫᑎᓰᔮᒄ᙮ ᐙᔥ ᐊᒀᒋᔥᑖᒡ ᒑᐦ ᐋᑳ ᐊᐙᓐ ᐊᐅᔅᑖ ᐄᑖᔨᒫᑦ ᐹᔨᒄ ᐊᐙᔨᐤᐦ ᑖᓐ ᐋᑖᔨᒫᑦ ᑯᑎᒃ ᐊᐙᔨᐤᐦ᙮ 7 ᐊᐙᓐ ᑳ ᒥᔨᑖᒄ ᓈᔥᒡ ᒑ ᒌ ᒋᔅᑖᔨᒦᓱᐙᒄ? ᓂᒧᐃ ᐋ ᒋᔖᒥᓂᑑ ᑰᐦᒋ ᒥᔨᑯᐙᐤ ᒥᓯᐙ ᑖᓐ ᐋ ᐄᔑ ᐃᔮᐙᒄ? ᒋᔖᒥᓂᑑ ᐋ ᒌ ᒥᔨᑖᒄ ᐅᔮᔨᐤ ᒥᔨᐙᐎᓐ, ᓂᒧᐃ ᐃᓯᓈᑯᓐ ᒑ ᒌ ᒫᒥᐦᒋᒧᔮᒄ, ᒧᔮᒻ ᐋᐦᐋᑳ ᐐᔨ ᐅᐦᒋ ᒥᔨᑖᒄ ᒑ ᒌ ᑎᔮᒄ᙮

8 ᒋᑎᐄᑖᔨᐦᑎᓈᐙᐤ ᔖᔥ ᒥᓯᐙ ᐋ ᐃᔮᔮᒄ ᑖᓐ ᐊᓐ ᒑ ᐄᔑ ᓂᑎᐙᔨᐦᑎᒧᐙᑯᐱᓈ᙮ ᑭᔮᐦ ᒋᑎᐄᑖᔨᐦᑎᓈᐙᐤ ᓈᔥᒡ ᐋ ᐙᔪᒡ ᐃᔮᔮᒄ᙮ ᒋᒋᐦᒋᐅᒋᒫᐅᓈᐙᐤ ᐋ, ᐋᐦᐋᑳ ᒫᒃ ᒋᐦᒋᐅᒋᒫᐎᔮᐦᒡ ᓃᔮᓐ? ᑭᒫ ᑖᑆᐦ ᒋᐦᒋᐙ ᒋᐦᒋᐅᒋᒫᐎᔮᒄ ᐋᒄ ᒫᒃ ᑭᔮᐦ ᓃᔮᓐ ᓂᐱᐦ ᒋᐦᒋᐅᒋᒫᐅᓈᓐ᙮ 9 ᓃᔨ ᒫᒃ ᐊᓐ ᐋ ᐄᑖᔨᐦᑎᒫᓐ ᒋᔖᒥᓂᑑ ᓂᒌᐦ ᐄᔑᐦᐄᑯᓈᓐ ᓃᔮᓐ ᐋᑆᔅᑎᓕᒡ ᑳ ᐄᑖᐱᑎᓰᔮᐦᒡ ᒫᐅᒡ ᓃᐦᑖᒡ ᒑ ᒌ ᐄᑖᔨᐦᑖᑯᓯᔮᐦᒡ ᐃᔥᐱᔥ ᐐ ᒑ ᒌ ᒋᐦᒋᐅᒋᒫᐎᔮᐦᒡ᙮ ᓂᒧᐃ ᒥᑐᓐ ᓂᒋᔅᑖᔨᐦᑖᑯᓯᓈᓐ᙮ ᒧᔮᒻ ᓈᐹᐅᒡ ᒑ ᑎᐹᔅᑯᓈᑭᓄᐙᑯᐱᓈ ᒑ ᓂᐱᐦᐋᑭᓂᐎᒡ ᐋᐅᒄ ᐋ ᐃᓯᓈᑯᓯᔮᐦᒡ᙮ ᓂᒌ ᐱᒋᔅᑎᓂᑳᐎᓈᓐ ᐊᓂᑎᐦ ᒥᓯᐙ ᐊᐙᓐ ᒑ ᒌ ᓈᓈᑭᒋᐦᐄᔨᒥᐦᑦ ᑖᓐ ᐋ ᐄᔑ ᓂᓈᐦᑳᑖᔨᒧᐦᐄᑭᐎᔮᐦᒡ᙮ ᑖᐱᔥᑯᓐ ᐄᔨᔨᐅᒡ ᑭᔮᐦ ᐋᓐᒋᓂᒡ ᓂᓈᓈᑭᒋᐦᐄᑯᓈᓂᒡ᙮ 10 ᐙᔥ ᐊᓂᔮᔨᐤ ᐋᐦ ᐋᐱᑎᔒᔥᑑᒋᐦᑦ ᙭, ᐋᐅᒄ ᐙᐦᒋ ᐄᑖᔨᒥᑭᐎᔮᐦᒡ ᐋ ᒌᔥᒀᔮᐦᒡ᙮ ᒌᔨᐙᐤ ᒫᒃ ᐐᔨ ᒧᔮᒻ ᓈᔥᒡ ᐋ ᑭᒑᐦᑖᐙᔨᐦᑎᒫᒄ ᒋᑎᐄᑖᔨᒥᑯᓈᐙᐤ ᐋᐦ ᐋᐱᑎᔒᔥᑑᐙᒄ ᙭᙮ ᓃᔮᓐ ᐋᑆᔅᑎᓕᒡ ᓈᔥᒡ ᓂᒧᐃ ᓂᓵᐱᓰᓈᓐ, ᒌᔨᐙᐤ ᐐᔨ ᒫᒃ ᒋᓲᐦᑳᑎᓰᓈᐙᐤ᙮ ᓅᐦᑳᑎᑭᐎᓈᓐ ᓃᔮᓐ᙮ ᒌᔨᐙᐤ ᒫᒃ ᒋᒋᔅᑖᔨᒥᑯᓈᐙᐤ᙮ 11 ᐙᐙᒡ ᑭᔮᐦ ᒫᒀᒡ ᐊᓅᐦᒡ ᓂᔮᓂᑯᑐᓐᐦ ᓂᔒᐅᑖᓈᓐ᙮ ᓂᔮᓂᑯᑐᓐᐦ ᓂᐹᑯᑖᐦᑖᓈᓐ᙮ ᓂᔮᓂᑯᑐᓐᐦ ᓂᒧᐃ ᒥᑐᓐ ᒌ ᐃᓯᓈᑯᓐ ᓂᒑᒀᓂᒥᓈᓐ᙮ ᓈᔥᒡ ᓂᐐ ᑐᑖᑭᐎᓈᓐ ᑭᔮᐦ ᒫᓐ᙮ ᑭᔮᐦ ᓂᒧᐃ ᑎᑯᓐ ᑖᓂᑖᐦ ᒑ ᒌ ᐐᒋᔮᐦᒡ᙮ 12 ᓈᔥᒡ ᒥᔥᑏᐦ ᓂᑎᐋᐱᑎᓰᓈᓐ ᒑ ᒌ ᐱᒫᒋᐦᐄᓱᔮᐦᒡ᙮ ᐋ ᐅᐎᔨᐦᒀᓯᔨᒥᐦᒡ ᐄᔨᔨᐅᒡ, ᓂᓂᑐᑎᒫᒫᓐ ᒋᔖᒥᓂᑑ ᒑ ᒌ ᒋᔖᐙᑐᑖᑯᒡ᙮ ᑭᔮᐦ ᓈᓈᐦᑳᒋᐦᐄᒥᐦᑣᐤᐦ ᐄᔨᔨᐅᒡ ᓂᒧᐃ ᓂᒋᔅᑐᑖᓈᓂᒡ᙮ 13 ᐋ ᒫᔮᔨᒥᔨᒥᐦᒡ ᐄᔨᔨᐅᒡ ᐋᐦ ᐋᐱᑎᔒᔥᑖᒥᒋᐦᑦ ᙭, ᐹᐦᑳᒡ ᓂᑎᔨᒥᐦᐋᓈᓂᒡ ᐋ ᓂᔥᒀᐅᓯᐦᐄᒋᐦᒡ᙮ ᑭᔮᐦ ᒫᒃ ᐊᓅᐦᒡ ᒫᒀᒡ ᒧᔮᒻ ᐙᐱᓈᓱᓐ ᐋᐅᒄ ᐋᐦ ᑐᑖᑭᐎᔮᐦᒡ, ᓃᔮᓐ ᒫᐅᒡ ᓂᒥ ᒑᒀᓐ ᓂᑎ ᐄᑖᔨᒥᑯᓈᓂᒡ ᐄᔨᔨᐅᒡ ᐅᑎᐦ ᐊᔅᒌᐦᒡ᙮

14 ᓂᒧᐃ ᐆ ᓂᑎᐄᑎᓯᓂᐦᐄᒑᓐ ᒑ ᒌ ᐱᒫᒥᔑᔮᒄ᙮ ᒥᒄ ᒋᐐᐦ ᐃᔮᒀᒥᒥᑎᓈᐙᐤ ᐆ ᐙᐦᒋ ᐄᑎᓯᓂᐦᐊᒫᓐ ᐙᔥ ᒥᓯᐙ ᒌᔨᐙᐤ ᓂᑎᐊᐙᔑᔒᒥᒡ ᑳ ᓵᒋᐦᐄᒀᐤ ᒋᑎᐄᑖᔨᒥᑎᓈᐙᐤ᙮ 15 ᐋᑦ ᒫᒃ ᓈᔥᒡ ᐋ ᒥᐦᒑᑎᒡ ᐊᓂᒌ ᑳ ᒋᔅᑯᑎᒫᑖᑯᒡ ᐋ ᐙᐐᐦᑎᒫᑖᑯᒡ ᑖᓐ ᒑ ᐄᔑ ᐱᒫᑎᓰᐙᒄ ᐋ ᓅᔔᔥᑳᒫᒄ ᙭, ᓃᔨ ᐋ ᐹᔨᑯᔑᔮᓐ ᒋᒌ ᐐᐦᑎᒫᑎᓈᐙᐤ ᒥᔻᒋᒧᐎᓐ᙮ ᐋᒄ ᒫᒃ ᐋ ᐃᓯᓈᑯᐦᒡ ᒧᔮᒻ ᓃᔨ ᐋ ᒌ ᐋᑎᐅᐦᑖᐐᑑᔮᒄ ᙭ ᒌᓴᔅ ᐅᐦᒋ᙮ 16 ᐋᐅᒄ ᒫᒃ ᐙᐦᒋ ᓈᔥᒡ ᐱᑯᓵᔨᒥᑎᑯᒡ ᒑ ᒌ ᒋᔅᒋᓄᐙᐱᒥᔮᒄ᙮ 17 ᐋᔪᐎᒄ ᐙᐦᒋ ᐄᑎᔑᐦᐅᒃ ᑎᒧᕢ ᐊᓂᑖᐦ ᐋᐦᑖᐙᒄ᙮ ᒧᔮᒻ ᓂᑯᔅ ᒋᔖᒥᓂᑑ ᐋ ᒌ ᐹᒋ ᒥᔨᑦ ᓂᑎᐄᑖᔨᒫᐤ, ᓈᔥᒡ ᓂᓵᒋᐦᐋᐤ᙮ ᒨᔥ ᑯᐃᔅᒄ ᐄᐦᑐ᙮ ᓂᓂᑎᐙᔨᒫᐤ ᒑ ᒌ ᒋᔅᒋᓲᒥᑖᒄ ᑖᓐ ᐋ ᐄᔑ ᐱᒫᑎᓰᐎᒡ ᙭ ᒌᓴᔅ ᐄᔑ ᐋᐦ ᑖᔨᒡ ᑭᔮᐦ ᐊᓂᔮᔨᐤ ᐋ ᐄᔑ ᒋᔅᑯᑎᒫᒑᐅᒡ ᒥᓯᐙ ᑖᓂᑖᐦ ᐋᐦ ᐋᑎ ᐃᔨᐦᑖᔨᒡ ᐅᒫᒨᐊᔨᒥᐦᐋᐤ᙮

18 ᐱᔅᒡ ᐊᓂᑎᐦ ᐋ ᑎᔑᔮᒄ ᓈᔥᒡ ᒋᒋᔅᑖᔨᒧᓈᐙᐤ᙮ ᓂᒧᐃ ᒋᑭ ᐅᐦᒋ ᑎᑯᔑᓐ ᒋᑎᐄᑖᔨᒥᓈᐙᐤ᙮ 19 ᒥᒄ ᒫᒃ ᐐᐱᒡ ᒋᑭ ᐹᒋ ᓂᑎᐙᐱᒥᑎᓈᐙᐤ, ᑎᐹᔨᐦᒋᒑᓯᐤ ᓂᑎᐙᔨᒥᒑ ᒑ ᒌ ᓂᑎᐙᐱᒥᑎᑯᒡ᙮ ᐋᒄ ᒫᒃ ᒑ ᓂᑑᒋᔅᒑᔨᒥᒀᐤ ᐅᒌ ᑳ ᒋᔅᑖᔨᒧᒡ ᑖᑆᐦ ᑳ ᒥᔨᑯᐙᒀ ᒋᔖᒥᓂᑑ ᓲᐦᑳᑎᓰᐎᓂᔨᐤ ᑭᔮᐦ ᒫᒃ ᒥᒄ ᓵᐦᒑᐄ ᐋᔨᐙᒀ ᐊᓂᔮᔨᐤ ᑖᓐ ᐋᐦ ᐃᔨᒡ᙮ 20 ᓂᒧᐃ ᒥᒄ ᒋᐱᐦ ᐅᐦᒋ ᐋᔨᒧᑖᑭᓂᐎᔨᐤ ᒋᔖᒥᓂᑑ ᐅᒋᐦᒌᐅᒋᒫᐎᓐ, ᒋᐱᐦ ᓅᑯᐦᑖᑭᓂᐎᔨᐤ ᑖᓐ ᐋ ᐃᔥᐱᔥ ᓲᐦᒑᔨᐦᑖᑯᓃᔨᒡ᙮ 21 ᐄᔥᐱᐦ ᐹᒋ ᓂᑎᐙᐱᒥᑎᑯᒑ ᑖᓐ ᐊᓐ ᐋ ᐄᔑ ᓂᑎᐙᔨᐦᑎᒫᒄ? ᒋᓂᑎᐙᔨᒥᓈᐙᐤ ᐋ ᒑ ᒌ ᐹᒋ ᑎᐦᑯᓂᒫᓐ ᐱᔑᔥᑖᐦᐄᑭᓐ ᑭᔮᐦ ᒫᒃ ᓵᒋᐦᐄᐙᐎᓐ ᒑ ᒌ ᐹᑖᔮᓐ ᐹᐦᑳᒡ ᒑ ᒌ ᑐᑖᑎᑯᒡ?