1 ᓃᒋᔖᓂᑎᒄ, ᒋᑭ ᐋᔨᒨᑎᒫᑎᓈᐙᐤ ᑖᓐ ᒑ ᐄᔅᐱᔨᔨᒡ ᑎᐹᔨᐦᒋᒑᓯᐤ ᒌᓴᔅ ᙭ ᑎᑯᔑᐦᑳ ᒫᒨᐎᔨᐦᒀ ᐊᓂᑖᐦ ᐐᔨ ᐋᐦ ᑖᑦ᙮ ᒋᓂᑎᐙᔨᒥᑎᓈᐙᐤ ᓃᒋᔖᓂᑎᒄ, 2 ᐋᑳ ᒑ ᒌ ᐎᓂᒧᔨᑖᑯᒡ ᑭᔮᐦ ᒫᒃ ᐋᑳ ᒑ ᒌ ᑯᔅᑖᒋᒥᑖᑯᒡ ᐄᔨᔨᐅᒡ ᐋᐦ ᐃᔨᒡ ᔖᔥ ᐋ ᒌ ᐅᑎᐦᒋᐱᔨᔨᒡ ᑎᐹᔨᐦᒋᒑᓯᐤ ᐋ ᒌ ᑎᑯᔑᓃᔨᒡ᙮ ᐊᑳᐐ ᑖᑆᐦᑎᒧᒄ ᐋᑦ ᐃᔨᒑ ᐊᐙᓐ ᐊᐦᒑᐦᒄ ᐋ ᒌ ᒋᔅᒑᔨᐦᑎᒥᐦᐄᑯᑦ ᐅᔮᔨᐤ, ᑭᔮᐦ ᒫᒃ ᐋᑦ ᐃᔨᒑ ᐊᐙᓐ ᐋ ᒌ ᐐᐦᑎᒨᐙᑭᓅᑦ ᑭᔮᐦ ᒫᒃ ᐋᑦ ᐃᔨᒑ ᓃᔮᓐ ᓃᔨ ᒥᓯᓂᐦᐄᑭᓂᔨᐤ ᐋ ᒌ ᐋᔨᒦᐦᑖᑦ ᐅᔮᔨᐤ ᐋᐦ ᐋᔨᒧᑎᒧᒋᐦᑦ ᔖᔥ ᐋ ᒌ ᐅᑎᐦᒋᐱᔨᔨᒡ ᑎᐹᔨᐦᒋᒑᓯᐤ ᐋ ᒌ ᑎᑯᔑᓃᔨᒡ᙮ 3 ᐃᔮᒀᒦᒄ ᐋᑳ ᒥᑐᓐ ᒑ ᒌ ᐎᓂᒧᔨᑖᑯᒡ ᐄᔨᔨᐅᒡ᙮ ᐋᔥᒄ ᐋᒸᔮ ᐅᑎᐦᒋᐱᔨᒡ ᐊᓐ ᐋ ᒌᔑᑳᒡ ᒥᐦᒑᑐ ᐄᔨᔨᐅᒡ ᒫᐦᒑᔨ ᒋᑭ ᓂᔅᑰᔅᑑᐙᐅᒡ ᒋᔖᒥᓂᑑᐦ᙮ ᑭᔮᐦ ᑭᑎ ᓅᑯᐦᐋᑭᓂᐤ ᐊᓐ ᑳ ᓂᔅᑰᔅᑎᒸᑦ ᒋᔖᒥᓂᑑᐦ ᐅᐐᔓᐙᐎᓂᔨᐤᐦ, ᐋᐅᒄ ᐆ ᒑ ᓂᔑᐎᓈᒌᐦᐋᑭᓅᑦ᙮ 4 ᒥᓯᐙ ᐊᓂᔮᔨᐤ ᒑᒀᔨᐤ ᑳᐦ ᑐᑖᑯᔨᒡ ᐊᐙᔨᐤᐦ ᒑ ᒌ ᐅᐦᒋ ᐊᔨᒥᐦᐋᔥᑎᐙᔨᒡ ᒋᔖᒥᓂᑑ ᑭᔮᐦ ᒫᒃ ᒋᔖᒥᓂᑑ ᐋᐦ ᑖᔨᒡ ᐋ ᐅᐦᒋᐱᔨᐦᒡ ᐋ ᐄᑖᔨᐦᑖᑯᓃᔨᒡ ᒋᑭ ᒫᓯᐦᑖᐤ᙮ ᐋᔪᐎᒄ ᐅᔮᔨᐤ ᒑ ᐅᐦᒋ ᑎᒃ ᐋ ᓂᑎᐙᔨᐦᑎᐦᒃ ᐐᔨ ᒫᐅᒡ ᒑ ᒌ ᒋᔅᑖᔨᐦᑖᑯᐦᐋᑭᓅᑦ᙮ ᐙᐙᒡ ᒋᑭ ᐲᐦᒑᐤ ᑭᔮᐦ ᑭᑎ ᐊᐱᐤ ᐊᓂᑖᐦ ᒋᔖᒥᓂᑑ ᐅᒋᔖᐊᔨᒥᐦᐋᐅᑭᒥᑯᔨᒡ ᐋᒄ ᒑ ᐃᔨᑦ ᐐᔨ ᐋ ᒋᔖᒥᓂᑑᐎᑦ᙮

5 ᓂᒧᐃ ᐋ ᒋᒋᔥᒋᓯᓈᐙᐤ ᔖᔥ ᒥᓯᐙ ᐋ ᒌ ᐐᐦᑎᒫᑎᑯᒡ ᐆ ᒫᒀᒡ ᐊᓂᑖᐦ ᐋᐦ ᑖᔮᒄ ᑳᐦ ᑖᔮᓐ? 6 ᐊᓐ ᐊᐙᓐ ᑳᐦ ᐋᔨᒨᒥᒃ ᑳ ᓂᔅᑯᔅᑎᒸᑦ ᒋᔖᒥᓂᑑ ᐅᐐᔓᐙᐎᓂᔨᐤ, ᒋᒋᔅᒑᔨᐦᑎᒸᓈᐙᐤ ᒑᒀᔨᐤ ᒫᒫᐦᒋᑯᓂᑯᑦ ᐙᐦᒋ ᐋᑳ ᐋᔥᒄ ᐱᒋᔅᑎᓈᑭᓅᑦ ᒑ ᒌ ᓅᑯᓯᑦ᙮ ᐹᑎᔥ ᐅᑎᐦᒋᐱᔨᒑ ᐊᓂᔮᔨᐤ ᒑ ᐃᔥᐱᔥ ᓄᑰᐦᐋᑭᓅᑦ ᐃᔮᒄ ᒑ ᐙᐱᒫᑭᓅᑦ᙮ 7 ᐙᔥ ᐊᓐ ᑳ ᓂᔅᑯᔅᑎᒸᑦ ᒋᔖᒥᓂᑑ ᐅᐐᔓᐙᐎᓂᔨᐤ ᔖᔥ ᒌᒧᒡ ᐋᐱᑎᔒᔥᑑᒻ, ᒥᒄ ᒫᒃ ᐊᓐ ᐋᔥᒄ ᒑ ᐄᔅᐱᔨᔨᒡ ᓂᒧᐃ ᐱᑎᒫ ᑭᑎ ᐅᐦᒋ ᐄᔅᐱᔨᐤ ᐹᑎᔥ ᒌ ᐄᒑᓈᑭᓅᒑ ᐊᓐ ᑳ ᐅᑎᒥᐦᐄᐙᑦ᙮

8 ᐋᒄ ᒫᒃ ᒑ ᓅᑯᐦᐋᑭᓅᑦ ᐊᐙᓐ ᐙᒋᐦᒡ ᐃᔮᐅᑦ ᐊᓐ ᑳ ᓂᔅᑯᔅᑎᒸᑦ ᒋᔖᒥᓂᑑ ᐅᐐᔓᐙᐎᓂᔨᐤ᙮ ᒥᒄ ᒫᒃ ᐄᔥᐱᐦ ᑎᑯᔑᐦᑳ ᑎᐹᔨᐦᒋᒑᓯᐤ ᒌᓴᔅ ᐐᔨ ᒋᑭ ᓂᐱᐦᐋᐤ ᐎᔮᐦᔮᐎᓐ ᐋᐦ ᐋᐱᒋᐦᑖᑦ᙮ ᒥᑐᓐ ᒋᑭ ᓂᔑᐎᓈᒋᐦᐋᐤ ᐄᔥᐱᐦ ᑎᑯᔑᐦᑳ ᐅᒋᔅᑖᔨᐦᑖᑯᓯᐎᓂᐦᒡ᙮ 9 ᐊᓐ ᑳ ᓂᔅᑯᔅᑎᒸᑦ ᒋᔖᒥᓂᑑ ᐅᐐᔓᐙᐎᓂᔨᐤ, ᓅᑯᓯᒑ, ᒥᒋᒥᓂᑑ ᒋᑭ ᒥᔨᑰ ᒥᒋᓲᐦᑳᑎᓰᐎᓂᔨᐤ᙮ ᐋᐦᐋᑳ ᑖᑆᒥᑭᓃᔨᒡ ᒫᒥᔥᑳᒡ ᐙᐱᐦᑏᐙᐎᓐ ᒋᑭ ᐙᐱᐦᑏᔨᐙᐤ ᑭᔮᐦ ᒫᒃ ᐋ ᒫᒥᔥᑳᑖᔨᐦᑖᑯᓃᔨᔨᒡ ᒑᒀᔨᐤ ᒋᑭ ᑐᑎᒻ᙮ 10 ᒥᓯᐙ ᓂᓈᐦᑭᐤ ᐋ ᐄᔑ ᒫᔮᑎᓃᔨᒡ ᑭᑎ ᐋᐱᒋᐦᑖᐤ ᐋ ᐐᐦ ᐎᓂᐲᐦᐋᐤ ᐊᓂᔮᔨᐤ ᒑ ᓂᔑᐎᓈᑎᓰᔨᒡ, ᐙᔥ ᐋᐦᐋᑳ ᐅᐦᒋ ᐐᐦ ᓵᒋᐦᑖᔨᒡ ᑖᑆᐎᓂᔨᐤ ᐊᓂᑎᐦ ᒑ ᒌ ᐅᐦᒋ ᐱᒫᒋᐦᐅᔨᒡ᙮ 11 ᐋᔪᐎᒄ ᒫᒃ ᐅᔮᔨᐤ ᐙᐦᒋ ᐱᒋᔅᑎᓈᑦ ᒋᔖᒥᓂᑑ ᒑ ᒌ ᓲᐦᒑᔨᐦᑖᑯᓃᔨᒡ ᐋ ᐄᔑ ᐎᓂᐱᔨᐦᐄᒫᑭᓂᐎᒡ ᐊᓂᑎᐦ ᒑ ᒌ ᐅᐦᒋ ᑖᑆᐦᑎᒥᔨᒡ ᓂᓂᑎᐆᓂᔨᐤ᙮ 12 ᐋᒄ ᒫᒃ ᒥᓯᐙ ᐄᔨᔨᐅᒡ ᐋᑳ ᐙᐦᒋ ᑖᑆᐦᑎᐦᒡ ᑖᑆᐎᓂᔨᐤ, ᐊᐅᔅᑖ ᐋ ᒥᔻᔨᐦᑎᐦᒡ ᐋ ᒥᒑᑎᓰᔨᒡ, ᐋᐅᑯᓂᒡ ᐅᒌ ᒑ ᓂᔑᐎᓈᒋᒫᑭᓂᐎᒡ᙮

13 ᐄᑖᔨᐦᑖᑯᓐ ᒨᔥ ᒑ ᒌ ᓂᓈᔅᑯᒥᒋᐦᑦ ᒋᔖᒥᓂᑑ ᒌᔨᐙᐤ ᐅᐦᒋ, ᒌᔨᐙᐤ ᓃᒋᓵᓈᓂᒡ ᑳ ᓵᒋᐦᐄᑖᒄ ᑎᐹᔨᐦᒋᒑᓯᐤ᙮ ᐙᔥ ᔖᔥ ᒋᒌ ᐅᐙᔮᐱᒥᑯᐙᐤ ᒋᔖᒥᓂᑑ ᒑ ᒌ ᐱᒫᒋᐦᐅᐙᒄ ᒌᔨᐙᐤ ᓃᔥᑎᒻ, ᐙᔥ ᒋᑖᑆᐦᑎᓈᐙᐤ ᑖᑆᐎᓐ ᑭᔮᐦ ᑳ ᓲᐦᒑᔨᐦᑖᑯᓰᔨᒡ ᐅᑎᐦᒑᐦᒄ ᒋᑭ ᑐᑖᑯᔨᐙᐤ ᒑ ᒌ ᐱᔮᐦᒡ ᐱᒫᑎᓰᔮᒄ᙮ 14 ᒋᔖᒥᓂᑑ ᒋᒌ ᐅᐙᔮᐱᒥᑯᐙᐤ ᐆ ᒑ ᒌ ᐄᔑ ᐱᒫᑎᓰᔮᒄ ᐅᐦᒋ ᐋᓐ ᑳ ᐐᐦᑎᒫᑖᐦᒡ ᒥᔻᒋᒧᐎᓐ᙮ ᒋᒌ ᐅᐙᔮᐱᒥᑯᐙᐤ ᒑ ᒌ ᐃᔮᐙᒄ ᒋᑎᐹᔨᐦᒋᒑᓰᒥᓂᐤ ᒌᓴᔅ ᙭ ᐅᒋᔅᑖᔨᐦᑖᑯᓯᐎᓂᔨᐤ᙮ 15 ᐋᒄ ᒫᒃ ᓃᒋᔖᓂᑎᒄ, ᓲᐦᒃ ᓲᐦᒋᑳᐳᒄ ᒋᑖᑆᔮᔨᐦᑎᒧᐎᓂᐙᐦᒡ ᑭᔮᐦ ᒥᒫᒋᑯᓂᒧᒄ ᑖᓐ ᑳ ᐄᔑ ᒋᔅᑯᑎᒫᑖᐦᒡ ᑳ ᑭᒑᔅᒋᒥᑖᐦᒡ ᑭᔮᐦ ᑖᓐ ᑳ ᐄᔑ ᒥᓯᓂᐦᐋᒫᑖᐦᒡ᙮

16 ᒋᔖᒥᓂᑑ ᑰᐦᑖᐐᓂᐤ ᑭᔮᐦ ᒋᑎᐹᔨᐦᒋᒑᓰᒥᓂᐤ ᒌᓴᔅ ᙭ ᒋᓵᒋᐦᐄᑯᓂᐎᒡ ᑭᔮᐦ ᒋᒌ ᒥᔨᑯᓂᐎᒡ ᑳᒋᒡ ᒥᔻᔨᒧᐦᐄᐙᐎᓂᔨᐤ ᑭᔮᐦ ᐊᔅᐹᔨᒧᐎᓂᔨᐤ ᒥᔪᐦᑳᒑᐎᓂᒡ ᐅᐦᒋ᙮ 17 ᓂᓂᑐᑎᒧᐙᓈᓐ ᒑ ᒌ ᒥᔻᔨᒧᐦᐄᑖᑯᒡ ᒋᑖᐦᐄᐙᒡ ᑭᔮᐦ ᒑ ᒌ ᓲᐦᒋᑳᐳᐦᐄᑖᑯᒡ ᒥᓯᐙ ᑖᓐ ᐋ ᐄᔑ ᒥᔪᑐᑎᒫᒄ ᑭᔮᐦ ᑖᓐ ᐋ ᐄᔑ ᒥᔪ ᐊᔨᒥᔮᒄ᙮