1 ᓂᒌ ᐐᐦᑎᒫᑭᐎᓐ ᐋᐦ ᑖᑦ ᐊᐙᓐ ᐊᓂᑎᐦ ᐋ ᒫᒨ ᐋᔮᒦᐦᐋᔮᒄ ᓂᑎᐐ ᐋᐦ ᐄᑖᑎᓰᑦ᙮ ᓂᒧᐃ ᐙᐙᒡ ᐊᓂᒌ ᐋᑳ ᑳ ᑖᑆᔮᔨᒫᒡ ᒋᔖᒥᓂᑑ ᒋᐱᐦ ᐅᐦᒋ ᐄᔑ ᐱᒫᑎᓰᐎᒡ ᑖᓐ ᐋ ᐄᔑ ᐱᒫᑎᓰᔨᒡ ᐊᓂᔮᔨᐤ ᓈᐹᐤ᙮ ᓂᒌ ᐐᐦᑎᒫᑭᐎᓐ ᐅᐦᑖᐐᐦ ᐎᔨᐐᔨᐤᐦ ᐋ ᐐᒋᒫᑦ ᐊᓐ ᓈᐹᐤ᙮ 2 ᓈᔥᒡ ᒫᒃ ᒋᒋᔅᑖᔨᒧᓈᐙᐤ᙮ ᑎᔨᑯᒡ ᒋᐱᐦ ᒥᒑᔨᐦᑖᓈᐙᐤ᙮ ᒋᐱᐦ ᐄᒑᓈᐙᐤ ᐊᓐ ᓈᐹᐤ ᐅᔮᔨᐤ ᑳᐦ ᑎᒃ ᐊᓂᑎᐦ ᐅᐦᒋ ᐋᐦᑖᐙᒄ᙮ 3 ᐋᐦᐋᑦ ᐋᔥᒄ ᐋᑳ ᑖᔮᓐ ᓈᑖᐦ ᐋᐦ ᑖᔮᒄ, ᓈᔥᒡ ᒋᔥᒌᑖᑎᓈᐙᐤ ᒧᔮᒻ ᔖᔥ ᐋᐦ ᑖᔮᓐ ᓈᑖᐦ ᐋᐦ ᑖᔮᒄ ᐋᐅᒄ ᐋ ᐄᑖᔨᐦᑎᒫᓐ᙮ ᔖᔥ ᒫᒃ ᓂᒌ ᐎᔮᔨᐦᑖᓐ ᑖᓐ ᒑ ᑐᑎᐙᑭᓄᑯᐱᓈ ᐊᓐ ᓈᐹᐤ ᐅᔮᔨᐤ ᑳᐦ ᑎᒃ, 4 ᑎᐹᔨᐦᒋᒑᓯᐤ ᒌᓴᔅ ᐋ ᒌ ᐹᒋ ᒥᔨᑦ ᒑ ᒌ ᐄᔑ ᐎᔮᔨᐦᑎᒧᒡ᙮ ᓂᔥᑐᐎᔮᒄ ᐙᐦ ᐊᔨᒥᐦᐋᔮᒄ, ᒧᔮᒻ ᐊᓂᑎᐦ ᐋᐦ ᑖᔮᒄ ᐋᐦ ᑖᔮᓐ ᒋᑭ ᐄᑖᔨᐦᑖᑯᓐ ᑭᔮᐦ ᒫᒃ ᑎᐹᔨᐦᒋᒑᓯᐤ ᒌᓴᔅ ᐅᓲᐦᑳᑎᓰᐎᓐ ᒋᑭ ᑎᑯᓂᔨᐤ᙮ 5 ᐱᒋᔅᑎᓈᐦᒄ ᐊᓐ ᓈᐹᐤ ᐊᓂᑖᐦ ᒥᒋᒥᓂᑑ ᐋᐦ ᑖᔨᒡ ᒑ ᒌ ᓂᔑᐎᓈᒋᐦᑖᑭᓂᐎᔨᒡ ᑖᓐ ᐋ ᐄᔑ ᒥᒋᓂᑐᐙᔨᐦᑎᒨᒥᑭᓃᔨᒡ ᐎᔮᔅ, ᐋᒄ ᒫᒃ ᐅᑎᐦᒑᐦᒄ ᒑ ᐱᒫᒋᐦᐄᒫᑭᓂᐎᔨᒡ ᐊᓂᔮᔨᐤ ᐋ ᒌᔑᑳᔨᒡ ᐹᒋ ᑎᑯᔑᓃᔨᒑ ᑎᐹᔨᐦᒋᒑᓯᐤ᙮

6 ᓂᒧᐃ ᒥᑐᓐ ᐃᓯᓈᑯᓐ ᒑ ᒌ ᒋᑳᔮᔨᒦᓱᔮᒄ᙮ ᒋᒋᔅᒑᔨᐦᑖᓈᐙᐤ ᐊᐱᔒᔥ ᐅᐦᐱᓯᑭᓐ ᐋ ᐱᒋᔅᑎᓂᑭᓂᐎᒡ ᐋᐃᐦᑯᓈᐦᒡ ᒥᓯᐙ ᐋᐦ ᐋᔅᑎᑎᒃ ᐊᓐ ᐋᐃᐦᑯᓈᐤ ᐅᐦᐱᔨᐤ᙮ 7 ᐊᑳᐐ ᐱᒋᔅᑎᓂᒧᒄ ᒥᒋᐦᑣᐎᓐ ᒑ ᒌ ᑎᑯᐦᒡ ᐊᓂᑎᐦ ᐋᐦ ᑖᔮᒄ᙮ ᐙᔥ ᒧᔮᒻ ᐅᐦᐱᓯᑭᓂᒡ ᐄᑖᔨᐦᑖᑯᓐ ᒥᒋᐦᑣᐎᓐ, ᐋᔪᐎᒄ ᐅᔮᔨᐤ ᑳᐦᑐᑖᑯᑦ ᐋᐃᐦᑯᓈᐤ ᒑ ᒌ ᐅᐦᐱᔨᑦ, ᐋᐅᒄ ᒫᒃ ᒧᔮᒻ ᐋᐦ ᑐᑎᒫᒑᒥᑭᐦᒡ ᒥᒋᐦᑣᐎᓐ ᐱᒫᑎᓰᐎᓂᐦᒡ᙮ ᓂᒧᐃ ᒋᐱᐦ ᐅᐦᒋ ᐃᔮᓈᐙᐤ ᒥᒋᐦᑣᐎᓐ ᒌ ᐱᒫᑎᓰᐎᓂᐙᐦᒡ ᐙᔥ ᒋᒌ ᐱᑯᐦᐄᑯᓈᐙᐤ ᒥᒋᐃᐦᑣᐎᓂᐦᒡ ᐅᐦᒋ᙮ ᐙᔥ ᙭ ᒌ ᒥᔮᔥᑳᒑᐤ ᒫᓂᔥᒑᓂᔑᒥᓂᐤ ᒌ ᓂᐱᐦᐋᑭᓂᐤ ᒌᔮᓂᐤ ᐅᐦᒋ ᒑ ᒌ ᐱᒫᒋᐦᐅᔨᐦᒄ᙮ 8 ᐋᒄ ᒫᒃ ᑭᓂᐙᔨᐦᑎᐦᑖᐤ ᐋ ᒌ ᐱᒫᒋᐦᐄᑭᐎᔨᐦᒄ᙮ ᐙᐱᓂᐦᑖᐤ ᐊᓐ ᐙᔥᑭᒡ ᐅᐦᐱᓯᑭᓐ ᐋᐅᒄ ᒥᒋᐦᑣᐎᓐ ᑭᔮᐦ ᒫᒃ ᒥᓯᐙ ᑖᓐ ᐋ ᐄᔑ ᒫᔮᑎᐦᒡ᙮ ᐊᓐ ᒫᒃ ᐋ ᐃᔥᐱᔥ ᒥᔻᔨᐦᑎᒥᐦᒄ ᐋ ᒌ ᐱᒫᒋᐦᐄᑳᐎᔨᐦᒄ ᑯᐃᔅᒄ ᐄᔑ ᐱᒫᑎᓰᑖᐤ ᑭᔮᐦ ᑖᑆᐎᓂᐦᒡ ᐄᔑ ᐊᔨᒥᑖᐤ᙮

9 ᒋᒌ ᐐᐦᑎᒫᑎᓈᐙᐤ ᐅᑎᐦ ᑳ ᒥᓯᓂᐦᐋᒫᑎᑯᒡ, ᐋᑳ ᒑ ᐐᒑᐙᑯᒡ ᐊᓂᒌ ᓂᑎᐐ ᒥᒄ ᑳ ᐄᑖᑎᓰᔨᒡ᙮ 10 ᓂᒥ ᓂᑎ ᐋᔨᒨᒫᐅᒡ ᐊᓂᒌ ᐋᑳ ᑖᑆᐦᔮᔨᐦᑖᒡ ᑳ ᒧᔥᑖᓂᒫᒑᒡ ᒑᒀᔨᐤ ᑭᔮᐦ ᑳ ᑭᒑᒧᑎᒡ ᑭᔮᐦ ᒫᒃ ᐊᓂᒌ ᑳ ᐊᔨᒥᐦᐋᔅᑎᐙᒡ ᒥᓂᑑᐦᑳᓐ᙮ ᐙᔥ ᐋᑳ ᐐᐦ ᑖᔨᐦᒄ ᐊᓂᑎᐦ ᐋᐦ ᑖᒡ ᐊᓂᒌ ᐋᑳ ᑳ ᑖᑆᑎᐦᒡ, ᒋᐱᐦ ᐄᒑᐐᓈᓂᐤ ᐅᑎᐦ ᐆ ᐊᔅᒌ᙮ 11 ᐊᓅᐦᒡ ᒋᒥᓯᓂᐦᐋᒫᑎᓈᐙᐤ ᒑᐦ ᐋᑳ ᐅᐐᒑᐙᑭᓂᔮᒄ ᐊᐙᓐ ᐋᐦ ᐃᔨᑦ ᐋ ᑖᑆᔮᔨᒫᑦ ᒌᓴᔅᐦ, ᒥᓯᐙ ᓂᓈᐦᑭᐤ ᐐᓂᓱᐎᓂᐦᒡ ᐋ ᐄᔑ ᐱᒫᑎᓰᒀ, ᒸᔥᑖᓂᒫᒑᒀ ᒑᒀᔨᐤ ᑭᔮᐦ ᒫᒃ ᐋᔮᒥᐦᐋᔅᑎᐙᒀ ᒥᓂᑑᐦᑳᓐ ᑭᔮᐦ ᒫᒃ ᓂᑎᐐ ᒥᒄ ᐋᐦ ᐄᑖᒋᒫᒀ ᐊᐙᔨᐤᐦ, ᑭᔮᐦ ᒫᒃ ᐙᐦᒋᐹᒀ ᑭᔮᐦ ᒫᒃ ᐙᐦᒋ ᑳᒑᒧᑎᒀ᙮ ᐊᑳᐐ ᐙᐙᒡ ᐐᒋᒦᒋᓱᒫᐦᒄ ᐊᐙᓐ ᐅᔮᔨᐤ ᐋᐦ ᐄᑖᑎᓰᑦ᙮ 12 ᐙᔥ ᓂᒧᐃ ᐃᓯᓈᑯᓐ ᒋᔮᓂᐤ ᒑ ᒌ ᑎᐹᔅᑯᓂᐦᒄ ᐊᐙᓐ ᐋᐦᐋᑳ ᐐᒋᑖᑆᔮᔨᐦᑎᒧᒥᑎᐦᒄ᙮ ᐐᔨ ᒋᔖᒥᓂᑑ ᑭᑎ ᑎᐹᔅᑯᓈᐤ᙮ ᒥᒄ ᒫᒃ ᒋᔮᐙᐤ ᐙᔥ ᒋᑭ ᒋᐅᔮᔨᐦᑖᓈᐙᐤ ᒑ ᒌ ᑎᐹᔅᑯᓈᑯᒡ ᐊᓂᒌ ᐄᔨᔨᐅᒡ ᐋᐦ ᑖᒡ ᐊᓂᑎᐦ ᐋ ᒫᒨ ᐊᔨᒥᐦᐋᔮᒄ᙮ 13 ᐙᔥ ᐄᑎᔥᑖᐤ ᐊᓂᑎᐦ ᒋᐦᒋᒥᓯᓂᐦᐄᑭᓂᐦᒡ, “ᐃᓯᓈᑯᓂᔨᐤ ᒑ ᒌ ᐄᒑᓈᒄ ᐊᓐ ᐊᐙᓐ ᑳ ᒥᒑᑎᓰᑦ ᐊᓂᑎᐦ ᐋᐦᑖᐙᒄ ᑳᐦ ᑖᑦ᙮”